ياسمح المحيا جر الهجينية

٤٩

       ،،الـجـزء الـتـاسـع والأربعين،،
.
.........****..........
أم جـلاجــل
.
..بيت مفلح..
،،غرفة هيفاء،،
هيفاء جالسة وهي تطالع المراية الصغيرة اللي ماسكتها بيديها
ثريا جالسة وراها تمشط شعرها بابتسامة:ياماشاء الله يازين الزين وازين بنيتي زيناه الله يحرسش من عينٍ ناصيتش بالشينة
هيفاء ابتسمت وهي تذكر امها وبنفسها:والله ياعمة لو اني خبرت بيحصل بنا هاللون ماغديت مع حمدان بهاك اليوم ابدن ابدن
>
>
هيفاء(٩سنوات)تجري قدّامه ووقفت عند شجرة وهي تأشر عليها:ذي مابها خلاف جزها(اقطعها)وغدينا يم البيت
حمدان(٢٧سنة)يمشي وراها وهو ماسك طرف الخطام(الحبل)المنتهي براس الحمار يسحبه وراه ضحك:مابراسش غير التعّود يم البيت!!
هيفاء بزعل:اي بالله ابي اغدي العب مع دلال وراك ماادعيتها تغدي معنا
حمدان:وش اعمل بكن يالثنتين والله ياانش بلحالش مشغلتني وشلون وهي معنا!!
هيفاء:اجل اعجل اريد اعود يم البيت
حمدان مد لها طرف الخطام:هاش عينش عليه لاتكبينه ويغدي
هيفاء مشت له وهي تسحب الخطام من يده بزعل:هات لاتبطي علي
حمدان وهو يلف ع ظهر الحمار وياخذ فاسه:يمه منش يمه اوجست يمش تعاونيني بالحطب مير مامنش معونة ابد اقصدي محلش لاتغدين من هينا اوحيتي
هيفاء وهي تاشر عالشجرة:اوجس يمك هذيك هذا كبرها جزها
حمدان تنهد:هذيك لو اشب بش انشويتي وهي ماشبت للحين(تنحرق هيفا والحطب كف الشجرة ماولع)لاتغدين
هيفاء كشرت بوجهها وهي تجلس:طيب طيب
حمدان مشى يلف المنطقة حولها يختار الشجر الزين ويأخذه حطب وهاذي رزقته الوحيدة اللي يصرف على اهله منها
هيفاء ربطت الخطام بالشجرة وهي تلعب حول الحمار ماابعدت ثم قامت ومشت لشجرة ثانية وجلست تحتها وبدت تحفر بقطعة غصن وهي تلعب عقدت حواجبها وهي تشوف ان الغصن يضرب بشي واكيد مو حجر كالعادة رمت الغصن بعيد وهي تجلس ع ركبها وتحفر بيديها بحماس حول هالشي اللي شدها استغربت اكثر وهي تشوف اللون الأحمر يوضح واخيرا وبعد فترة من الحفر خرجت صندوق احمر مذهبة أطرافه اتسعت ابتسامتها وهي تطالع هالشي الجميل بعينها وماعمرها شافت مثله بحياتها فتحته وهي غمضت عيونها وهي تحس بخوف غريب اجتاحها من فتحته فتحت عيونها بشويش وتبدد كل هالخوف بلحظة وهي تطالع كل هالذهب والأشياء الغريبة عليها داخله
حمدانِ راجع لها وهو شايل ع أكتافه حزمة من الحطب اللي قصصه حطها ع ظهر الحمار وربطه وطالع جهتها:هيفاء
هيفاء فزت واقفة وجرت له وهي لابسة عقد وبابتسامة شاقة وجهها وبين يديها الصندوق المفتوح:حمدان ياخيي راع وش عينت!!،،وقفت عنده وبوسط انفاسها،،راع راع
حمدان اتسعت عيونه بصدمة وهو يطالع الصندوق والعقد الغريب اللي على رقبتها ومسكها من يدها وسحبها له وبحدة:منين اخذتيه!!!
هيفاء توجعت من مسكته وبرجفة صوتها:مااخذته من احد كنت احفّر وعينته مدفون
حمدان دفها قدامه:اغدي قدامي وريني وين عينتيه
هيفاء مشت قدامه وهي تحبس دموعها ووقفت وهي تأشر عالمكان:هنيا
حمدان عقد حواجبه وهو يشوف مكان حفرها والتفت حوله وهو يفكر هالمكان مستحيل ينزل(يسكن)به احد درب سيل ومقطعة(ماحوله شي ابد)
هيفاء وهي حاضنة الصندوق وهي تكتم بكيتها:انا اللي عينته لي ماهو بلك ماني بكابته ابد ياحمدان
حمدان يطالعها بتفكير بحالتهم الكسيفة وصدقات الناس عليهم والديون اللي تنتظره عض شفته واخذ الصندوق من يديها
هيفا بكت وبصراخ:رده يمي لي
حمدان انحنى شبه جالس قبالها:هيفاء
هيفاء بدموعها:هاه
حمدان:ماهو بلنا هالغرض افصخي اللي برقبتش
هيفاء وهي تبعد خطوة عنه وتحط يدها عالعقد اللي برقبتها:خذ الصندوق وكب هالسلسلة لي ياحمدان تكفى
حمدان هز راْسه بلا وسط ابتسامته وهو يمد يده لها
هيفا نزلت العقد ودموعها شلال على خدودها وماسكته بيديها
حمدان سحبه من يديها وحطه بالصندوق ورجعه مكانه ودفنه ووقف وهو ينفض يديه
هيفا جنبه انفجرت تبكي بصوت:ماهو لاحدن ياحمدان!!الديرة ذي مابها احدن غير الاباليس كبني اخذ السلسلة تكفى
حمدان باسها على راسها:ابشري بالعوض واللي ازين منه،،انحنى ومسك يدها ومشى لحمارهم،،
