المملوك الاخير
الجزء العاشر
-اصحى يلا يا احمد قوم
*ايه يا بابا فى ايه
-هتفضل نايم كتير
*اه ما انا مش نازل
-طيب قول يا خفيف عشان امك عاوزه تدوقك
*تدوقنى ايه يا ابويا ما انا لسه دايق الفراخ المقرمشه قبل ما انام
-لا المره دى مش هتدوق بس
*امال هعمل ايه
-هتاكل بقى
*أكل ايه يا حاج انا سنانى وجعانى من وقت ما دوقت الفراخ المقرمشه دى .. بقولك ايه دوق انت
-ما انا دوقت .. وبعدين انت عاوز تضحى بيه يا ابن الكلب
*يا بابا انا مش هاكل فراخ تانى انا
-لا عملالك حاجه جديده
*عامله ايه يا بابا يعنى
-عامله لانشون
*لانشون ! .. يعنى جابت لحمه وعملت بيها لانشون .. والله حرام يا حاج كنا اشترينا لانشون جاهز وخلاص
-لحمه ايه يا اهبل انت مفهوش لحمه
*امال عملاه ازاى
-ازاى دى معرفهاش بس الى عرفته انها بتستعمل زيت ومش عارف جبنة ايه و الوان غذائيه
*طيب بقولك ايه ياحاج اعمل معروف انا مش هدوق البتاع ده .. بص دوق انت المره دى وانا هدوق المره الجايه
-يا ريت ينفع يا بنى .. انا عندى حساسيه من الالوان الغذائيه
*حساسيه من ايه؟! .. انت هتشتغلنى يا حاج
-اخرس يا كلب ازاى تقولى بشتغل والكلام ده
*آه ده انت متقمص الدور بقى
-بتبرطم بتقول ايه
*بص يا حاج انا مش هاكل من البتاع ده
-انت بتقولى انا قولها هى الكلمتين دول
*طيب بقولك ايه يا حاج متيجى نقنعها تغير مجال الطبخ ده .. احسن كده المعده هتخرب
-والله يا بنى حاولت وكانت هتقتنع بس انا رجعت قولتلها الاكل احسن كملى فيه
*ايه ! ايه يا حاج حرام عليك حرااام
-بس اسكت بطل تجعر .. هى كانت عاوزه تغير موضوع الاكل ده وبتقولك عاوز تساعد الناس ازاى تستخدم الاسعافات الاوليه .. وبتقولك فى البدايه هتعلم الناس تدى حقن ازاى
*حقن ! وهتعلمهم ازاى
-كانت بتفكر تجيب حقن ڤيتامينات وتجرب علينا
*يا نهار اسوووود
-وانا كبرت يا بنى مينفعش الناس تتفرج على اللامؤاخذه
*لا يا ابويا خليها فى الاكل ونضحى بالمعده عشان الجته تعيش
•بتعملوا ايه
-مفيش كنت بصحيه بس
•مش برتاحلكوا وانتوا قاعدين حاطين ودنكوا فى ودن بعض كده
*انتى المفروض تفرحى .. ليه عوزانا علاقتنا تبقى زى علاقة عبد الغفور البرعي وابنه فى لن أعيش فى جلباب ابى
•عبد الغفور البرعى .. بلا وكسه يا ريت ابوك كان نص عبد الغفور البرعى مكنش ده بقى حالنا
-وماله حالنا انتى مبتحمديش ربنا ابدا
•الحمد لله .. بس لازم يبقى عندك طموح
-سايبلك انتى الطموح
•هتشوف الى هعمله لما اشغل القناه
*ربنا معاكى يا حاجه .. لازم تشجعها بردو يا حاج
•طيب قوم يا احمد عشان تاكل
*ايه
قوم عشان تاكل
*ايه
•انت هتستعبط
*طيب هاكل ايه طيب
•قوم عملالك لانشون
*لانشون انتى عارفه مليش تقل على الحاجات دى
•ملكش ايه .. ما انت طول عمرك بتاكلها من الشارع .. قوم انا الى عملاله
*ما هو انا مليش نفس
•ملكش ايه ما انت طول عمرك بترمرم من الشارع زى الكلب ولما اعملهلك الاكل فى البيت تقولى مليش نفس
فيه .. قوم يا واد
*حاضر حاضر
-روح يا اخويا شجع
*انت اب انت
