ياسمح المحيا جر الهجينية

الجزء الثاني عشر

                 ،،الـجـزء الـثـانـي عـشـر،،
                     لاحول ولاقوة الا بالله
.
..بيت الشيخ مناور..
..عند الحريم..
،،كان بيت الشيخ مناور اكبر بيوت أهل القرية وبالنسبة لهم بمنزلة القصر بيت واسع وكبير من دورين ويحاوطه حوش اكبر والبيت مزين باللمبات الملونة الملعقة ع جدرانه غير اللمبات اللي مثبتة بسلك نازل من جدار البيت ومثبت بأطراف جدران الحوش وتتحرك مع كل نسمة هوا تهب،،
..بالنسبة للحريم البعض كاشف وجهه بس والبعض منزل عبايته وكاشخ وطبعا فيه منهم بكامل حجابها بس عيونها اللي واضحة من ورا نقابها وكل مجموعة منهم جالسين مع بعض عندهم ثلاجة قهوة بفناجيلها وصحن رطب لابأس بحجمه يسولفون ويتناقلون اخبار بعض..
..وكان بطرف الحوش سماعة شغالة يرقصون عليها البنات ومقصرين ع صوتها وكل بعد فترة تجي حرمة من حريم الديرة تخاصمهم وتقفلها عليهم ويرجعون يشغلونها اهم شي وناستهم حتى لو نكدّوا عليهم..
..كان الكل مبسوط بهالجلسة وهالعشا وكان الجو جميل والكل سوالف ووناسة..
ام غيث محد موازي لفرحتها بهالليلة ولدها ورجع لها بعد غياب كم سنة صحيح يجي للديرة بإجازاته لكن هو وحيدها تخاف عليه حتى من ظله صبرت وقلبها متشفق عليه والحين رجع لو بيدها تغطي الكل ورد غطتهم واقفة بوسط الحوش وضيوفها مليان الحوش منهم وبابتسامة وهي ترحب فيهم:ياحياكم الله يالله ان تحييهم أسفرت وأنورت واستهلت وأمطرت يالله ان تحييهم ياحياكم الله ياحياكم
..عباير وبخوت وحلايا دخلوا من باب الحوش اللي واقفة عنده خدامة وظيفتها توقف عالباب وترجع الصغار اذا خرجوا وتستقبل الضيوف بالزغاريط وقفلته وراهم..
..بنات ام غيث وبنت عمهم تغيرت وجيههم وهم يشوفونهم..
بخوت انتبهت لهم وقشعر جسمها من نظراتهم ورجعت خطوة لورا وصارت ورا عباير
عباير عقدت حواجبها من بخوت رفعت عيونها بعد ماكانت مشغولة تنزل طرحتها والتقت عيونها بعيونهم ميلت فمها بابتسامة وهي تلف على بخوت اللي وراها وتطالعها بحدة وهي تهمس من ورا اسنانها:بخوت!!خليش عاقور بحلوقهم
بخوت وهي تنزل طرحتها وتعطيها حلايا تمسكها:روعوني(خوفوني)ياعباير،،فتحت اول ازارير عبايتها ورجعت تقفلها،،
عباير توسعت عيونها:علامش؟!!
بخوت:هونت ماني بفاصخة
عباير تبي تخاصمها لكن سكتت اول ماسمعت صوت تحبه
مزون تجري لجهتهم وبدون اهتمام للي حولها:وهلا ياهلا وياااااااهلا تو مااستنار(نوّر)المكان
عباير بابتسامة وهي تسلم عليها ورافعة صوتها:اكيد بيضوي من الخير اللي داخل عليش ولا الباقي الله اعلم بحاله
نايفة ضحكت:امحق خير كانه من وراش
ام غيث التفتت لها وهي موسعة عيونها مصدومة ثم طالعتها بتهديد تسكتها
عباير ضحكت وبنفس نبرتها:اي والله صدقتي حتى الخير اللي من وراي واجد بالحيل عليكم وماانتم بوجيه خير الا وجيه شر وفقرن أقشر
نايفة بترد بغبنة لكن سحبتها نوفة ومشت فبها لداخل البيت
ام غيث بابتسامة تهدي اللي صار وبدون سلام بينهم وهذا المعتاد بين العايلتين:حياكم الله يابنات حياكم الله وأنتم أهل بيت حياكم الله
عباير ميلت فمها بسخرية وهي تتكتف بترد
بخوت سحبتها وراها وطالعتها بحدة تسكتها
عباير كشرت بوجهها بزعل
بخوت طالعت ام غيث:الله يحييك ويبقيك وعساكم أفراحكم دايمة
ام غيث طالعت حلايا وهي تنحني وبابتسامة حب:ياحيّها حياش الله ادني سلمي
حلايا تخبت ورا عباير وهي بطبيعتها ماتعطي وجه لاحد الا أهلها
عباير وهي تقرب حلايا منها اكثر بحدة:حلايا ماتداني الغُرب(ماتطيق او ماتحب الي ماتعرفهم)
بخوت التفتت على عباير تطالعها بحدة
ام غيث اعتدلت وهي تضحك بخفة:داسّين(مخبين)البنية وتبونها ماتذّل(ماتخاف)!!
