الجزء السادس
•القهوه والنسكافيه يا أساتذه
-ايه ده احنا مطلبناش حاجه يا عم عاطف
•وانا هستناكوا لما تطلبوا يا أستاذ أحمد بردو احنا خلاص بقينا شركا
-يعنى انت امبارح بتقول انا الى هوديكوا فى داهيه وشكلك انت الى هتودينا فى داهيه يا عم عاطف
*خلاص بقى .. بقولك ايه يا عم عاطف ، انت عرفت المواعيد الجديده ؟
•لا لسه
*طيب ممكن تروح تعرفلنا المواعيد الجديده ايه
•حاضر يا أنسه منى
-خد يا عم عاطف انت هتاخد المشاريع معاك تانى ولا ايه
•لا مؤاخذه يا أستاذ احمد
-عم عاطف شكل موضوع الدهب ده خلاه بيكلم نفسه
*هههههه معذور أكيد فضل يحلم بحاجات كتير نفسه يحققها بعد ما حكيتله على الموضوع
-عندك حق .. بس انتى مالك يا منى شكلك مرهقه
*منمتش كويس
-ليه
*حاولت ادور فى المراجع القديمه وشوفت كام خريطه تبع العصر ده
-ولقيتى أيه لقيت ان كلهم بيبتدوا بنفس النقطه بس بردو مقدرتش اوصل للنقطه دى
-انتى قولتى ان بشكل كبير النقطه دى اكيد بتعبر عن حاجه مشهوره او معروفه كويس وليها أهميه كبيره
*اه أكيد بس الاماكن المشهوره او المعروفه كتير فى القاهره
-يعنى زى ايه مثلاً ..؟
*اممم زى الجامع الازهر مثلاً او باب زويله القاهره مليانه اماكن مهمه مسجد عمرو بن العاص
-اه بس النقطه دى لازم يكون مكان مهم جدا بالنسبه للمماليك
*اه طبعا
-وهو مكان واحد الى كان المماليك بتطمع فيه ونهايتهم كانت فيه
*انت تقصد القلعه ..؟
-اه
*انا ازاى مفكرتش فيها دى
-عشان مش فى عبقريتى
*هههههه ماشى يا اينشتاين
-طيب هنتأكد ازاى
*لازم ارجع تانى للخرائط القديمه واحط القلعه بدايه النقطه واشوف الخرايط كده هتبقى واضحه ولا ايه
•يا أساتذه انا عرفت المواعيد
-ايه يا عم عاطف قول
•هنشتغل من8 ونخلص 12 الظهر
-طيب كويس جداً نتقابل الساعه 4 فى سطح حسن
*هو احنا هنتقابل كتير الفتره الجايه كلنا
-اه اكيد
*ماشى
•انتى قلقانه انك كل يوم تتأخرى يا منى يا بنتى ..؟
*اه يا عم عاطف
•يبقى النهارده نفكر هتقولى لبابا ايه
-يبقى اتفقنا هنتقابل الساعه 4
***************************
الخال : منى و عم عاطف لسه مجوش يعنى يا أحمد
احمد : زمانهم جايين يا خال
حسن : القهوه يا خال
الخال : تصدق ابتديت احبك يا حسن
حسن : احنا كل الى يهمنا رضاك يا خال .. مش عارف انت عاوز منى ايه انت وابن اختك
الخال : بتقول حاجه يا حسن
حسن : بقول منورين يا خال
الخال: على فكره يا أحمد فكره ان القلعه تكون نقطة البدايه فى الخريطه دى فكره منطقيه جدا
احمد : منى كمان قالت كده يا خال
منى : سلاموا عليكم
احمد : أهلاً يا منى
الخال : حمد الله على السلامه يا منى يا بنتى .. أهلاً يا عم عاطف
عم عاطف : أهلاً بيك يا خال
الخال : قوم يا حسن اعملهم كوبايتين شاى
حسن : انت ليه بتعاملنى على انى شغاله فلبينيه كده يا خال
الخال : انت الى محسسنا اننا قاعدين فى الهيلتون
احمد : المهم يا منى عملتى ايه
منى : انا رجعت للكتب التاريخيه وشوية مراجع فى العصر ده فيها خرايط وحاولت اخلى القلعه نقطة بدايه اكل خريطه وفعلاً كانت مناسبه جداً فى كل الخرايط
احمد : طيب وحطيتى القلعه نقطة بدايه فى الخريطه بتاعتنا ..؟
منى : اه طبعاً
حسن : طيب وده وصلك لإيه يا منى
منى : لما حطيت القلعة نقطة بداية فى الخريطة وضح ان المكان المقصود فى الخريطه هو بيت السحيمى
عم عاطف : فين بيت السحيمى ده
