رواية ﴿الـعـشق الفـاخـر﴾⁦♥️⁩

العشق الفاخر⁦♥️⁩

آسفه ع تأخير كان مفروض من أمس تنزل الحلقه
لكن أنتم عارفين أزمة الضي⁦♥️⁩
------------------

الحلقه السادسه..(6)
عند بسمه
سكرت الطنجره و جت تبي تطلع سمعت حاجه
طاحت ابــ صوت عالي و نصوري عيط
بسمه انفجعت و طلعت ابــ سرعه لقت نصوري
طايح من الصالون علي وجهه
بسمه حطت ايديها علي وجها: هيييييييييييي😱
و عدت شوره تجري علي طلعت غالية من الحمام
و خشت سمر حتى هي تجري
بسمه طبست رفعت نصوري و اقعدت اتشوف الـ راسه
بسمه ابــ خوف😟: اسسس خلاص حبيبي آسفه
واللهي آسفه
سمر جت شورها وفكت نصوري من يدها بــ قوة
سمر ابـ صوت عالي😠: كنه العيل شن درتيلا
علي خشت محمد
بسمه ابـ خوف😟: واللهي ما درتله حاجه مش ابـ قصدي
حطيته ع صالون و عديت للمطبخ و هو طاح
غاليه اتعيط وهي امعصبه😡: انتِ غبيه ولا كيف ,
تي كيف اتحطي عيل اصغير ع صالون عالي و تمشي
و اتسيبيه
محمد: تي شن في كنكم
بسمه ترعش: آسفه واللهي ما قصدي
سمر اتعيط😡: سكري فمك وين نصرفها أنا آسفه هذي
بسمه سكتت و طبست راسها
بسمه😔
غالية اتهزب: مره ثانيه ما اتخليش العيل ابـ بروحه
اتسيبي شغلك كله و تمسكيه هو و بس تي هو راس مال
حفيد تبي تقتليه ليا
سمر: تي هذي وحده غبيه ماتفهمش
محمد ابــ عصبيه😡: تي هاااااااااااااي ردو عليا شن في كنكم
غالية: تعال شوف يالي جبتها لنا أقريب قتلت العيل
محمد ابــ صدمه😳: تي كنكم شن يالي صار
سمر ابــ صوت عالي: امخليه العيل ع صالون و ماشيه
و امسيبته و هو طاح ع أرض علي راسه الحمدالله يالي ربينجاه لنا
بسمه ابــ حزن: واللهي ما قصدي كنت ناسيه الطنجره
ع نار مشيت انشوف فيها و هو طاح
محمد: خلاص حصل خير عدي شوفي شغلك
سمر😡: تي كييييييييف حصل خير انقولك العيل
اقريب مات
محمد ابــ عصبيه😡: سمر خلاص اسكتي
سمر اتعيط ابــ صوت عالي: ما اتقوليش اسكتي مانيش ساكته
محمد شد علي اسنونه: سمر مزلت ماسك أعصابي ومانبيش نغلط أنا قلت خلاص يعني خلاص
سمر: اسكوت مانيش ساكته و دير يالي تبي اديره , وبعدين أنت عليش ادافع عليها انقولك ولدنا اقريب
مات ابــ سببها ، و انت قاعدادافعلي عليها
محمد ابــ صوت عالي: سمرررررر مزلت ساكتلك خلاااااصسكري فمك و انهي الموضوع العيل
اكويس و ما صارله شي
غالية: كيف تبيه نين اتصيرله حاجه بيش تصرف
سمر: شفتيه يا عمتي شفتيه ديماً هكِ هو , كلامه هو الصحو محد ايعانده و ما يبيش يسمع راي حد
محمد ابــ عصبيه: توا عليش التلبيز فــ الكلام و عليش خشيتيعلي مواضيع ثانيه
سمر: ما اصلاً أنا ساكته من أمس و مانبيش نحكِ
محمد: لالا ما تقعديش ساكته قولي يالي عندك قولي
سمر جت تبي تحكِ غاليه قاطعتها
غالية: خلاص أنت وياها اسكتو الناس تسمع فينا
محمد جا يبي يحكِ
غالية: محمد خلاص هي كلمه , خوذ مراتك و اولدك
و اركبو الشقتكم
محمد برم وطلع ركب فوق و هو امعصب للمليووووون
سمر مزالت امصبيه و اتبحت في بسمه ابــ حقد
غالية شافتلها: كيف ما سمعتيني يا سمر
سمر متعقده: شنو يا عمتي
غالية: خوذي اولدك و اركبي في جرت راجلك
سمر هزة راسها يعني باهي و مشت هي و ولدها و ركبو الشقتهم
غالية بحتت في بسمه
غالية: توا تمشي  اتخشي الدارك و مانبيش انحق وجك
بسمه امطبسه راسها و ماسكه دمعتها: باهي خليني انكمل العشاءو انحطه لكِ
غالية ابــ صوت عالي: أنا قلت كمله ما تقعدش اثنين
درقي وجك الدارك ومعش نبي انشوفك فهمتييييي
بسمه برمت و عدت شور دارها خشت و سكرت الباب
قعمزت ع سرير و اقعدت تبكي
..........
