رفعت راسي لقيتهُ شهاب..يا الله المنقذ..على الرغم إننا ما بنتفق شديد بس أهو توصيلة والسلام.
_وريني بس بكرة مفروض نطلع كم ونرجع كم ؟!
=الحفلة الساعة 6 وبتخلص 10..بس أنا ما عندي مشكلة ممكن 8 نكون في البيت
_المكان بعيد ولا قريب !؟
=قريب ما بناخد نص ساعة في الشارع
_طيب حلو..معناها ح أوصلك
=شكراً يا شهاب♡
شال قطعه كيكة صغيرة في يدهُ ومشى من جنبنا
_شايف الناس اللطيفة الراقية
=بس بس يا مصلحجية..هو أنتي كلمتي جدو أساساً لما فاتحه نفسك للطلعة !
_ما ح يمانع
=الثقة الزايدة ما حلوة
صريت ليهو وشي وقمتُ مشيت لجدو..كان منفرد براهو وبعاين لاولادهُ وأحفادهُ..كلمتهُ بموضوع طلعتي..وإني ح أتخلف عن عرس تسابيح..في الأول رفض بس حنستهُ وحبوبة ما قصرت..في الآخر وافق
_لو حفلة صحبتك خلصت بدري..شهاب يسوقك وتجوا عندنا..البت بت خالتو ما تنسي
=حاضر يا جدو
رجعت مكاني وأنا متمنية جدو يقوم..عشان لو هو قام طالع ح نطلع كلنا وراهُ..واحده من بنات أعمامي قالت:-
_رايكم شنو قعدة الشاي الجاية نقترح على جدو يعملها لينا برة..في أي مٌنتزه مثلاً !!
سامي :- وده أي مُنتزه الح يشيلكم ده ههه..
غيمة:-على فكرة فكرتك حلوة..أنا معاك.
إياد:-جدو ما ح يمانع أصلاً...بس حقيقي عددنا ماشاء الله..بسحرونا هههه
فضلوا يتناقشوا في الموضوع ده فترة طويلة..ما حسيت بنفسي أصلاً لما غفيت ونُمتَ...صحيت بضربة خفيفة على خدي
_أصحي يا بتي كتفي وجعني