الحلقه الرابعه و العشرون...(24)
صباح يوم جديد
محمد فتح أعيونه لقى بسمه في حضنه و أول ما شافها
ابتسم و قعد ايبحت فيها
بسمه فتحت أعيونها لقت محمد ايشوفلها و مبتسم
بسمه مع ابتسامه و صوت واطي: صباح الخير
محمد مع ابتسامه: صباح النور
بسمه: من امتى نايض
محمد: مالياش واجد دوبي وعيت
بسمه: الساعه كم
محمد: مش عارف
بسمه جت تبي اتصبي محمد ردها في حضنه
محمد: وين ماشيه
بسمه: نبي نمشي انشوف منصور عيب من أمس
امخليته مع أميرة
محمد: تي تعالي قعمزي هنـا عندك وين ماشيه نزلت نبيك
بسمه اضحكت: مانيش هاربه منك قاعده جنبك طول الـ عمر , ولا
ماتبينيش طول الـ عمر
محمد: وربي أجمـل و احنط و أحلـى من يقعد امعايا الـ عمر كلا
بسمه: احميده
محمد: أعيون احميده
بسمه: أنـحـبـك
محمد: ردي قوليها
بسمه: أ نـ حـ بـ ك و كانت بسمه اتقول فيها بـ الحرف
محمد
و قرب شورها و قعد ايحب فيها و ..... جزء من النص مفقود
...............
فـ العشيه
تحديداً الساعه 5
التمو كلهم و قعمزو فـ سور الشاليه و جت زينب صحبت
بسمه و هلها حتى هما تعرفو على أهل محمد و قعمزو
ايهدرزو مع بعضهم طبعاً الرجاله كانواْ دايرين كراسي
برا قدام الشاليه و صبايا امقعمزات في سور الشاليه
.....
زينب و أميرة عيطاً مع بعضهن😱
بسمه ابـ صوت واطي: يا حيوانه إنتِ وياها اسكتاً خزي
الحق عليا أنا يالي نحكيلكاً
وجت بسمه تبي اتصبي زينب مسكتها
زينب: واللهي اتقعمزي اتكمليلنا
أميرة تضحك: واللهي عيطنا من الفرحه و الصدمه
في نفس الوقت
زينب و أميرة😂
بسمه اضحكت😅: خزي بردات
زينب: باهي هيا كملي
بسمه: خلاص هذا يالي صار شن تباً تعرفاً أخرى يعني
أميرة: باهي يعني تم موضوعكم
بسمه ابـ حشم: اهاا
زينب: باهي شنو قلتيله أنحبك
بسمه: قالي و قتله
أميرة و زينب: يا نا عليييييييي
بسمه جت تبي تحكِ فونها رن بحتت لقتها خالتها
جت تبي اترد محمد ناداها
بسمه: أشوية تو انجي
البنات: خوذي راحتك
بسمه عدت شور محمد يالي كان امصبي علي باب الشاليه
بسمه مع ابتسامه: نعم
محمد ابـ صوت واطي: رآيفتلك
بسمه ابـ صوت واطي: حـتى أنـا
محمد جا يبي يحكِ فون بسمه رن من جديد
بسمه: دقيقه انرد علي خالتي
محمد: باه
بسمه ردت: ايوا خالتي
نعمه: خيرآت سوما كيف حالك شن اخبارك
بسمه: الحمدالله يا خالتي اكويسه إنتِ كيف حالك
شن دايره
نعمه: الحمدالله وينكم أنتم جيت أنا و يامن عشان نعزموك
إنتِ و محمد على غداء بكره لكن مافيش حد فتحلنا الباب
بسمه: لالا نحن لنا يومين قاعدين فـ شاليه
نعمه: صااح باهي مش مشكله امتى ماتروحو تو نعزموكم
محمد شيرلها يعني كنها
بسمه حولت الفون من وذنها: جتنا فـ الحوش لقتنا مش قاعدين
كانت تبي تعزمنا
محمد: كلميها قوليلها ايجو يقضو العشيه امعانا
بسمه ردت الفون على وذنها
بسمه: خالتي قالك محمد تعالو اقضو العشيه امعانا
فـ شاليه و اللهي جو ايهبل بكل
نعمه: واللهي شن انقولك تو انشوف يامن كان بى تو انجو
بسمه: خلاص تمام , بس حاولي امعاه صحباتي و هلهن قاعدين
و أهل داري كلهم
نعمه: خلاص تو انشوف
بسمه: تمام نرجو فيك
نعمه: خلاص تم
و سكرت بسمه من نعمه حكت مع محمد أشوية
و بعدين ردت عند صحباتها و اقعداً ايركباً عليها عشان محمد كلمها
أما نعمه قالت الـ يامن ع شاليه و هو سألها من في امعاهم و بعد قالتله
صحبات بسمه طوووول وافق على أمل يلقى زينب قاعده
عدو شور الجزار خوذ لحم للشواء و عدو خذو مشروبات و حاجات حلوه
و مقرمشات و خبزه و رنة نعمه على بسمه قالتلها انهم جيين بس يامن
يبي محمد ايوصفله الطريق و عطت بسمه محمد الفون و وصف الشاليه
لِــ يامن و قالولهم أشوية و ح يقعدو عندهم
..............
