ياسمح المحيا جر الهجينية

٤٦

    ،،الـجـزء الـسـادس والاربـعيـن،،
استغفر الله العظيم من كل ذنب عظيم،لاحول ولاقوة الا بالله
.
..عند الرجال بالمكان المعتاد..
،،المكان ازدحم بالحضور واختلطت ريحة الحطب بريحة القهوة اللي تفور فوقه..وجيه مبتسمة تسولف وصفين يلعبون فيها الرجال وهم يتبادلون الردية،،
الشيخ مناور يطالعهم بصدمة من وجودهم
ابو هليّل جالس جنبه انحنى يمينه وهو يهمس:مناور ذَا ابو عادل وعياله صحيح!!
الشيخ مناور بصدمته وهو تمر به ذكريات حنين لشي محد يدري به همس وعينه عليهم:ايه ايه هم هم ياهلال هم
ابو هليّل اتسعت عيونه وهو يلتفت لمناور:اجل تصالحوا!!
الشيخ مناور بابتسامة:زينٍ على زين!!
الجد نشمي عيونه تنطق فرح وهو بالديرة يحضر أفراحها يتأمل كل شي بعد غيبته الطويلة
ابو غازي جالس  جنب ابوه بتكشيرة مرتسمة على وجـهـه وهو كل ماانمد له فنجال اخذه وحطه قدام جسّار اللي عن يساره
جسّار وظيفته الليلة يشرب القهوة والشاهي عن ابوه بوسط حلطمة بينه وبين نفسه باين تعابيرها على وجـهـه
الجد نشمي التفت يمينه لراشد:وينه خالك؟للحين ماعود؟
راشد:المكان بعيد ياجد
الجد نشمي:تاخر تاخر ياراشد
راشد:الإرسال يقطع بالديرة ادا ماكان مافيه والمكان اللي دليته عليه بعيد شوي غصب يتاخر والليلة زواج اكيد الطريق زحمة
الجد نشمي زفر:الله يزينها الله يزينها
الجد بادي دخل للمجلس
سعود وراه
غيث كشّر بوجهه ولو عليه ذبحه بعد موقف العصر
الجد نشمي فز من مكانه واتجه له:هلا هلا يالله ان تحييه ياهلا
الجد بادي تنحنح وهو يكابر بشوقه للحين وسلم عليه ببرود عكس سلام نشمي الحار:الله يسلمه ويبقيه
الجد نشمي مسكه من يده وسحبه وراه وهو يتجه لمكان جلسته
ابو غازي صدّ بوجهه عنهم
راشد قام من مكانه عنهم
الجد نشمي جلس وهو يجلسه جنبه
سعود اتجه لعند جسّار وهو يشوف ان ماله مكان يجلس فيه وجلس جنبه
راشد جلس جنب سعود
الشيخ مناور:ولد ياهليّل
هليّل جنب غيث وقف بمكانه:سم ياعم
الشيخ مناور:ادنى يمي
هليّل اتجه له وهو ينحني شبه جالس عنده:سم
الشيخ مناور همس له:تناول(خذ)الدلة الزينة والخلاص(تمر)واغد به،،وهو يأشر بهزة خفيفة براسه لجهة نشمي،،يم هذاك الرجل
هليّل التفت يطالع مكان ماأشر له واتسعت عيونه:عونك بادي!!!
الشيخ مناور بتكشيرة:الشايب اللي يمه ابد به اول ورحب به زين زين
هليّل:ابشر،،فز لجهة التمر اللي مجهز على جنب عند رصة الكاسات والفناجيل اللي ماتبعد عن المشب بمسافة طويلة واخذ التمر واتجه لهم،،
الجد نشمي بابتسامته:تشوقت يابادي للديرة تشوقت بالحيل
الجد بادي بنرفزة:امحق ديرة اي بالله اللي تشوقت لها وش رايدن منها!!
الجد نشمي قطب جبينه:ديرتي وأهلي وناسي والله ان البعد شين شين ماوراه!!
الجد بادي:مير انه ازين لك كبيتها ليتني مطاوعك وغادين معك!!بقعا تصرمها
الجد نشمي:حرام عليك يابادي وشلون يطاوعك قلبك تنصاها بالشينة!!
الجد بادي وهو يصد:الا حلالن بها وبناسها بعد وصريمة!!
ابو غازي مميل فمه بابتسامة:مير الصرايم ماتنصى احدن عبث!!
الجد بادي زفر نفس بضحكة خفيفة وبسخرية:بالله عليك؟!! ابو غازي:الجمر مايحرق الا رجل واطيه!!
الجد نشمي بحدة وهو يلتفت له:انكعم ياعادل انكعم
الجد بادي عض شفته وهو يكتم غيظه ويصد بوجهه عنه
أبو غازي بابتسامة:وانا وش اوجست!!
ناصر وقف عندهم بابتسامة وهو يقهويهم:يالله ان تحييهم
جسّار بابتسامته:تسلم تسلم
هليّل وقف جنب ناصر عندهم وهو شايل التمر ومد التمر للجد نشمي:حياك حياك
الجد نشمي اخذ تمرة بابتسامة:تسلم تسلم
هليّل نزل صحن التمر بين الجد نشمي وابو غازي بعد مامر به عليهم:حياك على عوض غيث
سعود احتدت نظرته وهو يشد ع قبضتيه ويطالعه
جسّار كشّر بوجهه وهو يذكر تعامل غيث الشين معه وبغبنة ماقدر يمسكها:تقصد الله يعوض اللي بتاخذه؟!!
ابو غازي طالعه وبحدة من بين اسنانه:جسّار
هليّل كشّر بوجهه بحدة:الا ياحليلها خذت خيرة الرجال ولد شيخ ومهندس سارين صيته بين الديار،،مشى وتركهم،،
ابو غازي طالع جسّار وبحدته:انكعم ياجسار مالك شغل انكعم
ابو صقر(من ديرة جنبهم)دخل بوسط ابتسامته المجلس وبصوته العالي وهو يسرع بخطواته لمناور:مبروك مبروك ياعله معواض الهنا مبروك
الجد بادي بلع ريقه وهو يكتم الكلام بقلبه خصوصا ان الضيف من برا ديرتهم
الشيخ مناور وقف وهو يضحك:يامرحبا يامرحبا الله يحييه ويبارك به ياهلا ارحب أرحب،،سلموا على بعض،،
ابو صقر سلم على غيث وبابتسامة:مبروك مبروك واهنيك بعد الظليمة تعوضت(ربي عوضه)وواهنياها ربي عوضها بعد اليتم
غيث بابتسامة:جزاك الله خير جزاك الله خير
سعود وقف وبغبنته:وش انهي الظليمة اللي غدت يمه!! ابو غازي قطب جبينه يطالعهم بعدم فهم للي صاير
راشد وقف وهو يطالعهم بحدة كل اللي يعرفه ان غيث زوج بخوت وحالة بخوت منه
ابو صقر التفت له وابتسم باحراج:مامن لوم يارجل هي عوايدنا نوجس هاللون وانت خابر
سعود بحدته:لا ماني بخابر لاغدت الظليمة من يمه وشوله توجسها اجل!!