هيفا تشاهق وهي تمشي معه
حمدان شالها وحطها عالحمار راجع طريقه لبيتهم طفش منها وهو يسمع شهقاتها التفت لها وهو يوقف:وثمن؟انتفخ هالوجه من كثر الصياح ولا عودت
هيفا:اريد السلسلة ياحمدان بس السلسلة تكفى تكفى
حمدان:اوجست يمش ابشري بالعوض وازين منه علامش ماتوحين
هيفا ببكا:ماهو بغادين عوض وحنا كل ليلة نظلي عالعشا مغير الما نتجرعه كل اليوم
حمدان احتدت نظرته
هيفا وهي تشوت الحطب وانفك عنه الحبل وطاح عالارض وبدموعها:مامن عوض وحنا نغدي بهالحطب يم الديرة ومحدن يشريه غير عمي مفلح
حمدان ضربها كف
هيفا سكتت وهي تبكي زيادة
حمدان بحدة:تحمدي ربش غيرنا مايحصله الما!!،،انحنى شبه جالس يجمع الحطب عض شفته وهو يسمع صوت بطنه من الجوع امتلت عيونه دمـوع وهو يكره هالضعف اللي هو فيه اخذ نفس يحبس دمعته وهو يسرع بجمعه للحطب ووقف وهو يثبته عالحمار،،
هيفاء مدت له الحبل وسط دموعها وهي ماتطالعه:هاك
حمدان نزلت دمعته غصب وهو يترك الحطب ويمسك خطام الحمار ويسرع بخطواته للصندوق وانحنى على ركبه وهو يحفر وسط دموعه اللي هلت غصب عنه
هيفا نزلت من ع الحمار وهي تطالعه بخوف وسط دموعها اللي ماجفت:مااريده ياحمدان غدينا يم البيت مااريد شي والله مااريد
حمدان خرج الصندوق وفتحه وخذ العقد وهو يطالع هيفا وبحدة:ادني يمي
هيفا تطالعه بمكانها خايفة
حمدان صرخ:ادني!!
هيفا اسرعت له ووقفت عنده
حمدان مسكها من يدها ولف ظهرها له ولبسها العقد ثم لفها له ووجهه بوجهها وبابتسامة:يازينه عليش تبارك الله يزهاش وانا خيش يزاهش
هيفاء ابتسمت وهي تطالع العقد ثم طالعته بابتسامة عريضة وهي تسلم على راسه:جزيت بالخير ياوجه الخير
>
>
ثريا انتهت من تظفير شعر هيفا وصحتها من سرحانها:بكرة ان شاء الله احنيه وثمن يغدي فوق زينه زين
هيفا ابتسمت وهي تطالعها وبحسرة بنفسها:ليت كل همي كان الحنا ياعمة ياليت
.
..بيت الشلة..
الجد بادي واقف عالباب ينتظر
سعود اللي نط للبيت فتح الباب وهو قبال جده:مابه احد ياجد مابه احد
الجد بادي كشر بوجهه:وين غدا هالاقشر وانا معلمه مايتب(يروح)
سعود:ياجد اوجس يمك شين بلكن انه غدا يمه
الجد بادي اتسعت عيونه:افزع افزع للسيارة واغدا يمي اهجل
سعود:ابشر ابشر،،جرى،،
.
.........****..........
..بيت فاهد..
يوسف بغرفته متمدد ع ظهره على سريره يتابع بجواله يكتم ضحكته لايسمعونه
نشمي دق الباب
يوسف قفل الجوال وهو يعطي الباب ظهره وتغطى كله باللحاف وهو يتصنع الزعل
نشمي دخل تنهد وهو يطالعه متغطي:يوسف
يوسف مارد
نشمي تنهد وهو يتكتف:ابشر وش اللي تريده؟
يوسف فز جالس وهو يرمي اللحاف ويجلس على ركبه وبفرحة:صدق ياخال صدق؟
نشمي زفر:النية اني غادين يمهم نهاية الشهر مير انت ولقافتك اللي ماتكبها عنك
يوسف بوناسة:اغدي معك؟؟
نشمي بتكشيرة على وجهه:غادين يم الموت!!مهبول!!والله ان خير ابوي انك ولد فاهد نحرك بمحلك!!
يوسف:ومن يوجس اني ولد فاهد!!
نشمي ابتسم
يوسف وقف وهو يحتضن ذراع نشمي وبابتسامة:يبه وش تريد نتعشى؟
نشمي ضحك:ابوك يالجحدة!!اعمد ابوك واعمل به مثلي
يوسف ترك نشمي:والله ان يذبحني بمحلي ياخال
نشمي تنهد:مايصلح تغدي معي يمهم
يوسف بزعل:ليش ليش قولي وحقن علي مااوجسه ابدن
نشمي:اعمد ابوك يعلمك
يوسف:اذا عشان عمتي جميلة الله يرحمها فانا خابر العلم
نشمي بحدة:يوسف!!
يوسف تنهد:نعم
نشمي بحدته:اعمد ابوك واوجس له اللي ناوين تعمله ثم لااعطاك شوره هاك الوقت عوّد يمي
يوسف بضيقة خاطر:مايحتاج اعمده خابره وش بيوجس  بيعيي علي(يرفض روحته)
نشمي:لاعيّا مامن غدية لك معي
يوسف بترجي:ياخاااال
نشمي:علمتك وياويلك لو تعمل شين مانخبره والله محدن يفكك مني قبل ابوك،،خرج،،
.
،،بالحوش،،
بتال متربع وهو مثبت عينه عليه بغبنة
جسّار ينتف من العشب ويرمي وهو يتحاشى يطالعه
بتال بنبرة عالية:اترك الزرع بحاله الا اذا تبي تاكله!!
جسّار طالعه:شايفني عنز!!
بتال بغبنة:الا والله تيس حتى التيس احسن منك
جسّار بغبنة:وش فيك معصب علي!!وش سويت لك انا؟!!
بتال:انا اللي وش ذنبي حتى انطرد معك ها!!