عند كمال
وعى علي صوت العركه ناض و طلع لقى أمه امصبيه
فــ صاله
كمال: تي شن هــ الحوش يالي مافيش هدوء بكل
24 ساعه اعياطو اشياط
غالية: تي أنت امتى تقعد فيه الحوش عشان تعرف
شن ياليايصير فيه
كمال: تي غير كنك راقيلك انتِ عليش اتفشي في
غلك فيا
غالية: تعرف اتخاطى وجي
كمال: تي باهي غير وسعي بلابيلك
و برم كمال رد للدار و سكر الباب و خش رقد
من جديدأما غالية طفت ع عشاء و ردت
شور دارها
...........
عند محمد
خش للشقه حط حاجته فــ الدار و سلح ادبشه
وخش دوش وطلع لبس دبش جديد و خذى فونه
و مفاتيحه و طلع من الشقهو سكر الباب بــ القوووووة
سمر طلعت من المطبخ: طبعاً انت هذا يالي شاطر فيه
تطلع و اتسيبلي الشقه خزييييييي
و ردت سمر للمطبخ
...........
عند بسمه
بعد بكت وفشت عبرتها صبت دوشت و بدلت دبشها
و طلعت شيتاتها و قعمزة تقرى علي رنة فونها بحتت لقتها زينب
بسمه ردت: هلا زينب
زينب: هلا سوما كيف حالك اليوم
بسمه حاولت ما اتبين الــ زينب أنها زعلانةة
بسمه: الحمدالله يا روحي و انتِ شن دايرة
زينب: الحمدالله قاعده نقرى لــ امتحان بكره
بسمه: حتى أنا هذا وين حصلت فرصه قعمزت نقرى
زينب: باهي ربي يعطيك الصحه حبيبي
بسمه: سلمك ياروحي
زينب: اسمعيني نسألك
بسمه: شنو قولي
زينب: توا حكيت مع أميرة حسيت جوها مش تمام
كنها صاير امعاها حاجه
بسمه: واللهي ما نعرف هي لما طلعت فــ صبح كان جوها تمام
بس بعدها ما نندريش عليها
زينب: اهاا نحسابك عارفه حاجه
بسمه: لا والله
زينب: باهي المهم هي ح اتجيك بكره الصبح تعالاً
بدري بيش انراجعو مع بعضنا
بسمه: خلاص حاضر أول ما اتجيني أميرة ح انجو طول
زينب: تمام حبيبي انسيبك تقري هيا باي
بسمه: باي ياروحي
و سكرت بسمه  من زينب و ردت تقرى
............
مشى الوقت
تحديداً الساعه 2ونص فــ ليل
ناض كمال من نومه طلع لقى حوشهم هس هس عدى شور المطبخ
فتح الثلاجة طلع عصير و كيكه و قعد ياكل و بعد كمل طلع برا الجنان
و طلع دخانه يبي ايدخن لقى سمر قاعده امقعمزة برا
كمال بــ ستغراب: هذي شن ادير هنا
و ولع كمال السبسي و عدى شورها
كمال السبسي في فمه: سمر
سمر بحتت فيه: بسم الله فجعتني
كمال: تي فيش اديري هنا في هــ ليل
سمر: نستنى في محمد
كمال: شنو محمد عيل اصغير عشان تستنيه
سمر: اوووووف كمال مش ناقصتك اسكت
كمال: تي كنك بسم الله شن حكيت امعاك انا
سمر: كذا خطاني وعدي شوف شغلك
كمال كر الكرسي و قعمز
كمال: تي غير احكيلي كنك شن يالي صاير
سمر: متعاركه أنا و خوك
كمال: عليش كنكم
سمر: عشان خاطر خدامه امعفنه امشرشحه خوك طلع
و سيبلي الحوش
كمال: تي أين خدامه و أين حوش فيش تحكِ انتِ
سمر: ما أنت مانكش عالم شي
كمال: باهي فهميني
سمر: تو نحكيلك من الأول
كمال: تمام احكِ
سمر: عمتي بعد انكسرت اكراعها .........