ابو هليّل وقف:اقطع الشر ياسعود والليلة فرحة مانريد شين يكدرها!!
راشد بحدة:اجل نتكدر احنا عشان خواطركم تخسي!!
ابو غازي طالعه وهو موسع عيونه بصدمة من راشد
ابو هليّل اتسعت عيونه:اعقب تخسيني يالوغد!!
الجد نشمي وقف:تعوذوا من ابليس تعوذوا يالربع
الشيخ مناور زفر:اعوذ بالله منك ياابليس اعوذ بالله منك الف خلاص ياابوهليل اقطع الشر انت مثلهم وانتم حياكم الله ضيوفنا عالراس والعين الله يحييكم الله يحييكم
غيث باستعطاف للحضور وهم يشوفون هجوم راشد وسعود عليه:مير انه محدن اوجس اكذاب ياشيخ هاذي جوازة العوض وهذا الصحيح!!
الشيخ مناور اتسعت عيونه وهو يطالع غيث اللي مستحيل يسكت وعض شفته بغبنة
جسّار وقف :ايه صح فعلا زواج العوض لك بعد ماخلصت اللي براسك ببنت الناس وهي الله عوضها باللي احسن منك!!
الجد بادي قطب جبينه
سعود التفت يطالعه باستغراب
غيث بسخرية وشوفة نفس:ومن يرضى بها!!
سعود صرخ:اعقب لاتطريها على لسانك النجس!!
جسّار رفع صوته وبسخرية من كلامه:اقولك الله عوضها باللي احسن منك تقول من يرضى بها!!وش فيك ماتفهم!!
غيث انقلب وجـهـه
جسّار ميل فمه بابتسامة وهو يشوف وجـه غيث:انا خاطبها من اَهلها وعطوني!!
ابو غازي انصعق من اللي يسمعه
الجد نشمي يطالعه بعدم استيعاب اللي قاله
راشد اتسعت ابتسامته
سعود يطالعه بحيرة مايدري يفرح لانه جسار او يخاف اذا درا جسّار بالحقيقة واذا درت بخوت بانها بتعيد التجربة
الجد بادي وقف وهو يرسم ابتسامة على وجـهـه وبصوت عالي:مير اني خابرن انكم ماتريدون يمي خير لا انا ولاعييلي مااوجست طريا يمكم ابدن الرجال طلب وانا عطيت والله عوضها باللي اخير منك ياغيث دكتورن بالمستشفى،،اشر بطرف عصاته عليهم وهو يحركها،،تموتون بلياه لامرضتوا دكتور دكتور وهذا والله العوض الزين اللي ماوراه
غيث بصراخ:معصي محد ياخذ بخوت محدن ابد!!
جسّار بحدة وهو يطالع غيث:اوووص لاتجيب اسمها على لسانك!!تركتك تسولف على كيفك لكن ماتنعطى وجه صدق ماأسمح لك تنطق كلمة على اهلي أقص لسانك سمعت!!
ابو جواد دخل للمجلس بوجهه المخطوف واتجه لهم وهو يشوفهم
ابو غازي وقف وهو يحس بصداع من اللي صار قدّامه مسك جسّار من يده وهو يلفه عليه
ابو جواد وقف عندهم ومسك ابو غازي اللي اقرب له من يده بقوة
ابو غازي التفت عليه وهو يترك جسّار ومقطب جبينه وهو يطالع وجـهـه:وش فيك يامسفر؟
ابو جواد بقلقه:طلبتك ياعادل طلبتك
الجد نشمي وقفوه يطالعهم
ابو غازي قشعر جسمه وبحدة:انطق يامسفر علامك!!
ابو جواد:جواد ياعادل جواد بالسجن
ابو غازي تغيّر وجـهـه:علمني بـالـسـيـارة مشينا الحين مشينا
ابو جواد سبقهم للسيارة ووراه الجد نشمي
ابو غازي التفت لجسار وبحدة:بكرة وانت عندي سمعت
جسّار بلع ريقه وهو يشوف نظرة ابوه وهز راْسه:ان شاء الله ان شاء الله
ابو غازي مشى وراهم يلحقهم
الجد بادي رفع صوته بوسط ابتسامته:عاد حياكم الله عالمعواض بوقته مبروك ماعملتوا وعساه هني(يقصد العشا)تصبحون على خير،،مشى ومشوا وراه سعود وراشد وجسّار،،
.
..بيت مناور..
بخوت واقفة قبالها رسمت ابتسامة على وجهها وسط انفاسها السريعة وهي ترفع أطراف الثوب بيديها:خابرته ياأم غيث؟خابرته؟
ام غيث عضت شفتها بغبنة للحظة ثم ابتسمت وبسخرية:لذالحين خاطرش يريده!!عزّاه ياغيث كلن يريدك
بخوت انفجرت تضحك قبالها بصوت عالي
ام غيث كشرت بوجهها
بخوت بابتسامة:مَن اللي يريده؟!!،،اشرت على نفسها،،أنا؟!!،،لفت بنظرها عالموجودين حولها،،كل ابوهم خابرين البير وغطاه!!
ام غيث بحدة:تعقبين
بخوت بصرخة:محد يعقب غيرش!!كل ابوهم خابريني ماهو ماني برايدته الا عايفته العوف اللي ماوراه وانتي براسش خابرة اني من اولها وانا اتهجج بروحي عنه!!