عند كمال
خش للشاليه عشان يشرب أميه قبلاته بسمه امصبيه فـ المطبخ
كمال: احم
بسمه برمت ابـ سرعه و بعد شافت كمال استكت
كمال: اااااااااااا نبي اميه
بسمه قدمت شور الكبايه عبتها اميه و قدمت حطتها
ع المرمار جنب كمال
كمال خذى الكبايه و قعد يشرب
بسمه حست روحها توترة و جت تبي تطلع من المطبخ
كمال مد يده علي باب المطبخ
بسمه خافت: كنك شن تبي
كمال: نبي نحكِ امعاك كلمتين
بسمه: شنو قول
كمال: أنا نبي نعتذر علي كل الحاجات يالي درتهن عارف
روحي كنت واحد حقير بس صدقيني توا أنا تغيرت بكل
و معش قعدت كمال الأول
بسمه: هذي حاجه اتخصك أنت
كمال: يعني مش ح تحكِ الـ أميرة شي
بسمه: لو كنتش عارفه أنك أتحبها جديات ما كنتش سكتت
و كنت حكيتلها كل حاجه بس عشان خاطرها و عشان
ما تشوه صورة الشخص يالي اتحبه فـ أعيونها مش ح نحكِ
شي مش علي خاطرك لالا علي خاطر صاحبتي
كمال جا يبي يحكِ علي خشت أميرة و زينب
أميرة بـ ستغراب: كنكم شن في
كمال ابتسملها و برم طلع من المطبخ
أميرة قربت شور بسمه
أميرة: سوما كنك في حاجه
بسمه: لالا ما في شي كان يرشب فـ أميه
أميرة: اهاا
زينب: هيا انديرو قهوه
بسمه و أميرة: هيا
و خشاً ايديراً في قهوه
..............
برا عند محمد
كان امصبي و يرجى في يامن يوصل بعد أشوية
وصل يامن و نزل هو و نعمه
محمد: مرحبتين مرحبتين ابـ خالتي
و سلم عليها محمد و حب علي يدها وراسها
نعمه: اتحب ع الكعبه يا اوليدي
محمد: سلمك يا خالتي خشي تفضلي
يامن مد يده: مرحبا
محمد مد يده وسلم: مرحبتين ولد خالتي كيف حالك
يامن: الحمدالله كيف حالك أنت
محمد: الحمدالله ابـخير , تعال تفضل
يامن: دقيقه انزل الشكاير من السيارة
و عدى يامن شور السيارة نزل الشكاير وجا
محمد: معقوله يا راجل عليش امتعب روحك
يامن: لا واللهي ما فيها مش تعب
خذى محمد الشكاير من يامن و كلم بسمه سلمت علي يامن
و عطاها الشكاير و قعمزو محمد و يامن مع كمال و اقعدو ايهدرزو
أما بعد المهيمن و بات زينب امقعمزين بعيد عليهم و ايهدرزو
..............
فــ ليل تحديداً الساعه 12
بدو الرجاله فـ الشواء و البنات ايوتاً في السفره و ايديراً فـ السلاطات
و ايسخنن فـ الخبزة و الصبايا و الرجاله الكبار ايهدرزو المهم كان جو
خيااااااالي بكل و الكل منسجم مع بعضه
حطو ع العشاء قعمزو تعشو كلهم و الجو ايهبل بعد كملو غسلو الماعين
و قعمزو سهرو مع بعضهم و بعدين الرجاله الكبار خشو رقدو و برضو
الصبايا الكبار خشاً رقداً و عيت زينب روحو للشاليه امتاعهم لكن زينب
قعدت مع البنات و محمد حلف الـ نعمه عشان يقعدو ايباتو امعاهم و بكره
ايروحو مع بعضهم
...............
