Rewrite The Stars

♡01♡

UNICODE

ဟိုးလွန်ခဲ့သော နှစ်‌ပေါင်းတစ်ထောင်ခန့်က တောင်တန်းတွေနဲ့ပင်လယ်ကြီးကဝန်းရံထားတဲ့ ရှီလာဆိုတဲ့တိုင်းပြည်တစ်ပြည်ရှိခဲ့တယ်။ အဲ့ဒီတိုင်းပြည်က တချို့လူသားမျိုးနွယ်တွေဟာ ကိုယ်ပိုင်စွမ်းအင်တွေရှိခဲ့ကြတယ်။ အချို့ကမီးစွမ်းအင်ကိုပိုင်ဆိုင်ကြတယ်။ အချို့ကရေစွမ်းအင်ကိုပိုင်ဆိုင်ကြတယ်။ အချို့ကနက္ခတ်တာရာစွမ်းအင်ကိုပိုင်ဆိုင်ကြတယ်။ အစရှိတဲ့မရေမတွက်နိုင်တဲ့စွမ်းအင် မျိုးစုံကို ပိုင်ဆိုင်ကြတယ်။

အဲ့ဒီလိုမွေးရာပါ စွမ်းအင်တစ်ခုခုပိုင်ဆိုင်ထားတဲ့သူတွေကို နတ်ဘုရားတွေလို့တင်စားခေါ်ဝေါ်ကြတယ်။

စွမ်းအင်တွေမရှိဘဲ မွေးဖွားလာတဲ့လူတွေလည်းရှိခဲ့ကြတယ်။ အဲ့ဒီလိုလူတွေကိုတော့ သာမန်လူသားမျိုးနွယ်အဖြစ်ပဲသတ်မှတ်ပြီး နတ်ဘုရားမျိုးနွယ်တွေရဲ့အစေအပါးတွေအဖြစ် အလုပ်အကျွေးပြုစေတယ်။

ထိုသာမန်လူသားမျိုးနွယ်လူတန်းစားထက် ပိုပြီးနိမ့်ကျတယ်လို့ သတ်မှတ်ထားတဲ့ နောက်ထပ်လူတန်းစားတစ်ရပ်လည်းရှိသေးတယ်။ ရှီလာတိုင်းပြည်ရဲ့ အစွန်အဖျားနေရာလေးမှာတည်ရှိတဲ့ရွာလေးတစ်ရွာပေါ့။ အဲ့ဒီရွာလေးကို မှင်စာရွာလို့ခေါ်ပြီး သူတို့ကို မှင်စာမျိုးနွယ်လို့ခေါ်ကြတယ်။

ဘာလို့ သူတို့ကိုမှင်စာမျိုးနွယ်လို့ခေါ်ပြီး နှိမ့်ချဆက်ဆံကြလဲဆိုတော့ မှင်စာမျိုးနွယ်ကလူတိုင်းဟာ မျက်စိမမြင်နိုင်ကြလို့ပဲ။ မျက်စိမမြင်နိုင်တဲ့အတွက် နတ်ဘုရားမျိုးနွယ်ကိုလည်း အလုပ်အကျွေးမပြုနိုင်သလို ကိုယ်ပိုင်စွမ်းအင်တွေလည်းမရှိကြဘူး။ အဲ့ဒါကြောင့် သူတို့ကိုလူပိုတွေအဖြစ်သတ်မှတ်ပြီး လူရာမသွင်းဘဲ နှိမ့်ချဆက်ဆံကြတယ်။

ဒါပေမယ့် သူတို့ဟာ အခြားသူတွေမြင်တဲ့အရာတွေကိုမမြင်နိုင်ပေမယ့် အခြား‌သူတွေမမြင်နိုင်တဲ့အရာတွေကိုတော့ သူတို့တွေထဲကတချို့ဟာ မြင်နိုင်ကြတယ်။

အခုပြောပြမယ့် ပုံပြင်လေးက အဲ့ဒီမျိုးနွယ်သုံးခုကကောင်လေးသုံးယောက်ရဲ့အကြောင်းပေါ့...