جسّار:عاد تعرف ابوي الخير يخص والشر يعم
بتال عطاه ظهره وهو يكبح غيظه:استغفر الله يارب استغفر الله
جسّار:بتاتيل لاتعصب عاد
بتال:اوووص اسكت عني لاذبحك انا حتى الغدا ماذقته جيعان ومطرود ومقابل وجهك وش ذا الحظ اللي عندي!!
جسّار كشر بوجهه:الله اكبر عليك مابين بعينك شي من اللي اسويه لك!!
بتال:لاتمن عاد لاتمن واتصل على خليل بس
جسّار مد يده:عطني جوالك
بتال:وجوالك وينه؟!!
جسار وهو يصد بوجهه ويهمس:معطيني حظر
بتال اتسعت عيونه:اهب ياوجهك وش مسوي حتى يحظرك!!
جسّار:وش يدريني عنه!!
بتال وهو يدخل يده بجيبه ويطالع جسّار وهو مكشر:والله محد يلومه!!
جسّار طالعه:لاتخليني اهون عاد!!
بتال رمى الجوال:اطلب اطلب ولايكثر بس
جسّار اتصل من جوال بتال:ايوا صديق اهلا اهلا
خليل(فلبيني)عقد حواجبه بشك من الصوت
جسّار:كيف حالك خليل في معلوم مين انا؟
خليل عرف صوته وبتكشيرة وهو يصارخ عليه:إنتا ليش مافي كلم تلفون مطعم ليش في جوال انا ليش
جسّار:ليش فيه خليل حبيبي انا
خليل:مافي حب انا مافي
رهايف شايلة بيديها فراش وقفت عندهم وهي ترميه عالارض وبتكشيرة:خذوا
بتال اشر له تسكت
جسّار ضحك:ادري بك ياقلبي مو من قلبك
رهايف:اطلب لي معكم
بتال احتدت نظرته
رهايف زمت شفايفها وهي تجلس
جسّار:جهز ثلاث وجبة بيق
بتال قاطعه:اربع
جسّار:قصدي اربع اربع وجبة بيق انا أرسلك السواق بس ها سوي سرعة انا في مسلم سوي صلاة صيام زكاة انا في صوم من امس شوي سرعة صديق
خليل بعصبية:انا في كافر ها!!انا في مسلم بعد مافي اهد صوم من امس ياكذاب،،قفل بوجهه،،
جسّار:اعوذ بالله منه ماينمزح معه!!،،رمى الجوال على بتال،،شف لنا رقم جديد نطلب منه اكيد حتى رقمك بيحظره
بتال:وش مسوي لادمي كاف خيره وشره يدور رزقه بس!!
جسّار:مدري عنه!!بس النفسية نفسية!!
بتال زفر بصوت وهو يحس انه ضايق صدره بالحيل
جسّار طالع رهايف وهو يمد يده:فلوس عشاك
رهايف اتسعت عيونها:متوظف ياادمي متوظف انت!!وبعدين خاف ربك تطلب من اختك المسكينة
جسّار:والله اختي ماهي بمسكينة وراها رجل يصرف عليها جيبي فلوسك بس
رهايف ضحكت بسخرية:الله يستر بس هالرجل لأصرف عليه انا
بتال صرخ:رهاايف!!
رهايف فزت ورا جسّار:خلاص ماابي عشا
جسّار وهو يطالع بتال:هد يابتّال وش فيك
بتال بحدة:اسمعي يارهايف زين انا سكت عنك قدام امي وجدتي وعماتي لكن الحين ماني بساكت جواد زوجك رضيتي او لا زوجك ومايحدث لك تعترضين ولاتنطقين كلمة وانتي اللي وافقتي عليه ومحد جبرك ابد
رهايف تطالعه عن طرف من ورا جسّار
بتال:هذا زوجك يعني تحترمينه وتكرمينه وتقومون بحقه حركات البزرنة اتركيها عنك فاهمة
رهايف بهمس:فاهمة
بتال بنبرة عالية:ماسمعتك!!
رهايف:فهمت فهمت
بتال:وان غلط عليك تعرفين وين بيت ابوك ومو اَي احد تقولين له المشكلة ابوك ابوك وبس سمعتي؟
رهايف بتكشيرة:طيب
بتال:ورب النعمة يارهايف ان سمعت شي منا ولا منا لأخليك تكرهيني اني اخوك سمعتي!!
رهايف:طيب
بتال:هيا انقلعي جيبي لي موية ولااسمع لك صوت
رهايف مشت وهي حابسة دمعتها
جسّار طالع رهايف لحد ماابتعدت ثم طالع بتال بحدة:ليش تكلمت معها كذا!!
بتال زفر:لازم أتكلم معها كذا!!اختك ياشاطر ماهي مستوعبة انه زوجها ولاهي مستوعبة ان فيه حياة زوجية تنتظرها
جسّار:طيب وش فيك أكلتها!!قولها فهمها حبة حبة مو بصراخ!!
بتال:هي لو قالتها صريح كان ذبحتها والله
جسّار شهق:بتاااال!!
بتال طالعه:خير وش فيك بعد!!
جسّار اخذ نفس:صدق سامحته خلاص طاح الحطب؟!!
بتال:اكيد لا طبعًا باقي بالخاطر لكن مهما يصير يبقى جواد ولد عمنا الوحيد مالنا غيره وماله غيرنا
جسّار كشر:انا ماني مسامح ابد لو يحب على راسي
بتال ابتسم:محد حاب على راسك ارتاح
جسّار بتكشيرته:ليه مايحب راسي ويستسمح وفعايله الشينة بحقي واجد!!
بتال:يالله عاد لاتصير أخلاقك شينة تعلم العفو
جسّار وهو يطالعه بشك:والله الصدق عاد توقعتك تنبسط على سالفته ويبرد قلبك
بتال:انبسطت شوي الصراحة بس يوم شفت حالته اوجعني قلبي عليه
جسّار اتسعت عيونه:اعوذ بالله لهالدرجة عاد!!