عند بسمه
كانت هي و صحباتها امقعمزات ع شط أقريب من البحر
و قدامهم امقعمزين كمال و محمد و يامن بس كانو بعيدين عليهم
يامين كان ايشوف للـ زينب من تحت الـ تحت أساساً ما كان في حد
فاطنله لأن محمد أعيونه مع بسمه و كمال أعيونه مع أميرة
البنات كانن ايهدرزاً
أميرة جتها رساله شافتها لقتها من كمال بحتت فيه
شيرلها يعني صبي
صبى كمال اعتذر منهم و عدى و بعد أشوية لحقاته أميرة
محمد قعد أشوية ايهدرز مع يامن و بعدها يامن جاه فون صبى يحكِ
محمد قعد ايبحت في بسمه و طلع فونه و دزلها رساله
بسمه جتها رساله فتحتها لقتها من محمد قاللها تعالي نبيك
و صبى محمد و بسمه قالت الـ زينب أشوية و انجيك
زينب تضحك: تم خوذي راحتك يا حنه
بسمه اقعدت تضحك و عدت ورا محمد
زينب اقعدت امقعمزة و اتشوف للبحر و منسجمه
يامن كمل فونه رد لقى محمد مش قاعد بحت جهة البنات
لقى زينب امقعمزة ابـ روحها فـ قرر يمشيلها و عدى شورها
يامن: سلام
زينب بحتت فيه: اهلين
يامن ضحك: كيف سيبوك ابـ روحك
زينب ضحكت: الله غالب
يامن: لو تبي نقعد امعاك عادي
زينب: عادي تعال ونسني
يامن طبس و قعمز بعيد من زينب
يامن: كيف حال صحتك
زينب: لا الحمدالله اكويسه
يامن: ان شالله معش نسيتي تاخذي ابرة السكر
زينب ضحكت: لالا معش ننسى فيها
يامن ضحك: باهي الحمدالله
قعدو ساكتين أشوية و بعدها
زينب: احم
يامن بحت فيها: كنك تبي تحكِ حاجه
زينب: ااااااا لالا شي
يامن هز راسه يعني باهي
و ردو سكتو هما الأثنين
زينب تبي تسأل يامن و متردده أو بـ الأصح مش عارفه
كيف تسأله
يامن حس أن زينب عندها دوه
يامن: زينب
زينب بحتت فيه: آه نعم
يامن: حاس ان في فمك دوه
زينب سكتت و برمت وجها
يامن: شنو قولي لو تبي حاجه ولا مستحقه حاجه
زينب ردت برمت عليه: تبي الحق
يامن: شنو قولي
زينب: عندي سؤال من فترة و هو عالق في راسي و خاطري
نسأله لكِ و توا مش امصدقه أنك قاعد امعايا و قادره نسألك
يامن ضحك: باهي دبيني قدامك هيا اسألي
زينب: بس ما تفهمنيش غلط
يامن: قولي مش ح نفهمك غلط
زينب: أنت عليش جيتني فـ المستشفى قصدي عليش
رديت عليا فـ الصبح بدري و بعد أمك جت الحوشنا
قالت أنك نوضتها فـ الصبح عشان اتجوني لكن هي قالتلك خليها
فـ العشيه قصدي أنت عليش جيتني بدون أمك و فـ الصبح بدري
يامن برم وجه و سكت
زينب: لو ماتبيش اتجاوب عادي
يامن: لا نبي انجاوب لأن حتى أنا محتاجه الجواب
زينب اقعدت ساكته و تسمع
يامن: نجاوبك بس ابشرط
زينب: قول
يامن: ما تزعليش من جوابي
زينب: لالا مش ح نزعل
يامن: من أول مره شفتك فيها معش قدرت ننساك ولا
ننسى ملامح وجهك قعدي راسخه في ذاكرتي و ما قدرت
انطلعك هذك الليلة ما كنتش نبي انروح و انسيبك لكن أمي
اصرت عليا عشان انروح لكن يشهد الله كنتي طول الليل في بالي
و كانت نار راكبه فيا لأنِ سبيتك بدون ما انشوفك و نطمن عليك
و ما صدقت الصبح طلع عشان انجيك و بعد أمي مابتش تمشي
ما قدرتش لعند العشيه فـ جيتك طول
زينب ابتسمت
يامن: إنتِ حركتي حاجه هنا
و حط يده علي قلبه
زينب تحشمة و اخدودها انحمرو و صبت ابـ سرعه شور الشاليه
يامن ابتسم و صبى في جرتها نين خشت للشاليه برم و عدى حتى هو روح
................
