"صباح يوم آخر__الجُمعة"
كنت بشرب الشاي مع أهلي وبنطمن على بعض زي ما بنعمل كلما تجينا فرصة وقعدة صباحية مجتمعين فيها كُلنا..قاعدة بين غيمة وإياد وبابا وماما قدامنا.
بابا وقف على حيلهُ:-
_الليلة الفطور عند عمكم محمد..أنا عندي مشوار صغير كده بقضي وبرجع بعد الصلاة.
بعدها مشى ناحية الباب وماما وراهُ...يمكن ده موقف من مواقف كتيرة بتكون في بالي..أنا عاوزة علاقة زي دي..مهما يعدي بينا العمر..لما يقوم ماشي أوصلهُ باب الشارع..ما عندي خلفية عن الحوار البدور جنب الباب شنو..بس متأكدة أنو كلهُ حنية وتوصية وإهتمام♡.
دخلت غرفتنا لقيت تلفوني بِتصل..كان سامي.
_متصل مكالمة عديل كده.
=شفتي بعزك كيف.
_لالا مغترب ماف كلام
=إتلهي ياخ
_المهم..طمني عليك وكيف البلد ديك معاك !؟ ولقيت شغل ولالا !!
=فٌلة أنا ما جيت عشان شغل ولا غيرو..شفتي الزول لما يكون عامل مشكلة ويمشي يدسى !! بس ده أنا
_سجمي..عملت شنو أنت يا سامي..أصلاً سفرتك دي ما ساي..أختك أنا وستر وغطا عليك قول قول
=ههه حلوة دي..لا هو الموضوع ما كبير شديد بس كبير برضو..وما مؤلمني بس برضو متأثر بيهو فاهماني. !؟
_أنا أيوة بفهم بس ما طوالي..سامي إتكلم عديل
=مفروض أتكلم عديل عشان الرصيد ده ما جايبو مجان..فا ح أتكلم.
_سامعاك
=هو عموماً الموضوع ليهو علاقة بمِنة.
***************************
واقفة في مطبخ ناس مِنة بحمر في البطاطس وجنبي غيمة بتعمل في شطه مطبوخة ومِنة بتجهز السلطات وفي كم بنت معانا..كنت سرحانة وبتذكر في كلام سامي وعبرتهُ وهو بيحكي..من جواي عارفة سامي غلطان بس برضو مِنة أجرمت في حقهُ..كنت ح أبقى قاسية لو قلت ليهو أنت غلطان وقعدت ألوم فيهُ..هو سلفاً بكون عارف ده..أنا بس كنت بسمعهُ وبهدي وبطبطب على جرحهُ..مِنة كنت بشوفها عشرة عشرة..ما أعتقد لو بتحب شِهاب بجد تشوف غيرهُ حتى لو حصل برود وإهمال في العلاقة..وفي رأيِ برضو إنها ما حبت سامي..حبت كلام سامي حنيتهُ عليها حبهُ ليها..بس ما بادلتهُ نفس المشاعر...يمكن هي ما فاهمه نفسها ولا عارفة روحها عاوزة شنو ولا قادرة تحدد..ما بين إني عتبانة عليها بس برضو شايفاها ما ناضجه كفاية..ثم إنو أحلى حاجه في العلاقات الوضوح..مِنة ما كانت واضحة مع سامي وسامي برغم وضوحهُ معاها ما كان حاسم.