و حكتله سمر كل يالي صار
كمال: قصدك البنت قاعده عندنا
سمر: اهاا قاعده الها يومين اهي جوا
كمال: من هي البنت قصدي من يالي جابها
سمر: من غيرها أميرة بنت خالك
كمال: اففففففف مبرد دم أمها البنت هذ
سمر: المهم قولي شن اندير
كمال صبى: بـ النسبة لـ محمد مش ح ايجي الليلة
اركبيارقدي خيرلك من القعده فــ الصقع
سمر: تي وين ماشي
كمال: طالع , هيا سلام
و عدى كمال طلع و سكر الباب
سمر: خزي حيوان(حشاكم)
وصبت ركبت فوق شافت ولدها لقاته راقد
خشت الدارها و رقدت
...........
عند محمد
بعد طلع من الحوش برم أشوية و بعدين عدى شور
المستشفى خلى الدكتور يالي ماسك توكه ايروح
و مسكالتوكه بداله
...........
مشاً الأيام
و محمد و سمر ما يحكو مع بعضهم الا بــ الرسميات
أما بسمه اقعدت اتحاشى في أهل محمد و طول الوقت
اتضم و اطيب و اتشوف غالية شن ناقصها و باقي
الوقت بعد اتكمل اتخش الدارها و اتسكر علي روحها
و ما تطلع , سمر مزالت مش عجبتها قعدت بسمه
و كل يوم اتوز علي راس غالية و اتقوللها ان بسمه
مافيش منها فايده انها لازم اتزلها و هي ح تخدمها
بـ أعيونها أما كمال طول وقته برا الحوش و ما يندري علي شي لكن كان عنده فضول ايشوف البنت يالي تشتغل عندهم و في نفس الوقت كان ايدور علي البنت يالي شافها فــ الجامعه يالي هيبسمه بس بعد دور واجد و ما وصللها طلع الموضوع من راسه و فاتها بكل , أميرة بعد سمعت كمال حاولت تنساه و تقنعروحها أن كمال مش الها لكن ما قدرت لأنها أتحبه من هي و اصغيرة
بس اقعدت اتحاشى فيه و ما اتخلي فيه ايشوفها ولا
هي اتشوفهعشان اتحاول تنساه
..........
بعد مرور ثلاث أسابيع
محمد خش من الباب هو و أمه
سمر جت تجري: ها طمنوني
غالية ابــ فرحه: خلاص كلها ثلاث أيام و انحول الجبس
سمر ابـ فرحه: باهي الحمد الله
(مع العلم سمر ما فرحت الـ عمتها لا هي فرحت لأن
بعد عمتها اتحول الجبس و اتصح بسمه ح يكمل شغلها
عندهم و ح اتعدي من الحوش)
محمد: هيا أمي تبي حاجه أنا طالع
غالية: لالا سلامتك
محمد برم يبي يطلع
سمر ابـ صوت واطي: عمتيييي قوليلا ع فرح
غالية: اهاا احميده
محمد: نعم
غالية: بيش بعدين اتجي تاخذنا الفرح عليوه حفيد
ولد خالتي
محمد: اهاا مش ناسيكم تو انجيكم بعد المغرب
غالية: خلاص تمام
محمد: ما اتسيبوش بسمه ابـ روحها خذوها امعاكم
غالية: اهاا أكيده ح ناخذها عشان اتعاوني فــ الفرح
سمر اتوشوش: زمري عاد بسمه ديما مذكرها أكثر حتى من
مراته و أولده
محمد: هيا مع سلامه
و برم محمد طلع علي فتحت باب الحوش
وخشت بسمه
محمد مع ابتسامه: سلام
بسمه ابــ حشم: اهلين استاذ محمد
محمد: كيف هذي الترويحه من الجامعه
بسمه: اهاا هذا وين روحنا
محمد: كيف أميرة مش امعاكي
بسمه: لالا روحت تبي اتجي بعد الغداء
محمد: اهاا تمام انتِ تبي حاجه ناقصك حاجه
بسمه: لالا بارك الله فيكم أنتم مش امقصرين امعايا
في شي
محمد: تمام أي شي ناقصك قوليلي وما اتحشمي
أوكي
بسمه ابتسمت: تمام
محمد: هيا سلام
بسمه: سلام
طلع محمد و بسمه خشت لقت سمر و غالية امقعمزات
فــ صاله طلقت عليهن السلام وخشت بدلت دبشها
و طلعت طول ولعت ع غداء  و اقعدت تبرم و اتضم
فــ الحاجات يالي حيسات
(طبعاً بسمه اتنوض ع فجر تنصب فـ الغداء و اتضم
فـ الحوش و اتوتي فــ الفطور و اتوتي دواء غاليه
يعني ما تمشيش للجامعه الا وهي امتممه امور الحوش)
...........
