المملوك الآخير
•اصحى بقى يا احمد هتفضل نايم لحد أمتى
-فى أيه يا أمى عوزانى اصحى ليه ورايا الديوان يعنى
•لا مش الديوان ده خالك بره بيقول انه جايبلك شغل
-يا فتاح يا عليم يا رزاق يا كريم فى الأخر هيطلع جايبلى فرد أمن
خرج احمد من غرفة النوم ليجد خاله يجلس فى الصاله
*يا بنى كفياك سهر طول الليل ونوم طول النهار بقى
-بص يا خال انا كائن ليلى تقدر تسمينى خفاش
*لا ما انا عاوزك تغير نظام حياتك ده وتعيش زى الخلق يعنى تبطل تبقى خفاش وتخليك ديك
-ديك ..! انت عاوز ايه يا خال ايه الشغل الى انت جايبه انا خايف يكون فرد أمن زى كل مره
*قال يعنى انت فلحت فيها أوى ما انت قافشينك بتصتبح أخر مره ومشوك
-ما انا قاعد طول الليل مبعملش حاجه قولت اشرب سيجاره على الماشى تخلى الصبر يطول والقاعده تجيب مفعول
*تقوم تشرب السيجاره قصاد كاميرا المراقبه
-مهو كان أول يوم ومخدتش بالى بقى
*ما علينا عشان لما بفتكر ضغطى بيعلى .. المرادى جايبلك شغل حكومه هعينك يعنى الساعه تلاته تكون مروح البيت
-بجد والنبى يا خال
*اه وحياة خالك بس دى لو اتقفشت فيها هتبيت فى القسم
-مش هصطبح فى الشغل يا خال هبقى اصطبح لما أروح .. أيه بقى الشغلانه
*عارف متحف الفن الاسلامى
-ده فين ده يا خال
*يا بنى الى قصاد مديرية أمن القاهره
-مديرية أمن القاهرة ..! أنت عاوز تسلمنى يا خال
*يا أبنى متخلنيش أسبلك واسب لأمك وأقوم أمشى
-خلاص يا خال بهزر معاك يا عم
*متحف الفن الاسلامى الى فى باب الخلق
-تمام ماله بقى
*هو الشغل فيه
-هشتغل فيه ايه بقى تمثال ؟
*يا عم بالله عليك ما تقرفنى عشان انا مش ناقصك
-معلش يا خال اصل امبارح كنت مصطبح وكنت بتفرج على فيلم الحرب العالميه التالته واتخيلت التماثيل بتتحرك وكده وانا بخاف
*مفيش زفت تماثيل هناك
-أيه ده متحف مفهوش تماثيل
*اه وحياة امك ما فيه
-طيب هشتغل ايه
*هتبقى مسئول عن الموقع و هتنزل صور للمتحف وهتقطع تذاكر عن طريق الانترنت للزوار
-حلوه الشغلانه دى
*بكره تروح تستلم الشغل
-بس انت عرفت تجيب الشغلانه دى ازاى
*ده واحد صاحبى من زمان قابلته واكتشفت انه شغال فى وزارة الاثار من زمان والراجل كان عاوز يدى ابنه درس فى العربى فقولتله عليك لقيته عينك علطول
-صحيح هو انت ليه يا خال مشغلتنيش معاك
*أشغلك معايا أيه إن شاء الله
-يعنى كنت ظبطلك مواعيد الدروس مسكتلك الفلوس كده
*لا مبحبش حد يشتغل معايا
-لا انت خايف ابص على فلوسك يا خال .. انا عارف انك مليونير يا خال بس انت عوض
*عوض ..! ايه عوض دى
-عوض يا خال فريد شوقى فى البخيل وأنا
*تصدق بالله انت أمك معرفتش تربيك
*******************************
فى اليوم التانى لبست احسن لبس عندى وطلبت أوبر وروحت على متحف الفن الاسلامى .. روحت المتحف وطلبت أقابل مدير المتحف ، وبالفعل اخدنى احد السعاه الى مكتب مدير المتحف ، كان شعره مليان بالشعيرات البيضه رفيع اكل الدهر عليه وشرب كان متجاوز الخمسين من العمر .. دخلت مكتب مدير المتحف
