الجزء الخامس
*ايه يا عم احمد جايبنى مقعدنى على قهوه ليه
-عادى يا خال وحشتنى قولت نقعد مع بعض شويه ونشرب كوبايتين قهوه مع بعض
*و القهوه دى مينفعش كنا نشربها فى البيت عندكوا
-لا كنت عاوزك فى موضوع مش هينفع نتكلم فيه فى البيت قولت اجيبك نقعد على القهوه وناخد لنا جنب كده ونتكلم
*وايه بقى الموضوع الى كنت عاوزنى فيه .. شكلك عاوز تجوز ومحسن مش راضى
-ايه جو الافلام الابيض وأسود ده يا خال
*امال عاوز ايه مزنوق فى قرشين
-بقولك ايه يا خال هو انت مينفعش تصبر لما اقولك انا لازم تسبق الاحداث يعنى
*خلاص قول
-شوفت فيلم جزيرة الشيطان بتاع عادل امام
*اه
-انا بقى عاوزك فى مشوار شبه ده كده
*ايه لقيت جزيره عليها كنز
-حاجه زى كده
*وطبعا انت متخيل ان انا بيبرس وانا الى هصرف على المشوار ده
-هو انا مفكرتش كده بس هى فكره حلوه بردو
*طيب وضح بقى ايه القصه عشان افهم
-بص يا خال بالمختصر المفيد لما شغلتنى فى المتحف شوفت هناك من المعروضات خريطه .. الخريطه دى بتوصل لخريطه تانيه بتوصل لكنز
*كنز ايه ده
-بيتقال ان وقت الحمله الفرنسيه المماليك جمعوا اموالهم وحطوها فى مكان ودى بقى الخريطه الى هتوصلنا لمكان الكنز ده
*بس الى انت بتقوله ده معناه ان لو ملقناش حاجه هتبقى ضيعنا وقتنا على الفاضى ولو لقينا حاجه واتمسكنا هنتشلوح
-انت بردو هتقولى آثار .. يا عم ده دهب ناس شالت فلوسها واحنا هندور عليها .. تانى حاجه موضوع تضيع الوقت ده انت فاكر نفسك رجل اعمال يا خال
*يا بنى انا راجل كبير مش حمل بهدله
-خلاص يا خال انا هدور لوحدى بس خليك فاكر انى وقت ما احتجتلك موقفتش معايا وان لو حصلى حاجه ذنبى فى رقبتك
*طيب خلاص هبقى معاك ولو حصلى حاجه انا هيبقى ذنبى انا الى فى رقبتك
-متقلقش يا خال لو روحنا فى داهيه فأنا الى هسبقك عل الداهيه دى
*ربنا يبشرك بالخير .. المهم بقى اشرحلى موضوع الخريطه بالتفصيل
-ماشى هقولك انا ...
**************************
-سلاموا عليكوا
*وعليكم السلام يا منى
-بتعملى ايه
*مفيش قاعده على الموبايل شويه .. وشويه وهقوم اذاكر او احتمال اسهر بالليل اذاكر شويه
-ليه مش هتنامى بدرى عشان المدرسه
*بكره اجازه عشان موضوع الكرونا الجديد ده بيقولوا احتمال ناخد اجازه الفتره الجايه .. انتى عندك فى الشغل مخدتيش أجازه ؟
-مش عارفه لسه محدش قالنا حاجه لحد دلوقت
*اكيد هيقولوا عشان الموضوع خطر
-ربنا يستر
*المشكله انا خايفه لان بيقولوا الموضوع ده خطر على كبار السن وبابا مش هيستحمله
-متخوفنيش بقى ان شاء الله خير
*ربنا يستر يا منى
-هو بابا فين
*اتغدى ونام بس شكله تعبان شويه
-مش عارفه أعمل ايه .. ان شاء الله نوفر الفلوس ونعمل العمليه
*المشكله الفتره الى جايه دى ممكن يوقفوا الحجز فى المستشفيات والعمليات
-ليه يعنى
*عشان موضوع الكرونا ده زى ما بقولك يا منى هيخافوا من العدوى
-مش عارفه الدنيا بتتعقد ليه .. انا تعبت يا مريم والله
*حاسه بيكى يا منى وعارفه انك تعبانه بس ان شاء الله كل حاجه هتتحل
-انا هدها اوضتى اريح شويه يا مريم
*ماشى يا حبيبتى
