المملوك الاخير
الجزء الثالث عشر
-صباح الخير يا منى
*صباح الخير يا عم عاطف
-اجيبلك حاجه تشربيها
*لو ممكن تجيبلى قهوه يبقى كتر خيرك
-بس كده ده انتى تؤمرى
*ربنا يخليك يا عم عاطف
-امال احمد فين
*مجاش النهارده سهران طول الليل مع حسن بيظبطوا العربيه
-ربنا يستر وميودوناش فى داهيه هما الاتنين
*هههههه ان شاء الله خير يا عم عاطف
-احمد ده اول ما جه مكنش نازلى من زور .. بس بصراحه طلع انسان محترم وكفايه وقفته معاكى فى موت والدك
*عندك حق يا عم عاطف ربنا يباركله
-انتى عارفه يا منى انك زى بنتى
*اكيد يا عم عاطف
-انا شايف احمد معجب بيكى وبصراحه شايفه سند ليكى يا بنتى
*ربنا يقدم الى فيه الخير
-طيب هروح اعملك القهوه
*متنساش الخال هيستناك بعد الشغل النهارده عشان تروحوا عند المدرسه
-اه ما انا فاكر متقلقيش يا منى
ذهب عم عاطف ليحضر القهوه
•ست الكل .. صباحك ورد
*استاذ عوض ! .. اهلا يا أستاذ عوض
•اهلاً بيكى يا استاذتنا
*غريبه اول مره يعنى حضرتك تيجى المكتب هنا
•انا عرفت ان ابو حميد اجازه يعنى .. قولت اعدى اشوفك يمكن محتاجه حاجه ولا حاجه .. وكمان افكرك اننا هنروح مسجد السلطان حسن اخر الاسبوع
*لا متقلقش انا فاكره كويس
•الا صحيح هو استاذ عوض مفتحكيش فى حاجه كده
*حاجه زى ايه
•يعنى موضوع كده كنت مكلمه عليه
*وانت ليه متكلمتش فيه علطول معايا
•يعنى انتى عارفه انا بعتبر استاذ فوزى ولى أمرنا
*طيب هبقى ارد على استاذ فوزى بقى
•امتى
*هو ايه الى امتى
•اقصد يعنى هتردى عليه امتى يا ست الكل
*فى اجتماع اولياء الامور الجاى ان شاء الله
•ايه .. اه .. طيب هستأذن انا
*مع السلامه ايا استاذ عوض
********************************
*ازيك يا خال
-اركب ياعم عاطف
*بسم الله .. ده ايه العربيه دى
-مالها يا عاطف
*ولا حاجه يا خال حاسسها مجهده شويه
-مجهده ! .. ايه يا عاطف انت زمان كانت اقصى احلامك تجيب عربيه بحمارين
*الله الله .. ايه يا عم عبده بالراحه العربيه زى الفل
-ايوه كده اظبط
*طيب يلا نتحرك ولا انزل ازق
-لا بتمشى لوحها يا خفيف
تحرك الخال بالسياره
*انت عارف المكان ؟
-اه عشر دقايق من هنا هنبفى هناك بس هنركن عن مسجد الرفاعى كده وهناخدها مشى
*حرام عليك انا راجل كبير مقدرش على المشى
-عشان تبقى تتريق على زوبه
*يا خال بهزر يا خال دى زوبه دى ست الكل
-ادينا وصلنا يلا يا عم انزل
*ادينى نزلت .. وعربيتك دى هتقفلها بالمفتاح ولا هتحطلها قفل
-تصدق انت راجل كبير وهايف
*بهزر معاك يا خال .. ايه ده الجمال ده
-دول جامعين السلطان حسن والرفاعى يا عاطف
*بس حاجه عظمه اوى يا خال
-طبعا يا عم عاطف السلطان حسن حاجه فخمه اوى والرفاعى كمان .. تعرف ان الملك فاروق و شاه ايران مدفونين تحته
*انت بتشتغلنى يا خال ..؟
-هشتغلك ليه يا عم
*هو مش الملك فاروق مشى من مصر وركب السفينه زى ما كنا بنشوف
-ايوه يا عاطف مشى من مصر بس لما مات جابوه دفنوه هنا
*فى الخير والله .
-تعرف انا نفسى بقى نظبط الاماكن الاثاريه دى
*اه نبعها دى تجبلنا دهب
-نبيع ايه يا كبير يا هايف انت
*الله امال يعنى ايه نظبطها
-عارف لما تروح تاكل طبق فول الراجل بيعملك ايه جنبه
*شوية طحينه وطبق مخلل وشوية بتنجان ولو عاوز يدلعنى هيحطلى شوية بطاطس وطعميتين
-هو ده .. لازم حوالين كل اثر يبقى فين اسواء وفنادق واضاء وحياه .. ندلع السياح زى بتاع الفول ما بيدلعك
*والله انت بتفهم يا خال .. المفروض يمسكوك وزارة الرى والاثار
-ايه علاقة الرى بالاثار يا عاطف
*هما مش وزاره واحده
-وهيبقوا وزاره واحده ازاى يا راجل يا خرفان انت
*عشان الى اعرفه انهم بيدورا ويحفروا فى الصحراء وهما وحظهم بقى يطلع ميه يطلع اثار
-اسكت يا عاطف
*ادينى سكت .. بس احنا مشينا كتير اوى يا خال
-اهو احنا بنتفرج على الجوامع والمدارس القديمه دى اثار .. منطقة الدرب الاحمر الى احنا فيها والمناطق الى حواليها كانوا اصل القاهره ايام المماليك والعثمانين
*وسموها ليه الدرب الاحمر .
-الناس بتقول ان لما حصلت مذبحة القلعه ان الدم غرق الطريق عشان كده سموه الطريق الاحمر او الدرب الاحمر
*وده حقيقى يا خال ؟
-معتقدش يا عم عاطف متهيقلى دى حكايه من حكاوى الناس والتاريخ مليان حاجات كده ..ادينا وصلنا اهو يا عاطف
*طيب عربيتك مكنتش تعرف تمشى الشويه دول بدل ما انت قطعت نفسنا ولا عربيتك بتتكسف
-احنا عاوزين نتعرف على المنطقه اكتر يا عاطف
*احنا كبار سن يا خال .. منك لله انت وابن اختك
-استنى ده فى قهوه فاتحه .. ايه رأيك نقعد عليها
*اه وحياة ابوك يا شيخ نقعد
-تعالى ..شد كرسى