فــ القيلة تحديداً الساعه 3ونص
أميرة: اوووووف بسمه بلاش سماطه
بسمه: أميرة فكيني واللهي مانبي نلبس لا اندير شي
أميرة: انتِ ماشيه للفرح و الناس تبي اتشوفك كيف
تبي تمشي امبهدله
بسمه: أميرة أنا بس ماشيه انعاون عمتي غالية عندي
عليش لابسه و حاطه ميك آب
أميرة: هي كلمه وحده ورد غطاها اهو انا جبتلك امعايا
قفطان تلبسيه و انحطلك ميك آب و اديري شعرك
و انتِ ساكته و ما اتنقشيش امعايا
بسمه: بس ...
أميرة قاطعتها: هي كلمه وحده صبي عدي دوشي
و اغسلي شعرك و تعالي نبدالك
بسمه: اوووووف منك و خلاص , باهي اقل شي خليني
انشوف عمتي غالية بالك تبي حاجه
أميرة: عدي ديري يالي قتلك عليه و عمتي أنا تو نمشي انشوفها
بسمه: اخر كلام
أميرة: اخر كلام
و صبت بسمه خشت للحمام و أميرة طلعت عشان اتشوف
لو غالية مستحقه حاجه
............
عند سمر
كانت قاعده مع غاليه فــ دار و امقعمزة ع المراية
و اتحط في ميك آب علي خشت أميرة
أميرة: عمتي
غالية: نعم أمورة
أميرة: جيت انشوف لو تبي حاجه ولا مستحقه حاجه
سمر اتحط فـ الكريم على وجها: تقريباً عندنا خدامه تخدم عمتي
أميرة بحتت فيها ابـ نص عين: أول شي معش اتقولي علي بسمه خدامه ثاني شي أنا يالي تقلها انتِ دوشي و وتي الأستشوار و أنا يالي ح نمشي
انشوف عمتي و ردت أميرة بحتت في عمتها
غالية: لالا حبيبتي مانبيش شي
سمر برمت علي أميرة: وعليش الأستشوار بالك تبي تستشور
أميرة: تقريباً نحن مشيين الفرح أكيده تبي تستشور و اتحط ميك آب و تلبس
سمر حطت الكريمه ابــ عصبيه: و انشالله خير عليش هذا كلا راهي
عقاب خدامه ماهيش بنتنا ولا كنه عشان ادير هذا كلا
علي خشت محمد من باب الحوش سمع هرجه و صوت البنات عالي
أميرة قدمة شور سمر ابـ عصبيه: أنا قتلك معش اتقولي عليها خدامه
بسمه مش خدامه
سمر: هه معناها شن انسموها
أميرة ابــ صوت عالي: بسمه بنت كيفنا كيفها هي بس ظروف الدنياالشينه هي يالي خلتها توصل للمرحله
هذي و بعدين يالي اتقولي عليها خدامه هذي تسواك
و تسوى هلك يا حقيرة
سمر صبت علي حيلها ابـ عصبيه: نعم نعم نعم شن قلتي
أميرة: كيف ما سمعتي
غالية: هييييييييي يا بنات عيب يالي قعدات ايدراً فيه
سمر ابـ عصبيه: شوفي بنت خوك كيف تحكِ امعايا يا عمتي
أميرة: و كنها بنت خوها ولا مش عاجبك كلامها
غالية: أميرة عشان خاطري خلاص
أميرة: على فكرة انتِ انسانه متخلفه و عقليتك متخلفه
و مش عارفه احميده كيف متحمل يقعد مع وحده زيك كل هــ الوقت
و برمت أميرة تبي تطلع علي خشت محمد يالي سمع كل الكلام يالي صار
أميرة شافت الـ محمد و طلعت من جنبه و عدت الـ دار بسمه
سمر: محمد ...
