ياسمح المحيا جر الهجينية

٤٤

   ،،الـجـزء الـرابـع والاربـعـيـن،،
لاحول ولاقوة الا بالله،،سبحان الله وبحمده سبحان الله العظيم
.
.
...........****...........
         العصر
...........****...........
..بيت مفلح..
هيفاء متمددة ع فراشها وصحت من نومتها اللي بوقت غلط مو متعودة عليه رفعت نفسها ولاقدرت تتحرك من مكانها اتسعت عيونها وعرق جبينها وهي تستوعب اللي يصير معها حاولت تتحرك وتقاوم وكل اللي يطلع منها مجرد شهقات وسط دموع تسيل من عيونها وتنتهي على مخدتها وتبللها
ثريا فتحت الباب:علامش ماوعيتي(صحيتي)لذالحين ياهيوف؟
هيفاء على فتحة ثريا للباب تحررت وفزت جالسة وهي غرقانة بعرفها ودموعها تهل للحين ماوقفت من فجعتها
ثريا دخلت تطالعها مستغربة وجلست عندها وهي تمسح عليها:بسم الله عليش بسم الله منام منام ماهو بصحيح
هيفاء دفت يد ثريا عنها وهي تقوم وتجري برا الغرفة وخرجت من البيت وهي توقف قدام عمها
مفلح واقف برا بيته بيتجه لغتهم طالعها باستغراب من وضعها:هيفاء؟!
هيفاء تطالعه بدموعها وهي تستجمع كل قوتها حتى تنطق لو هو حرف وكل اللي منها طلع مجرد بحة جلست عالارض تبكي بيأس وهي مو قادرة تقول لعمها شي
.
..بيت بادي..
الجد بادي عالباب وبعصبية:اعجلي يابنت وش هالميتة اللي متولجتش؟!(البرود اللي فيها وماتتركه)
عباير وهي لابسة عبايتها وفاردة طرحتها بين يديها وهي معصبة:وشو له تجلي(تطرد)الراعي وانا للحين مابريت!!
الجد بادي كشّر بوجهه
عباير وهي تلف طرحتها وتلبس نقابها:ايه مير انتم مابكم رحمة قلوبن سودا اللهم يا،،سكتت وهي تشوف نظرتها،،
الجد بادي بحدة:طاوعتش وكبيت خيّش يغدي يم بيتي ومااوجست يمكم هرجة وذالحين انكعمي ولاأوحي لش حس!!،،خرج وهو يستغفر ويكتم غيظه عنها،،
بخوت وهي تمشي لها ومعها السبت(السلة اللي فيها اغراض القهوة)ومدته لها:ماتحرزين(تقدرين)تقضبين لسانش شوي!!
عباير:يوم اني انعليت زان الحلال بعينه!!،،بصوت فيه الصيحة،،ماني بمحرزة اجرّ العلف من اول وتالي يابخوت!!
بخوت:الشكوى لله وش تعملين اغدي اغدي وانا خيتش اغدي يمه
الجد بادي من برا بصوت عالي وواضح انه معصب من تأخيرها:عبااااايررر!!!
بخوت مدت لها المفتاح وبوجه انقلب:اعجلي اعجلي
عباير سحبت المفتاح منها بسرعة وخرجت وهي تقفل الباب بقوة وراها وحطت السبت بصندوق السيارة وفتحت الددسن الغمارة الوحدة وهي معصبة وركبت مكان السواق وقفلت الباب بقوة وبصوت عالي من كل قلبها:ياعلّها بالذيب اللي يسحتها(ياكلها)مرتن وحدة ويفكني منها ومن مريرها(عذابها)
بتال جالس مكان الراكب اتسعت عيونه وهو يثبت نظره لقدام وزم شفايفه بصدمة من الصوت اللي عارفه زين وبنفسه:ياليل مااطولك!!
الجد بادي اللي راكب بالوسط بينهم التفت لها بسرعة وعيونه بتخرج من مكانها وبحدة وهو يرص ع اسنانه:اوجست لش انكعمي!!
.
..بيت الشلة..
ابو غازي بغبنة وهو يطالع ابوه:معجبك وهو يبدّي كلمته علينا؟!!
الجد نشمي زفر:اصبر وانا ابوك اصبر
ابو جواد يتقهوى ساكت وهو مبعد نفسه عن النقاش
ابو غازي:ماعيّنا من ورا الصبر عليهم غير الجهد!!