بتال:يوووه ياجسار شفت ذاك الغرور وشوفة النفس
جسّار يطالعه ساكت
بتال:كله تبخر كله مافي مكانه غير كسرة الخاطر والله ياجسار لو تشوف حالته ترحمه مابترتاح وهو بذاك المكان
جسّار:الله يعينه ويالله يالله لافكيت عنه أزمته انه يتوب ويفكنا من شره
بتال بنرفزة:خلك منه وقولي الحين انت وش وضعك؟
جسّار:وضعي في ايش!!
بتال:هو انت صدق تبي البنت ولا تدبست فيها؟
جسّار:تدبست
بتال رمش وهو يطالعه
جسّار بابتسامة:بس احلى تدبيسة والله
بتال كشر:خلك سوالفك البايخة على جنب ذا زواج مو لعبة ياجسار!!
جسّار:داري والله داري وعن قناعة تطمن
بتال:معها بنت على قولتك يعني احتمال كبير تطلب منك تعيش معكم
جسّار:عادي بنتها ويحق لها!!
بتال:لاتشتكي بعدين ترا ذا زواج مو لعبة
جسّار:اتركني عنك وسمعني احلى قصيدة،،وهو يشد ظهره بجلسته ويعدل ياقته،،عشان اقولها للمدام بعدين
بتال هز راْسه يمين ويسار:الله يعوضها بالجنة
جسّار ضحك بغرور:شكرا شكرا مايحتاج ادري اني جنة
بتال كشر بوجهه
جسّار بترجي:تكفى سمعني تكفى
بتال زفر:اسمع اجل
جسّار بحماس:كلي اذانٌ صاغية قول
بتال:يـامـرحـبـا يـابـنـت الأجـواد وأهلين..
يـاأم الـدلـع وأم الـغـنـج والـوصـايـف..
يـافـاتـنـة كـل الـعـذارى الـمـزايـيـن..
يـاأم الـيـديـن الـنـاعـمـات الـرهـايـف..
فـيـها مـن الـورد الـحـمـر والـبـسـاتـيـن..
ومـن الـجـمـال اليـوسـفـي والـردايـف..
جسّار بانسجامه:الله!!
بتال:مـن هيـبـتـه الـيـا مـشـت كـانـهاQueen..
الـلـه عـلـيـهـا مـن قـلـوب الـولايـف..
جسّار تنهد:اويل قلبي ياقلبي ياجسار،،صرخ بحماس،،يااااوك،،اختفى حماسه وهو يقطب جبينه،،وانت وش فيك تتغزل بمحارمي!!
بتال اتسعت عيونه:نعممم!!!!
جسّار وقف وهو يحس نفسه جاب العيد:وش فيك عصبت!!دوعابة دوعابة
بتال وهو يوقف:والله ياإنك بتصير محور الدوعابات
جسّار جرى:تكفى تكفى اسف والله اسف
بتال جرى وراه:هه خل محارمك تفكك الحين
.
.........****..........
أم جـلاجـل
.
..بيت فالح..
راشد يطالعه بحدة وهو يستجمع كل شجاعته:وش تبي مني؟ووشو له ماتطالع الا بوجهي انا ها؟،،صرخ،،وش تبي انطق!!
حمدان باستغراب:انا!!،،هز راْسه يمين ويسار،،ماابي منك شي لكن هم يبون
راشد قطب جبينه:مين هم؟!!
حمدان:هم اللي طلعوا لك بالحلم وقت الحادث اللي صار لك
راشد انصدم:وش دراك!!
حمدان:وانا اللي سحبتك منهم وفكيتك من أذيتهم وانـ
راشد وقف حمدان عن كلامه بضحكة اعتلت المكان:والمفروض اتشكرك!!ماقصرت راعي واجب!!جاوبني الحين وهالهم هذولي وش يبون مني!!وش سويت لهم انا!!
حمدان زفر:لانك طلعتني من سجنهم
راشد بتكذيب له:انا!!ماعمري شفتك بحياتي قبل هالديرة حتى اشوفك بسجن!!!
حمدان:ماهو بشرط يكون السجن سجن بعينك حتى تفتحه ياراشد السجن سجن
>
>
قبل الحادث بشهر..وسط البر
>
>
،،حمدان وبتّال وفيصل وقفوا بالسيارة،،
بتال نزل من السيارة:اسرعوا لاتتاخرون تنقّوا(اختاروا)الحطب الزين وارجعوا،،طالع فيصل،،انتبه من الأخضر لاتقصه فهمت
فيصل بيده الماطور:طيب طيب عارف
بتال:وانتبه من الماطور لاتتبلى نفسك
فيصل بتأفف:طيب طيب،،مشى،،
بتال تنهد من حركات فيصل والتفت لراشد اللي مشى عنهم ورفع صوته:لاتروح بعيد
راشد وهو يمشي:ان شاء الله ان شاء الله
،،افترقوا كل واحد بطريق،،
راشد بعد ماابتعد مسافة وقف عند شجرة وبدا يقص من أغصانها وانحنى شبه راكع يجمع الحطب عقد حواجبه وهو يشوف طرف شي مو واضح له زين بسبب التراب اللي مغطيه نزل الحطب اللي بيده وانحنى شبه جالس وهو يبعد التراب عنه اتسعت عيونه وهو يشوف هالصندوق الأحمر المذهبة أطرافه وهمس:يمكن مضيعينه اهله!!،،فتح الصندوق ومع فتحته له هي عليه عجاج(هوا بغبار)قوي وغريب لدقيقة غطى وجهه بذراعه وهو يغمض عيونه ثم فتح  عيونه وهو ينفض نفسه،،اعوذ بالله من الشيطان الرجيم،،نفض نفسه،،وش ذا!!،،طالع الصندوق وميل فمه بزعل وهو يشوفه فاضي قفله وحطه جنب الشجرة ووقف ومشى راجع للسيارة وهو يتركه وراه بدون اَي اهتمام له،،
>
>
راشد بصراخ:وش دخل الصندوق فيك!!ووش دخلني فيكم كلكم!!
.
..بيت مفلح..