عباير:والله البزر من ربي يعرف الزين والشين محد يشيشه على احد!!
بخوت انجلطت من عباير اللي ماتعرف تسكت
مزون قاطعت الجو:خالة صيفة يزهمونش(ينادونك)بناتش
ام غيث تطالعها:وين أدّن(راحوا)
مزون:يم البيت
ام غيث:ان شاء الله،،طالعت بخوت وعباير،،حياشن الله اغدن داخل،،مشت،،
بخوت بحدة:ماتعرفين تسّدين فمش
عباير ببرود وهي تنزل عبايتها:اذا سدوا فويههم(فمهم)اول
مزون بحماس:يمه ياعباير توقعتش تجدعين(تطيحها عالارض وهي تضربها)نايفة ثم تجدعين امها فوقها
عباير بغبنة:جعلهن بعاقور وش علي منهن،،ابتسمت،،بس عاد زوين هرجش يامزون
مزون:الحمدلله فطينة فطنة فطنة تمشي على الارض
عباير وهي تغمز لها:ياكافي من فطنتش ولّا ناسية علومش
بخوت:مااردى من مزون الا انتي بس انكعمي
مزون انفجرت تضحك وماحست الا بيد تمسكها من يدها تسحبها والتفتت تطالعها بفجعة
ام مزون:أغدي وراي
عباير حزت بخاطرها وبخوت مثلها تقدمت وسلمت عليها:علومش ياخالة
ام مزون سلمت بسرعة وهي مرتبكة:بخير،،وسحبت مزون وراها وهي تبتعد عنهم،،
عباير زفرت وهي تطالعهم ثم التفتت لبخوت وهي تأشر بعيونها لوسط الحوش:غدينا هناش نقعد(مشينا هناك)
بخوت طالعتها:من صدقش!!
عباير:اعجلي علي والصحي عباتش نبي نشبّها الليلة
بخوت:بس ياعباير
عباير وهي تمسك عبايتها وتفكها:مانش فاصختها انا افصخها لش
بخوت سحبت عبايتها من عباير:بافصخها بس امنعيني منش
..عند بنات مناور..
شريفة واقفة وبتعصيبة:علامش انتي؟وش بش عليهن؟!!
نايفة جالسة ورفعت راسها تطالعها وبزعل:الحين بدال ماانش تفزعين معي زعلانة لهن!!
نوفة جالسة جنبها:مير انتي الغلطانة طرتي بهن وهن ماقالن حتى السلام
نايفة طالعت غيثة اللي جالسة جنبها بعد:ناظري خواتش فازعات وتاركاتني!!
غيثة وهي تطالعهن:يعني ماتخبرينهن هذيل هن دايم يحوفون الغُرب ويتركن القرب!!
نوفة توسعت عيونها:الغلط ماينسكت عنه ياغيثة
شريفة اتجهت للباب والتفتت وتطالعهن:اسمعن كلكن عاد لاتنكدن على امي بكلمة الليلة طايرة بغيث ياويل وحدة منشن تعمل شي،،فتحت الباب وبوجهها هدية،،خليش اعقل منهن ياهدية وعقليهن،،خرجت،،
هدية تطالعها مستغربة
نوفة وقفت:خلن المصاخة عنكن وقومن خلصن الأمور معنا،،مشت،،
نايفة بقهر:مالت عليشن من خوات مابهن خير
هدية:علامكم؟
غيثة طالعتها وابتسمت:اقول هدية وش رايش ترزين الراية؟
نايفة تشقق وجهها من الابتسامة وبحماس:اي والله
هدية توسعت عيونها:صاحيات انتن!!
