فيـنـوس ♥♒ (مكـتمـلة )

الحـلقـة الرابـعة عشـر ....❤️

طلعت جهان من غرفتها .....نزلت للدور الارضي لقت مريم ف المطبخ
خشت للمطبخ وهي تبرم
مريم : تبي حاجه انسه جهان
جهان هزت راسها بمعني لا وقالت : مكسده بس
مريم استغربت لانه جهان مش من عوايدها تطلع من دارها
مريم وقفت ع الحوض تغسل ف شوية اماعين وقالت : باهي قعمزي احكيلي ع صاحبتك الجديده شن اسمها وكيف تعرفتي عليها
جهان توترت وقعدت تلعب بطرف التيشرت امتاعها وقالت : تعرفت عليها ف الجامعه
مريم هزت راسها وهي مبتسمه وقالت : باه
جهان تحاول ماتشوفش لعيون مريم : اسمها....ااء اسمها أ...ألاء
مريم هزت راسها : باه ماشاء الله ....وشن اديري انتي وياها لما تمشيلها وشنو وضع هلها وكم عندها خوت وخوات
جهان لما حست انها حيبان عليها التوتر ومش حتعرف تكذب قررت انها تهرب وقالت : نبي نعدي نقرأ
مريم هزت راسها وكلها استغراب من حركات جهان اللي قعدت غريبه !
طلعت جهان من المطبخ وركبت بسرعه لدارها
خشت للدار لقت نقالها يرن شافت المتصل وكان "أدم "
ردت قبل ما المكالمه تفصل : الو
أدم :اهلا
جهان ابتسمت : اهلين
أدم : شن الامور
جهان قعمزت ع سريرها : كويسه وانت
أدم : الجو مزفت بدونك
جهان ابتسمت وسكتت
أدم : بجديات امتا بتجي؟!
جهان وقفت تعدل ف شعرها ع المرايا وقالت : مش حنقدر اليوم
أدم بنبره جديه : وليش ؟!
جهان : مش عارفه حسيت انه مريم شاكه فيه وانا قعدت انخاف انجي
أدم عقد حواجبه : تخافي ...به به تمام
جهان قالت بخوف : زعلت ؟!
أدم بنرفزه : لا
جهان ضحكت : باه كويس
أدم ضحك : باه باه ياجهان ....يعني ماتبيش اتجي
زادت ضحكت جهان وقالت : اها مش جايه
أدم ابتسم : به هيا درقي وجهك معناته.... وصكر عليها الخط
وخلا جهان تضحك ....وقدمت ع المكتب امتاعها خذت كتاباتها وقررت انها تنزل ولاول مره تقرأ ف الحديقه
ــــــــــــــــــــــــــــــــ

الساعه 4:30 م ✨
رضا قاعد ف داره ومركز بكل حواسه ع باب الحوش
دقائق 🕑
و دق الباب ✊🏻
قعد رضا يستنى شويه وبعدها طلع سمع صوت صابره(بنت جيرانهم)
تأفأف ورد لداره لانه ماكانش هضا اللي ف باله
قعمز ع نقاله وهو يفكر .....وبينه وبين نفسه يقول شن الافكار الغبيه اللي كنت تفكر فيهن يارضا
وهو غارق ف تفكيره دق باب داره
رضا : خش
خشت نسيبه وضحكت : دقيت الباب المره هذي شن رايك!
رضا ابتسم وعيونه ف النقال : كويس ....بدأ يصير منك وتقعدي بني أدمه
نسيبه شقلبت عيونها بضحكه وقالت : باهي تعال للمطبخ الحوض اصكر
رضا عزق نقاله وناض وهو يتأفأف : تي شن اتحطي فيه انتي .... ستين الف مره يصكر ف اليوم
نسيبه طلعت وراه من الدار وهي تقول : مش مني من الخدامه
وخشوا رضا ونسيبه للمطبخ ....وبدأ رضا يدير ف الحوض ولبز الدنيا لانه مايعرفش يدير ولاا حاجه ف الحوش ، وعبوا المطبخ اميه وزادت حالة الحوض تأزمت 😂
نسيبه قعمزت ع الكرسي وهي تضحك : خلاص خلاص تو نقول لبابا يكلم حد يجي يصلحه
رضا وهو يشوف للحوض : يكون احسن والله ....لانه انا حرت فيه
نسيبه ضحكت ع رضا بهزوه وقالت : علي اساس
رضا خبطها ع راسها : عدي بسرعه جيبيلي دبش والمنشف خلي اندوش ف حمام الممر مش حنقدر نخش لداري هكي
نسيبه شافت لدبشه المبلول ضحكت وطلعت من المطبخ عشان ادير اللي قاللها عليه
بعد نص ساعه 🕕
طلع رضا من الحمام اللي ف جنب الصالون....يسمع ف صوت حد يوشوش
عقد حواجبه وقرب من الصالون وهو يسمع
ام رضا : مش عارفه انا رضا مش كيف قبل ...وحتى معش يطلع واجد وباين عليه مضايق شكله سيبها
صابره : انا من يوم اللي تلاقيت انا وياها وقتلها انه رضا يكلم ف بنات غيرك وهكي معش شفتها بعدها ف الجامعه....مش عاارفه شن صار
ام رضا كيف بتحكي شافت رضا اللي خش عليهن ووجهه مايتفسرش
صابره برمت وشافت وين ماتشوف ام رضا ،وخافت لما شافت رضا الواقف قدام الباب وساكت
ام رضا بتوتر : رضا تبي حـ.......
هي مازالت ماكملت كلامها وخش رضا والشر يطاير من عيونه جبد صابره من يدها وقعد يدف فيها لعند لزها من الحوش ....وهددها بأنه يقول لخوتها ع اللي داراته وهي تجدا فيه وامه تجري وراه وتحاول تحامي ع صابره اللي دفها رضا للشارع وسكر الباب بقوه وبرم علي امه اللي حاولت تقرب منه
رضا دفها وهو يعيط : انتتتتييي شننننننو ....عليييييش هضضااااا كلللله بس نببي نففففقهم اناااا
امه قدمت وهي تقول : انا امك نعرف مصلحتك ونحبك اكثر من اي حد
رضا هز راسه بمعني لا وعيونه مدمعات وقال بصوت مليان كسره : انتي مستحيل تكوني اتحبيني مافيش ام ادير لعيالها هكي مافيش ....انتي ادوري ع مصلحتك وبس
وهو ماشي لداره جت عينه ع نسيبه ونوره اللي واقفات قدام دارهن ويبكن
خش رضا لداره وبدأ يلم في دبشه بعشوائيه وهو يخبط بغل
خشت عليه نسيبه وهي تبكي : انا مش حنمنعك المره هذي من انك تمشي بس رضا اناا نحبك ونبيك امعايه
رضا قدم عليها وخذاها ف حضنه وقال : ماتخافيش حنجيك ف الجامعه ولا انتلاقوا ف اي مكان بره بس انا الحوش هضا مستحيل مازال نقعد فيه ولا نخشله مستحيل
نسيبه مسحت دموعها : تمام
رضا باسها ع راسها : اي حاجه اتصير تحتاجي اي حاجه طول كلميني
نسيبه هزت راسها وطلعت وخلت رضا غير ملابسه وخذا حاجاته وطلع
وامه تشوفله من الصالون تبكي
طلع رضا بسيارته وهو يفكر واول شي خطر ف باله مها ♥
قرر انه يمشيلها ويحكيلها اللي صار امعاه ويصالحوا ويفتحوا صفحه جديده ويشري حوش بالفلوس اللي عنده يستقر فيه ، وبعدها يعرض ع مها الزواج ويجوز بدون موافقة وعلم امه
ــــــــــــــــــــــــــــــ
الساعه 5:00م🌾

