نعم يا حبيبَتىِ (مكتمله)

《15》

دخل راحل وموسى ولاكن بدون حراسة
اول ما شافته اسينا جريت عليه هى وياسين
اخدها موسى فى حضنه واخد راحل ياسين فى حضنه
موسى بحب: اهدى يا حبيبتى اهدى متخافيش انا موجود اهو معاكى
راحل بيحاول يهدى من زعر ياسين: اهدى يا بابا معلش انا معاك 
المجهول بصوت عالى: خلاص اطمنت عليهم
ساب موسى اسينا مع راحل وراح ناحية المجهول وقال بعصبية: انت ازاى تدخل بيتى بالطريقة دى
المجهول ببرود: انا ادخل اى مكان انا عايزه
موسى بسخرية: يبقى لسة متعرفش مين الصياد والصقر
المجهول بسخرية: يا مامى خوفت انا كده!!!
موسى برافعة حاجب: انت مين
المجهول بثقة: انا فريد الحربى
راحل بصدمه: ابن منصور الحربى!!!
موسى بسخرية: واضح ان دى الحاجه الى كان بيسافر المانيا علشانها بقا
فريد بضحكة سخرية: برافو عليك الإجابه صحيحه
موسى ببرود: والباشا مشرفنا ليه؟؟
شاور فريد للحرس بتوعه علشان يطلعوا
طلع فريد من جيبه كارتين وحطهم مكانه على الكرسى الى كان قاعد عليه وقال: ده الكارت بتاعى وهبقى اكلمكوا علشان عندى كلام كتير لمصلحتكوا
وسابهم فريد ومشى
اول ما فريد مشى قرب موسى من اسينا وقال: بطلى عياط يا حبيبتى كفاية هو مشى خلاص
اسينا بخوف: لا انا عايزه امشى المكان هنا مش امان ابدا
موسى بحنان: مفيش مكان أأمن من هنا صدقينى
كمل موسى بعصبية: انا معرفش ازاى دخل وكمية الحرس دى بره ده انا هروقهم اقسم بالله...احكيلى بس حصل ازاى كل ده
بدأت اسينا تهدى وبدأت تحكى الى حصل
اسينا: انتوا مشيتوا وحوالى عشر دقايق كده وفجأه لقيت الباب بيخبط جامد انا طبعا خوفت جدا و اخدت ياسين ودخلنا اوضتى وفجأه الخبط زاد وسمعت الباب وهو بيتكسر وانا كنت نسيت اقفل علينا باب الأوضة بالمفتاح فدخلوا واخدونا وبعديها الشخص ده كلمك
راحل بقلق: بص هى حركه زباله منه بس هو مش ضدنا
موسى بتغيير للموضوع: مش وقته كلام فى الموضوع ده خالص...ادخلى انتى ارتاحى بس ونتكلم بليل
مشى راحل وراح يدخل اوضته
لسة اسينا هتمشى ولكنا وقفت
موسى بضحك: عايزه تقولى اى؟؟؟
اسينا بفضول: هو مش راحل امبارح كان زعلان وموضوع بباه ده ازاى لما صحى كان عادى جدا وعمل معايا فطار وبيتعامل عادى
موسى: بصى راحل لما بيبقى فى حاجه مزعلاه وينام بيصحى ناسى الى حصل لفتره وبعديها بيفتكر بس هو مش بيحب يبين حزنه قدام حد وبيحاول يتعامل عادى
اسينا: طب انت كلمته فى موضوع باباه ده
موسى: تؤ
اسينا: لو ينفع يعنى ابقى اقعد واتكلم معاه يمكن يقتنع
موسى بغيره: ينفع بس هبقى قاعد معاكوا
اسينا بضحك: ماشى يا عم الغيور

*فى شركة عرابى

عصام بلامبالاه: ما تطلقها واجع دماغك ليه
عرابى بغضب: انا كده كده هطلقها دى بتهددنى لو منفذتش كلامها بس انا عايز عيالى
عصام بجفاء: عيال اى وقرف اى بس متخافش عليهم هى امهم بردو واحنا محتاجين نركز فى شغلنا ونفتح لراحل وموسى

*عند همسه

كانت همسه بتتكلم فى الموبيل
همسه: مش هعرف انزل اليومين دول خالص يا يوسف
يوسف بمكر: يا حبيبى انتى وحشتينى موووت
همسه بحب: وانت اكتر والله...بس صعب انزل تانى
يوسف بخبث: متخافيش مش هنقعد فى كافيه واحد صحبى عنده استوديو هنقعد فيه مع بعض شوية و ونمشى ولو مش عايزه ممكن نروح اى حته هادية علشان نتكلم براحتنا
همسه بقلة حيله: هحاول يا حبيبى حاضر