الجد نشمي بنرفزة:جده ياعادل جده واقرب له منهك يازوج امه!!
ابو غازي ضحك:زوج امه اهله،،بحدة،،ماهو بهالغريب اللي غادين يمه ،،اشر بطرف سبابته اليمين ع راسه بانفعاله،،وهو بيغزي الشيب شعيرات راسه!!
الجد نشمي اخذ نفس يكتم غيظه:مامن خلاف يتخبره
ابو غازي بعصبية:وش يتخبر هاه؟ماني بمرتاح له ابدن ابدن
الجد نشمي بلع القهوة مرة وحدة من غيظه اللي يكتمه وهو يصد عنه
جسّار داخل وهو وجه ينطق تعب
ابو غازي طالعه بتعصيبة:تو الناس!!تقول ثلاث بـالـبـيـت والحين غيبة الشمس ماشاء الله عليك!!
جسّار بصدمة من ابوه اللي هب فيه فجأة:مناوبتي اليوم بالمستشفى والطريق يبي له وقت وللحين ماغابت الشمس!!
ابو غازي اتسعت عيونه:تكذبني ياولد!!
جسّار تنهد:محشوم يبه محشوم
ابو غازي:ماشفت اخوك العلة على طريقك؟
جسّار باستغراب:تركته معكم قبل دوامي!!
الجد نشمي تنهد:تعال تعال وانا جدك تعال تريح جنبي ولاتريحت خذ لك فنجالن يضبط الراس
ابو غازي بحدة:وش فنجاله وهالثور عيّا يروح المستشفى نشوف وش علته فاقعن قلبه بادي مثل ماهو فاقعن قلبي بعناده هالولد
جسّار بنص عين وسط ابتسامته:ايه يبه تغار!!
ابو غازي تقدم له وبعصبية:انكعم غارت عليك
جسّار وهو يجري لجده ويقاطع ابوه:زوجتي،،جلس عند جده،،
ابو غازي بحدته وهو يرفع يده ناوي يضربه:الا غارت عليك صرايم
ابو جواد استغفر بصوت عالي
الجد نشمي رفع يده بوجه ابوغازي اللي قدامه يوقفه :اتركه عنك وثم اترك بتال على هواه مابه خلاف لو به شي ماتحرك من محله وثمن هذولا(يقصد جواد ومسفر)ماهم بمالين عينك!!
ابو غازي:والحين ووش سالفة هالعرس!!وش علينا بام جلاجل وحنا مانبي لها طريا!!هاه؟!
ابو جواد صدع راسه من كثر الهواش وبنرفزة:عادل اقعد تقهوى وفكنا من القرق الزايد والعرس لاغديت يمه ارعيت الصريمة اللي تحتريك به بعويناتك صدعت برؤوسنا!!
ابو غازي يطالعه مصدوم منه:وش اوجست يامسفر!!
الجد نشمي بتكشيرة:اخزوا ابليس وانكعموا يالاثنين عنا،،طالع ابو غازي،،وبالذات انت ياعويدل
راشد دخل وعلى وجهه ابتسامة:السلام عليكم
ابو غازي التفت يطالعه بابتسامة:هلا ياهلا!!وشرف العلة الثانية شرف!!،،اختفت ابتسامته وبحدة،،وينك فيه من اليوم؟!!
.
..عند الغنم..
بتال يجمع من الحطب ويحطه فوق كومة الحطب اللي جمعها قبال جده وبوسط انفاسه:هاه يكفي؟
الجد بادي وهو يختار من وسط الحطب رفع عينه له:وش،،يقلده بنطقه،،يكفي!!يسدّ يسدّ لااحدن يوحيك بس
بتال بضيق خلق:يسد؟
الجد بادي كشّر بوجهه وهو يطالعه وفاهم عليه:تخيّر لي قرمشن(حطب صغار جدا)زين حتى تشب به النار
بتال عقد حواجبه:وش قرمشه ذا بعد!!
الجد بادي بحدة:استح يارجل!!اقصر حسك!!الوغدان يخبرونه وانت ماتخبر!!واعيباه!!
