ياسمح المحيا جر الهجينية

الجزء الخامس

                ،،الـجـزء الـخــامـــس،،

.........****..........
بيت بادي
بخوت جالسة عند باب البيت من داخل وبدموعها طالعت عباير وبعصبية:هذا اللي تبينه يحصل من سنين صحيح؟
عباير جالسة على يمين الباب متكية بظهرها عالجدار التفتت عليها تطالعها:خليه يحصل يابخوت عالاقل قلبي يبرد وخاطري يطيب مو مثلك اموت باليوم مية مرة من الغبينة!!
بخوت رفعت صوتها بعصبية:عباير!!
حلايا جالسة بحضن بخوت فزت من صرختها وهي تتلفت بينهم تطالعهم بخوف لأول مرة يصرخون ببعض
عباير بحدة وسط تكشيرتها:أوحيش ماني بعيدة!!،،اخذت نفس،،خلينا يابخوت خلينا خلي الخواطر تطيب!!
بخوت بصوت يرجف:انسي ياعباير انسي خلاص!!
عباير:هذا انتي مانسيتي للحين ولاتكذبين على روحش وتقولين نسيت!!
بخوت انفجرت وهي تنزل حلايا من حضنها وسط وجع يدها الفظيع واعتدلت بجلستها وقابلت عباير وبقهر:ايه مانسيت ياعباير مانسيت!!ولاني بمثلك طويلة لسان مااحشم احد!!
عباير قطبت جبينها بزعل
بخوت وسط دموعها:وايه اموت من الغبينة كل يوم مثلكم وأكثر بعد لكن قلبي مو بصاخي(بايع)بسعود ياعباير ولاهو بصاخي ولا بواحدن منكم ابد ابد لو تنقّص رقبتي عشانكم تنقص ولا تصيبكم أذية!!
عباير صدت بوجهها وهي بعد رغم طوالة لسانها لكن خايفة على سعود
.........****..........
بيت الشعر
،،المفروض الجمعة تقتصر على عيال نشمي وزوج عمتهم حصة وصديق ابو غازي الوحيد اللي هو ابو عذاري لكن الجد سبب جلطة للكل وعزم الجماعة والجيران كلهم غازي وبتّال يدورون بالدلال يقهوون وراشد وجسّار يصفون الفناجيل والكاسات بدولاب الزينة بزواية البيت حتى يسهل لهم يوصلون لها بدل مايخرجون برا البيت ويروحون للحوض وراه وفيصل يوزع صحون التمر بين الرجال ورامي يلف بالبخور على ضيوف جده اما بالنسبة لجواد كالعادة معتبر نفسه من الضيوف مايحط يده بشي،،
أصوات عالية ترحب..ضحكات متفاوتة بصوتها مترامية بأطراف المجلس..ابتسامات وشوق وسواالف وطيب نفس مغطية الجالسين..ريحة القهوة الممزوجة بالهيل..ريحة البخور اللي يلف به رامي..ويغلب ريحة هالمكان كله ريحة المشب اللي متوسط المجلس..
الجد نشمي:ياحياكم الله ارحبوا ارحبوا ياحيهم
بتّال وهو متجه لصديق جده الجد ساعي وبنفسه:يالله انك تشغله عني ياكريم اشغله يارب بضروسه اللي أشغلنا بها اشغله عني يارب،،وقف قدامه وهو يأخذ نفس ومد له فنجان القهوة،،سم
الجد ساعي اخذه:سم الله عدوك
بتّال مشى بسرعة من جنبه وابتسم بوناسة ماقال شي وقف قدام جده وبابتسامة وهو يمد له الفنجال:سم
الجد نشمي اخذ الفنجال بابتسامة:اقول يابتال
بتال:أبشر ياجد
الجد:وراك
بتال اختفت ابتسامته اول ماسمع الكلمة
الجد:وراك ماتجّر لنا هجينية؟
بتال انلخم:هاه؟!
غازي وجسّار وفيصل وراشد بعد التفتوا على ابو غازي يطالعونه
بتّال التفت على يمينه يناظر ابوه
ابو غازي يضحك ويسولف مع ابو عذاري
الجد:هوى عدوك ببير ماله قاع اقولك جر الهجينية وانا جدك!!
بتّال اخذ نفس وتحرك للي جنب جده وهو يبي يجر الهجينية
غازي سبقه وجر الهجينية:
يـامـاحـلاا دلـتـن بـالـهـيـل مـمـلـيـه..