*فى أوضة خالد

كان خالد بيكلم إلين فى الموبيل
إلين بسعاده: بجد مش مصدقة انها كلها كام شهر ونتخرج اخيرااا
خالد بسخرية: انتى هترتاحى اما انا هلبس فى الجيش
إلين بضحك: لا ده انت ربنا معاك بقا

*مساءً فى بيت موسى وراحل

كانت اسينا نايمه هى وياسين
موسى: يلا هنروح لفريد
راحل: هتسيبهم لوحدهم؟؟
موسى بتفكير: هسيب الحراسة كلها هنا وناخد عربية واحده بس
راحل: خلاص نسيبلهم محسن ورجالته وناخد تامر ومعاه كام راجل من بتوعه
(كانوا عاملين الحرس بتوعهم مجموعات وكل مجموعة ليها قائد والشخص ده بيثقلوا فيه جدااااا)
خرج موسى وراحل برا البيت
راحل: محسن هتفضل هنا برجالتك وانت يا تامر تعالى ومعانا
موسى بتحذير: تحموهم بحياتكوا
محسن بطاعه: اطمن يا باشا
خرج موسى وراحل وركبوا عربيتهم وطلعوا على العنوان الى كان فى الكارت
وصلوا عند مكان تقريبا مفيهوش بشر
وفجأه ظهرت عربية فى وشهم
وقفوا بعربيتهم لأن العربية سدة الطريق
نزل واحد من العربية وراح ناحيتهم
البادى جارد: موسى باشا وراحل باشا اهلا
موسى ببرود: عايزين فريد
البادى جارد: فريد باشا مبلغنا....ياريت تفضلوا معانا والحرس بتوعك هيفضلوا هنا الرجاله
نزل موسى وراحل وركبوا معاهم وفضل عربية حرس من بتوع فريد مع تامر ورجالته
بعد تقريبا 10 دقايق وصلوا بيت كبير لا هو اقل ما يقال عنه انه قصر ملكى
راحل بسخرية: ده ابن منصور طلع زوقه حلو اهو
موسى: لما نشوف عايز اى
دخل موسى وراحل ولقوا فريد قاعد بدون تيشيرت بنطلون بس
فريد بثقة: كنت متأكد انكوا هتيجوا
قعد موسى وقال ببرود: ارمى الكلمتين الى عندك يا فريد
فريد ببرود: اولا مبحبش الطريقة دى فى الشغل ولا انا اقل منك ولا انت اقل منى نتعامل كويس امييين
اخد راحل نفس وقال: طيب عايز اى يا فريد واى سبب ظهورك فجأه
فريد: انا كنت بجهز لأنتقامى وقررت أظهر علشان انفذه وانتوا اكتر اتنين تقدروا تساعدونى فى ده
موسى بتساؤل: يعنى انت متقدرش على الانتقام لوحدك؟!
فريد بثقة: لا أقدر طبعا بس من مصلحتكوا اننا نتشارك هنكون إمبراطورية ونقدر على اى حد
راحل بجمود: الكلام على مين
فريد: عرابى والدلدول بتاعه
ضحك موسى بسخرية وقال: جاى تنتقم لأبوك طبعا
فريد بسخرية: طب ما انت عارف اهو
راحل: طب واحنا هنستفيد اى؟
فريد: هتستفادوا انكوا هتخلصوا من عرابى الى واجع دماغكوا وطبعا عصام الى بوظ حياتك مع اهلك يا موسى
وأنهى كلامه بغمزه
صك موسى على أسنانه وقال: متابع من زمان انت
فريد بثقة: اماااال
بصلهم فريد وقال: ها قلتوا اى؟
بص راحل لموسى وقالوا فى نفس الوقت: معاك
ضحك فريد وقال: على بركة الله نحتفل بقا
سقف فريد بعد ثوانى ظهرت خادمه ومعاها ازازة فوتيكا (نوع من انواع الخم*ره) وكاسات
راحل باعتراض: لا
موسى ببرود: راحل فكك منى انا مش ماشى مع ابويا انا
فريد بلامبالاه: ياعم اشرب محدش واخد منها حاجه
راحل برفض: لا احنا مبنشربش وغير كده احنا معانا واحده فى البيت ومش هفضل ألمك انا
بصله موسى برفعة حاجب وقال: يبنى متخلنيش اعاندك
فريد: اى يا جدعان محناش شاربين حاجه خدى يا بنتى رجعيها وهاتى عصير فريش لينا احنا التلاته
بص موسى بغيظ لراحل
فريد بضحك: عنده حق اسمع كلامه
موسى: المهم انت داخل فى السكه دى علشان الأنتقام بس ولا ناوى

يتبع....

بقلم/رقية حمدى

#بقلمى
#رقية_حمدى
#نعم_يا_حبيبَتىِ