نايفة:اقطعي الشك باليقين وخلي كل أهل الديرة يحيرونش(يحجزونها)له
هدية بخوف:والله ان تذبحني عمتي قبل عمي
غيثة:ماهي مسوية شي وهي تشوف العلم سرا وسط الخليقة(الناس)
.
مزون جالسة جنب امها تتحلطم:ابي اقعد مع عباير وبخوت
ام مزون:انثبري بمكانش ناقصنا قيل وقال
مزون:يمه حرام عليش تراهن بنيات خالتي مزون مزون اللي سميتيني عليها بنيات اختش اللي ماجابتها امش
ام مزون طالعتها ومن بين اسنانها بحدة:انكعمي واقطعي الهرجة وانثبري بمكانش ودواش لاعودّنا(رجعنا)يم البيت
.........****..........
بتال خارج من بيتهم بخطوات سريعة اقرب للهرولة وتفكيره محصور به بس يبي يلمحه حتى يطيح بيدينه
جواد توه راجع من برا بعد السالفة اللي سدت نفسه وقفلت اخلاقه طول يومه وقف بسيارته بموقفها المعتاد قبال باب بيتهم نزل من سيارته ماحس الا بيد تسحبه من قفاه
بتال اول ماشافه تحولت خطوات الهرولة لجري وتولع صدره غبنة اكثر وأكثر وقف عنده وهو يمسكه من قفاه ويسحبه وبغلاظة:هيه انت ياللي حتى انت كثيرة عليك
جواد التفت بسرعة للي سحبه من صدمته وكشر بوجهه وهو يدف يد بتال عنه
بتال اعتدل من دفة جواد اللي ماتحركت فيه شعرة بالأساس وصار بينهم مسافة خطوة
جواد وهو يطالعه من فوق لتحت بشوفة نفس وبرود:خير
بتال ابتسم بشر:أبشر بعزك هالحين يجيك الخير،،ضرب جواد على انفه قاصد مكان الضربة وهو يبرد قلبه وكأنه يستبدل مكان ضربته لرهايف بجواد،،
جواد غطى انفه بيد وحدة بعد الضربة اللي جاته وهو يحاول يوقف نزيف انفه
بتال وهو يحط يديه ع وسطه(يتخصر)وتكلم وهو يكبح نفسه وواضح الغبنة بأنفاسه المسموعة الواضحة لجواد:والحين اَي رجل تكلم؟
جواد توسعت عيونه وهو يدري ان هاذي بس مجرد تحمية من بتال والموت جاية لو جاوب هالسؤال بالذات
بتال قاطع تفكيره بكف زلزل عالم جواد واهتز
جواد لفت رقبته من الكف اللي جاه وحس بالدنيا دارت للحظة
بتال صرخ:اَي رجل ياعديم المروّة
رهايف مسكته من وسطه وسحبته وهي تبكي:تكفى يابتال تكفى
بتال دفها عنه ومسك جواد من وسطه وشاله ورماه بالأرض وهو يجلس فوقه ويفرغ غبنته كلها فيه
جواد يدافع عن نفسه لكن هيهات قدام بتال اقرأ عيال عمه ندم عاللي سواه فعلا لكن حتى لو نطقها لبتّال بتال مابيرحمه
بتال بصراخه:انت تمد يدك على اختي ياالخسيس انت انت
،،خرجوا كل الموجودين  بالبيوت على صراخ رهايف وترجيها لبتّال يترك جواد،،
بتال وهو بقمة انفعاله حس بسحبة قوية من قفاه رفعته عن جواد وتقطعت معها ازارير ثوبه
ابو غازي شات بتال ع بطنه بكل قوته مع سحبته له
،،كل الموجودين انصدموا من اللي يصير،،
بتال جالس عالارض ورفع راْسه لابوه وهو يطالعه بابتسامة رغم ألمه:اخيرا دريت!!توقعت امشي وانت للحين مادريت!!
.
~السيارة~
غازي يسوق متجه لبيت عمه
عذاري جالسة بجنبه مبسوطة:بتسهر معنا؟
غازي بجلافته المعتادة:اكيد
عذاري مدت يدها وسحبت يده اللي كان ماسك فيها الدريكسون وبابتسامتها:طيب اسرق نظرات ولا مافيه اَي حب لي؟!!