منى : بيت السحيمى ده موجود فى الدرب الاصفر فى الجماليه فى شارع المعز .. ويعتبر من اجمل البيوت الآثرية فى القاهرة .. البيت فيه اكتر من مبنى وحديقه والمبانى مليانه بالمشربيات ، والبيت ده صدر له قرار فى سنة 2000 انه يتحول مركز ثقافى .. والبيت مقسوم قسمين قسم جنوبى انشأه الشيخ عبد الوهاب الطبلاوى وقسم شمالى أنشأه الحاج اسماعيل شلبى واتسمى بيت السحيمى نسبه للحاج أمين السحيمى شيخ رواق الاتراك بالازهر وكان اخر من سكنه
الخال : انتى عبقريه يا منى يا بنتى فى شرحك
منى : تسلم يا خال .. كمان الخريطه فيها جزء فى وصف للبيت الى فيه الخريطه ومتهيقلى الوصف متطابق مع بيت السحيمى خصوصاً القسم الجنوبى
احمد : طيب عندى سؤال
منى : اتفضل يا أحمد
أحمد : هل أمين بك سكن فى بيت السحيمى
منى : الحقيقه لا أمين بك عمره ما سكن فى بيت السحيمى
حسن : طيب ازاى الخريطه تبقى موجوده هناك اذا كان أمين بك نفسه عمره ما سكن هناك
منى : متهيقلى دى مش مشكله اوى .. ممكن امين بك يكون راح فى زياره لأحد الشيوخ الى سكنوا البيت وساب الخريطه على سبيل الأمانه
احمد : طيب والخريطه الى معانا بتحدد الخريطه التانيه دى موجوده فين بالظبط ..؟
منى : اه محدده قاعه من قاعات الضيوف
الخال : طيب واحنا ممكن ندخل البيت ده يا منى يا بنتى
منى : البيت كان بيفتح فتره صباحيه فقط وكان دخوله برسوم رمزيه لكن حالياً بسبب الكرونا البيت مقفول
عم عاطف : مقفول ..! ده ايه الحظ الهباب ده
احمد : طيب ازاى ندخل البيت ده يا منى
منى : اهو ده بقى معرفوش
حسن : يعنى ايه هنستنى اما موضوع الكرونا ده يخلص ..!؟
احمد : احنا مش عارفين موضوع الكرونا ده هيستمر شهر ولا شهرين ولا سنه ولا سنتين
حسن : طيب ايه الحل
الخال: انا عندى حل بس مش عارف هينفع ولا لا
احمد : قول يا خال
الخال : دلوقتى انتوا بتعملوا ايه فى الشغل
احمد : ولا حاجه
الخال : طيب دى فرصه انكوا تطلبوا من مدير المتحف ان هو يسهلكم تدخلوا بيت السحيمى وتصوروا البيت من جوه وتعرضوا ده فى المتحف
احمد : ايه الفكره الغريبه دى يا خال
منى : مش غريبه ولا حاجه احنا بنشتغل فى متحف فن اسلامى و بيت السحيمى وغيره من البيوت تابعين للعصور الاسلاميه والفكره دى هتربط كتير من الآثار الاسلاميه ببعض وممكن يتعمل فى المتحف كتالوج بكل المعالم الاسلاميه .. فكره كويسه جدا وكمان انت ممكن تستخدم الصور والفديوهات الى ممكن نصورها فى الموقع وده هيبقى داخل فى اختصاص شغلك
احمد : خلاص من بكره نقعد مع مدير المتحف ونتكلم معاه
عم عاطف : لا مينفعش
احمد : ليه
عم عاطف لازم نستنى شويه عشان يبقى طبيعى طلبكوا ده انكوا زهقتوا من قلة الشغل نستنى اسبوع او اكتر .. كمان مش هينفع انت موظف جديد وتتكلم معاه فى كده متهيقلى منى هى الى تطلب منه
حسن : ايه ده يا عم عاطف ده انت دماغك متكلفه
احمد : حلو اوى حاسس اننا ماشيين فى الطريق الصحيح
*******************************
•هتشربوا ايه ؟
*صباح الخير يا عم عاطف
•صباح النور يا أنسه منى
-انت جى بنفسك كده تسألنا هنشرب ايه يا عم عاطف من غير ما يطلب
•على الله يطمر
-ليه يا عم عاطف ليه .. ليه تعمل الحاجه الحلوه وترجع تدلق عليها تراب
•المره الجايه هحطلك عليها سكر
-هات قهوه مظبوط يا عم عاطف
•والقمر هيشرب ايه
*هههههه نسكافيه يا عم عاطف
•دقيقه وتكون المشاريب جاهزه