تــقـعـد خـوى الـراس لامـن صـار تـعـبـانِ..
بتال ابتسم براحة طلع منها
جسّار ارتاح بعد ماسمع غازي يجرها ونفس الحالة عند فيصل وراشد
غازي مكمل:وارد بـاشـنـفـر ولا حـتـى لـقـمـتـيـه..
مـن فـوق جـمـر الـغـظـى تـحـمـس مـسـيـانـي..
تـحـمـس عـلـى الـكـيـف لاحـردزة(محروقة) ولانـيـة..
يـطـرب لـهـا مـثـل راع الـكـيـف حمدانِ..
الجد نشمي بابتسامة:صح لسانك وسلم هالفم
غازي بابتسامة:صح بدنك
الجد ساعي:اَي والله اَي والله صح لسانه يانشمي لكن هجينيات بتّال غير غير
بتال وقف شعر جسمه وهو يسمعه
الجد نشمي:هي من ناحية غير اَي والله صدقت بتّال غير!!
جسّار همس لراشد وهو يرتب الاغراض:الليلة مامن نوم لا لنا ولا لبتّال!!
راشد بهمس:وش علي منكم انا بنام ببيتنا!!
جسّار طالعه :هب يالجحود!!
فيصل وصل عند جواد طالعه بكره وهو يمد صحن التمر له:خذ
جواد مد يده
فيصل طيحه على ثوب جواد مستقصد:اوه معليش اسف والله
جواد زفر:حصل خير حصل خير
فيصل تضايق وهو كان يبي جواد يتهاوش معه خلص التمر وهو يتحلطم داخله ثم راح عند جسّار وراشد يساعدهم
غازي التفت على جده يطالعه بعتاب وهو ساكت
الجد نشمي ضحك:والنعم بغازي وهجينياته لكن مابعد هجينيات بتّال لاجّرهن
الجد ساعي تنهد:اَي والله يشرح الصدر ويوسع خواطرنا،،طالع بتال اللي كان على يمينه يقهوي،،جر جر وانا جدك جر
بتّال استسلم للي يصير اخذ نفس وطالع الجد نشمي بابتسامة وبوسط نفسه وهو يهز راسه عالخفيف باستسلام نطق:هــيــه ياجدي
الجد نشمي اعتدل بجلسته بعد ماكان متكي وابتسم وبحماس:هيه يابتال
بتال تنحنح وهو يقول بصوت غطى المجلس:أوووه أنـت،،طالع جده وابتسم لحماسه الواضح ثم جر الهجينية بصوته المبحوح اللي أطرب الكل وهو مكمل يقهوي:
يـاالـلـي بـعـيـنـك تـراعـيـنـي..
عـذبـت روحـي وهـي حـيـة..
أدنـى مـن الـدون يـبـكـيـنـي..
دمـعـة عـيـونـي حـشـوكـيـة..
مـاهـو بـحـقٍ تـخـلـيـنـي..
لـلـحـب تـودعـنـي ضـحـيـة..
يـاجـل مـن جـل فـي عـيـنـي..
مـاعـاد لـي غـيـرك رعـيـة..
الـلـي يـبـيـنـي ويـرجـيـنـي..
يـعـرض بـحـسـنـاه والـسـيـه..
ذَا الـلـيـل لاحدٍ يـحـاكـيـنـي..
الأخـلاق عـنـدي تـجـاريـة..
هـم الـمـفـارق مـخـاويـنـي..
أول نـهـاري وتـالـيه..
الشباب منطربين مثل اللي بالمجلس ماعدا جسّار اللي مايحب الهجينيات همس:والله ياليلتنا الليلة ليلة!!الشكوى لله!!
بتّال:وسلامتكم
اختلطت الاصوات بالمجلس بـ(صح لسانك،يسلم لسانك وبدنك،ماشاء الله،...)
الجد ضحك:اجل أخلاقك تجارية!!
بتّال مشى لجده ونزل الدلة والفناجين اللي معه وسلم على راْسه:السموحة ياجد
الجد ضحك:وش سموحته الله يصلحك!!،،ابتسم وسحب بتّال،،
بتّال انحنى شبه راكع
الجد نشمي همس له:من هي وانا جدك؟علمني وأبشر بعزك
بتال اعتدل بسرعة بوقفته وهو يرجع خطوة لورا وبعيونه المتوسعة:جدي!!
الجد نشمي ضحك:محد يقول لبتّال كلمة الليلة اتركوه لحد يكلمه اخلاقه تجارية!!