غازي ابتسم وهو يضغط على يدها:الغلا ماهو بكلام ياعذاري
عذاري تركت يده بزعل:طيب خلاص مانبي شي،،تكتفت وهي تطالع لقدام،،
غازي ابتسم وهو يمسك يدها:
الـحـب مـاهـو بـكـلـمـة أهـواك وأغـلـيـك..
صـدق الـمـشـاعـر تـبـيـنـه لـك الأفـعـال..
ولا الـكـلام الـعـذب كـلـن بـيـعـطـيـك..
تـلـقـاه مـع شـاعـر وعـاشـق ومـحـتـال..
عذاري كشرت بوجهها:ايه هذا اللي تستفيده من بتال كان علمك شوية رومانسية طيب!
غازي ضحك بخفة ثم باس كف يدها بهدوء:الله يسامحك يعني ابد ماحولي شي
عذاري تنهدت وهي تطالعه بخجل وسط ابتسامتها اللي تكبحها:وش اقول يعني كلك على بعضك حليو
غازي:الله!!حليو!!مو بحلو كامل!!وش الناقص وأصير حلو كامل؟!
عذاري طالعته وهي مترددة تصارحه
غازي بفضول:قولي؟
عذاري:الصراحة ياغازي
غازي رن جواله وقاطعهم رد وهو يستقبل اتصال فيصل الخواف كالعادة توسعت عيونه وهو يسرع بالسيارة ويقفل جواله واتجه لأقرب مخرج بالطريق قدامه
عذاري بصدمة:وش فيه؟
غازي:مصيبة قايمة بالبيت
عذاري بحدة:وصلني لاهلي بالأول
غازي بحدة:مو وقت مناقرتك عذاري
عذاري بصراخ:اذا ماتبي توصلني وقفني بالطريق وانا اروح بنفسي!!
.........****..........
بيت الشيخ مناور
..الحريم جالسين بوسط الحوش ومكونين صفين قبال بعض صف يغني وصف يرد نفس الأغنية بلحن متناسق جميل وسط دق الطبول وتصفيق الحريم(اسمها ملعبة او لعب)ويخالطهم رقص بعض الحضور..
الصف الأول يغني:يامن هو رزّوا(ثبتوا)رايته ريش النعام بعمامته..
الصف الثاني رد نفس البيت:يامن هو رزّوا(ثبتوا)رايته ريش النعام بعمامته..
الصف الاول:ياغيث هو رزّوا رايته ياغيث رزوا رايته  ريش النعام بعمامته ريش النعام بعمامته..
..بهاللحظة دخلت هدية ترقص وسط الحريم وهي لابسة ثوب غيث ومتلثمة بشماغه وكان هذا تقليد خاص لام العريس بليلة زواجه ترقص على نفس الأغنية وهي لابسة ثوب وشماغ وكأنها بالهفعل تثبت لكل المتواجدين ملكيتها وأحقيتها لغيث ومحد له كلمة غيرها ابدا..
ام غيث كشرت بوجهها وسط صدمة شريفة ونوفة عكس نايفة وغيثة اللي زادت زغاريطهم وحماسهم وهم يشوفونها بهالشكل
الصف الثاني رد الاغنية:ياغيث هو رزّوا رايته ياغيث رزوا رايته ريش النعام بعمامته ريش النعام بعمامته..
عباير ابتسمت وهي تشوف اللي يصير فتحت شنطتها
بخوت سحبت الشنطة من يديها وهي تطالعها بترجي:تكفين ياعباير طلبتش امنعينا من الشر
عباير اخذتها من بخوت بالقوة وهي تطالعها بحدة:لا يابخوت ماني بعباير الاولة هم اللي نصوني(قصدوني)وانا ارد عليهم واردى!!،،خرجت من شنطتها نقاب الصقر (خاص للبدو وفيه ناس للحين تلبسه)ولبسته ووقفت،،
بخوت تتلفت حولها وهي تشوف الكل انتبه للي لبسته عباير وفزوا يمسكون مكان حتى يشوفون رقصها وهي اجمل بنات الديرة بالرقص:امنعينا ياعباير امنعينا
عباير سحبت يدها ومشت باتجاه الملعبة اللي قدامها بخطوات بدون اَي اهتمام لترجيات بخوت
الصف الاول:ياام غيث تهنيتي أخذتي ماتمنيتي ياام غيث تهنيتي أخذتي ماتمنيتي ،،عباير دخلت وهي تلف الملعب برقص سريع،،
الصف الثاني رد نفس الشي
هدية احتدت نظرتها لعباير اللي ترقص قبالها
عباير ابتسمت وهي تشوف نظراتها ثم غمزت بتحدي لها وهي تبيها تجاري رقصها وهي واثقة بنفسها
مزون وقفت وهي تصفر وبصوت عالي وسط تصفيقها:عاشت عباير عااااااشت عاشت أخت سعود،،زغرطت بصوت عالي قد ماتقدر،،
نايفة وغيثة يطالعون اللي يصير بقلوب منحرقة وهم ودعم يمسكون عباير ويذبحونها بمكانها
،،الصفوف تحمست وبدوا يغنون أغنية ثانية ولاقدرت هدية تجاري عباير ابد بالعكس انسحبت وسط حماس الكل وعيونهم على عباير وتناسوا امرها وحركتها تماما،،<<استمتعوا بالملعبة لفوا يمين>>
.........****..........