بتال بقلة صبر:انا اشب لك النار هالحين بدون قراميشك ذي ولاابي اعرفها ولا ابي ادري وش تكون اصلا،،انحنى وهو ياخذ له كم عود بيده من الحطب ويرميها فوق بعض بعناده،،
الجد بادي بغيظ يكتمه:ياولد اوح وجسي
بتال:أشبها انا صبر شوي بس،،انحنى شبه جالس قبال جده بمسافة بسيطة عند الحطب وهو يلف شماغه على راسه زين وسحب العود،،بسم الله
الجد بادي بعصبية سحب مركوعه اللي عن يمينه عالارض بسرعة ومده لقدامه وهو يدف بتال من كتفه بطرفه
بتال جلس:وش فيه؟!
الجد بادي بنرفزة:اعوذ بالله ياهالقنق اللي بروسكم ماتوحون لاحد!!
بتال يطالعه بتكشيرة
الجد بادي:لاتلمس شين ابد خلك محلك،،التفت يطالع الشبوك حقت الغنم رفع صوته،،عباير بنت ياعباير
عباير داخل احد شبوك الغنم واقفة على طوبة ومنحنية بجسمها على برميل باللون الأزرق وهي بيدها زبدية حديد كبيرة وتقطف من الموية اللي بداخل البرميل وتصبه بحوض المويا اللي جنبها وهي تدعي بصوت واطي لكن مسموع للي قريب بس:ياعلش ماتروين(تكتفي من المويا😅)اي والله قطعتي ظهري!!حسبي الله عليك من راعي معدم(خرّب)البزبوز(الصنبور)ياعلّ حيلك ينقطع مثل ماقطعتني،،سمعت جدها ووقفت وهي تطالعهم بمكانه بحقد،،يتقهوى وكابني للعنا واغبنت قليبش ياعباير،،طنشت وهي تكمل شغلتها،،
بتال وقف:اناديها؟
الجد بادي طالعه بتكشيرة من لهجته:مااريدك تزهمها انا خابرن قنقها ودواه مير اقعد اقعد لاتشغلني
بتال جلس
الجد بادي وقف وهو يصرخ وبتهديد:والله ياعباير والله ان مااعجلتي لاادعيش تعلفينها وتحلبينها الصبيحة بكرة ولحالش محدن معش وقلل لاتشرق الشمس وهذاني علمتش
عباير كشرت بوجهها وهي تسمعه ومنحنية داخل البرميل اعتدلت بوقفتها وهي بيدها الزبدية مليانة موية واتجهت لهم
بتال صدّ بوجهه وهو يشوفها جاية لهم
الجد بادي ابتسم برضا
عباير وقفت عندهم وبحدة:هاه
الجد بادي بتكشيرة وحدة:وهواه تهوي بش!!اقصري حسش اوجس لش ماتوحين!! عباير اخذت نفس وقصرت صوتها شوي:هاه
بتال كتم ضحكته
الجد بادي بعصبية:انتي علامش!!وش غادين بش هاه؟!
عباير:والله ابد ماغير ظهيري(ظهري)انمزع ابد مامن غيره شي
الجد بادي زفر:وش مزعلش
عباير فيها الصيحة وهي تشتكي:البرميل خربانن بزبوزه وانا ماغير اتناوط به(تنحني داخله)بهالصفريّة(الزبدية)والما بقاعة البرميل وانت خابرني(تقصد انها قصيرة ماتحلق اخره)ذليت(خفت)اتناوط به وثمن مااعود(تنقلب وهي منحنية وتطيح داخله)
بتال كتم ضحكته وهو يتخيل الشكل وواضح هزة ظهره لها من كثر ضحكه اللي يكتمه
عباير تطالعه بتكشيرة
الجد بادي تنحنح:اقصري حسش ماتوحين!!وثمن وش اعمل لش هاذي خلقتش(يقصد انها قصيرة)تحمدي ربش عالعافية بس
بتال انفجر يضحك بصوت عالي ثم كتم ضحكته بالقوة
الجد بادي تنحنح وهو يطالعه بتقطيبة جبينه
عباير بغبنة:جدي!!
الجد بادي:اغدي اغدي هاتي قرمش كود يتخبره هالرجل وثمن كبي الما هو يسقيه عنش الليلة
بتال اتسعت عيونه وهو يلتفت لجده:هاه
عباير بصدمة:ذا يسقي الغنم!!مايخبر ياجد!!
الجد بادي وعينه على عباير:يخبر يخبر،،التفت يطالع بتال بتكشيرة،،وثمن علامك!!وش غدا بك!!قم قم معها تغدي بك يم الحوض واسق الغنم لانستاثم قم
بتال:بس انا
عباير قاطعته بعصبية:وش هالعلم ياجد تكبه يغدي معي!!ورجلن غريب!!