ام غيث بحدة:ايه من سواد وجهش
بخوت:تعقبين كلن يدري ببخوت وطبايعها حتى عقب ماعينت الظليمة من وراكم لذالحين بخوت على ماهي عليه،،سحبت الثوب من عليها بقوة وهي تمد بوجه ام غيث،،اوجس يمش تخبرينه تخبرين؟
>
>
قبل اربع سنوات
>
>
بخوت جالسة قبال المشب بقميص بني بأكمامه الطويلة بشعرها اللي رافعته كله ولافته بوجه شاحب مرتسمة عليه بقايا اثار كدمات قديمة ضامة رجولها لصدرها وتطالع النار كيف تاكل بعضها بهدوء غريب يحتويها كلها
حلايا بنت الشهر بمهدها على يمين بخوت عالارض اعتلى صوت بكاها المكان
بخوت مااهتمت لها ابد رفعت عينها للباب اللي يدق وقفت وهي تجر خطواتها للباب فتحت الباب بشويش ماحست الا بدقة قوية للباب رجعتها لورا وانفتح الباب كله
ام غيث داخلة وهي شايلة شنطة وبابتسامة وهي تزغرط بأعلى صوت:ياسعدش ياصيفة ياسعدش،،زغرطت،،
بخوت انرعبت وهي تطالعها وقفلت الباب بكل قوة وهي ترجف
ام غيث التفت لها وبابتسامة سخرية:علامش ذلّيتي(خفتي)!!مايريد لش شوف!!كبي عنش هالذلة اللي على غير سنع وانتي محدن يحرز(يقدر)عليش!!
بخوت برجفتها:ويوم انه مايريدني علامش غادية يمي وانا ماني بمرتن له
ام غيث:جيت اوجس يمش العلم
بخوت قطبت جبينها
ام غيث بابتسامة:غيث وخطب هدية
بخوت تطالعها ساكتة
ام غيث:هدية اللي انتي خابرة مير انه يحتريها تقضي من هالمدرسة وثمن تغدي حليلتن له
بخوت سكتت وهي مالها شغل فيهم ولاتبي تعرف عنه شي
ام غيث:وانا لفيت بروحي اوجس العلم يمش محدن غيري كود إنش للحين بقليبش شين له
بخوت وهي تضم يديها تخفي رجفتها وتقاطعها:مابقلبي شين له ابدن ابدن
ام غيث ضحكت:ايه ايه والمريّة(الدليل)،،رفعت الشنطة،،انش كابّتن(تاركة)غرضانش من غديتي من يمنا!!
بخوت وهي تهز راسها بلا:مااريد شي ماني برايدة شين ابدن ابدن
ام غيث ابتسمت برضا:زين زين،،جلست عند المشب وفتحت الشنطة،،وهالغريضات ولمهن غيث
بخوت قشعر جسمها وهي تسمع اسمه ورجعت بخطواتها لورا من خوفها منه
ام غيث وهي تسحب من ملابس بخوت وترميها بالمشب:وانا لفيت يمش اوكد العلم كود ظل شي بخويطرش لذالحين
بخوت اتسعت عيونها وهي تشوفها ماسكة طرحة زواجها السودا المطرزة بالخطوط ذهبية جرت لها بسرعة وهي تمسك الطرحة وتسحبها منها وبعصبية:كبيها ماهي لكم ولا منكم كبيها،،اخذتها وهي تحضنها،،
ام غيث وقفت ومدت يدها وسحبتها بقوة من بخوت وبعصبية:هاتيها اوجس لش
بخوت:تركت امي لي ماهي بمنكم كبيها
ام غيث اخذتها ورمتها بالمشب
بخوت تطالع الطرحة وهي تحترق ونزلت دموعها بقهر من هالعايلة اللي ذوقتها المر
ام غيث ببرود وهي تجلس عند الشنطة ورفعت  كحل بخوت اللي ماعمرها استخدمته وهي تطالعه بسخرية ورمته:ايه الله يكتب لك العوض ياعيني،،وهي تطالع بخوت عن طرف،،مامن زين مير انه الشكوى لله،،سحبت الثوب الكحلي اللي كان فستان بخوت بزواجها واللي اختارته هي لخاطر ولدها مو حبا ببخوت وتنهدت وهي تطالع حلايا اللي للحين تبكي وهي ماكلفت نفسها تشوفها حتى ورمته لعند حلايا ووقفت وهي تطالع بخوت وبتكشيرة،،لاغدا الوقت باكر ونشدتك هالبنية عن عرسش لاتوجسين يمها اكذاب ادعيها تراعي هالثوب اللي محدن لبس مثله قبلش بهالديرة وعلميها بثمنه اللي تنافضوا الرجال يوم اوحوه،،بتشديد على كلامها،،وأدعيها تراعي ان ابوها ماقصر بش بشين ابد
بخوت عضت شفتها وهي تطالعها بقهر
ام غيث بتكشيرة وتهديد:واياش ثم اياش يطري براسش يوم طاري انش تعودين يم غيث يابخوت
بخوت تجمدت من الخوف وهي تطالعها
ام غيث وهي تمشي لها وبتهديد:كود نويتيها بيوم هالبنية مابتراعينها طول عمرش،،مشت،،
بخوت وهي مرعوبة انها ترجع لغيث التفتت لحلايا اللي تبكي وهي تعرف غيث وطبايعه مابيتركها وبياخذ هالبنت عذر حتى يرجعها له وهي مستحيل ترضى بهالشي اتجهت لها وشالتها ورفعتها وهي ناوية ترميها بالمشب بكره لها ولكل شي يربطها بغيث ماحست الا بسحبة من شعرها ترجعها ورا
عباير بعبايتها راجعة من برا بصراخ:انخبلتي!!!
بخوت بتطنيش لعباير وهي مصرة ترميها بالمشب
عباير سحبت حلايا من يدين بخوت بالقوة وبصراخ وهي تضم حلايا لها:اي بالله انخبلتي!!طار عقلش!!
بخوت بصراخ وهي تسحبها:هاتيها ياعباير هاتيها
عباير دفت بخوت بكل قوتها عنها
بخوت طاحت وسط دموعها
عباير بصراخ:وثمن؟لاعطيتش اياها وثم؟بتطشينها بالنار!!مهبولة!!
بخوت بشهقاتها:يغدي يمي ياعباير يغدي يمي وانا مااقواه والله مااقواه
عباير بغبنة منها وعليها بحدة:ولاطشيتيها كبش!!هاذي علومش!!الردي ردي يابخوت مامنه رجى!!
بخوت برعب واضح:بيردني يمه اوجسه ياعباير يمي مايكبني اوجسه
عباير بغبنة:ونطشها بالنار كود ماتعودين يمه!!وش عملت بش هالضعيفة حتى تعملين بها هاللون!!!