ثريا جالسة عالقهوة تنتظر مفلح يرجع
هيفاء جالسة جنبها تنتظر بصمت كعادتها
ثريا بنرفزة:ايه هو حلالن عليها يبطي والله لو انه انا ان مايكبها تغدي دوني!!،،ابتسمت وهي يطري ببالها ووقفت،،احتريني هنيّا غادية يم الغريفة ومعودة،،مشت بسرعة
هيفاء ابتسمت بحزن وهي ماعندها مكان تروح له مدت يدها وهي تصب لها فنجال تتقهوى
ثريا وقفت قبالها وسط ابتسامة عريضة معتلية وجهها وهي تفرد ذيك الطرحة الطويلة المطرزة اطرافها بفصوص ذهبية عريضة(بحجم الهللة تقريبا)الخاصة بالزواجات وحطتها على راسها وهي تلف اطرافها على يديها:ها ياالزين وش زينها علي؟
هيفا تتقهوى طالعتها اتسعت عيونها وشرقت بالقهوة وبدت تكح
ثريا جلست قدامها بسرعة وهي تمسح على ظهرها:بسم الله عليش يابنيتي بسم الله عليش والله اني ماظنيت إنش بتخبرينها ياهيفا!!
هيفاء رفعت عينها عليها بعد ماوقفت كحتها طالعتها وكأنها تنتظر تاكيد
ثريا فهمتها:اَي بالله هي ياهيفاء هي المسفع(الطرحة)اللي اهدانيه حمدان
هيفاء التمعت عيونها وهي تطالع ثريا بحدة وبقهر انها تحتفظ بهالمصيبة بنظرها للحين سحبت الطرحة من يدها بقوة وهي توقف ومشت باتجاه باب البيت
ثريا فزت واقفة تلحقها:يابنت علامش!!وش غدا بش علميني!!،،اسرعت بخطواتها تلحقها،،هيفا يابنت ياهيفا
هيفا جرت وفتحت الباب وخرجت برا البيت وهي تجري واتجهت لمشب عمها وانحنت وهي تسحب الملقط اللي على طرف المشب وتبعد الرماد عن الجمر اللي بالمشب
ثريا وقفت عندها وهي تطالعها بصدمة وانحنت وهي تمسك يدها وتسحب الملقط منها بقوة وترميه عنهم بعيد وشدتها من يدها تسحبها عن المشب وبصراخ:علامش انتي علامش!!وش اللي غدا بش تقل طار بش ابليس!!
هيفا عضت شفتها بوسط دموع احرقت خدها
>
>
بعد اسبوع من سالفة الصندوق
>
>
..بيت فالح..
،،عايلة فالح كلها مجتمعة ابو حمدان وجنبه ام حمدان وبينهم المسند وبعد مسافة جلوس شخص وضحى(زوجة حمدان)جالسة وبنتها دلال بحضنها وقبالها هيفاء وحمدان جنبها وبينهم دلة القهوة اللي لنصها وصحن صغير تمر،،
هيفاء كل شوي تمسك العقد تتاكد من وجوده وهي فرحانة فيه كأنها بهاللحظة لبسته
ابو حمدان الشيبة المريض:ها ياحمدان بشر عساهم شروا الحطب كل ابوه وانا ابوك؟
وضحى بابتسامة:لاتروع ياعم اكيدن بايعه وانا كروتي من الغزل بكرة يعطونيها الأمور زينة ياعم زينة الحمدلله
ابو حمدان بانكسار:الشكوى لله غديت همن عليكم فوق الهم
حمدان بعصبية:افا يبه وش هالوجس كلي دونك ولعمرك فدا ياعله!!
ابو حمدان تنهد:الله يفتحها عليك وانا ابوك الله يفتحها من فضله
ام حمدان وهي تطالع الكيس اللي جنب حمدان:وش هاللي غادين به ياوليدي؟
حمدان ابتسم:ماهو ابوي دايمن يوجسه الله يفتحها علي
،،الكل يطالعه باستغراب،،
حمدان لف عالكيس اللي جنبه وهو يشيله بيديه الثنتين من ثقله ويحطه قدامه وعلى نظرهم كلهم وهو يحط يده فوقه:والله فتحها يااميمتي فتحها علي
ام حمدان بابتسامة:ياولدي الطيب ربك مايحط بدربه غير الطيب
حمدان رفع نفسه وجلس ع ركبه وفتح الكيس وهو يخرج الفروة اللي عليها الكلام بذاك الوقت
،،اتسعت عيون الكل باستغراب وذهول بنفس اللحظة،،
حمدان وقف وهو يفرد الفروة قدامهم وبابتسامة:ها وش علمكم؟زينة؟
وضحى بابتسامة:ياعلها مبروكة الزين مايبي له الا زينٍ مثله
حمدان:والله انها هه يعني ماهي بذاك الزين
ام حمدان اتسعت عيونها:خاف ربك ياشين!!كل هالزين بها ولاملت عينك!!
حمدان تقدم لابوه وانحنى شبه جالس عند ابوه وهو يحط الفروة ع ظهره:صدق هي مابها خلاف مير انها مازانت الا عقب مالبسها ابوي
ابو حمدان وهو يشيلها من عليه ويمدها لحمدان بيلبسه الفروة
حمدان مسك يد ابوه:والله ماتطبني(مايلبسها)شريتها من شانك وهي لك يالغالي،،رفع نفسه وسلم على راْسه،،وقليلة بحقك يابيي
ابو حمدان بشك:ولد ياحمدان اصدقني ثمنها منين غديت به؟
حمدان:هماني موجسن الله فتحها علي!!
ابو حمدان ضغط على يد حمدان:اصدقني ياولد
حمدان وهو يسحب يده من ابوه بشويش ويحط الفروة على ظهر ابوه:ومن متى حمدان يوجس اكذاب ياابو حمدان!!
ابو حمدان:علمني العلم ياولد
حمدان:يابيي عاونت لـي رجلن وطلع ربي فاتحها عليه وعطاني الجزا ذهب
ابو حمدان اتسعت عيونه وبخوف:ياولد بلكن انه سارقهن!!الله يكفينا شر صرايمه!!