بتال بزعل:جدي!!
الجد ضحك:اموزحك ماينمزح معك يالمزوح!!
بتال ابتسم:المزوح تعرفه ياجدي
الجد:وينه ماله حس
بتال وهو مستقصد يلف حتى يشوف ابوه لكن انصدم ابوه مبتسم والوضع عادي ناظر راشد وهو يأشر له على جسّار اللي معطيهم ظهره
راشد دق جسّار بقوة
جسّار:اااه وش تبي؟
راشد:بتّال يبيك
.........****..........
مـجـلـس الـشـيـخ
.........****..........
جالس متوسط المجلس متربع ممدد يديه وقافل قبضتيه وشاد عليهن وتلامس نهاية ذراعيه لركبتينه ناسف شماغه ع كتفه رافع خشمه ويناظر اللي قباله ولا عبّر اللي عن يمينه ويساره وهو يسمع همساتهم وطيف ابتسامته يمر بين لحظة ولحظة وهو يسمع الهمسات جالس بكل ثقة وبدون ذرة ندم عاللي سواه ممكن ندم على شي واحد بس وهو انه ماقص لسان هليّل ووقفه عند حده
هلال يطالعه بحقد وبغبنة وهو يشوفه ماهمه احد وبصوت عالي:يبي له قصاص هالداشر معتدي على محارمي وداخل بشره مافيه حشمة لاحدن ابد!!
هليّل جالس جنب ابوه
الشيخ مناور:استهدي بالله يابو هليّل وحقك بتاخذه انت اصبر
هلال وقف وبصراخ:اقولك تعدى على محارمي وفوقها ناوي يذبح ولدي وتقول اصبر!!والله لو انه انت ان ماتقّر(ماتتحمل تجلس)بمكانك!!
سعود التفتت له ورفع راْسه وهو يطالعه وبحدة:ليتني ذبحته!!
هلال توسعت عيونه صرخ:أوحيتوه!!ها علموني ذبحه حلال الحين صحيح؟!!
سعود طالع الشيخ اللي جالس قباله وبحدة:ليتني قاضي(خالص)من ذيك الليلة
الشيخ مناور قطب جبينه وبنبرة عالية:سعووود!!
الجد بادي دخل مقطب جبينه وبجلافته المعتادة مع أهل الديرة وبحدته:وش فيه سعود؟!!
هلال بغبنة وهو يطالعه:وش اللي مافيه سعود!!لّم ولدك يابادي؟
الجد بادي بحدة وتحدي:ولدي منلم ومحشوم طرقن عن خشومكم كل أبوكم!!وولا واحدن منكم يوصل ربع مراجله ياعديمين النخوة!!
،،اعتلت الأصوات بالمجلس والبعض منهم وقف وهو ناوي هوشة مع بادي اللي مايحشم احد،،
العم مصلح اللي كان واقف ورا بادي توسعت عيونه من سمع كلامه ورفع صوته وهو يشوف المجلس اهتاج:اذكروا الله!!وتعوذوا من ابليس!!
سعود فز ووقف جنب جده وبغلاظة ماتبعد عن جده:اللي به خير يخطي خطوة يمّ جدي!!
العم مصلح انتفض قلبه وهو يشوف سعود يزيدهم غيظ وغل عليه وعلى جده تلفت يطالعهم وهو يشوف بعيونهم الغيظ اللي تراكم بصدورهم من فترة ويبون يطفونه
دخل ولد بعمر ال(١٣)وبوناسة واضحة ورا ابتسامته:البشارة ياعم مناور البشارة
،،الكل التفت عليه وللحظة بس انشغلوا بكلام الولد،،
من الجالسين عَصّب عليه وصحّى الموجودين ورجعهم للموضوع:طسّ عن وجيهنا!!ماحنا يمك طسّ يالله!!
الولد كمل طريقه بدون اهتمام للي يهاوشه ووقف قدام مناور:البشارة ياعم البشارة
الشيخ مناور:وش بشارتك يامسعد؟
الولد بوناسة:وصل وصل ياعم
الشيخ مناور:من هو؟!
غيث دخل المجلس بابتسامته:السلام عليكم
.........****..........
