ياسمح المحيا جر الهجينية

الجزء الرابع

              ،،الـجـــزء الـرابــع،،
.........****..........
بيت بادي
،،الكل جالس حول هالجلسة الحلوة اللي ترد الروح حتى لو كانت بسيطة اهم شي انها بعيونهم تسوى الدنيا كلها،،
سعود يتحايل على عباير وهي ساكتة ماترد بالاخير عصّب:علامش؟وش مضيق بالش؟وش هالعنقوص المربوط على وجهش!!
عباير ماردت
الجد بادي يسرق لها نظرات بقلق وهو يقلب بالراديو
بخوت مدت لها كاسة الشاهي وبابتسامة:سمي يازينة البيت سمي
حلايا تطالع عباير اللي واضح عليها الضيقة رفعت صحن ورق العنب لعباير:كله لش والله مااكل منّه بس لاتزعلين
عباير سحبت كاسة الشاهي من يد بخوت بقوة وهي تبلع غصتها وعينها عالشاهي ماطالعتهم
الجد بادي نزل الراديو وكشر بوجهه:بنت ياعباير
عباير طالعته وبصوت يهتز:سم
الجد بادي:وش فيش؟
عباير ابتسمت:مافيني شي بس ضايقتن شوي
الجد بادي زفر:اذا عشان تردين كل يوم
عباير قاطعته:آفا ياجدي لا والله مو بعشان هالسالفة
الجد بادي:اجل دام ماهو بعشانه وش اللي مضيقش؟
عباير:مابي شي ابد
الجد بادي بحدة رغم انه يكتم أعصابه لايصكها بالراديو اللي معه:دامش ماتبين تعلمين وش بش فكي هالعنقصة عنّا ولا طسّي يم غرفتش ولا انحلّت اباليسش عوّدي يمنا وعيّني من الله خير!!
عباير وقفت وبعيون غرقت دموع وبقهر:ايه لو انك موحي اللي موحيته ماتنافخ بوجهي كان نافخت بوجهه!!
الجد بادي فز بحيله وضربها كف بكل قوته:اعقبي ياقليلة الحيا!!
بخوت صرخت وغمضت عيونها وهي تضم نفسها
سعود فز ووقف بينهم:تعوذ ياجدي تعوذ الله يهديك
حلايا تطالع اللي يصير برعب
عباير دفت سعود من قدامها وبصراخ بوجه جدها وبغبنة وسط دموعها وبصوت يرجف:كمّل كمّل واذبحني لانك لو أوحيت وش قال كان سويت اللي سويته من سنين مرتن ثانية!!
سعود توسعت عيونه
بخوت فتحت عيونها وطالعت عباير بصدمة
الجد بادي قطب جبينه:انتي وش تخربطين؟!
عباير مشت لغرفة جدها بخطوات سريعة وسحبت السلاح ورجعت له ورمته عند رجوله:اذبحني ياجدي اذبحني الحين ولاتسمع هرجته بعد الصلاة ويلحس مخك ويضحك عليك بكم كلمة وتصدقه وتجي تنحرني!!،،صرخت،،اذبحني الحين اذبحني!!
الجد بادي طالعها بضياع وبخوف من اللي بتقوله ورا ملامحه القاسية اللي رسمها الزمن عليه:عباير تكلمي ياعباير؟
سعود مسكها من يدها وجرها له وهو يضغط على يدها بقوة طالعها وهو يغلي وعروق رقبته بتفجّر من غيظه ووجهه قبال وجهها وأنفاسه الحارة تضرب خدودها الحمرا من صياحها وبحدة وهو يضغط على اسنانه اللي يحسها بتتكسر من غيظه:وش اللي صاير ياعباير انطقي لاأخليش عبرة بهالبيت؟!!
عباير انفجرت وبشهقاتها:هليّل ياسعود هليّل عرّاني(اتهمها بشرفها)
بخوت بردت اطرافها وهي تطالعهم بصدمتها تحس بكارثة كبيرة مقبلة لهالبيت
الجد بادي يطالعها ساكت
عباير صرخت:عرّاني ياسعود عرّاني
سعود جرى وهي مانطقت اخر كلمة حتى جرى بدون نعاله ولا شماغه ولا حتى بوسة حلايا اللي مستحيل يطلع وهو مااخذها او ماطبعها على خدها جرى وكله جنون يفكر بشخص واحد وعينه تدور على شخص واحد وغيظه المكبوت بيتفجر بهالشخص الواحد
بخوت فزت على حيلها ولحقته
حلايا جرت وراها
بخوت مسكته عند الباب وهي تلف يدينها على وسطه وبدموعها اللي هلت:تكفى ياسعود نخيتك ياسعود!!