غازي وقف عند بيت عمه
عذاري متكتفة ولاتطالعه ولاتكلمت معه
غازي:انزلي
عذاري بدون لاتطالعه:انزل معي
غازي بنبرة عالية واستعجال:خلصيني
عذاري نزلت وقفلت الباب بقوة
غازي نزل القزاز:اشبعي من بيت اهلك لحد ماتموتين ياعذاري
عذاري توسعت عيونها
غازي حرك بسرعة جنونية متجهة لبيتهم
.
ابو غازي يطالعه بحدة وعروق رقبته بتتفجر من بروزها وبغبنته:يعني تعترف بكل قواة عين بسواتك؟!!
بتال وقف وهو مكشر بوجهه:ليش وش سويت؟
ابو غازي ضربه كف ع وجهه صرخ:وتراددني بشينك يابتال!!
ابو جواد وقف بينهم ووجهه لأخوه:استهدي بالله ياعادل
،،الكل يطالع الموقف ساكت وهم يدرون اذا تدخلوا مابيحلون شي بالعكس يزيدون الموضوع تعقيد وفوق كل ذَا مايدرون وش الموضوع،،
بتال سحب عمه بجنبه وهو يطالع ابوه:وشو الشين اللي سويته هاه!وشو؟!!،،صرخ،،ابي اعرف وش الشين بالضبط؟
ابو غازي صرخ:تدري بسواتك وتقول وش الشين؟!!
بتال طالعه وهو يكتم غيظه:وش اللي سويته حتى تزعل كل هالزعل!!الناس الطبيعين بهالوضع يحتفلون يباركون لكن احنا كل شي نسويه بالدّس عنك(يعني من وراه)!!لأننا ندري بتقلب الفرحة لتحقيق!!
ابو غازي صفق وبضحكة:الله الله الحين صرنا ناس مجانين ولا نليق بالمقام!!بعد ماتغير الوضع وصرنا اصحاب مقاعد!!
بتال بحدة:يحق لي كل شي جنيته من تعبي!!
ابو غازي:وتعبي أنا عليك وينه؟وين راح؟!
بتال طالعه وهو يعض شفته يبلع كلامه
ابو غازي:هاذي نهاية التعب هاذي نهاية تعبي يابتال!!
بتال:كل اللي تبيه انت الشهادة وهاذي هي عندك ومبروزة قدامك وماهي بوحدة ثنتين بعد
ابو غازي صرخ:اعقب!!
بتال صرخ:طول عمرك وانت تبي الشهادة وهذا انا اخذتها وعطيتك إياها!!هاذي هي معك اشبع بها لكن اللي بعد الشهادة كله لي وحقي مالك أي ذرة منه
ابو غازي مد يده ومسكه من ياقة ثوبه وهو يخنقه وينزل وجهه لمستواه وبحدة:وشو يابتال وش تقول؟!!
بتال يطالع ابوه وبغبنة:الشهادة لك والباقي كله لي وحقي لحالي لي لحالي
ابو غازي ضحك بوجه بتال وتركه وهو يدفه
بتال قطب جبينه باستغراب وهو توقع ابوه يذبحه بعد كلامه
ابو غازي طالعه:دام السالفة كذا سدد
بتال بنفس تقطيبته:وش أسدّد؟!!