الجد بادي:ماهو بغريبن عنش!!
عباير:اجل؟!!
الجد بادي:ولد خالتش
عباير كشرت بوجهها:ويوم انه ولد جميلة
بتال قطب جبينه باستغراب من طريقة كلامها عن امه
عباير:تكبني معه!!وش هاللي توجسه ياجد!!
الجد بادي بنرفزة:خالتش جميلة بالاولة وثمن دخلت الغريب لبيتي(يقصد راشد)رايدتني اطرد القريّب!!يازين علومش يابنية!!
عباير:مير
الجد بادي قاطعها بصرخة:عباير!!
عباير فزت وبنفس نبرته:اوحيك!!
الجد بادي:هونّا مانبي شبة نارٍ ابد طسّي يم الشبك وهو يتبعك ذالحين
عباير تطالعه بغيظ
الجد بادي بحدة:علامش!!!
عباير بحدة:هذاني غادية،،عطتهم ظهرها ومشت،)
الجد بادي التفت له وهو متنرفز من عباير وبعصبيته:علامك لذالحين قاعدن يمي!!
بتال:ياجد انا ان بغيتني اختار لك ذبايحك ابشر لكن هالسوالف مااعرفها ابد
الجد بادي بسخرية:صحيح!!وعساك توجس لروحك غادين بك معي حتى تولم القهوة وتبولع بها هاه!!
بتال كشّر بوجهه
الجد بادي رفع مركوعه بتهديد:قم قم لااهفك بهالمركوع قم!!
بتال انصدم منه وهو يشوفه يهدده ووقف:وين تبيني اروح؟!!
الجد بادي يعدله:اغدي اغدي
بتال بنرفزة:وين اغدي؟
الجد بادي شهق:اغدا يمّها وين تغدي اجل!!اعجل عالبنت اعجل لاتبطي عليها وثمن لاتبطون علي احتريكم بالددسن
بتال مشى وهو يستغفر بنفسه ويصبر نفسه عالتصرفات اللي بتصير معه
الجد بادي زفر وهو يوقف ويتجه للسيارة:اعوذ بالله وش هالقنق اللي معهم كل واحدن قنقه اشين من الثاني!!
عباير داخل الشبك وعند البرميل تحديدًا تشاور نفسها اذا تعبي او تنتظره لانه بيريحها من التعب زفرت وهي تصب الزبدية اللي بيدها بالحوض وتهمس:ماظل غيرها يتمنن ولد جميلة علي!!،،طلعت عالطوبة وانحنت داخل البرميل،،
بتال دخل على بداية الشبك وانصدم من المنظر وعطاها ظهره وهو يتنحنح
عباير انقلب وجهها وهي علقت داخل البرميل اللي مستوى الموية داخله اقل من النص تركت الزبدية وهي تمد يديها للجهتين تثبت نفسها وهي تكتم صرختها
بتال شك منها وهو لايسمع لاصوت حركة او حتى صوت لها والتفت وطالعها واستوعب انها عالقة
عباير برجفة صوتها داخل البرميل:علامك متسمّر(ثابت)محلك!!
بتال تقدم بخطواته لعند البرميل وهو محتار كيف يساعدها واخيرا وصل للحل رفع يديه ومسك البرميل ودفه بكل قوته عالارض
.
..بيت مناور..
ام غيث جالسة بزواية البيت بابتسامتها الواسعة وهي ترتب كروات ولدها اللي ماحصل مثلها بزواجات الديرة قبلها(سبتات شعبية وكل سبت داخله قماش وطرحة وحنا وسدر وكحل ومبخرة وبخور)
نايفة وقفت عند امها:يمه تسدهم كل ابوهم كان ادعيتينا(تركتينا)نوزعهن الصبح مثل عوايدنا
ام غيث:ماهو انا اللي تدور على حريّم الديرة بفرحة وليدها هن يجن وياخذن كرواتهن
نايفة هزت راسها باقتناع:اي بالله صحيح!!