سعود فك يديها بقوة وبصراخ من حرقته:يخسى سعود كان تركه هالمرة يخسى!!
بخوت مسكته مرة ثانية وبوسط شهقاتها:الله يخليك ياسعود لاتغدي يمه الله يخليك ياسعود نخيتك وانا اختك نصيتك وانا اختك تكفى ياسعود تكفى!!
سعود فك يديها ودفها وبقهره:عشانكم ياأخت سعود عشانكم وربي ماأمرح(أنام)الليلة وهو متهني بفراشه
بخوت تعلقت فيه بقوة وبرعب:ماتغدي يمّه والله ماتغدي
سعود دفها عنه بقوة
بخوت طاحت وضربت يدها بعامود العشّة
سعود خرج وهو ممتلي شر
بخوت جلست مكانها وهي تبكي وتشوف النهاية الأكيدة نزلت بهالبيت هالمرة خلاص
الجد بادي طالع عباير اخذ نفس وبهدوء:متأكدة؟متأكدة ياعباير؟!
عباير غرقت عيونها دموع وبغبنة:ليش ياجدي وهالعلوم بها أكذاب؟!
الجد بادي بحدة:عباير!!
عباير نزلت دموعها:هذا انت ياجدي ماصدقتني من الأول بتصدقني ذَا الحين!!
الجد بادي طالعها بغبنة
عباير لفت عنه ومشت
الجد بادي رفع صوته:مصدقش مصدقش وصدقتش اول وهالحين
عباير التفتت تناظره بصدمة
حلايا انفجرت تبكي بصوت عالي هز المكان
بخوت وقفت وشالتها بيد وحدة وجرت لجدها وبدموعها:تكفى ياجدي سعود ألحق على سعود ياجدي ألحقه!!
..عند سعود..
سعود يعاجل بخطواته بوجهه المتجهم كالعادة لكن هالمرة مكتسي وجهه سواد من غيظه وهو يكبح هالغيظ بشدته ع قبضته وضغطه ع اسنانه وبيت هلال ماكان بعيد عن بيتهم بنهاية الحارة
طلق يمشي متجه لبيت الشيخ مناور يبي يسلمه حصيلة البقالة اليوم وقف وهو يشوف سعود بنفس طريقه اخذ نفس وابتسم ورفع يديه:ياحيّه
سعود دفه عن طريقه وبحدة:طسّ(اذلف)عن وجهي الليلة!!
طلق يطالعه بصدمة واستغراب ثم كمل طريقه بعد ماشافه يبتعد
..بيت هلال..
هلال فتح الباب اللي باقي شعرة وينكسر من الدق اللي يجيه وبعصبية:وصرايم(مصايب)تصرمك!!،،طالعه باستغراب،،هذا انت!!،،كشر بوجهه،،خير وش تبي؟!كسرت الباب ياعلّ يدك بالكسر اللي مايجْبْر(يلتئم)
سعود بحدة:وينه هليّل؟!
هلال:وش تبي فيه؟،،طالعه بشك،،عوذا منك ومن شرك مابه احد هنيّ(هينا)،،قفل الباب،،
سعود مسك الباب ودفه وبنرفزة:طسّ عن وجهي انت،،صرخ وهو يتلفت بالبيت،،هليّل هليّل
هلال توسعت عيونه:ابوك ياهلال تخَطّاك(مرّ من جنبه)وماحشم حرمة بيتك!!،،لحقه ومسكه ودفه يرجعه طريقه بيخرجه برا وبصراخ وسط عصبيته،،اعقب ياللي ماتستحي!!اهب ياوجهك معتدي على محارمنا!!اعقب!!
ام هليّل كانت بالمطبخ لفت الجلال اللي عليها وتلثمت به زين وهي تسمع هالاصوات ميلت راسها وطلعته من باب المطبخ تطالعهم
سعود وقف ميل فمه بسخرية
هلال يسحبه ماقدر يحركه من مكان وقوفه
سعود:معتدي!!معتدي!!،،زادت غبنته ودفه بقوة عنه صرخ،،هليييييييل!!