ابو غازي بابتسامة:دام الشهادة لي والباقي لك رجع كل اللي خذيته مني يابتال من يومك صغير لحد الحين واولها افصخ اللي عليك
بتال يطالعه مصدوم
ابو غازي بحدة:كل شي عليك من خيري هالطول المرتز ولحمك ماكبّره غيري يابتال!!وجاي تقول الشهادة لي والباقي لك!!،،صرخ،،سدّد يابتال سدّد!!
بتال فصخ ثوبه ورماه عند رجول ابوه وهو يطالعه بكسرة خاطر بلمعة وسط عيونه رغم حدة ملامحه:عاد لولا الحيا فصخنا الباقي ياابو غازي لكن أبشر لك اللي يرد لك كل هللة انصرفت عليه
ابو غازي:وهالبيت يابتال
بتال قاطعه وهو يكمل:أبشر اخر الجمايل مااطبّه(ادخله)
ابو جواد بتعصيبة:اسكت يابتال وش هالكلام ياعادل؟!!
ابو غازي بحدة:مالك شغل يامسفر باللي بيني وبين هاللي وراك!!خله يروح جعله مراح الأولين(دعوة بالموت)
بتال مشى
ام غازي وهي تسرع بخطواتها تلحق بتال:ارجع يابتال ارجع ياامي
بتال وقف والتفت لامه وهو قلبه يتقطع عليها ووده يرجع عشانها
ابو غازي صرخ:وسمية
ام غازي وقفت ولاطالعته عينها على بتال
ابو غازي بحدة:تحرمين علي ليوم الدين كانك لحقتيه
،،عياله شحبت وجيههم من كلمته واولهم بتال،،
بتال اسرع بخطواته يبتعد عن امه لايفرق بين امه وابوه
ابو غازي بصراخ وغبنة:اللي يلحقه ولّا يردّه لاهو ولدن لي ولا أعرفه،،طالع بتال وهو يبتعد،،الله لايرده سويد الوجه ناكر المعروف والجمايل!!
الجد نشمي بصوت عالي:أوقف يابتال!!
بتال وقف والتفت يطالع جده
ابو غازي التفت بحدته:يبه!!
الجد نشمي بحدة:انكعم ياعادل
ابو غازي بعصبية:يبه ذَا
الجد نشمي بحدة وسط نبرته العالية وهو يقاطعه:كلكم لبيت الشعر الحين والحريم يم البيت
،،تحركوا كلهم ماعدا ابو غازي ظل واقف وهو يغلي من داخله،،
الجد نشمي بنظرة حادة وحدة:بيت الشعر ياعادل
.........****..........
..بيت الشيخ مناور..
عباير جلست جنب بخوت بأنفاسها اللي تطلع وتنزل بعد رقصها
بخوت طالعتها زعلانة
عباير ابتسمت وهي تنزل النقاب والطرحة:علامش؟
بخوت بزعل:علامي!!وش اللي ماهو بعلامي!!
عباير ضحكت:امنعيني منش ومن هالسلوم اللي مالها سنع
بخوت:ناظريهم وهم يناظرونش
عباير قاطعتها وهي ترجع شعرها لورا بغرور وابتسامة:يناظرون القمر وجاره
بخوت بتعصيبة:عباير!!
عباير صدت وهي تحاول تتحكم بتعابير وجهها لاتبين زعلها
مزون جلست عندهم:خير خير خير علامكم؟
عباير بزعل:مابنا شي
مزون طالعت بخوت وبتكشيرة:علامش عليها؟!
بخوت:انتي اللي وين غديتي عنها؟!!المفروض إنش معي تمنعينها عن خبالها
عباير التفتت بسرعة تطالعها وبنرفزة:وش خباله هاه؟!!اجل اسكتن لهن!!يخسن وانا بنت ابوي!!
بخوت بعصبية:اجل طيري بهن واذبحيهن!!
مزون قاطعتهم:وينها حلايا؟
بخوت طالعت عباير:راحت معش وقت غديتي للملعبة
عباير:مادريت بها
بخوت تغير وجهها من فجعتها
عباير فزت واقفة:ماعليش مع البزران تلهي(تلعب)
.........****..........
..بيت خالد..
عذاري حاضنة امها وسادحة رقبتها ع كتف امها بوجه واضح عليه الضيقة
ام صايل تمسح ع راس عذاري بهدوء وسط تفكيرها  وصمتها وهذا حالها المعتاد
ابو صايل:وش صاير معك عذرية قليبي
عذاري طالعت ابوها وبزعلها:وش فيني يبه يعني!!