بخوت وقفت وبترجي وسط دموعها:طلبتش اقلعيها عنّا اقلعي هالصريمة عني تكفين مااريدها تكفين
عباير ابتسمت بقهر:ابشري ابشري اقلعها عنش بسيطة اقلعها بغدي بها يمهم واوجس مانريدها هاكم وغدكم اعملوا به على ماتريدون وش علمش؟
بخوت طالعتها بتفكير وهي عاشت بذاك المكان الشين اللي بنظرها جحيم
عباير لفت عنها وهي متجهة للباب
بخوت نزلت عينها اللي طاحت ع ثوب زواجها واحتدت نظرتها بغبنة وانحنت للثوب وشالته بيمينها وجرت لعباير ومسكتها من كتفها وهي تلفها عليها واخذت حلايا من يدين عباير وتلفها بالثوب وسط دموعها اللي احرقت خدها وهي تهمس:نذرن علي لااعرضه عليش بأزهى ايامش نذر
>
>
ام غيث بتكشيرة:وشلون مااخبـ
بخوت ضربتها بالثوب بوجهها:هاك
ام غيث احتدت نظرتها
بخوت رفعت صوتها:انا غديت يمش الليلة حتى أرده يمش
ام غيث بحدة:صدقتن عليش ياللي ماتخبرين السنع
بخوت انحنت وهي تاخذ الثوب واتجهت للمشب البيت ورمته قدام الكل
ام غيث عضت شفتها بغبنة
بخوت وهي تلفت لها تطالعها وبابتسامة:والصدقة عودت يم اهلها ومالكم شين عندنا وهالثوب اللي يتنافضون الرجال لااوحوا طواري ثمنه أكلته النار اللي حطبها من ازهد الأثمان
ام غيث بغبنة:والله من الغيرة اللي اكلت قلبش اعرس بعدش وانتي محدن دق بابش
بخوت بسخرية وهي تهز راسها:صحيح صحيح الغيرة هولت بي!!ولفيتش وانا طايرن عقلي!!
ام غيث كشرت بوجهها
بخوت بابتسامة وثقة:الجيزة ماني بعاجزتن عنها لاردتها مير اني ذالتن ينخبل وليدش لاأوحى العلم ويفضحش وسط العربان
ام غيث احتدت نظرتها بغبنة وهي تدري انها تقول الحقيقة
بخوت طالعت عباير:غدينا يم البيت ياعباير غدينا قبل انوي الجيزة صحيح وينخبل ولدها ويبلشون به غدينا
.
بتّال راجع للبيت وبـيـده اليمين كيس يحركه بحركة دائرية ويده اليسار بجيب بنطلونه الاسود الواسع بعد مااخذ اللي يبيه من سيارة راشد الي يشوفها بقالة متحركة يهمهم أسرع بخطواته وهو يمر من بيت مناور  اللي يضوي الديرة كلها بأنواره وأصوات مزعجة بالنسبة له غطت المكان هدا بخطواته وهو يشوفها قدّامه وطالعها بشك من وجودها بهالمكان ولوحدها
حلايا واقفة ع زاوية بيت الشيخ منزلة نظرها للأرض وكأنها تنتظر احد
بتّال ابتسم وهو عرفها اختفت ابتسامته وهو يوقف ويطالع اللي قدامها باستغراب
هليّل منحني قبالها شبه جالس يطالعها  بابتسامة:وشلونش ياحلايا؟
حلايا مكشرة بوجهها ورجعت خطوة لورا
هليّل:ماتريدين إتخبرين ابوش وتسلمين عليه؟
حلايا هزت راسها بلا
هليّل مد يده لها:تراعينه احسن لش بيدعيش تشرين اللي تريدين من الدكان
حلايا وهي ترجع يديها ورا ظهرها وبتكشيرة:مااريد ابو
هليّل زفر ومسكها من يدها
حلايا انقلب وجهها وسحبت يدها منه بس قوته أكبر منها بكثير
عباير خرجت من بيت الشيخ وهي تدورها بقلق كيف اختفت من قدامها بثانية عقدت حواجبها وهي تشوف واقف وطالعت اللي يطالعه واتسعت عيونها بصدمة
بتّال جرى له
عباير جرت وراه
بتّال وقف عندهم وضرب هليّل بالكيس بوجهه
هليّل انصدم من الضربة وجلس وهو يحط يده ع وجـهـه ويمسحه
عباير وقفت عندهم ورفعت رجلها اليمين وهي تشوت هليّل من جنبه:اعقب يالموذي!!
بتّال التفت يمينه يطالعها بوسع عيونه بصدمة من اللي سوته
هليّل مسك جنبه وهو يكتم اهات المه
طلق شايل بـيـده كيس البن المطحون انصدم وهو يطالعها واقفة جنبه
حلايا بدموع محبوسة:بعاير
عباير بصرخة فز معها بتّال وهو يبعد بخطواته عنها شوي:وصريمة!!علامش واقفتن بمحلش ادني يمي!!
حلايا مشت بهرولة لعباير وهي تحتضن رجول عباير وتدفن وجهها بعبايتها
هليّل وقف وهو يطالع عباير بحدة واسرع الكم خطوة اللي بينهم وسدد لها ضربة بكل قوته
بتّال مسك يد هليّل بنظرات حادة اخترقته وهو يوقف بينهم وصارت عباير وراه ودفه وبحدته:اجمع بقايا كرامتك واذلف احسن لك
هليّل بحدة:انت محدن اوجس يمك شي طس عني،،طالع عباير،،هاتي البنية ابوها يريدها
بخوت وقفت عندهم وانخطف وجهها وهي تسمع اخر كلام هليّل وسحبت حلايا من يدها وضمتها لها بخوف احد ياخذها
عباير بحدة:ابو هالبنية بادي عندكم شين اوجسوه يمه
بتّال بحدة:سمعت!!تقلع الحين يالله تقلع ولايكثر
طلق وقف جنب هليّل وهو ينزل الكيس جنبه وبحدة:وانت وش لك بالسالفة محدن اوجس يمك شي!!،،طالع عباير،،والاناثي(الحريم)مايوجسن شي لانطقوا الرجال!!
بتّال بسخرية:والرجال تعرف تدق أبواب البيوت وتكلم اَهلها ماهو بهالطريقة يارجال!!