هليّل نازل عالدرج من السطح وبصدمة من وجوده:خير خير!!
سعود شافه قباله بمسافة جرى مثل المجنون وهجم عليه يضربه بكل قوته 
هليّل حاول يدافع عن نفسه لكن سعود مو سهل ومعروف بقوته خصوصا بعد اللي صار له ثبته وجلس فوقه وهو يبي يبرد قلبه
هلال جرى له وهو يحاول يسحبه عن هليّل
ام هليّل صرخت وهي تجري لهم:يمه وليدي!!
سعود دف هلال بيده وهو ماطالعه حتى
هلال طار من دفته وطاح
،،خوات هليّل يطالعون اللي يصير من ورا باب غرفتهم وسط رعبهم من اللي يصير،،
ام هليّل تضرب سعود ع ظهره وهي تبكي وتصرخ:فكّه(اتركه)فكه ياعلك الكسر فكه
شامة(أخت هليّل)جمعت شجاعتها وطلعت من الغرفة وصرخت بأعلى صوت:ذبح اخوي أفزعوا لنا ياعرب!!افزعوا عليكم وجه الله!!،،صرخت،،ياااااعربنّاااا(يااهل الديرة)!!!
سعود يطالعها بابتسامة وهي تستفزع(تطلب الفزعة)
هليّل اللي يروح ويجي بوعيه من الضرب يلقط انفاسه بتعب تحت جسم سعود بعد ماوقّف سعود ضرب ويناظر لأخته
ام هليّل اللي تسلل لقلبها اليأس وهي ماقدرت على سعود رجع لها الأمل وهي تشوف بنتها وضربت سعود وصرخت:فكه عليك من الله الصرايم
سعود دفها بعيد عنه
هلال فز وضرب سعود بالمحماس(يحمسون فيه القهوة على الحطب)اللي سحبه من الدرج اللي طاح عنده
سعود توجع وناظر كتفه اللي بدا غرق من الجرح أسفل راْسه
هلال حس بلحظة خوف وهو يشوف دم سعود لكن تجاهلها وصرخ فيه:ياعلّي(مثل يارب)اشوفك تذّكى(تذبح)ياللي ماتخاف ربك!!،،مسك سعود من كتفه يدفه،،
سعود طيّره(دفه)من جديد وهو يشوف الوقت يضيع واكيد الكل بيتجمع بعد صراخ شامة طالع هليّل وهو يدخل يده بجيبه ويطلّع سكينة جيبه مخصصة للصيد ماتفارقه ابد مسك هليّل من ياقة ثوبه ويثبته بيده وهو يفتح بيده الثانية السكينة وبغبنته:تشهد ياهليّل تشهد رفع يده وسدد بكل قوته بالسكين
شامة صرخت وهي تغمض عيونها
هلال يناظره برد حيله
ام هليّل شحب وجهها وهي تطالع سعود وتودع هليّل
طلق مسك يد سعود باخر لحظة بيديه الثنتين وطالعه بغبنة وصرخ:انخبلت انت انخبلت!!
.........****..........
