ထိုသို့ တွေးရင်းပျော်ရင်းနှင့်ပင် သူ့အပေါ်ဖြာကျသော နေရောင်ကလေးကလည်း ပိုနွေးလာသည်။ ဧကသူသည်လည်း သူ၏ဆံပင်ကို စိတ်လှုပ်ရှားစွာဖြင့် အလျင်အမြန်ပြင်ဆင်လိုက်ပြီး မင်းသားပီယံရှိမည့်နေရာဆီ ထွက်ခွာလာခဲ့သည်။
မနက်ခင်းပွဲတော်စာအတူတည်ခင်းမည့် ယာယီတဲနန်းဆောင်သို့ ဧကသူ ရောက်ရှိလာသည်။ ထိုအချိန်တွင် သူ၏စိတ်ကူးအိပ်မက်ကလေး အနည်းငယ်ထိခိုက်ခံလိုက်ရသည်။
သူထင်ထားသည်က သူနှင့်ပီယံမိတ်နှစ်ဦးတည်း မနက်စာစားကြမည်ပေါ့လေ။
အခုတော့ ပီယံမိတ်၏မျက်နှာချင်းဆိုင်တွင် ပင်လယ်ပြာရောင်ဝတ်စုံဝတ်ထားသော အမျိုးသမီးတစ်ဦးပါ ထိုင်နေသည်။
ထိုအမျိုးသမီးနှင့်ပီယံသည် စကားပြောဆိုနေကြ၏။ စကားပြောဆိုနေကြသည်ဟုဆိုသော်လည်း တကယ်တမ်း အမျိုးသမီးကသာ တရစပ်ပြောနေခြင်းဖြစ်ပြီး ပီယံမိတ်က ပြုံး၍ဖြစ်စေ၊ ခေါင်းညိတ်၍ဖြစ်စေ စိတ်ဝင်တစားနားထောင်နေသည်။
ပီယံမိတ်သည် နူးညံ့စွာပြုံးနေ၏။ သူနှင့်တွေ့ခဲ့သည့် တစ်နေ့ကအတိုင်းပါပင်။ ဧကသူ၏စိတ်ထဲတွင် အနည်းငယ်တော့ အုံ့မှိုင်းသွားရသည်။
မင်းသားပီယံမှာ သူ့ကိုချည်းကွက်ပြုံးပြနေသည်မဟုတ်ဘဲ ပင်ကိုစရိုက်ကိုက တစ်လောကလုံးရှိ သက်ရှိသတ္တဝါအားလုံးကို နူးညံ့ကြင်နာစွာ ဆက်ဆံတတ်ပုံရသည်။ သတ္တဝါအားလုံးကိုလည်း သူ၏စွဲမက်ဖွယ်ရာအပြုံးကို ဖောဖောသီသီပေးအပ်နေပုံပေါ်သည်။
နေရောင်ခြည်က သူတစ်ဦးတည်းကို ကွက်နွေးစေသည်မှ မဟုတ်ဘဲ။ တွေ့သမျှသူတိုင်းအတွက် နွေဦး၏နေရောင်ခြည်ကလေးဖြစ်နေသော ပ်ီယံမှာ သတ္တဝါအားလုံးအပေါ် ညီတူညီမျှ နွေးထွေးနေစေသည်။
ဧကသူသည် သူ၏အခွင့်ထူးခံဖြစ်နေသည်ဟူသော ခံစားချက်များ တစ်စစီပြိုပျက်သွားကာ အဘယ်ကြောင့် တစ်နေ့ကမှတွေ့သည့် ပီယံမိတ်က သူ့ကိုပဲ ထူးထူးခြားခြားဆက်ဆံပေးပါမည်နည်း၊ သူကရော အဘယ်ကြောင့် ထိုသို့တွေးထင်ရပါသနည်းဟု တစ်ကိုယ်တည်း ရှက်ရွံ့စွာ ညည်းညူလိုက်မိသည်။ ထို့နောက် သူ၏ရှက်စိတ်များကို အသာသိမ်းဆည်းရင်း ယာယီတဲနန်းအတွင်းသို့ ဝင်ရောက်သွားသည်။
YOU ARE READING
The Everlasting One (volume 2 + 3 )
FantasyStart Date : 24.11.2021 End Date : 1.4.2024 Unicode ဥတ္တရနိုင်ငံရဲ့ မင်းသားအရုဏဟာ သူ့ချစ်သူ ယုဂန်နိုင်နဲ့အတူ ပျော်ပျော်ရွှင်ရွှင်နေထိုင်သွားဖို့ပဲ ဆန္ဒရှိခဲ့တယ်။ ဒါပေမဲ့ မထင်မှတ်ထားတဲ့အရာတွေ သူတို့နှစ်ဦးဆီ ရောက်ရှိလာတဲ့အခါ.... ယုဂန်ကိုလက်တွဲပြီး သူက...
Chapter : 120
Start from the beginning