محمد قاطعها: تعالي اركبي قدامي فوق
سمر جت تبي تحكِ
محمد: الحقيني
و برم محمد طلع و طلعت سمر في جرته و ركبو فوق الشقتهم
غالية: لا حول ولا قوة الا بالله عليك قصة هي
............
عند أميرة
خشت للدار علي طلعت بسمه من الحمام(حشاكم)
بسمه لافه راسها بــ المنشف: أميرة أنا كملت دوشت
و غسلت اشعري
أميرة و هي غمتلها: تمام هيا تعالي نستشورلك
بسمه بـ ستغراب: أميرة كنك في حاجه , باين عليك جوك مش تمام
أميرة: لالا مافيش شي غير راسي صداع اشوية
بسمه: تو نعطيك بنادول عندي
أميرة: تمام تعالي انكملو حاجتنا  بعدين تعطيني
بسمه: أوكي
و جت بسمه قعمزت و بدت أميرة اديرلها فــ شعرها
و بعد كملتلها بدت بسمه ادير الأميرة في شعرها
............
عند محمد
ركب الشقته فتح الباب و خش و سمر خشت في جرته
و سكرت الباب
محمد برم عليها: انتِ ماتبيش اتغيري من روحك
سمر ابـ خوف: كنك شن درت أنا
محمد: ما اتحاوليش تكذبي عليا أنا سمعت يالي صار كلا
سمر ابـ رفعت حاجب: قصدك جاي تبي اتهزبني علي خاطر خدامه
محمد ابـ عصبيه: تي انتِ كنك هكِ فهميني كنك هكِ وحده متخلفه
و مش متحضره بكل
سمر: اووووووووو ماشالله سيبت بنت خالك طلعتلي أنت
و بعدين أنت عليش ادافع عليها الفرخة يالي أسمها بسمه هذي
عقاب خدامة امعفنه اتصبي في وجه مراتك
محمد: سمر احترمي نفسك و معش اتقولي خدامه امعفنه
سمر: باهي باه خلاص قولها من الأخير قول قول أساساً باين في وجك
من أول جيتها قلبتلي حياتي فوق تحت و غيراتك عليا
محمد بـ ستغراب: انتِ فيش تحكِ
سمر: قولها قولها أن البنت عاجبتك أساساً من أول
جيتها انت فرشتلها الأرض ورد غير شن تبي يا بسمه
اتقول مراتك مش خدامتك
محمد ابــ عصبيه: سمر سكري فمك
سمر: ههااااااااااهي عليش انسكر فيه فمي ولا جيت ع جرح اهاا
ياربي القني جيت ع وتر الحساس بسمه
و كلمة بسمه قالتلها ابــ هزوة
محمد ايقدم عليها بدون مقدمات و هوووووووب
يعطيها كفنين خدها نمل
سمر حطت يدها علي خدها و اقعدت مصدومه
محمد: تعرفي انك احقر عباد الله
و لف محمد طلع و سيبها و سمر مزالت امصبيه و مصدومه
من يالي صار لأن هذي كانت أول مره محمد ايمد يده عليها
سمر و العبره خنقتها: تضربني عشانها يا محمد ماشي الحال واللهي
انوريك يا بنت الكلب (حشاكم)
و طلعت سمر من الشقه و ردت نزلت تحت عند عمتها
و اقعدت اتكمل في ميك آبها و ولا كأن صاير حاجه
............