بيت مسفر
رهايف التفت على أمجاد اللي على يسارها مرتميه تطالعها بصدمة مدت يدها تلمسها:أمجاد،،حركتها،،أمجاد!!،،صرخت وهي توقف وتجري له
جواد عطاها ظهره ومشى مبتعد عنها بخطوات سريعة
رهايف:ذبحت اختي يالـ##ذبحتها،،تعلقت بظهره ومسكته من شعره وهي تبكي،،موتها!!ذبحتها!!ربي ينتقم منك
سهام ناظرت شذى:روحي جيبي موية بسرعة
شذى جرت للمطبخ
ام جواد راجعة من خرجتها وهي تتأفف توسعت عيونها وهي تشوف الحوسة اللي صايرة
سهام جلست عند امجاد ترفع رجولها تحاول تصحيها:امجاد امجاد حبيبتي ردي علي
جواد وهو يفكها عنه وبصراخ:اتركيني خليني اجيب أغراضي أشوفها اتركيني
رهايف:هذا اللي تبيه انت تذبحنا ثم تسوي نفسك المنقذ لكن هين،،تركته وصرخت وهي تجري متجهة لباب البيت بتطلع،،يبه غازي الحقوا علينا
ام جواد مسكتها من يدها:رهايف اصبري الحين بتصحى اصبري
رهايف سحبت يدها وبصوت يرجف:اسفة عمتي لكن لا ومليون لا
جواد شبه جالس عند امجاد وسهام وشذى رفع صوته:صحت
رهايف التفتت تطالعهم ناظرت امجاد اللي شبه جالسة بحضن سهام جرت لها ودفت جواد عن طريقها وهي تجلس عند امجاد
جواد جلس من دفتها وهو موسع عيونه من جرأتها ولا استغرب وقاحته باللي سواه
رهايف بخوف:ياروحي انتي كيفك الحين انادي ابوي؟
امجاد بوجه شاحب:مافيني شي ليش كل هالخوف؟!!ساعديني نرجع البيت؟
ام جواد عندها:بنتي عساك طيبة
امجاد:بخير ياعمري بخير الحمدلله،،اعتدلت بجلستها ولبست نقابها اللي نزلته سهام من البداية وقفت وهي تتسند على رهايف،،
رهايف طالعته بحقد:لاتحسب الموضوع بيمر زي السلام
امجاد وهي تضغط على يدها وبعصبية تعرفها رهايف من صوتها الهادي:رهايف!!
رهايف:هين حسابك معهم مو معي!،،مشوا وخرجوا،،
امجاد بتعب:ماتعرفين تسكتين؟!
رهايف بخوف:انتي طيبة؟موجوعة؟
امجاد:الحمدلله مافيني شي
رهايف بحرقة:وربي ماااخليه يرتاح قليل الخاتمة!!ان ماخليته يتراعد(يرجف من الخوف)كل مامر واحد من  اخواني قدامه بالعشا الليلة مااكون رهايف!!
امجاد وهي تضغط على نفسها بالكلام:انا يوم اقولك اسكتي مو عشان خاطره ابد والله ماحسبت له حساب كله عشان عمي والبنات لاتخربين بين ابوي وعمي
رهايف عضت شفتها بقهر ماردت
فيصل اللي جاهم يجري متاخر:وش فيكم طولتوا؟!
رهايف طالعته بقهر:هين حسابك مع العيال
فيصل عقد حواجبه وهو يشوف امجاد:وش فيك؟
رهايف:ابد مافينا شي تهجم علينا ولد عمك وانت مامنك فايدة!!
امجاد وقفت:رهايف!!
فيصل بوسع عيونه:وشو؟!!
امجاد طالعت فيصل:ماعليك منها رهايف تحب الآكشن تلاسنوا هي وجواد بس
رهايف:قولي الحمدلله ماكسر ضلوعك هالمهبول وعدت على خير
امجاد بحدة:اسكتي رهايف اسكتي!!
فيصل بنرفزة:وليش تسكت دامها تقول اللي صار!!هالجواد من زمان يبي له احد يوقفه وأخيرا جاب العيد بنفسه!!
امجاد بحدة:اسمعوا إنتوا الاثنين تنطمون سمعتوا!!لا ابوي ولا العيال ولاحتى امي تدري محد يدري ابد وهالشي مو عشان جواد لا عشان ابوي وعمي لايصير بينهم شي فهمتوا؟!
فيصل بعصبية:مابيصير شي اذا وقفناه عند حده بيتعظ ولاعاد يكرر غلطته ولا يفكر اصلا!!
رهايف:وابوي وعمي بيأدبون هالجواد ومابيصير شي بينهم ابدا!!
امجاد:قلت انطموا!!سدوا حلوقكم!!واذا تكلمتوا وسألني ابوي بأكذبكم وأوقف مع جواد وأنتم بكيفكم بعدين!!تحملوا اللي يصير لكم،،مشت وهي تتركها وراها رغم وجعها اللي يروح ويجي،،
رهايف تطالعها منجلطة:مهبولة اختك مهبولة؟!!
فيصل:ماتنلام والله!!عاشرتك وانعدت!!
رهايف دفته:اذلف بس اذلف والله لاقول لأبوي انك تأخرت وأخذتنا عذر!!،،مشت قدامه بسرعة،،
فيصل لحقها وهو يترجاها:هف هف تكفين هف هوفتي!!
....نرجع لبيت مسفر....