بيت عادل
،،بتّال جالس فوق الطاولة بالمطبخ التحضيري ورهايف وأمجاد  وجسّار جالسين عالارض يحضرون السلطة والحلى والفاكهة بالصحون وسط حلطمة جسّار ورهايف عكس امجاد اللي تشتغل وهي ساكتة،،
رهايف قبالها صينية حلا توزعها بالصحون وتتشكى:ليش ابي اعرف ليش ليش؟
امجاد زفرت وهي تشتغل عارفة وش تبي توصله من كلام
بتّال يطالعهم ابتسم وهو يشوف تكشيرة امجاد من رهايف
جسّار وهو يحط السلطة:وشو اللي ليش؟!!
رهايف:الحين المجلس اقصد بيت الشعر مو بمشترك؟
بتّال تربّع وهو منصت لرهايف
جسّار:ايه وثم؟!
رهايف:ليش حنا؟ليش دايم بيتنا اللي يمسك كل العذاب وبيت عمي وعماتي مرتاحين؟ليش ليش؟
امجاد طالعتها وبحدة:انكتمي رهايف!!
بتّال وجسّار انصدموا من امجاد وطالعوها وهي اللي عصبت فجاة وهي متعودة على حلطمة رهايف
رهايف كشرت بوجهها:ماني منكتمة!!انكتمت قبل شوي وسمعت لك!!لكن الحين لا!!
بتال ميل فمه بشك من كلامهم لبعض
امجاد صرخت:رهايف!!!
رهايف:ليش عشاني اقول الصدق!!
أمجاد بنرفزة:الصدق ان البنات ماسكين ضيافة الحريم ولا جلسوا وهالحلا من عمتي حصة وعذبة وعمتي عذبة مايحق لك تتشرهين عليها وانتي عارفة وضعها!!
رهايف:وانا ماقلت مقصرين!!ابيهم مرة وحدة بس يمسكون اغلب الأشياء مثلنا وحنا نرتاح!!
امجاد:ماورا الراحة اللي حنا فيها الحمدلله!!اللي يسمعك يقول حنا طابخات الذبيحة!!
رهايف رمت الملعقة بالصينية واعتدلت بجلستها وهي تطالع امجاد تبي تذبحها
بتّال قاطع هوشتهم وهو يغني ويدق عالطاولة يستعجلهم ويغيظهم بنفس الوقت(بلحن أغنية بالله تصبوا هالقهوة🌚):بالله تحطوا هالسلطة تحطوها زين..حطوها بالصحون وضبطوها زين..
جسّار بتنفيسة:اذلف يرحم امك عن وجهينا مانبي ازعاج
بتّال بغرور:لك الشرف اطربك بصوتي شفهم برا يتذابحون عشان بحتي الذبّاحة
جسّار بقهر:هـه هـه هااا نشوفك شوي وش بتسوي مع عادلنا اذا راحوا ضيوفه
بتّال قشعر جسمه:يارجال اوص بس لاتذكرني احسني انمغصت
رهايف لفت على جسّار تطالعه وبحماس:وش سويتوا وش وش!!
امجاد:رهايف قومي جيبي الصحون
رهايف بعناد:ماالحقها!!
بتّال:انا اجيبهن خليك
امجاد طالعته وبحدة:لا ماتعرف لها تقوم هي!!
رهايف وقفت وطالعتها بعصبية:ناقصه رضاعة يعني!!
جسّار كتم ضحكته وهو يناظر بتّال
بتّال يسمعها منجلط وساكت
رهايف:وش اللي مايعرف!!هذا هو وش طوله باقي أنملتين ويصير نخلة وتقولين مايعرف!!
امجاد طالعت رهايف:مثل ماطلعتي عالكرسي والرخام وحطيتيها فوق المطبخ تقدرين تطلعين وتنزلينها!!
رهايف تكتفت وبسخرية:والله!!مادريت ان الموضوع سهل كذا!!
أمجاد وقفت ومشت:خلاص شكرا ماابي منك شي
جسّار ارتفعت حواجبه من قوة التناقض
رهايف مشت وراها
بتال لحقهم
رهايف وهي تسرع بخطواتها:مقومتني ثم تقولين شكرا!!لا والله مو بكيفك،،مرت من جنبها ودفتها عالخفيف وكملت طريقها بدون ماتطالعها،،اخر زمن!!،،وقفت عند رخامة المطبخ،،
امجاد لحقتها وسحبتها من بلوزتها من ورا ورجعتها لعندها
رهايف التفتت لها وهي تدفها عنها
بتّال وقف بينهن:هدوا وش فيكم اليوم زعلانات من بعض!!
امجاد تطالع رهايف اللي ورا بتال بس ماتشوفها:لاتتدخل!!