مشى الوقت
و أميرة و بسمه كملاً شعرهن و داراً ميك آب و لبساً فساتينهن
أميرة اتشوف لِــ بسمه يالي طالعة توووووووحفه
أميرة: ياروحي يا سوما كيف طالعه اتجنني واللهي سبحان الخالق
يالي بدع في خلقك
بسمه ابــ حشم: مش للدرجه هذي عاد
أميرة: و قسماً بذات الله أنك جميلة يا سوما ولون شعرك الأحمر
الطبيعي ايجنننننننن بكل
بسمه: شكراً يا قلبي حتى انتِ طالعه اتجنني
أميرة: نجك ليا
بسمه: من يبي ياخذنا
أميرة: ماما توا جايبها بابا فــ طريق قالت انتكي ناخذ جزء منكم
و احميده ياخذ الباقي اهو حس سيارة بابا شكلهم جو
بسمه: اهاا باهي خلينا نمشو مع باتك
أميرة: اهاا .. و بعدين سكتت
بسمه: أميرة كنك وين رحتي
أميرة ابــ خبث: اصبري دقيقه
بسمه: وين ماشيه
أميرة: اصبري بس
خذت أميرة عبايتها و وِشاحها لبستهن و طلعت لقت غالية و سمر
لبسات و امصبيات فــ السقيفه
أميرة: هيا احميده وصل
سمر بـ ستغراب: وينه
أميرة: اهو حس بيابته
غالية: هيا هي اطلعي يا سمر
سمر: خلاص معناها انتاً تعلاً مع باتك
أميرة ابــ هزوة: اهاا تو نمشو مع باتي
و طلعت سمر هي و غالية برا قابلهم بات أميرة و أمها
سمر بعد شافتهم انصدمة
عبدالمهين: هيا اركباً
غالية: نحسابوكم احميده
هاجر: باهي مش مشكله تعلاً أنتاً امعانا و الباقي يمشاً مع احميده
سمر: اااااا عمتي انتِ عدي امعاهم و تو انكلم اميرة و بسمه
و انا تو نرجى احميده
غالية: مافيش داعي عندك عليش ترجي نحن طلعنا طلعنا
هيا اركبي و أميرة و بسمه تو ايجاً مع احميده
سمر ابــ توتر: لالا يا عمتي ...
عبد المهيمن قطع عليها
عبد المهيمن: هيا خلاص اركباً مافيش داعي اتكثراً كلام
باقي البنات ايجيبهن احميده
غالية: باهي هيا
و ركبت غالية و سمر اتساعد فيها و ركبت سمر وهي راقيييييييييلها
للألف و غمتلها من يالي صار و كانت عارفه أن أميرة كانت عارفه
ان يالي جا باتها و دارتها فيها بـ العاني
و علق عبد المهيمن شور القاعه
...........
عند أميرة
بعد شافتهم عدو خشت جوا وهي تضحك
بسمه: كنك تضحكِ بسم الله
أميرة تضحك: شي غير اذكرت حاجه اتضحك
بسمه: باهي شنو عدو
أميرة: اهاا عدو اسمعي أنا ماشيه للحمام(حشاكم) انتِ البسي
عبايتك قبل لا ايجو ياخذونا
بسمه: تمام
طلعت أميرة شور الحمام و بسمه جت تبي تلبس
عبايتها علي رنة فونها بحتت فيه لقتها غالية
بسمه ردت: الو عمتي
غالية: بسمه جبيلي امعاك دواي انسيت ناخذه
بسمه: تمام بس وين قاعد
غالية: في الدرج يالي فـ جنب راسي
بسمه: باهي تمام
غالية: توا خوذيه و حطيه في شنطتك قبل لا تنسيه
بسمه: هيا طالعه
غالية: توا اطلعي و خشي للدار فيسع
بسمه: هيا هي
و طلعت بسمه ابــ سرعه خشت الدار غالية و اقعدت
اطلع فــ الدواء
..........
عند محمد
كان فــ المستشفى كمل شغله و لم حاجته و طلع
من المستشفى عدى شور حوشهم وصل درس
السيارة و نزل خش للحوش و عدى شور دار أمه
محمد فتح باب الدار: أمي هيـا بيـ ...
و بعد شاف بسمه استك و انصدم
...........