حمدان زفر:خابرني يبه مآخذ شين حرام ابدن!!وثمن هالذهيبة الصغيرة بعتها وعطيتها الـشـيـخ قسمن لنا بالمزرعة
ابو حمدان اتسعت عيونه:ورضى بك؟!!
حمدان:الله يصلحك يبه ترا ابو غيث مايقصر ولد حلالن طيب لو هالهلال اللي معه
ابو حمدان:والقريشات ضيعتهن على هالفسافيس(أغراض مالها داعي)
حمدان ابتسم:هالفسافيس ماتغلى عليك يابيي ها توكدت ذالحين؟
ابو حمدان زفر:الله يكتب اجرك ياحمدان قل امين
حمدان وقف وهو يرجع للكيس ويخرج منه طرحة واتجه لامه وانحنى وهو يسلم على راسها ويحط الطرحة ع رجولها:وهاذي لام حمدان ياعلها سالمة طول عمرها
ام حمدان وهي تحتضن راْسه بين كفوفها قبل يقوم ويبعد عنها وطبعت على جبينه بوسة كلها حب وسط عيون تلتمع تحبس دموعها:ياعل ربي يسخر لك ياعين امك يالرضي يالله ان تسخر له من يخافك يالله
حمدان سحب يدها اليمين من على خده وهو يبوسها:الله لايخليني من حسش يايمه،،مد يده للطرحة وهو يفتحها،،عاد اني ردتش(يبيها)تفكين المسفع وتراعين اللي به مير دامني قضبت هاليدية والله محدن سواي يحطهن عليش
ام حمدان طالعته باستغراب والكل يطالعه بفضول
حمدان خرج من وسط الطرحة معضد ذهب ثقيل
ام حمدان اتسعت عيونها وهي تسحب يدها:يسدني المسفع عطه مرتك ياولد
وضحى:والله مابدّي شين لروحي عنش ياعمة والله
حمدان وهو يسحب يد امه ويفتح المعضد ويحطه بيمين امه ويقفله ويبوسها:يامحلاه على يديتش ياميمتي يازوينه تبارك الله
ام حمدان بلعت غصتها:الله يغنيك ياحمدان ويزيدك وانا امك
حمدان بفرحة محتويته وهو سوا هالشي البسيط لامه وابوه ورجع لعند الكيس وهو يجلس:بنت ياوضحى
وضحى:سم ياعيني
حمدان وهو يأخذ فنجاله ويرفعه
وضحى فزت واقفة وهي تنزل دلال جنبها واتجهت له ووقفت عنده
حمدان مد الفنجال وبتكشيرة:باردة ومرة تقطع الكبد ياوضحى
ام حمدان طالعت هيفا وبغبنة:وهالعوبا اللي جنبك ارسلها اغدي باللي تريده وشو له ترسل وضحى وهي تعيبانة من الصبح ماتريحت
وضحى انحنت شبه جالسة قباله وهي تمد يدها اليمين له والتفت للدلة وهي تمد يدها اليسار لها وتأخذها وهي للحين ماطالعته:فنجالك
حمدان اللي دخل يده بالكيس من اول ماجلس وطلع من داخله كيس قماش حرير باللون العودي بحجم كف اليد وحطه بيدها
وضحى التفتت له بسرعة تطالعه
حمدان ويدها بين يديه اليسار تحت واليمين فوق الكيس اللي بيدها وبابتسامة:والله ثمن والله ياوضيحة القلب لو انها جميرتن تغدي وتكوي كود انها منش ياوضحى انها مثل اللبينة ع قليبي(يقصد لو القهوة تمشي وتحرق داخله ان هالحرق مثل برودة اللبن على قلبه)
وضحى خجلت وهو يقولها هالكلام قدامهم نزلت الدلة وهي تسحب يدها من يده ووقفت وانحنت له وسلمت على راسه وهي تتحاشى نظراتهم:الله يعوضك بالخير ياابو دلال
حمدان مسكها من يدها وجلسها قدامه وهو ياخذ الكيس منها ويضغط على يدها:انتي العوض كله ياوضحى!!انتي الخير كل ابوه ياوجه الخير،،فتح الكيس المربوط وبوسطه اربع بناجر ذهب وهو يرفعها ثنتين ثنتين ويلبسها،،وصحيح ان بنيتي متربعة بوسط قليبي مير ان حمدان منش أزين من ابو دلال ياوضحى،،مسك يدها وهو يطالعها عليها،،يازين على يديتش ياعل النار ماتمسها
وضحى بابتسامة:كثر الله خيرك ياابـ
حمدان رفع عينه يطالعها
وضحى بضحكة:ياحمدان ماتقصر ياحمدان
حمدان ترك يدها وهو يحس بيجيب العيد لو طول ماسكها
وضحى وقفت بسرعة وهي تتحاشى نظرات عمها وعمتها ورجعت مكانها
دلال وقفت قباله:يبه؟؟
حمدان ضحك
هيفاء فزت من جنبه بسرعة ووقفت جنب دلال وهي تبتسم
حمدان:اعوذ بالله منش يالطماعة!!
هيفاء شهقت:الا والله انك حسود ماعطيتني شين وانا كبيت الصندوق كل ابوه لك!!
،،الكل انتبه لكلمتها،،
حمدان ضحك بربكة:اعوذ بالله صحيح محدن يستامنش ياطول لسانش،،دخل يده بالكيس اللي هبط بشكل واضح بعد ماخرج الاغراض وخرج قطعة قماش ملفوفة وبكلام سريع وهو يتصنع الثقل:يدياتش يادليّل يدياتش
دلال مدت يدينها بسرعة لقدام:هاه هاه
حمدان حط القماش بيديها وبنفس النبرة:افزعي افزعي يم اميمتش اعجلي
دلال جرت لامها وهي تمد له وتنط مكانها:يمه يمه
حمدان يطالعها وهو يكتم ضحكته عليها
وضحى فتحت القطعة
دلال ضحكت بوناسة
وضحى ابتسمت لها:ياماشاء الله كرتة(فستان)!!يازينها عليش ياعيني
دلال اخذتها من يد امها وجرت للغرفة تلبس
هيفاء وهي تطالع دلال بوناسة التفتت لحمدان اللي قبالها وهي تمد يدها:وانا؟!!