طلق ميّل فمه بسخرية مثله:ايه ايه هذولا الرجال ماهو باللي يغدون يم البيوت يوايقون(يسرقون النظر)ولا مرادهم علومن ثانية
عباير انغبنت وهي تدري انه يقصدها
بتّال ضـحـك
طلق قطب جبينه
عباير طالعته باستغراب
بتّال بابتسامة:والله كلن يرى الناس بعين طبعه دام طبعك توايق وتدور علومن ثانية فالسموحة منك مالي بعلومك الشينة خبر
عباير وهي تمرر نظرها عليهم وبحدة:ايه لاتلومهم مامن شرهة عليهم
طلق عض شفته بغبنة
هليّل تقدم خطوة وبقهره:كود إنش صادقة ادني من وراه
بتّال التفت لها وعطاها نظره بمعنى اسكتي ورجع نظره عليهم
عباير كشرت بوجهها وهي تصد عنهم
بتّال:ووش عليك منها!!،،مد وجـهـه له،،تفضل تكفى ابدا انت تكفى
طلق احتدت نظرته
هليّل شد ع قبضته يستعد
طلق مسك يد هليّل
هليّل التفت له بحدة
طلق:الليلة فرح مانريد شين يهدم هالفرحة زود
هليّل رص ع اسنانه بغبنة:غيث يريد حلايا
بتّال:يعرف بيت اهلها،،وجه الكلام لعباير وبخوت وعينه على طلق وهليّل،،قدامي لبيتكم
عباير عدت من جنبهم وهي تتنهد بصوت عالي قاصدة تغيظهم
طلق انغبن منها ومن عنادها
بتّال انفقع قلبه من حركاتها
بخوت اللي ضامة حلايا عدت بخطوات سريعة وهي ماتطالعهم حتى وسبقت عباير بالطريق
بتال مر وهو يطالعهم بنظرات كلها استحقار للي سووه
هليّل سحب يده من طلق بقوة وطالعه بحدة:تمنعني عنها!!لذالحين رايدها!!وعلى خيتي!!معصي ياطلق معصي تغيظ شامة معصي!!
طلق بحدة:احشم عمرك ياهليّل!!وثمن لانويت اخذ فوق اختك اخذت ولااحدن رادني مير اخز ابليس واطرده عنا!!
هليّل زفر وهو يصد بوجهه عنه ويتعوذ ثم طالعه وبتهديد:والله ثم والله ياطلق كود قليبي اروح شكّه(شك فيه)انت خابرن علومي مايحتاج اوجس يمك شي
طلق كشّر بوجهه
هليّل طالع مكان ضربتها ومسح عليه:وهي مصختها واجدن واجد،،رفع عينه يطالعه،،وانا اخذن حقي منها قريب قريب
.
..بيت غيث..
الشيخ مناور وهو يكتم غيظه من غيث ويتناسى اللي صار قبل شوي فتح باب بيت غيث وبابتسامة:حياك بيمينك وسم سم
غيث دخل وعينه بالارض وراسه بينفجر من كثر تفكيره كيف بخوت بتتزوج من بعده
الشيخ مناور انتبه لسرحانه ورفع صوته:سم!!
غيث انتبه على نفسه وزفر:بِسْم الله
هدية داخل غرفتها حست برجفة وهي تسمع اصواتهم اخذت نفس وهي تهدي هالرجفة صحيح فرحتها ناقصة بعد اللي صار بينها وبينه لكن مايمنع تفرح وهالليلة ليلتها
الشيخ مناور وهو يمشي لداخل البيت:حياك حياك
غيث وقف:يبه
الشيخ مناور معطيه قفاه كشّر بوجهه ولاالتفت عليه:وش بغيت؟
غيث:يبه انا ناوين اغدي بحلايا يمي
الشيخ مناور التفت له وهو موسع عيونه:وشو؟!!
غيث:حلايا ماتخبرني يبه ولاارعتني تهولت!!
الشيخ مناور بحدة:مير انها إتهول من كل الخليقة ماغير اَهلها!!وثمن نسيت وجسك يم بادي!!،،بصراخ،،نسيت الوعد قدام الديرة!!مالي بها بـد هي بنتكم مااشقتني ولا لي بها عازة!!نسيت نسيت!!
غيث:يبه بذاك الحين مااعلم الامور زين
الشيخ مناور اتسعت عيونه من العذر
غيث:وثمن هي بنيتي وأريدها تراعي ابوها وإتطبّع طبوعه
الشيخ مناور بحدة:امحق ابو وامحق طبوع!!
غيث بزعل:يبه!!
الشيخ مناور بحدة:معصي ياغيث معصي انا خابرن وشو له هالعلم كله مير انكعم وانشغل بروحك ياغيث
غيث بعصبية:بنتي يبه بنتي ومحدن يمنعني عنها!!
الشيخ مناور بحدة:ياعلك ماتنبت قل امين!!اقطع هالعلوم الشينة واغد رحل كلمتك وحدة ماتثنى!!
غيث:وبنتي أبيعها لخاطر اغدي رجل!!مايحصل هاللون!!
هدية خرجت من غرفتها وبحدة:هالبنت لاغدت يم البيت انا مالي محل به
الشيخ مناور التفت لها وبحدة:عودي يم الغرفة ياهدية عودي
هدية بحدتها:ماني معودة وتخير ياغيث ياأنا ياهي بهالبيت
.
..بيت بادي..
،،العشة الخارجية،،
..شابين النار ودلتهم فوقها الكل ملتزم الصمت،،
الجد بادي مرتسمة ابتسامة عريضة على وجـهـه وهو اللي حلف عليهم يقهويهم ومحد منهم يساعده
جسّار قباله وعينه عالنار بوسط المشب وهو يطالعها بهدوء يفكر باللي سواه
سعود جنب جده ساكت بهم يفكر بردة فعل بخوت وجسّار
راشد جنب جسّار وبينهم المسند يطالع جسّار بشك منه وهو يشوف هدوءه الغريب التقت عينه بعين الجد بادي
الجد بادي كشّر بوجهه وتنحنح وهو يطرد تكشيرته وهو يشوف هالمناسبة تستاهل رواق مايحتاج له كدر وهو يكمل شغله بابتسامة وسط همهمته
راشد رمش باستغراب انه ماقاله شي
بخوت مرت من عندهم بخطوات سريعة وهي ضامة حلايا ودخلت للبيت
سعود عقد حواجبه
عباير تمشي بخطوات سريعة
الجد بادي:بنت ياعباير
عباير وقفت ووطت صوتها:سم ياجد
جسّار صد بوجهه وهو مو مرتاح
الجد بادي:وش العلم؟
عباير:كل خير ياجد
الجد بادي:صحيح؟
عباير:مااوجس اكذابن ابد!!
