رافضاني ؟!
أنا ما رافضاك ما رافضاك بس برضو ما عاوزاك...دي تتشرح كيف وتتفهم كيف بس !!!
_جاوبيني ؟!
=ها..أنا أنا
ما عارفة ليه لساني بتربط كده لما السيرة دي تجي ولما هو تحديداً يتكلم معاي..
_أنتِ شنو !!..على فكرة أنا زي زيك جدو لما أقترح الموضوع ده وفتحهُ معاي قدام الحاج وعمي ما كان عندي جواب..أنا من جواي عارف ومتأكد أنك المناسبة لي... زوجة وأم لأولادي..ما أعتقد أني محتاج لأكتر من كده
=يعني أنت موافق عشان بس شايفني مناسبة !؟
_أيوة طبعاً...سبب رفضك شنو أنتِ؟!
كيف يعني شايفني مناسبة وكيف يعني عاوز يتزوجني لمجرد أني مناسبة...كنت ح أتكلم وأوضح ليهو ليه رافضة الزواج..ما بس منهُ...رافضة أي زول ح يكون شايفني مناسبة بس...جات تاج ودي أصغر حفيدة في العيلة..قالت بطفولة:-
_جدو عاوزكم برة يا فلة وعمو يوسف
لما قالت عمو يوسف ضحكت..دي ما أول مرة تاج تقولها..يوسف بالنسبة ليها ولي باقي أطفال العيلة هو عم وخال حتى لو الصلة بينهم خوة...وده بسبب شخصيتهُ وحركاته
=ضحكتك شديد !!
_لا براحة...
سخييف سخيف...ما إستجريت أطلع وهو لسه واقف..لحدي ما سمح لي..مشيت قدامهٌ وهو وراي
***************
هيبة جدو يوسف وخشونة صوتهُ وقعدتهُ كأنه ملك...كالعادة كل خميس لازم قعدة شاي عندهُ وأحياناً عند عمو أحمد..بحكي لينا عن قصص حصلت من ستمية سنة وسمعناها كتير بس لازم طبعاً ننبهر كأننا أول مرة نسمعها..كلنا مركزين معاهو...ختم كلامهُ ب:-
_بكرة إن شاء الله ح نتغدا كلنا في بيت حاتم "راجل عمتو إبتسام" بمناسبة تخريج ولدهُ سامي من كلية الهندسة..شوفوا البرامج الح تتعمل وما عاوز أي عذر لغياب أي زول فيكم
تاج قالت:-حتى أنا يا جدو !؟
_حتى أنتِ يا تاج هههه..تكوني أول واحدة مفهوم !!
=حاضر