ام جواد تضربه على كتفه بخفة:الله لايبارك بعدوينك جبت العيد فينا الليلة!!اه ياغبنتي بتشبها بين ابوك وعمك ياللي ماتستحي!!
جواد ابتعد عن امه خطوة:يوووه يمه خلاص عاد صار اللي صار
ام جواد تغير وجهها:يمه وش يفكك من عيال عمك وهم خلقة مايطيقونك!!والله ان تموت بيدينهم الليلة!!
شذى:هو اللي جاب الكلام لنفسه!!هو خلا احد يحبه!!هو اللي بدا يرمي كلام وفوقها متهجم على رهايف واللي أكلتها المسكينة امجاد!!
جواد مشى لها وهي ماكنت تبعد عنه اساسا ومسكها من يدها وشدها وبحدة:رايك خليه لك محد سألك فاهمة!!
شذى:ايه ارفسني انا بعد!!
ام جواد صرخت:بس!!اترك اختك ولاتحضر العزيمة الليلة وانتي انثبري احترمي اخوك!!
جواد بعناد:الا بأحضر يمه واللي يصير يصير!!
.........****..........
بيت الشعر
،،ورا بيت الشعر تحديدا عند الحوض والمشب الخارجي العيال يجهزون أغراض العزيمة،،
بتّال يغسل الكاسات بالموية بس سريع سريع وهو ساكت
راشد جنبه يستلم منه وينشف
جسّار جالس عند المشب يحمّي الدلال عالخفيف وبحلطمته المعتادة وهو ينزل الدلة:وينه هالعلة؟متى بيشرف حضرة جنابه؟!!ولا ولد وزير مايحط يده بشي!!
راشد زفر بدون لايرد وهو مكمل شغله
بتّال بطفش من نفس الموضوع اللي ينعاد كل مرة تكلم وهو يشتغل:سدّ(قفل)فمك جسّاروه مانبي مشاكل!!
جسّار:اه بس اه ياخسارة الاسم فيه والله!!عمي غلط!!بالله عليكم ذَا جواد الا والله ذَا
بتّال قاطعه وهو يلف يطالعه وبعصبية:جسّار ورب البيت ماقفلت هالموضوع ياويلك!!
جسّار:طيب طيب
بتّال بحدة:اذا تكلمت فيه مرة ثانية ماتلوم الا نفسك فهمت؟
جسّار:طيب طيب ليش الزعل مني ليش؟
بتّال لف يكمل شغله وهو يستغفر بصوت عالي
جسّار بابتسامة يبي يراضيه:ياصاحب الشامة
راشد ابتسم على سماجة جسّار
بتّال ترك اللي بيده وهو يتكي عالحوض ولا طالعه:كملها وشوف وش يصير لك
راشد التفت على جسّار بوناسة للي بيصير
جسّار وهو ينزل الدلة بشويش ويوقف ويتسحب بخطواته:حبك مسّوي بقلبي علامة،،جرى،،
بتّال فز وراه بسرعة:والله مايفكك مني احد
راشد انفجر يضحك وهو يشوفهم
غازي جاي لهم وبيده أغراض القهوة يزيد الناقص منها 
جسّار وهو يتخبى ورا غازي:انا بوجهك ياغازي
بتّال وقف اول ماشاف غازي وبوسط انفاسه:خله يجي ولا الموضوع بس محتاج امد يدي وأوصله!!
جسّار من ورا غازي:نعم!!وش هالكلام!!يهينك ياغازي يتمسخر علينا عشانّا اقصر منه!!
غازي وهو يطالع جسّار بطرف عينه:انثبر بس انثبر،،طالع بتال وبابتسامة،،وش مسوي لك؟
جسّار:ماسويت له شي بس قلت له ياصاحب الشامة
غازي قاطعه:اَي والله حبك مسوي بقلبي علامة صدقت
بتّال توسعت عيونه:وشو!!
جسّار شرد وترك غازي
غازي يرجع لورا وبابتسامته:ياأخي والله هالشامة ذبّاحة!!
بتّال:ذبّاحة أجل!!والله انت وأخوك اللي بتنذبحون على يديني الليلة
غازي رمى اللي بيدينه وشرد متجه لبيتهم
بتّال جرى وراه وهو يتوعد
راشد اللي ميت ضحك وهو يشوفهم اختفت ضحكته وهو يتذكر الشغل:هالمخفات اتركوني لحالي!!
.
.
.