الجد بادي زفر وهو يهز راْسه:زين زين
عباير دخلت للبيت
سعود وقف بوسط قلقه:اترخص
الجد بادي:اقعد ياسعود
سعود:انا غادين
الجد بادي قاطعه وهو يطالعه:مامن خلاف اقعد لو به بلا ماهي بمنكعمة وانت خابر مير اقعد
بتّال وقف وبابتسامة وهو مستغرب جمعتهم:السلام عليكم
سعود جلس وهو مو مرتاح
بتّال وقف عند جده وانحنى وهو يسلم على راْسه
الجد بادي:سلمت سلمت
بتّال مد يده ومسك الدلة
الجد بادي ابعد الدلة عنه؛انا اوجست محدن يحط يده بها رح تريّح مع الربع
بتّال تنهد وهو يشوف اصراره واتجه لراشد وجسّار وسحب المسند اللي بينهم وجلس مكانه وهو يحشر نفسه بينهم
راشد وجسّار افسحوا له مكان وهم يطالعونه بنظرات ويبلعون كلامهم
الجد بادي بعد ماصب القهوة بدلته لف يغسل الفناجيل:ياولد
سعود:سم ياجد
الجد بادي:ماهو بأنت عنيت اللي طلب
جسّار طالعه:سم
بتّال التفت بسرعة لجسار بصدمة:وش طلبته؟!!
الجد بادي مسك الفناجيل ورفع عينه يطالعه بحدة: العلم اللي اوجسته من شوين وش طاريه؟
،،الكل التفت يطالع جسّار،،
جسّار:مثل ماسمعت ياعم انا ابيها زوجة لي على سنة الله ورسوله
الجد بادي:كم لك؟
جسّار:٢٩
الجد بادي:وهي فوقهن بثلاث ومعها بنية
جسّار:انا قابل بها وببنتها هي بتصير زوجتي وبنتها بنتي
الجد بادي بابتسامة:على بركة الله تم تم
سعود يطالع جسّار وهو يزفر ارتاح شوي من همه
بتّال يطالع جسّار منجلط من اللي يسمعه
الجد بادي وهو ينزل الفناجيل على طرف المشب:القهوة ياسعود
سعود فز وهو يسحب الدلة والفناجيل:ابشر ياجد
الجد بادي بابتسامة:بعلمكم بعلمن والفطين اللي يحلّه
بتّال:اسلم
الجد بادي:الأولين يوجسون الواحد لاانجز(انجرح)اصيبعه يقعد فوق هالاصيبع ابليس وثمن كل من مرّ به من خلق الله إقذعه(رماه بحجر)يتعوذ منه علموني ذالحين وش تالية الإصبع؟
سعود ضـحـك بخفة
راشد:أجاوبك؟
الجد بادي قطب جبينه:ووشو له احجويك(اقولك لغز)!!
راشد:الإصبع غيث والجرح
الجد بادي تنحنح يقاطعه:وابليس؟
راشد سكت مايبي يقول
بتّال:انت ،،كلهم طالعوه،،
الجد بادي هز راْسه بموافقة لكلامه:وثمّن؟
بتّال:واللي يرمون اصحاب الجرح
الجد بادي ابتسم:وتالية الإصبع؟
سعود:نجزه من قاعته
الجد بادي ضحك وهو ياكد بهالضحكة قصده:صحيح صحيح مااخطيتم عساكم ماتخطونه،،مرر نظره عليهم وهو يشوف شبابهم ويقارنه بنفسه وقت شبابه زفر وسط ابتسامته وهو يجرها قاصدهم،،تـو مـاشـافـت غـزيـر الـزيـن عـيـنـي..
طـارت الـغـدفـة وشـفـت الـلـي تـحـتـهـا..
بتّال قاطعه وهو يجرها:
نـاطـحـتـنـي والـجـدايـل سـبـحـتـيـنـي..
يـاصـبـاح الـخـيـر  يـاشـوف طـخـمـتـهـا..
بـس عـذروب الـحـبـيـب شـارتـيـنـي..
مـع سـواد عـيـونـها طـول رقـبـتـها..
الجد بادي قاطعه بنص عين:بنت مَن ياولد هاللي غربلتك؟
بتّال اتسعت عيونه:والله محد جريتها وراك!!
الجد بادي ضـحـك وهو يكمل:يـاحـلـي الـلـي رقـت يـم الـبـطـيـنـي..
قـادت الـغـزلان والـريـم تـبـعـتـهـا..
،،مرر نظره عليهم بابتسامته،،قريب قريب كل واحدن تتله(تسحبه)ريمه من رقيبته
.
...........****..........
      يوم جديد
...........****..........
.
أم جـلاجــل
.
عباير وقفت بـالـسـيـارة قبال شبك الحلال لابسة فروة جدها اللي اقصر من طولها بشي بسيط باللون البني وهي تتثاوب وميتة من النوم وهي تدعي بينها وبين نفسها عالغنم والراعي اللي حرمها نومة الصباح نزلت من السيارة وقفلت الباب وراها وهي تضم الفروة عليها بعد ماحست بلفحة الهوا البارد مشت باتجاه الشبك عقدت حواجبها وهي توقف وتطالع الغنم اللي تتحرك داخل الشبك حركة مي طبيعية اخذت نفس وهي تتعوذ من الشيطان قشعر جسمها وهي تسمع نباح كلب وراها وجرت الشبك وهي تصرخ ودخلت له وهي تقفل باب الشبك وراها مرعوبة
الكلب ينبح على باب الشبك
عباير رجعت بخطواتها لورا وهي بتموت مكانها من الخوف وعيونها عليه لصقت فيها وحدة من الغنم من وراها بدون ماتنتبه لها وفزت بصراخ وهي تجري لاخر الشبك وجلست عالارض وهي تبكي وسط نباح الكلب اللي اخذ عقلها من الخوف وغطت أذانيها وسط دموعها:وصريمة تصرمك طس عني يامال الناقة اللي تعقطك(تضربه)
.
...........****..........
..بيت مسفر..
،،غرفة النوم،،
ام جواد جالسة عالسرير  بوجهها اللي للحين ماخف من اثار البكا وحتى وهي وقفت بكا مكتسي ملامحها  السواد من الهم
ابو جواد دخل للغرفة وهو يجر خطواته بتعب مخفي صدمته عن الكل باللي صار وهو يتصنع الشدة
ام جواد فزت له وهي تطالعه:بشر يامسفر بشر؟
ابو جواد زفر:مافيه فايدة ياعواطف مافيه
ام جواد قطبت جبينها وبعصبية:وش هالكلام!!