ام غيث:مرت الشيخ وولد الشيخ غير عنهم هم بكفة وأهل الديرة بكفتن ثاني
نايفة:يمه يالله قومي عاد وتولمي ماظل شي على جيت العربان
ام غيث:تولمن انتن وثمن جمرتي الفحم؟
نايفة:شريفة ولمته وبخرت غرفة المعاريس وبخرت هدية بعد
ام غيث بنرفزة:مااريد جمر شريفة عنيت الجمر اللي ابخر به اخوش وابوش
نايفة:مليان الجمر انتي بس قومي من هالكروات اللي اخذتن عقلش،،اتجهت للباب وهي تسمعه يدق،،
ام غيث وقفت:مسرعهم لفوا
ام مزون داخلة وهي تزغرط
مزون وراها وهي تجر خطواتها بتأفف وملل وتنزل طرحتها
ام مزون غنت:ياأم غيث تهنتيتي..نلتي ماتمنيتي،،زغرطت التفت تطالع مزون بحدة،،
مزون صفقت بحماس وهي تميل شعرها باستعباط:ويأم غيث تهنيتي نلتي ماتمنيتي وعلى عدوانش تخطيتي،،زغرطت واختفت الابتسامة وهي تتكتف وواضح على وجهها انها مغصوبة عالحضور بهالوقت،،
نايفة تطالعها من فوق لتحت برفعة حاجبها مو عاجبها الوضع
ام مزون:ياعساه مبروك والفين مبروك،،زغرطت،،
ام غيث بابتسامة:امين امين وعقبال مانسيّر عليش ونعاونش بجهازة مزون
مزون بنفسها:الله لايجعله عوذا
ام مزون:الله يزين فرحتش بعويلتهم(عيالهم)
ام غيث:امين امين
نايفة:علامش غاديتن يمنا كود انش ماتبين عون!!
ام مزون دقت مزون
مزون اجبرت نفسها عالابتسامة:وش هالوجس!!حنا نعين ونعاون ماحنا برديين وانتي خابرة الرداة وين مرتعها!!(مكانها)
ام غيث كشرت
نايفة بحدة:وشو؟!!
ام مزون بربكة واضحة:الله يقطع عدوش يابنيتي يانايفة مير انها مريضانة اليوم وانا غصبتها عالجية معي
نايفة بغبنة:مانريد من وراش عون تيسري ودامش مريضانة ماله بـد تجين العرس الليلة
ام غيث بحدة:نايفة!!
نايفة بزعل:مااوحيتيها يمه!!
ام غيث:اغدي يم خواتش وتولمي العرب على جية
نايفة:طيب طيب،،مشت،،
ام مزون وهي تضيع الموضوع:ياعله بالبركة ياعساها زيجة الهنا ياعله يسعدها ويرضيها وياعلها تنسيه المقرودة اللي عذبته بعمره
مزون كشرت بوجهها بزعل
ام غيث:امين امين الله يتقبله وانا اختش ياعساه يتهنى ياعـل السعادة فالهم ومرتعهم.
.
~السيارة~
بتال يسوق
الجد بادي مكان الراكب
عباير جالسة بصندوق السيارة متنقعة موية وهي ضامة نفسها وترجف
الجد بادي وهو يضرب بتال بمركوعه
بتال بنرفزة وجده مستلمه ضرب بهالمكان من ساق السيارة:وش سويت الحين!!
الجد بادي اتسعت عيونه:اعقب ترفع حسك فوقي اعقب
بتال عض شفته يكتم غيظه
الجد بادي:لاتحدر بنا يم خط العبري ثمن وش يفكنا منهم
بتال بنبرة شبه عالية:وانا أبعدت من زمان عن ذا الخط الا انت يدك تحكك!!
الجد بادي التفت له منجلط وصرخ فيه:علامك انت علامك ترادد!!
بتال زفر:ياجد ناظر قبالك هاذي هي الديرة قدامي خلاص يعني عدينا ذا الخط اللي شاغلك من اول
الجد بادي بحدة:يعقبون يشغلوني!!وانت وشو له توجس هاللون هاه!!تراعيني ذالّ(خايف)منهم!!
بتال وقف عند بيت جده:ماقلت شي والله ماقلت!!
الجد بادي:ايه ايه انا اعلمك سلومي ماهو بهالسلوم الشينة اللي غادين بها معك يمي
بال اتسعت عيونه:وانا وش قلت!!!
الجد بادي:ابدن ماتوجس شي مير
عباير وقفت وضربت عالتندة(سقف السيارة😅)وهي تنزل من جهة جدها
،،الكل فزّ،،
الجد بادي بعصبية:عوذا منش اهبي!!روعتينا!!