حمدان ضرب يده بيدها:يقواتش واللي بحلقش!!
هيفاء كشرت:وانا ياحمدان؟؟
حمدان وهو يدخل يده بالكيس:مابه غير قراطيس عطية عمتي ثريا وعمي مفلح(يعني اكياس الهدايا بوسط الكيس)
هيفا امتلت عيونها دموع:نسيتني!!
حمدان ضحك
هيفا بكت:اهب ياحسدك هذا انت دايم ماتحسبني بشين ابد!!
ام حمدان:الله اكبر عليش ياطول لسانش محدن متنعم بهالبيت غيرش ياهيوف!!
هيفا لفت بتمشي
حمدان مسك يدها وهو يضحك:ام دميعتن تهل على ادناة الدون
هيفا تطالعه:وش تريد؟
حمدان وهو ماسكها بيد ودخل يده الثانية بالكيس وخرج لها جكيت ومده لها:هاش
هيفا اختفت دمعتها وارتسمت ابتسامة ع وجهها وهي تسحب يدها من يده وتاخذ الجكيت:ياتبارك الله يازينه عليش ياهيفا
حمدان ضحك:والله إنش خرطية(تهايط)يابنت!!
هيفا وهي تضم الجاكيت لها:كبني عنك كود تخيرطت على روحي
.
.
نص الليل>>
.
.
،،غرفة ام وابو حمدان،،
هيفاء نايمة مع امها وأبوها بفراش لوحدها وفراشها مكانه المعتاد عند رجولهم كشرت بوجهها وهي تحس بحرارة عند راسها صحت من نومتها وهي تطالع مكان الحرارة اتسعت عيونها وهي تجلس وتشوف جاكيتها يحترق ابتعدت برعب عنه وهي تلتفت تطالع لامها وابوها تبي تصحيهم وكانت صدمة عمرها وهي تشوف الأقرب لها ابوها اللي متغطي بفروته الجديدة محترق هو والفروة بس وباقي الفراش سليم انتبهت لطرف فراش امها المحترق وحطت يديها على عيونها تغطيها وسط انهمار دموع ماوقف من شافت ابوها حبت عالارض وهي مغمضة بتخرج من الغرفة وسط همساتها:حمدان حمدان
.
،،غرفة حمدان واهله،،
وضحى فزت من نومها تصرخ وهي تحس بيدها تحترق
حمدان فز من نومته ع صراخها وطالعها بفجعته
وضحى تبكي وهي تحاول تفك البناجر عن يديها:حمدان عجزت عنها ياحمدان
حمدان مسك يدها بين يديه يحاول يخرج البناجر وانقلب وجهه من الالم وهو يترك يدها وينفض يده اللي احترقت أصابعها من مسك هالبناجر
وضحى نست المها وهي تطالع دلال اللي نايمة بجهة حمدان وبصراخ وهي تشوف بداية النار من جهتها:افزع لدلال ياحمدان افزع
دلال صرخت وهي توقف تحاول تنزل الفستان من عليها
حمدان ترك وضحى وفز لدلال وهو يحاول يفتح الفستان عن دلال ماحس بنفسه الا وهو يطير من ضربة قوية لبرا الغرفة وارتمى عالارض طالع الغرفة بفجعته وانقفل باب الغرفة بقوة وقف وهو يجري للغرفة لكن للاسف كل مااقترب من الغرفة ينرمي عنها بعيد جلس باستسلام بعد محاولاته وهو يغطي اذانيه وسط دموع غبنته وقلة حيلته وهو يسمع صرخات زوجته وبنته اللي يحترقون داخل هالغرفة
هيفاء اللي خرجت من الغرفة جرت لحمدان وببكى هستيري:ابوي ياحمدان ابوي وامي مدري وش غدا بها،،سكتت بصدمة وهي تشوف غرفة حمدان تحترق،،
حمدان طالعها وبدموع الحسرة والندم:كله منش ليه ماطاوعتيني يوم اوجست يمش نكبه ليييه!!
هيفاء طالعته بشهقاتها:مير اني ماعملت بيحصل هاللون ياحمدان
حمدان اتسعت عيونه بفجعة وهو يشوف العقد يغوص داخل حنجرتها فز وهو يلحق طرف هالعقد وجره بكل قوته وانكسرت قطعه بسيطة جدا بيده
هيفاء اتسعت عيونها وهي تشوف حمدان يرتفع قدام عيونها عن الارض  واختفى شهقت بفجعة وهي يغمى عليها
>
>
هيفاء بوسط دموعها رمت الطرحة بوسط المشب وهي تمد يديها للجمر اللي باطراف المشب وترميه فوق الطرحة بدون وعي منها
ثريا سحبتها بقوة وهي تمسكها وبصراخ:انخبلتي ورب النعمة انخبلتي!!
هيفاء سحبت يدها بإصرار غريب على ثريا وجلست عند المشب وهي تطالع هدية حمدان تبي تتاكد بنفسها ان هالهدية تحترق وتصير رماد
.
..بيت فالح..
حمدان:وشلون مالك بدّ والسالفة كلها مربوطة بهالصندوق
راشد:وش ذنبي انا!!انا مااخذت منه شي تركته تركتتته!!
حمدان:انت طلعتني منه وهذا اللي مايريدونه ياراشد
راشد بعصبية:وش تبي مني الحين دام خرجت اتركني بحالي وشو له تلاحقني!!ليش؟!
حمدان انقلب وجهه وهو يلتفت وراه وكأنه يطالع احد:لافين يمّنا!!