ابو جواد:مانطق حرف تعبت ماقال شي ابد ماقال
ام جواد:وبتخليه!!بيضيع الولد وبتسكت يامسفر!!
ابو جواد نزلّ ثوبه وهو يجلس عالسرير:ماني تاركة ياعواطف بالعقل!!،،تمدد،،يصير خير يصير خير ان شاء الله ابي تريّح شوي
ام جواد طالعته بقهر وهي تحس ببرود موقفه اتجهت للدولاب وهي تفتحه واخذت عبايتها وقفلته بقوة
ابو جواد باستغراب:وين؟
ام جواد:اذا انت بترتاح ارتاح انا مااقدر ارتاح وولدي بالسجن
ابو جواد بحدة:وش هالكلام ياعواطف!!
ام جواد برجفة صوتها:مااقدر مااقدر يامسفر اجلس وجواد بيروح منا مااقدر ماقدر يامسفر اقعد
ابو جواد جلس وبعصبية:يعني انا الحين مرتاح برايك وهو بهالحالة!!والله لو انه عدّوي ماتريحت وانتي عارفتني ياعواطف
ام جواد رجعت عبايتها للدولاب وهي تحبس دموعها
ابو جواد تنهد:ماني بتاركه ياعواطف هذا ولدي مثلي مثلك تعالي تعالي بـس يابنت الحلال وان شاء الله تنحل تعالي
.
..بيت نشمي..
،،عالفطور،،
الجد نشمي باستغراب:وشلون ماقال شي!!
ابو غازي وهو مو عاجبه اللي يصير:يقول سوا اللي عليه والرجال هذا يومه
الجد نشمي شهق وهو موسع عيونه:وش ذا العلم!!
ابو غازي:مثل ماسمعت
الجد نشمي زفر:والدبرة ذالحين!!
ابو غازي وقف:ان شاء الله خير يبه ان شاء الله خير
الجد نشمي:اقعد تقهوى!!
ابو غازي:دائمة دايمة بس اني مين من التعب وابي ارتاح،،انحنى وهو يسلم على راسه امه وابوه ومشى،،
الجدة منيرة زفرت:ايه دارت الدنيا صحيح!!
الجد نشمي التفت لها بحدة:اقطعي الطريا لاحدن يوحيش!!
.
..بيت عادل..
ام غازي جالسة على كنبة مفردة بمدخل الباب الرئيسي تنتظره وقفت وهي تعرف صوت خطواته ثبتت عينها ع الباب
ابو غازي فتح الباب ودخل ابتسم وهو يطالعها:السلام عليكم
ام غازي بابتسامة وهي تتقدم له:وعليكم السلام والرحمة،،سلمت عليه ووقفت جنبه،،
ابو غازي مسك يدها بيده وهو يمشي وبابتسامة حب هادية:الله يكثر هالأيام كود أراعيش تحتريني ياوسمية
ام غازي:مير اني كل عمري وانا احتريك ياعادل واقفتن على بابك احتريك
ابو غازي وقف والتفت يطالعها وهو يفكر
ام غازي وهي تضيع الموضوع:وش عملت بالسالفة؟بشر؟
ابو غازي تنهد وهو يمشي وللحين يدها بيده:سواة الله خير
ام غازي:ونعم بالله بـــــس وش صار عليه
ابو غازي:احتري مسفر يراعي المستشفى عنده بلكن يرد انا خبر
ام غازي هزت راسها:الله يفرجها عليه
ابو غازي:روحي وشوفي امه
ام غازي:ماني رايحة!!
ابو غازي ترك يدها وبحدة:وليش ان شاء الله؟!!ولا زانت لك الايام والحين دورك!!
ام غازي احتدت نظرتها:ماني من الشماتين ياعادل والله ماحبهم!!والنية القشرا كبها عنك!!انا عنيت الوقت مايصلح ذالحين دام توك معوّد فاخوك مثلك وعيب اجيهم بهالوقت وانا خابرتن حالتهم
ابو غازي ندم على تسرعه وزفر:وسمية الشـ
ام غازي قاطعته بزعلها:الشيطان سبوق!!هذا العدر ماعاد ينفع معي ياعادل لانك تحرز إتدركه(تمسكه)مير انت تعودت ترمي اللي بلسانك ولاعليك من احد،،مشت،،
ابو غازي رفع صوته:جسّار خطب ياوسمية
ام غازي وقفت وهي تطالعه بصدمة
ابو غازي:لاتراعيني بهاللون احتريه يغدي يمنا وأراعي مصيبته اللي ابلش روحه بها وابلشنا معه
.
...........****..........
أم جـلاجــل
.
..بيت بادي..
الجد بادي يفطر بتكشيرة على وجـهـه وهو كل شوي يسرق نظرات له ويستغفر وسط تنهيدة بصوت مسموع
سعود يطالع جده وهو مميل فمه مو عاجبته تصرفات جده ويقطع من الخبزة(مطبوخة عالحطب)ويحط عند راشد اللي على يمينه
راشد جالس قبال بادي وبينهم الفطور(الخبزة بالوسط وحولها زبدية اللبن وزبدية سمن وزبدية زبدة)ويتحاشى نظرات بادي
حلايا جالسة بين سعود وراشد وهي تطالع جدها بتكشيرة وبنبرة عالية:جدي
الجد بادي طالعها وبابتسامة:ياحلوة جدها
حلايا بعصبية:ليس تلاعي الحلو كديا(ليش تراعي الحلو كذيا)
راشد ابتسم
سعود انبسط وبنفسه:حيلش به ياحلوة الخد
الجد بادي وسع عيونه:اخو نشمي!!وش هالعلوم!!
راشد انحنى وباس حلايا على خدها ووقف وبابتسامته:جاد الله عليكم
سعود وقف:وين!!
حلايا تطالع جدها بحدة
الجد بادي تنحنح وهو يكمل فطوره عادي
راشد باحراج:والله يادوب ألحق عالمدرسة
سعود:اليوم سبت مامن داوم!!
راشد:يوووه اقصد اصحي الشباب اكيد ناموا عن شفتاتهم ونومهم اللهم ياكافي!!