عباير:الليلة عرسه ياجد لزومن تقوم بالواجب،،مشت للبيت،،
الجد بادي كشّر بوجهه:خابره خابره
بتال فتح الباب ونزل
عباير وقفت عالباب
سعود خارج وهو بقمة كشخته
عباير ارتفع حاجبها:وين غادي يمّه!!
سعود ابتسم:قريّب قريّب،،خرج،،
عباير دخلت
.
..مـكـان الـعـرس الـمـعـتـاد..
غيث جالس بصدر المجلس وعن يمينه ابوه وهو يبتسم مجاملة للي حوله
طلق جالس عن يمين غيث يطالعه بنظرات حادة مو مصدق وجوده
ناصر جنب طلق همس:خلاص شيل عيونك هاللي تلاقط يمّه!!اللي يراعيك يوجس تريده ميت!!
طلق همس:وَذَا الصحيح!!
ناصر انقلب وجهه بفجعة
هليل جالس جنب ناصر وبفضول يذبحه:ناصر وشلون سلمتم من عيال عبري هاه؟!!وشلون؟!
ناصر تنحنح:ربي سهلها وثمن هم أجاويد
هليل ضحك:وشو!!عيال عبري أجاويد!!ومعنا!!لااحدن يوحيك من الجماعة يوجس بك بلا!!
ناصر:وَذَا الصحيح فزع يمي،،وهو ياشر بطرف دقنه ع جسّار،،هالاجودي وهم ماقصروا معه
هليل بصدمة:من جدك؟توجسه صادق!!كبوك تغدي ماعملوا بك شي!!عيال عبري!!
ناصر بحدة:اوووص لايوحيك احد اوجست السالفة يمكم مااريد احدن يعلم اللي حصل!!
هليل:وليه!!خلهم يعلمون بلكن لان راس كبير عيال عبري ويكبنا نعود يم الديار اللي حول المسيل والحلال يتغنم!!
ناصر التفت له وبحدة:والله ثم والله ان علم احد ياهليّل بالعلم اللي خبرتك به لاانت رفيقي ولا اعرفك،،صدّ بوجهه عن هليل،،
هليل:خلاص خلاص على ماتريد علامك خنفرت علي هذا جزاي اريد الخير للديرة!!
ناصر:مشكور محدن رايد الخير من ورا عيال عبري اترك العلم ياهليّل اتركه!!
بتال جالس بين راشد وجسّار وهو يهمس بغبنة منهم:ووجعوه مستقبليني عالباب وساحبيني وراكم قلت فيه مصيبة صايرة ماتبون احد يدري فيها والله ماتستاهل سالفتكم السحبة ذي كلها وفوقها ريحتي ريحة غنم
جسّار:لاتخاف محد بيشره عليك وهم دارين انكم يارجال
بتال كشّر بوجهه:ادفنك الحين!!
راشد؛اوووص حنا جايين عشان الكروة ورايحين هدوء
بتال زفر وهو يطالع راشد:الحين خطتك نأخذها وبعدين؟
راشد:اذا لحقت شي تكلم
بتال كشّر  وهو يطالعه
راشد وهو يطق رقبته يمين ويسار بحماس:الليلة ليلتك ياراشد
بتال:مو انت هاوشتني المرة اللي راحت!!وش فيك بيطق عرقك من زود حماسك!!
راشد:هالمرة غير طلبة يابتال طلبة
بتال قطب جبينه وهو يميل فمه بشك
ابو هليل وقف وهو يمشي متجه لوسط مجلس العرس وبابتسامة وشوفة نفس:حياالله ضيوف الشيخ اهلًا هلا ومليون هلا وترحيبة تكسيكم من روسكم لمواطيكم وحيالله أهل ام جـلاجــل ياحيهم أهل الوفا والكرم والجود الأصيل اخوان فزعة وراعين الواجب حياكم الله جميع بهالليلة اللي من زين الليالي عالديرة ياهلا واهلا هلا بكم بليلتين كلها فرح وسرور الليلة ليلة جواز ولدنا اللي رفع روس عيال ام جـلاجــل بعلمه الزين المهندس غيث
،،اعتلت الأصوات بالمجلس مابين ونعم..ورجال..ابيض وجه..ومبروك>>وسط استغراب بتال وراشد وجسّار من هالمدح المبالغ فيه بنظرهم،،
ابوهليل بنفس الابتسامة:ولد الشيخ مناور الشيخ اللي كلكم تعرفونه الشيخ اللي مايحب راسه على وسادته الا وهو مراعي كل أهل ام جـلاجــل شيخن حكيم طيب جزله عطاياه للغريب قبل القريب شيخنا مناور
الشيخ مناور ابتسم
ابو هليل:واجب علينا نفرح معه ونبارك له وندعي لهم،،التفت يطالع غيث وهو يتجه له،،ولد ياغيث
غيث ابتسم وهو يوقف:سم ياعم
ابو هليل وهو يسلم عليه:مبروك وانا عمك الف مبروك الله يوفقك ويتمم لك على خير
غيث بابتسامة:الله يبارك فيك والفال لهليل ياعم
ابو هليل ويده بيد غيث وهو يلتفت لهم:مثل ماتخبرون هالضعيف واللي انعمل به بجيزته(زواجه)الاولة اللي ربي نجاه منها وراد له الخير مع بنية عمه اليتيمة
غيث ميل فمه بعدم رضا للحظة بسيطة ثم ابتسم
بتال قطب جبينه وهو ياكل تمر:حركات هالخبيث متزوج مرة ثانية!!