راشد قطب جبينه بشك ونسى الخوف للحظات وهو يطالع حمدان
حمدان تحرك لعنده بسرعة ماتمت للبشر بصلة ابدا ومسك راشد من يد
راشد قشعر كل جسمه ووهو يسحب يده من حمدان
حمدان ضغط على يده وهو يطالع قباله يكلم احد:اغد بنا قبل يلفون اعجل،،وسحب راشد معه واختفى،،
.
سعود وقف بالسيارة ونزل وهو يجري وترك الباب وراه مفتوح دخل لبيت فالح اللي بابه مفتوح وهو يصرخ:راااشددد رااااشدد،،دخل ولف البيت غرفة غرفة زاوية زاوية وهو يدور عليه خرج وهو محتار مايدري وش يسوي ركب السيارة،،ماعينته ياجد
الجد بادي زفر:استغفر الله العظيم وأتوب اليه،،سكت وهو يفكر اتسعت عيونه،،يعني يخبره!!ولد ياسعود اغد يم درب المسيل
سعود قطب جبينه:مابه احدن إهنا!!،،سكت وهو يذكره حرك السيارة بكل سرعتها،،
.
..بيت مفلح..
ثريا جالسة جنب هيفاء تطالعها:والله رمدت(صارت رماد)قومي معي يم البيت
هيفاء هزت راسها بلا وهي تشوف للحين باقي منها قطع بسيطة
حمدان وقف عند هيفاء وثريا وراشد وراه
راشد اتسعت عيونه بصدمة واخيرا صدق اللي يصير معه مو كذب السالفة صدق فيها جن وقاصدينه شحب وجهه وهو يشوف كل شي قدامه ضباب مو واضح ابد
ثريا صرخت بفجعة وهي تمسك يد هيفاء وتقوم وتسحبها معها
هيفاء اتسعت عيونها وهي تشوفه وسحبت يديها من ثريا وهي توقف وجرت له
ثريا التفتت لهيفاء وانصدمت وهي تشوفها تجري للغريب اللي ماانتبهت لملامحه تركتها وهي تجري لداخل البيت
راشد وهو يحس بنفسه بيفقد وعيه خلاص عطاهم ظهره وهو يغمض عيونه بقوة ويفتحها يبي يشوف طريقه زين تحرك من عندهم وهو يجر خطواته بثقل يبي يهرب من هالمكان
هيفاء وقفت قدامه وهي تطالعه مو مصدقة انه قدامها بعد كل هالسنين
حمدان تأمل اخته بتمعن تأملها وكأنه يوادعها التمعت عيونه وهو يشوف اخته الصغيرة كبرت
هيفاء مدت يدها تبي تلمسه تتاكد انه اخوها مو شبيه له
حمدان هز راْسه بلا وهو يرجع لورا عنها:ابطيت عنش ياروح اخوش!!
هيفا هزت راسها بايه وعيونها تشكي له طول غيابه
حمدان:تعذري لخيّش(اخوك)شرطت عليهم يأخذوني وثمن ارد العقد ويكبونش ياهيفاء مير انهم قوايا الله حسبيهم ياعيني
هيفاء هزت راسها بلا وسط دموعها
حمدان دخل يده بجيبه وهو يخرج قطعة العقد الصغيرة ومد يده والقطعة بوسطها وطارت من يده واتجهت مباشرة لنحر هيفاء
هيفاء غمضت عيونها وهي تحس بحرارة فظيعة برقبتها لكن خوفها من انها تفقد اخوها اكبر مدت يدها ومسكت يد حمدان وهي تبكي بخوف
حمدان ابتسم وهو يشوف العقد ملتف على رقبتها مد يده وسحب العقد بقوة من رقبتها وقطعه من عليها وصار بيده
هيفاء بدموعها:لاتغدي ياحمدان وتكبني تكفى ياخيي تكفى
حمدان ابتسم وهو يسمع صوتها تنهد:هذا جزا اللي أخذناه وهو ماهو بلنا ياهيفا
هيفاء:خذني معك تكفى خذني ياحمدان لاتكبني
حمدان وهو يحط يده على خدها:مااريد يمش الهوايل انا اخذهن عنش ياعين اخوش
هيفاء هزت راسها بلا:انا اللي عينت ذاك الصندوق مالك بد به ياحمدان
حمدان التفت وراه وهو كأنه يطالع احد
هيفاء شدت على يده بقوة وهي تبكي:لا ياحمدان لا لاتكبني خذني معك
حمدان سحب يده بقوة منها وبعيون تلمع من دموعه:تحرصي على عمرش وانا اخوش ودعتش الله ياعيني ودعتش الله،،اختفى حمدان بلحظة مثل ماظهر قدامها بلحظة،،
هيفاء انهارت تبكي بصوت:لاتغدي دوني خذني معك احتريتك وابطيت عني وذالحين تغدي بلياي لاتغدي وتكبني تكفى،،ظلت تشاهق وهي متكورة على نفسها بمكان مافارقته،،
ثريا خرجت من البيت وبيدها البندقية مصوبتها لقدام وهي ترجف:ابعد عنها ولا ثورت بك!!،،نزلت البندقية وهي تتلفت ماحوله احد ماعدا صوت بكى هيفا اللي مغطي المكان جرت لها وهي تقومه بالقوة،،غدينا يم البيت ياشينة غدينا
راشد يجر خطواته مبتعد عن بيت مفلح وهو ماابتعد كثير ابد
مفلح راجع لبيته على رجوله كالعادة وقف وهو يشوف هالغريب وبالليل لحاله وبحدة:علامك يارجل؟وش غادين بك يمّنا؟!!
راشد ارتمى عالارض بدون اَي حركة
مفلح جرى له وهو يرفع طرف بشته ع كتفه وجلس عنده وهو يصحيه:يارجل وش بلاك؟بسم الله الرحمن الرحيم،،خرج علبة الموية الصغيرة من جيبه وهو يرشها على وجه راشد وانصدم من حرارته،،بسم الله الرحمن الرحيم!!يارجل من انت وش غادين بك!!!
.
وانتهت سالفة حمدان وراشد ارائكم وتحليلاتكم للموضوع💙💙
<اللهم صل وسلم على نبينا محمد>
.