ابو صايل ابتسم:يابنيتي هذا زوجك وهذا طبعه للحين ماعرفتيه
عذاري:الى متى يبه الى متى
ابو صايل:يابنتي من صبر ظفر
عذاري:صبرت يبه
ابو صايل:وهو بعد!!
عذاري بنرفزة وهي تترك امها وتطالعه:يبه من ولدك هو ولّا أنا؟!!
ابو صايل ضحك وبنص عين:ياعيّارة اعرف حركاتك انا
عذاري ضمت امها وعينها لابوها وبزعل منه:انا اهم شي عندي امي امي وبس
ابو صايل تنهد:الله يهدي اموركم يابنيتي وانتي سايسيه(يعني هدّيه)والأمور بنزين ان شاء الله
عذاري صدت بوجهها وهي مو عاجبها كلام ابوها
.........****..........
نايفة وغيثة يطالعونها وهم جالسين قبالها ومابينهم مسافة وشبه حاشرينها
حلايا تطالعهم ساكتة بوجه احمر ودموع تحبسها
نايفة طالعت غيثة وباستغراب:علامها منصهر كبدها(تبكي عالصامت،محروقة من خوفها)وحنا ماعملنا بها شي!!
غيثة:ماعليش منها لاتغرش دميعاتها هاذي مثلهن مصيبة تمشي على وجه الارض وباطنها
نايفة طالعت حلايا:تعرفين من انا؟
حلايا وهي تحبس دموعها:خايفة المهّولة(تخوف)
غيثة ضحكت
نايفة كشرت بوجهها ودقت غيثة بطرف كوعها:ووجع
غيثة بابتسامة:وانا؟
حلايا نزلت دموعها:قحطة(جفاف)
نايفة ضحكت:صدقتي والله انها قحطة
غيثة كشرت وهي تطالع حلايا:مالومش تربية الجنية بعاير جعلها بالبعير اللي يعقطها
عباير دفت باب الغرفة بوسط انفاسها السريعة:اللي يعقطش قبلي ويبرك فوقش(يجلس عليها)ياقحطة ياللي مابوجهش خير
حلايا وقفت وجرت لعباير وهي تبكي بصوت عالي وبوسط بكاها:بعاير تزهمس(تزهمش>تناديك)بعاير
عباير اخذتها لحضنها وهي تضمها بخوف عليها:ياعيون عباير وين غديتي عني؟
غيثة وقفت وبصوت عالي وهي تطالعها:هيه هيه علامش!!داخلتن بشرش تجرينه وراش!!
عباير طالعتها وبحدة:ماهو بوراي شري الا قدامي للي مثلش وشرواش
نايفة وقفت وبفزعة لأختها:هيه هيه انتي ياالجاهلة ياللي ماتعرفين السنع والأصول احشمي روحش واعرفي من تخرجين معه
عباير وهي تنزل حلايا وترجعها وراها:خفي علي ياللي مقطوع سرش(سرها)بفرنسا يامختمة الثقافات ووزيرة الأمم المتحدة وربي ان ماحشمتي عمرش انتي واختش انس لاصير اسم على مسمى واخليشن عبرة للي مااعتبر!!
نايفة ماتقدر تبدا الضرب وهي تدري امها تذبحها وبتحدي لعباير حتى تبدا وبابتسامة:ورينا اعبرش(العبرة اللي تقول عليها)اللي تقولين عنها
غيثة بابتسامة:اَي والله تكفين طلبتش اعجلي علينا بالعبرة
بخوت المفجوعة دخلت بوجهها الباكي وهي تدور على حلايا واخذتها من حضن عباير لحضنها وهي تقطع المناقشة الحادة بين عباير ونايفة وغيثة
نايفة تطالعها باستغراب:الحمدلله محد بيعمل بها شي
بخوت التفت عليها بوجهها الباكي بغضب وعطتها كف من كل قلبها
نايفة انصدمت
غيثة توسعت عيونها
عباير تطالعها مصدومة ماتوقعت بخوت تسوي كذا
بخوت بحدة:تاركتكم على ماتبون الا اهلي ماهو بكيفكم تفجعوني بهم ابد،،مشت،،
عباير طالعتهم وهي تمر من عندهم مميلة فمها بابتسامة عريضة
.
.
.
.