رهايف دفته عنها عالخفيف حتى تشوف أمجاد:ابعد يالجثة!!
بتال ابتعد خطوة مع دفتها ووقف ووجهه عالمطبخ وهو يزفر نفذ صبره وهو يسمع مهاوشتهن وراه
جسّار وقف واتجه لهن وبحدة:مو وقت مهاوشتكن ابد يالسخيفات!!
امجاد:مالك شغل جسّار ابعد
رهايف:اتركنا لسخافتنا!!اذلف انت والجثة برا!!
بتّال لف عليهن ومسك كل وحدة من شعرها وشدها
رهايف وأمجاد صرخن مع بعض بصدمة من بتّال وألم من شد شعورهم بنفس الوقت
جسّار كتم ضحكته وهو يشوف اشكالهن وبتّال منفس عليهن
بتّال:غلطتن على بعض وسكت!!غلطتن علي وسكت!!غلطتن على جسّار وبرضه سكت!!لكن تطرديني يارهايف بقلة الحيا ذي لا لا ماتمشي عندي ابد وأنا بأدبكن يابنات عادل!!
رهايف رافعة يديها تحاول تفك يده عن شعرها:وجعوه بتال شعري وراي حريم اطلع لهم بعد شوي بتضيع مستقبلي!!
بتّال:خلف الله على مستقبله اللي بياخذك
جسّار انفجر يضحك
بتّال تركهم وهو يشوف امجاد تلمع عيونها عكس رهايف اللي متعودة على مضارباتهم وهوشاتهم حتى لو بكت قدامهم عادي لف للمطبخ مد يديه بدون لايرفع نفسه ولمس طرف الصحن الكبير اللي بوسطه صحون التوزيع القزاز براحة:أبعدن شوي تعرفون ترتيب رهايف بِسْم الله عليها عساني مااحسدها عالسناعة!!
جسّار رجع لمكانه بابتسامة
امجاد رجعت لمكانها تكمل شغلها لانهم تأخروا بالحيل
رهايف بزعل:لا ياشيخ
فيصل واقف عالباب:وش فيكم تأخرتوا!!ابوي اكلنا بنظراته اخلصوا علينا عجلوا!!
بتّال يرجع بخطواته لورا وهو يسحب الصحن بشويش يبي ينزله حتى يستخدمون صحون التوزيع الصغيرة اللي بداخله:طيب طيب لاتزعجنا!!
رهايف ابتسمت بخباثة ومدت يدها تقرص بتال من جنبه بقوة:اجل انا ماارتب زين!!
بتّال تحرك من قرصتها وهز الصحن تغير وجهه اول  ماحس بالصحون جاية ورا بعض نزل يده اليسار بسرعة وصار ماسك الصحن بيد وحدة رغم ثقله ولف لرهايف اللي على يساره وهو يوسع خطوته ويقرب نفسه قد مايقدر منها ودفها بقوته الباقية بعيد عنه لايصير لها شي
رهايف تحركت خطوات معدودة بس وكانت هاذي هي كل قوة بتال الباقية بس هالخطوات كانت كفيلة تبعدها مثل مايبي بتال
بتال بمحاولة اخيرة منه يستدرك الوضع لف رجع لمكانه بسرعة وهو يرفع يده يبي يمسك الصحن ومسكه لكن بعد مااستقبل كل الصحون اللي بعضها تكسرت على راْسه واللي ماتكسر على راْسه ضرب باكتافه او كمل طريقه للأرض وتكسر حول رجوله او على أطراف أصابع رجوله
،،عم الهدوء المكان وهم يناظرونه بفجعة وصدمة،،
ام غازي جت عالصوت بفجعة توسعت عيونها وهي تشوف بتال حوله القزاز
بتال معطيهم ظهره ورافع يديه وماسك الصحن الكبير
جسّار فز واقف ومشى له ووقف على أطراف القزاز اللي حوله رغم ان القزاز تبعثر بالمكان كله لكن الأغلب حول بتال وبرعب:بتال؟!
ام غازي جرت له وبخوفها عليه:بتال
جسّار مسكها باللحظة الأخيرة لاتتوطى بالقزاز ويصير لها شي وبحدة:يمه!!
بتّال تلون ثوبه باللون الأحمر من قفاه
رهايف بردت عظامها وهي تشوف دمه
فيصل توسعت عيونه وظل مكانه عالباب ماتحرك لادخل داخل ولا هو اللي طلع
ام غازي تدف يد جسّار عنها وبقلب بينفجر من الخوف اللي تخفيه:فكني ماتشوف اخوك يصب دمه!!