راشد بحدة وعينه على غيث:ايه هالخبيث متزوج اختي
بتال وقفت التمرة بحلقه وهو يلتفت لراشد
جسّار بصدمة وهو يطالع راشد:بخوت اختك!!!من متى؟!!لحظة لحظة يعني سعود اخوك!!!
بتال بيموت مكانه وهو يسمع الاخبار الجديدة
راشد:بعدين أعلمكم بعدين المهم الحين الكروة ياعيال الكروة
ابو هليل:بنية العم احسن من الغريبة واجد وكل ابوكم خابرين اللي انعمل بهالمسيكين وارعيتوا البلا والجلا اللي غدا به من وراهم ماعيّن خير والمسكين تروع من الجيزة كل ابوها!!
راشد ميل فمه بسخرية وهو يقارن بين غيث وبخوت بينه وبين نفسه وبهمس:مدري من اللي تروع عساك بالروعة!!
ابو هليل ترك يد غيث وهو يرجع لوسط المجلس وسط صوته اللي معطي المكان:وبعد خمس سنين وهاذي السادسة فتح الله على قليبه ونوى الجيزة عسى الله يوفقه وييسر له عاد ماودي ابطي عليكم والليلة كروتنا غير عن كل ليلة كرو،،سكت وهو يكشر بوجهه يطالعه،،
سعود دخل للمجلس بكامل كشخته كانه هو العريس ثوب ابيض شماغ مرسم بدقة ريحة بخوره الفواحة وعلى اكتافه بشت باللون البيج
راشد ابتسم وهو يشوفه
جسّار:الله الله لايكون زواج سعود ومادرينا!!
بتال يطالع اللي يصير بحماس:جسّار وش فيك صاير دلخ هالمرة غير غير مثل ماقال راشد
سعود وهو يرفع يده:السلام عليكم
،،اللي بالمجلس ردوا السلام وهم مستغربين الوضع،،
سعود عدا ابو هليل بدون اي اعتبار ووقف قبال الشيخ وغيث وبابتسامة وهو يمد يده
الشيخ مناور سلم عليه وهو يخالط باله الشك
سعود بابتسامة:مبروك مبروك عليك الفرح ياشيخ هالمرة عملت اللي تريده ماهو بسكيتي من سواد الوجه اللي انعمل من وراه
غيث كشّر بوجهه
الشيخ مناور احتدت نظرته:سعود!!
سعود شهق:مااوجست غير الصحيح!!علامك شايشن(معصب)علي وانا فرحانن لكم!!،،مد يده لغيث،،
غيث صافح سعود وهو يضغط على يده بقوة يحذره وعيونه اخترقت سعود بنظراته الحادة
سعود ابتسم برواق:عاد لزومن علينا لزوم نبارك لك ونهنيك وانت عندنا غير ياعله مبروك ياغيث مبروكن عليك والف مبروك منك المال ومنها العيال مير مامن عيالن بيلفونك مثل حلايا هي الزين والصلاح كله الله يعينها المسيكينة اللي أخذتك ويفك عوقها لا لفوا يمها عيالك بصرايمهم مايبعدون عنك ابدن
غيث بصراخ:احشم روحك ياسعود
سعود وهو يترك يده:الحشيمة لاهلها،،لف عنه ببرود،،
.
.
<اللهم صل وسلم على نبينا محمد>
.
.