"مغرب اليوم نفسهٌ"
"عند سامي"
كنتَ قاعد في الصالة وبدردش بالتلفون..أخواتي جابوا القهوة وقعدوا جنبي..إبتدوا يتونسوا وإطار الونسة كان عن شِهاب !!
_غايتو فِرحت فرح لما سمعت الكلام ده من حبوبة.
=والله ياخي شِهاب كويس ومناسب ليها شديد
_أصلاً يا بت..كنت قايلة براي المٌلاحظة نظراتهُ ليها
=أتخيلي بس لو جدو كان إختار غيرها لشِهاب..واااي ههه
لقيت نفسي بقتحم ونستهم بدون أحس.
_جدو أختار منو لشِهاب !؟
=بت خالو محمد
_بتو منو !!؟
=هو عرس لبناتهُ كلهم فضل منو غير تاج ومِنة..قصدنا مِنة يا سامي..
كيف يعني مِنة !؟..مِنة وشِهاب !!..حسيت راسي بقى تقيل ومخي ما قادر يستوعب كلامهم ده..كأني في حلم ولا بتخيل..طلعت من البيت وأنا ما شايف قدامي.
********************
طلعت يدوب من الحمام وحاسة بإنتعاش وحيوية كده غريبة..جاتني فاتن ناطه كالعادة.
_والله أشتقت ليك
=أمس ما أتلاقينا المساء صح !؟ يبقى أنا كمان أشتقت ليك
_عان الكلبة..المهم المهم عندي ليك شمار
=ح تتمو عرسكم !!
_لا ده شمار مكشوف أصلاً
=طيب شنو !!
_شِهاب ح يخطب
=وه...منو سرعة
_خمِني
=فاتن أنجزي
_مِنة بت عمو محمد
فاتن كان واضح عليها مبسوطة بالخبر ده..ما عارفة ليه جا في بالي سامي ومخي عمل "Erorr" ...أيوة أنا أتوقعت حاجه زي دي تحصل ومفروض ما أتفاجأ..بس ثقة سامي وكلامهُ عن مِنة طول الوقت !!..معقولة يكونوا مرتبطين..ممكن سامي يعمل حاجه ويوقف الزواج ده !!