عند بسمه
كانت اطلع فــ الدواء فجأة انفتح عليها باب الدار
بسمه ادور فــ الدرج: أميرة ماشفتيش دواء السكر امتاع
عمتي غالية
و برمت بسمه قابلها محمد
بسمه انفجعت: هييييييي أستاذ محمد
محمد مزال مستك و امصبي و ايشوف لِــ بسمه يالي كانت
لابسة فستان أسود راسملها جسمها يالي كان كيف الحوريةو شعرها الأحمر الموج و فيه لمعه جميلةة بكل و أعيونهاالزرقة و بياضتها يالي كيف الثلج و لابس اكسوار لولي
محمد ما كانش فاطن الروحه كيف اليبحت فيها
لأنها فعلاً جذباتهابـ جمالها
بسمه كانت امصبيه و متحشمه
بسمه رفعت أعيونها و شافت الــ محمد يالي كان طول
في عرض شخصية مش عادية بكل اللحية و الشعر
في حته ثانية العيون و لونهن ايجننو
و اقعدو ايبحتو في بعضهم نيييييييييين
أميرة اتنادي: سوما يا سوما
و خشت للدار شافت احميده و سوما ايبحتو في بعضهم
أميرة بـ ستغراب: احميده
محمد بعد أميرة نداته فطن للوضعيه يالي هو فيها
محمد: آه نعم
أميرة: كنك تبي حاجه
محمد: لا جيت انقول لـ أمي هيا عشان انشيلكم
أميرة: عمتي و سمر عداً مع بابا و ماما مزلنا أنا و بسمه بس
محمد: تمام هيا أنا نرجى فيكاً برا
أميرة: هيا هي خمس دقايق بس
لف محمد طلع و أميرة خشت شور بسمه
أميرة: تي فيش اديري انتِ هنا و احميده كيف خش عليك
بسمه مزالت مستكه: آه شنو
أميرة: تي شنو آه شنو
بسمه اقعدت اتحك في راسها: عمتي غالية رنة عليا و ........
أميرة: باهي هيا تعالي البسي عبايتك و وِشاحك و أنا تو انطلع الدواء
بسمه: تمام
و عدت بسمه لبسة عبايتها و وِشاحها و أميرة خذت الدواء
و طلعت هي و بسمه ركباً للسيارة و عدى بيهن محمد شور القاعه
............
فــ القاعه عند سمر و غالية
كانن امقعمزات ع طاولة و امعاهن هاجر أم أميرة
و امعاهن صبايا يقربنلهم و ايهدرزاً
سمر كانت قاعده علي ناااااااار و قهرتها أن بسمه ح تمشي
مع محمد فــ سيارة
أشوية اخرى جاً أميرة و و بسمه خشاً سلحاً عباياتهن و قعمزاً
امعاهم ع طاولة و اقعداً ايهدرزاً مع بعضهن و يحكاً مع زينب
فيديو و ايرواً فيها كيف طالعات
زينب: سوما كنك مش لابسة سلسال
بسمه حطت يدها علي ارقبتها
بسمه: هييييييييييي وين عدت أنا كنت لابسه سلسال
أميرة: يا طاحت فـ الحوش يا أما سيارت احميده
بسمه: يلا ما لياش نصيب نلبسها
زينب: هيا انسيبكاً أنا توا نحكو بعدين
بسمه و أميرة: تمام باي
زينب: باي
و سكراً البنات من زينب و اقعداً ايهدرزاً مع بعضهن
سمر صبت و جت شور بسمه و عزقت منصور عليها
سمر ابـ ستفزاز: خليه امعاك ورد بالك منه رآه ايصيرله حاجه
بسمه مسكت منصور اكويس: تمام
أميرة جت تبي تحكِ بسمه حطت يدها على يدها يعني ما تحكيش
سمر جت تبي تمشي علي جيت وحده تعرف غالية
المرا: غالية كيف حالك
غالية: اهلاً اهلاً كيف حالك شن اخبارك
و سللاً علي بعضهن
المرا: الحمدالله كيف حالك انتِ و العيال
غالية: واللهي الحمدالله في نعمه
المرا بحتت في بسمه: ماشالله هذا حفيدك
غالية: اهاا منصور اوليد احميده
المرا: ماشالله لا قوة الا بالله كنتك اتهبل لا قوة الا بالله
سمر بعد قالت المرا علي بسمه كنتك اتهبل اقريب ماتت
سمر و هي متعقده: لالا أنا كنتها , أنا هي مرات احميده
المرا: اهاا امالا هذي من
سمر: هذي خدامــ ....
غالية قاطعتها: هذي صحبت أميرة بنت خوي
سمر بحتت في عمتها ابــ صدمه
المرا: اهاا ماشالله لا قوة الا بالله عليك يا ابنيتي عيني عليك
بارده ربي يحفظك من العين 
بسمه ابــ حشم: تسلمي يا عمتي
مشى الوقت و كل مره جايه وحده اتسلم و تحساب بسمه هي
كنت غالية سمر رقالها بككككككل و خذت منها منصور عشان
معش حد يسأل عليها لكن طول الوقت الصبايا يالي فـ الفرح
كلهن يسألاً عليها
.............