سعود تنهد وهو يشوفه يصرفه:على خير بس تعال تقهوى شوي
راشد:مااوعدك لكن حياك عندنا ياسعود ننتظرك انت وجدي بادي
الجد بادي مارد واكتفى بسكوته
سعود:تسلم تسلم ان شاء الله على خير
راشد:فمان الله،،مشى ووقف وهو يشوفها،،
عباير دخلت للبيت وقفلت الباب وراها بقوة وهي ترفع نقابها وتنزل طرحتها بوجهها اللي واضح عليه اثار بكاها وبزعل بصوت عالي:هذا اللي أعينه من وراكم
الجد بادي لف بجسمه عليهم وهو جالس مكانه يطالعهم
سعود اتجه لها بخطوات سريعة وبخوفه:علامش وش غادين بش؟!
بخوت نزلت القهوة والشاهي عند جدها واتجهت لهم:علامش؟!!
عباير:ايه ايه ذالحين غديتوا يمي ومحدن اوجس علامها ابطت!!
راشد:الا والله فقدتك وسالت عنك بس قالوا راحت للحلال واحسب هالوضع طبيعي وانا اخوك قولي لي وش فيك عسى ماشر ياعباير؟
عباير استحت وأخفت هالحيا وبصوت هادي:ابدن ماغير كلب ابو ضاري مرتع على باب الشبك ماتبعد لو هو فتة!!(جالس لها الكلب عالباب ولاترك لها مسافة تخرج)
الجد بادي زفر ورجع بفطرته يكمل
سعود ضـحـك بخفة وهو يعطيها ظهره راجع للفطور
عباير اتسعت عيونها:عشت عشت من خي ايه ايه تضحّك بعالي حسك كود يوحونك أهل هالديرة كل ابوهم
سعود جلس يكمل فطوره مااهتم لها
بخوت:الله يصلح حالك ياعباير هذا انتي من صغرش إتهولين من الكلاب ماهو بجديدن عليش!!
حلايا تطالعها وهي كاتمة ضحكتها:صدد انس سلودة(صدق إنش شرودة:خوافة)،،ضحكت،،
راشد كتم ضحكته
عباير:ايه ايه لااوصيكم تضاحكوا لامن تنفقع كبودكم من الضحك ماهو انتم ماتخبرون وش تعمل هالكلاب عساها بالجرب
بخوت بتكشيرة:عباير لاتخنفرين علينا عوذا منش لاخنفرتي!!
راشد:عاد استأذنكم انا
عباير مدت يدها ومسكته وهي تطالعه:وين؟!!
راشد بابتسامة:عندي شغل
عباير طالعت قفا جدها:اكيد شايبنا طاش يمك شي خابرته انا مايكب عوايده
راشد اتسعت عيونه بصدمة
الجد بادي اتسعت عيونه وفز واقف وهو متجه لهم ويرفع عصاته
عباير طلعت منها صرخة مكتومة وتركت يد راشد وتخبت وراه:بوجهك ياراشد بوجهك
الجد بادي وقف وهو يشوفها تخبت وراه وبعصبية:اعقبي يابنت!!عيب عليش جدش انا جدش ماهو بأصغر وغدانش!!
راشد:حشى ماقال شي الا كريم وراعي واجب بيض الله وجـهـه
بخوت مدت يدها ليد راشد بوسط نبضات قلبها السريعة ومسكته
راشد يطالعها باستغراب وهو يحس برجفة يدها ماعاد فاهم شي وسطهم
الجد بادي يطالع بخوت ساكت
بخوت وهي تسحب راشد معها وتتجه لمكان جلستهم:والله ماتغدي محل الا وانت قاضي(فاطر ومتقهوي معهم)
الجد بادي سكت وهو يطالعهم ثم التفت لعباير اللي واقفة بمكانها وميل فمه:اجل انا شايبن اطش علوم وهاذي عوايدي مااكبها!!
عباير جرت الخطوات اللي بينهم بسرعة وهي توقف قبالهم وترفع نفسها ع اطراف رجولها وهي تبوس راسه وبسرعة:صبحت بالخير ياوجه الخير،،جرت للجلسة وهي تاركينه وراها وجلست معهم،،
الجد بادي ابتسم براحة وهو يطالع فرحتهم البسيطة تنهد وهو يدعي بينه وبين نفسه الله لايغير هالسعادة عليهم
.
...........****..........
     الــظــهــر
...........****..........
..السجن..
،،مكتب الضابط،،
جواد جالس وهو ساكت
ابو غازي جالس جنبه زفر بتعب منه وهو يحاول معه ولا هو راضي ينطق كلمة:والنهاية معك انت والنهاية؟!!
جواد بهدوء:اقل الأضرار ياعم اقلها وانا راضي
ابو غازي تنرفز:انت تدري وش اللي تقوله!!اقل الأضرار تنسحب رخصتك وبختم نهائي يعني ماعاد تشتغل شغلتك ابد
جواد:الحمدلله على كل حال
ابو غازي وقف وبصراخ:ولد!!!
جواد ببروده:نـعـم
ابو غازي انحنى مسكه من سكرابه من رقبته وهو يزمه يخنقه:اللي وصلني من كلامك الحين انه بالطقاق بتعب امك وابوك وبالطقاق على كل تعبك وإنجازاتك بالحياة وبالطقاق سمعة المستشفى اللي تعب عليها ابوك طول عمره صاحي انت صاحي
جواد احتدت نظرته:المستشفى ماله شغل باأخطائي الشخصية!!
ابو غازي شده بغبنة اكثر:يعني انت معترف باللي صار وخالص!!
جواد عض شفته يكتم الكلام وسط حدة نظراته
ابو غازي دفه بقوة وهو يعتدل بوقفته:والله ان مانطقت وقلت اللي صار معك اني لاأمردغك ياالثور!!
جواد ميّل فمه بابتسامة:ليش!!
ابو غازي قطب جبينه وهو يطالعه
جواد:ليش هالاصرار كله!!وفرصة على طبق من ذهب!!
ابو غازي:وشلون تبي قلبي يطاوعني وانت واحدن من عيالي!!
جواد انصدم من رده
ابو غازي:ماارضى يصيبك شي وانت معزتك مثل معزة اخوانك حتى ولو انك اخطيت وكثرت خطاك مردك تعود انا مالك مفر
جواد احتدت نظرته بكره لهالكلام
ابو غازي:وثمن حتى لو اني كارهن لك انا ماارضاها لمسفر مايهنى لي بال وانا اشوف اخوي ضايقن باله
جواد صد بوجهه:ماعندي كلام غير اللي قلته
ابو غازي بعصبية:اجل تنقّع بهالسجن الى منه يلين راسك وثم تكلم لابغيت،،خرج،،
.
.
<اللهم صل وسلم على نبينا محمد>
.
.