امجاد اللي واقفة جنب امها مسكتها وبصراخ:يمه بنبلش فيك بعد!
جسّار اللي انفقع قلبه صرخ:بتاااال!!!
بتّال لف عليهم بشويش وهو لازال رافع يديه ماسك الصحن الكبير وطالعهم ساكت
جسّار عقد حواجبه
بتّال بوجهه الشاحب:وينكم؟ليش قفلتوا اللمبات!!
،،توسعت عيونهم بصدمة انخرسوا وتغيرت وجيههم كلهم وهم يناظرونه وسط رجفة قلوبهم قبل عظامهم من كلامه الوحيدة اللي صدر منها رد فعل واضح هي امه وردة فعلها كانت شهقة بصوت واضح للكل،،
بتّال انفجر يضحك وهو يطالع اشكالهم:وربي تهبلون!!خفتوا علي!!الحمدلله طلعتوا تحسون فيني وتخافون علي!!
ام غازي بلمعة عيونها من الدموع وبقهر صرخت:بتااال وربي حسابك عسير معي ياقليل الخاتمة
جسّار عض شفته بغبنة منه
امجاد زفرت براحة
رهايف ماعاد تحملت توقف جلست مكانها
فيصل اخذ نفس عميق يهدي نفسه
بتال وهو يرمي الصحن لقدام:لاحد يقرب مافيني الا العافية الحمدلله،،حنى نفسه ومسك أطراف ثوبه ورفعه وربطه على وسطه،،
جسّار يطالعه باستغراب:هيه هيه وش بتسوي
بتّال:بأشقح القزاز!!
جسّار:يامهبول لايصير لك شي
ام غازي:بتالوه انثبر مكانك!!
بتال ماسمع لهم اخذ نفس ونط وهو يسمي وشقح القزاز على قولته مثل مايبي لكن رجله طبت بالصحن وزلق فيه واختل توازن بتال وضرب عالارض بظهره وهالمرة ماقدر يكابر ويقاوم الألم مثل قبل شوي وطلعت منه شهقة من الألم اللي حس به غصب عنه عقد حواجبه وهو يحس الدنيا هدوء ماعاد يسمع اَي صوت ولا حتى صوت انفاسه والنور يخف بالمكان والمصيبة يخف بسرعة خوفته همس بكلام مو مسموع لهم وهو يظن انهم يسمعونه اظلم المكان بعيونه وهينا غمض عيونه باستسلام وغاب عن الوعي تماما
جسّار رفعه وهو يسمي عليه ويصحيه وبخوفه:بتال بتال قوم يااخوك بتال تسمعني بتال،،لمه لحضنه وهو يشوفه مايرد لمه اكثر وسط دقات قلبه السريعة ووجهه المخطوف بخوف عليه وهو يشوفه مابه حيل ويتفلت منه كل مارفعه ولاهو قادر يشيله لحاله،،
امجاد مسكت بتال تساعد جسّار وهي تشاهق بشهقات مكتومة
ام غازي تطالعهم جامدة بمكانها ماتحركت وهي تشوف حالتهم
رهايف عينها على بتّال ماتشوف احد غيره ماتشوف الا بتّال ودمه بس
فيصل يطالع دم بتال اللي ملا جسّار ماتحمّل يظل واقف بمكانه لف عنهم وجرى لبيت الشعر وقف على بابه بوجهه المخطوف وصدره اللي يطلع وينزل بأنفاسه السريعة والمخنوقة وهو يكبح عبرته وعيونه تلف بالمجلس تدور عليه تدور على شخص محدد
،،هدا المجلس وهم يطالعونه باستغراب،،
غازي عقد حواجبه وهو يطالعه
راشد والجد وأبو جواد والأهل الخاصين كلهم توتروا من شكله
فيصل شاف اللي يبيه جرى له ووقف قباله وبصوت مخنوق:يبه
ابو غازي فز على حيله وبحدة:وش بلاك ياولد؟!!
فيصل:يبه بتال يايبه بتال
ابو غازي دخل قلبه الخوف وتغير وجهه:وش فيه اخوك انطق!!
فيصل وهو يكافح عبرته:ناقع بدمه يبه ولايتحرك!!مايتحرك يبه مايتحرك ابد!!
غازي رمى الدلة اللي بيده وجرى لبيتهم  بكل سرعته وتبعه راشد يجري وراه
.
.
.