ဗီလိန်ကို မရည်ရွယ်ဘဲဆွဲဆောင်မိသွားပြီ (Completed)

Chapter-39

Unicode Version

ယှဥ်ပြိုင်မှုတိုင်းမှာ အဆုံးသတ်သို့မရောက်သေးခင်အထိ အောင်နိုင်ခြင်းနှင့်ကျရှုံးခြင်းဟာ တစ်လှည့်စီဖြစ်ပေါ်တတ်လေရာ ပိုင်စိုးမိုးသူနှင့် စွမ်းစေတမာန်၏ထိပ်တိုက်ရင်ဆိုင်မှုသည်လည်း ထိုနည်းလည်းကောင်းပင်။

အသာစီးရလိုက်၊ ပြန်နစ်နာရလိုက်နှင့် လုံးလည်ချာလည်လိုက်နေကြရင်း အဆုံးသတ်မှာ ကိုယ့်ဘက်ကအသာစီးရဖို့အတွက် အားတင်းထားကြရသည်။

ပိုင်စိုးမိုးသူအဖို့တော့ ကုမ္ပဏီတွင်းမှာလည်း ရှယ်ယာရှင်တချို့၏ထောက်ခံမှုဖြင့် နေရာတစ်နေရာကို တစ်စတစ်စဖြင့် မသိမသာကုပ်တွယ်ရင်း ဆက်ခံသူနေရာအား သူသာရထိုက်ကြောင်း သက်သေပြသည့်အနေနှင့် အလုပ်တွေအများကြီးဖိလုပ်နေရသည်။

အလုပ်တစ်ဖက် မိသားစုအရေးတစ်ဖက်ဖြင့် ဖိအားများနေသောသူ့ဘဝမှာ အပန်းဖြေရာဟူ၍လုံးဝမရှိ။ ပုံမှန်ဆိုလျှင် ထိုမျှသောဖိအားတွေဟာ သူ့အတွက် ဖြုံလောက်စရာမရှိသော်ငြား စွမ်းစေတမာန်၏မိခင်ထံမှခြိမ်းခြောက်ခံရပြီးကတည်းက ဆတ်ဆတ်ထိမခံဖြစ်နေသောသူသည် နေ့ရက်တိုင်းကိုလည်း သူ့အမေနှင့်စကားများရန်ဖြစ်ကြရင်း ကုန်ဆုံးနေရပြန်သည်။

အဖက်ဖက်ကဖိအားတို့သည် သူ့အား ယခင်ကထက်ပို၍အရိုင်းအစိုင်းဆန်လာစေသည်။ လက်စားချေခြင်းအမှု၌ အရူးအမူးဖြစ်လာစေ၏။ အမြဲလိုလိုထိန်းသိမ်းရခက်သောဒေါသကလည်း ပေါက်ကွဲဖို့ ပိုလွယ်ကူလာသည်။

သူ၏သည်းခံနိုင်စွမ်းများကို ကုန်ဆုံးသွားစေသောကိစ္စမှာကား စွမ်းစေတမာန်၏အဖေဆိုလည်းဟုတ်၊ သူ့အဖေဆိုလည်းဟုတ်သော ဦးစွမ်းဝေယံထက်က သူမသိအောင် သူ့အမေနှင့်ဆက်သွယ်ဖို့ကြိုးစားနေသည်ကို သိလိုက်ရခြင်းပင်။

တွေ့ကြဖို့ဆိုသည်မှာလည်း စွမ်းစေတမာန်၏ကောင်းကျိုးအတွက်သာ ဖြစ်နေပြန်၏။ ပိုင်စိုးမိုးသူမှာ စိတ်တိုရလွန်း၍ တစ်လောကလုံးကိုလှောင်ရယ်ဖို့ပင် မတတ်နိုင်တော့။ ရှိရှိသမျှလူတိုင်းကို စိတ်ကုန်စိတ်ပျက်ရလွန်း၍လည်း သူ့မှာ မောလှပြီ။