عند محمد
بعد وصل البنات للفرح عدى للمستشفى قعد يشتغل بس عقله
كان كل مره ايذكر فيه بِــ بسمه و كيف كانت جميييييييييييلة
حاول محمد معش ايفكر فيها لكن صورتها كانت عالقة في
مخيلته , علي قيس الساعه 11 طلع محمد من المستشفى
فتح باب السيارة الخلفي جا حط شنطته جت عينه علي سلسال
طايح فــ سيارة طبس عليه و خذاه
محمد بـ ستغراب: امتاع من هذا
و خذاه محمد و حطه في جيبه و سكر باب السيارة و عدى ركب
و علق شور القاعه
محمد طلع فونه و رن علي أمه
محمد: ايوا يا أمي
غالية: ها احميده
محمد: شنو انجيكم
غالية: لالا خالك جا هو تو ايروح بينا
محمد: باهي تمام
و سكر محمد و علق شور الحوش
...........
فــ القاعه
كانوا قاعدين يرجو في عبد المهيمن ايجيهم
بسمه: هيييييييييييي
أميرة: كنك بسم الله
بسمه: نسيت فوني جوا ع طاولة
أميرة: عدي جيبيه فيسع قبل لا ايجي بابا
بسمه: هيا هي
و خشت بسمه جوا ابــ سرعه و اقعدت ادور في فونها
بعد اشوية جا عبد المهيمن طلعو كلهم و محد فطن أن بسمه
مش قاعده امعاهم الا سمر كانت فاطنه لكن مابتش تحكِ
و قالت خليها تقعد هنا و نفتك منها ركبو كلهم فــ سيارة
و عدو شور الحوش و هما وصلو لَــ نص الطريق رن
فون أميرة طلعاته لقتها بسمه
أميرة فنصت أعيونها: بسممممممه
سمر ضحكت ضحكة شيطانية
أميرة ردت عليها ردت عليها
بسمه ابــ خوف: أميرة وينكم طلعت لقيتكم مش قاعدين
أميرة: حي عليا واللهي انسيتك بككككل
بسمه: حي عليا أنا خايفه يا أميرة القاعه فضت معش في الا
أهل الفرح
أميرة: باهي اصبري تو انردو عليك
بسمه: ابــ سرعه واللهي خايفه
أميرة: تمام هي وسكرت أميرة و قالت الــ باتها أنهم نسو بسمه
فــ القاعه و عبد المهيمن قعد ايهزب كيف ينسوها و قال
أن ما يقدر ايرد عليها لأن وصل لِــ نص الطريق
و غالية قالت الأميرة اترن على محمد هو يمشي ايجيبها
سمر سمعت أن محمد هو يالي ح يمشي ايجيب بسمه
اقريب مااااااااااااااتت و قالت ياريتني ما خليتها تقعد
رنة أميرة على محمد و قالتله ايرد علي بسمه و هو قاللها باهي
...............
عند محمد
أشوية و وصل للقاعه رن علي بسمه بس هي
ما ردت عليه نزل و عدى شور باب القاعه قبلاته بسمه
امصبيه برا
محمد ابـ صدمه: بسمه فيش اديري هنا
بسمه: أهل الفرح روحو و القاعه سكرت
محمد: باهي هيا تعالي خلينا انروحو
لف محمد و عدى شور السيارة و بسمه نزلت من الدروج
و هوووووووب اتعكف ع الدروج و اطيح
بسمه: آآآآآآآآآآآآآآآه
محمد سمع صوتها برم لقاها طايحه عدى شورها يجري
و طبس عليها
محمد: بسم الله بسم الله انتِ اكويسه
بسمه رفعت راسها و شافت للـ محمد يالي كان نازل عليها
و وجه لاصق في وجها و اقعداً اعيونهم في أعيون بعضهم
بسمه و محمد🤤⁦♥️⁩

وفجأة ..
.
.
.
.
.

يتبع...
بسمه و محمد شن يالي قاعد ايصير بيناتهم ؟
سمر من جيت بسمه وهي كل يوم في مشاكل مع محمد
شن ح ادير سمر و كيف ح تصرف مع بسمه ؟
هذا كلا ح نعرفوه فـ الحلقه الجاية

أودي الفرجاني💚