رويدا مقعمزه ف الصالون عشان مها راقده ف الدار وماتبيش تزعجها ....تحكي مع أدم وتشرب ف قهوتها
سمعت جرس الباب 🎶
استغربت وسكرت من أدم عشان تمشي تفتح
وتفاجأة لما فتحت الباب ولقت رضا
رويدا رفعت حواجبها وهي مستغربه وقالت : رضا !
رضا بترجي : رويدا كلمي مها ....لازم نحكي امعاها
رويدا سكتت وهي مش عارفه شن تقول
رضا حس بيها بترفض قال : موضوع مهم يارويدا ....ماتقوليش لا
رويدا تنهدت : تمام خش
خش رضا وصبا ف السقيفه ، ورويدا سكرت الباب وقالت : مها راقده انوضها وانشوفها لو تبي تطلعلك
رضا هز راسه وهو ساكت
خشت رويدا للدار خذت نفس وولعت الضي وقالت : مهاا
مها ماناضتش ولا تحركت
رويدا قربت منها : مها نوضي نبيك ف حاجه ضروريه
مها.... لارد
رويدا حولت من عليها الغطاء ودفتها مع كتفها لانها كانت راقده ع جنبها ودايره وجهها للساس
وقالت: مها نوضي
مها ماتحركتش ...وهنا رويدا خافت لانه مها نومها مش ثقيل ومفروض ناضت
قعمزت رويدا ع طرف السرير وعاودت هزت مها مع كتفها
طاحت مها اللي كانت مرخيه ع رويدا ....ورويدا اول ماشافت وجهها الاصفر وفمها الابيض وكيف غايبه عن الوعي عيطت بعلو صوتها
رضا اللي كان ماشي جاي ف السقيفه بتوتر ....اول ماسمع عياط رويدا خشلها يجري وعرف انه مها صارتلها حاجه
وصل للدار وخش بسرعه ....شاف مها كيف راقده ع السرير وملامحها الباهته قرب بسرعه وخذاها ف حضنه وهو يخبط ع وجهها ويحاول يوعيها
رويدا سمعت صوت عياط جدة مها اللي تسأل شن فيه لانها ماتقدرش اتحرك من سريرها بروحها ....مشتلها تجري وحاولت اطمنها وقالتلها انه مها مريضه شويه وحنشيلها للمستشفى
وردت بسرعه للدار لقت رضا طالع بمها لحقاته وطاروا للمستشفى
اول ماوصلوا خذوها الاسعاف من رضا
وقعدوا رويدا ورضا واقفين ف الممر
رويدا تبكي وتخبط ع وجهها : ياربي مايصيرلها شي ياربي ماعنديش غيرها وقربت من رضا وهي تبكي ....رضا مها ماتت ؟
رضا هز راسه بمعني لا ودموعه نزلوا : لالا ....مستحيل لا
دقائق 🕑
وطلع الدكتور وعلامات الأسى والحزن ع وجهه
رضا ورويدا قربوا منه بسرعه
الدكتور :.........
#يتبع ♥