بعد مرور ثلاث أيام
تحديداً يوم تلبيسة أميرة و كمال
عند بسمه
كانت فـ الدار و ادير في شعرها علي جيت محمد
محمد فتح باب الشقه وخش
محمد اينادي: سوما سوماااا
بسمه: هنـا تعال
محمد جا شور الدار وخش
بسمه حطت المملس و صبت شور محمد و ضماته
محمد لف ايديه عليها
محمد: شن دايره يا عمـري
بسمه: الحمدالله امريفتلك بكل
محمد غرس وجه في رقبتها و حبهاا
محمد: الله غالب إنتِ عارفه ظروف العمل
بسمه: عادي يـاروحـي كان ما تحملتك أنت من نبي انتحمل
محمد: نجك ليا سمحتي إنتِ
بسمه صبت على أطراف اصابعها و حباته علي خده
محمد: فيش اديري
بسمه: أندير في شعري عشان نشو الحوش أميرة كمال
يبي ايلبس أميرة
محمد: مش على أساس أمس بعد قرينا الفاتحه تبو تمشو
بسمه: اهاا بس عمتي قالت اليوم فاتحه و تعبنا خلوها بكره
محمد: اهاا , باهي كنك رايحه سمحه
بسمه اضحكت: اسكت انتحشم
محمد: عليش اتحشمي مش أنا حبيبك
بسمه: أكييييييييييييد
محمد: خلاص معناها معش اتحشمي
بسمه: باه
محمد: منصور وين
بسمه: توا هذ كيف بدلتله و رقد
محمد: باهي معناها حتى أنا خليني نمشي اندوش
و ناكل لقمه و انخش انتريح
بسمه: غداك واتي قاعد فـ الكوشه تو انطلع انسخنه لكِ
محمد: لالالا إنتِ كملي حاجتك ما اتعبيش روحك
أنا تو انطلع و ناكله هك
بسمه: غير خليني انسخنه لكِ
محمد: لالا نبيه امصقع خلاص عدي كملي حاجتك
بسمه: باه
خش محمد خذى ادبشه و طلع للحمام و بسمه كملت شعرهاوعطرت جسمها و دارت ميك آب خفيف و لبسة فستانهاو اكسوارها و اقعدت امصبيه ع المرايه و اتعدل في روحهاعلي طلعت محمد من الحمام(حشاكم) وخش عليها
محمد😍
بسمه☺️: كنك
محمد🤤: ناعليااااااااااا عليك سماحه
بسمه☺️: اسكت يا بارد انتحشم
محمد قدم شور و ضمها من لاورا: تي مش قتلك معش
اتحشمي أنـا
بسمه: احميده حول نبي ننزل هيا أكيده يبو ايعدو
محمد🤤: عارفه وحق ربي لو كنت مش تعبان رآه
ما سيبتك اتعدي
بسمه تضحك🤣: خلاص حول عاااااااد
محمد فك ايديه و وخر من عليها
بسمه خذت عبايتها و وِشاحها و لبستهن
بسمه: هيا انا ماشيه دير بالك علي منصور و كان
ناض عطيه الهاينز قاعد فـ الثلاجه
محمد: أي اوامر اخر
بسمه تضحك: هيا باااااااي
و طلعت بسمه تجري و نزلت
محمد ابـ صوت عالي: تي غير اتروحي يا سمحةة
و قعد محمد يضحك و عدى شور المطبخ
...............
بعد نص ساعه تقريباً
طلعو أهل كمال و عدو شور حوش أهل أميرة
بعد أشوية وصلو نزلو وخشو استقبلوهم عيت خالهم
اقعدو ايهدرزو و أميرة كانت طالعه أتهبلللللللللللل بكل
و بعد ساعتين جا الوقت يالي يبي ايخش فيه كمال ايلبس أميرةخش كمال و كان طالعه توووووحفة كانواْ حاطين كرسيينلِــ أميرة و الـ كمال لبسها كمال و طبعاً الجو ما خلى من حركات كمالو الــ 💋💋😂
بعد أشوية قعمز كمال قعد ايهدرز هو و أميرة و اقعدو ايضيفوفي تورتة و في نفس الوقت صارت حاجه محد كان متوقعها بذات كمااااال
خشت ...........
كمال😳🤦
كلهم😮
.
.
.
.
.
يتبع ..
أودي الفرجاني💚
