عارفة روحي طولت و الحلقه مفروض تنزل
من أمس لكن من سوء حظي و حظكم جيت
درت تحديد كل و نبي أندير نسخ درت حذف🤦
و طارت النية أن أنرد نكتبها من جديد😭
___________
الحلقه السادسه عشر...(16)
بسمه مصدومه و ساكته
محمد ايبحت فيها: بسمه كنك ساكته ردي عليا
بسمه بحتت فيه: أنـا ... وسكتت
محمد: إنتِ شنو احكِ
بسمه سكتت
محمد: بسمه عارف روحي غلطت في حقك واجد
و سمعتك كلام مش تمام و عارف معاملة هلي امعاك
كانت مش تمام و أنا انرد انتأسف علي كل حاجه صارت
و كان علي سمر خلاص أنا طلقتها و كلها يومين و ننهي
موضوعها فـ المحكمه و اندزلها ورقتها
بسمه في عقلها: بس أنت ليش تبي اتكمل أمعايا ليش ماتبيش
اطلقني و تاخذ غيري ليش أنا مش غيري
محمد: بسمه ردي قولي حاجه ما تقعديش ساكته
بسمه مزالت ساكته و مش قادره تحكِ ولا كلمه مع محمد
محمد: أنا مانبيش نضغط عليك خليك الليلة تريحي أرقدي
و فكري فـ الموضوع و بكره فـ الليل اترديلي جواب تمام
بسمه هزت راسها يعني تمام
محمد ابتسملها و صبى طلع من المربوعه و خش الداره
بدل ادبشه و فرد جسمه ع سرير و قعد ايفكر أشوية و بعدين
خذاه النوم و رقد أما بسمه كملت الليل و هي اتشوف للخاتم
و مش امصدقه أن محمد طلبها اتكون زوجته رسمياً
أذن الفجر صبت بسمه صلت و رفعت ايديها الـ ربي
و دعت أن ايساعدها و ايكون جنبها و يعطيها كل حاجه
فيها خير الها و بعد كملت خشت الفراشها و اقعدت اتفكر
نين رقدت
...............
صباح يوم جديد
وعى محمد صبى قعمز ع سرير و رفع فونه
شاف للساعه لقاها 11
محمد ايحك في لحيته: اوووووف القني منزلت نعسان
علي دقت باب الدار
محمد: خشي
بسمه فتحت الباب وخشت بـ شوية
بسمه: انشالله مازعجتك بس
محمد: لالا تعالي خشي
بسمه خشت: فاضي ولا عندك حاجه
محمد: لالا ماشي للمستشفى لكن ع ساعه 12 ونص
كنك تبي حاجه
بسمه امشبكه ايديها في بعضهن: نبي نمشي للجامعه أنشوف
البنات و ناخذ المحاضرات يالي فاتني
محمد: خلاص تمام خلينا نفطرو و بعدين انشيلك
بسمه: آه
محمد ضحك: كنك مستكه قتلك حطيلنا فطور نفطرو
و بعدين انشيلك
بسمه ابـ فرحه: خلاص تمام
محمد: منصور وين
بسمه: اهو برا يلعب تبيه
محمد: لالا تو نطلعله
بسمه: تمام
و طلعت بسمه تجري عدت شور المطبخ و بدت اتوتي
فـ الفطور و محمد صبى طلع غسل وجه و قعمز برا
بعد أشوية كملت بسمه و كلمت محمد عشان يفطر و جا
محمد قعمز و بدى يفطر
محمد بحت في بسمه: تعالي افطري وين ماشيه
بسمه: لالا ماعنديش نيه نبي نمشي نلبس
محمد: باهي ابـ راحتك
و عدت بسمه خشت للمربوعه خذت دبشها و طلعت
للحمام(حشاكم) دوشت و بدلت دبشها و جففت شعرها
و لماته و لبسة وِشاحها وطلعت لقت محمد امكمل فطور
و واخذ منصور و نازل تحت , بدت بسمه اتلم فـ سفرة الفطورو بعد كملت خذت شنطتها و طلعت و سكرت الشقه و نزلت تحت
..............
عند محمد
كان امقعمز مع أمه فـ الجنان
غالية: شن صار في قصة سمر
محمد: عندي أوليد صاحبي محامي كلمته و قالي
أنها كلها يومين وينهي القصة و ايطلقنا
غالية: باهي و بسمه حتى هي
علي جيت بسمه تبي تطلع سمعت أسمها وقفت
محمد بـ ستغراب: كنها بسمه
غالية: قصدي امتى تبي اطلقها
محمد: و من قالك نبي انطلقها بسمه
غالية: نعـمم كيف ماتبيش اطلقها ؟
محمد: اهاا مانبيش انطلقها الا هذا هي تبي تطلق منِ
غالية ابـ عصبيه: كيف الكلام هذا
محمد: مافيهاش من كيف أنا أمس حكيت أمعاها و قتلها
لو هي وافقت نبي نزوجها رسمي
غالية شهقت: نعممممم هذا يالي ناقص تزوجلي خدامة بنت شوارع
محمد ابـ عصبيه: أمي بلاش كلام طالع نازل عليها
غالية: وكنك ادافع عليها ساحرتك لا شنو
محمد: لأنِ أنحبـها يا أمـي
غالية صدمتها كلمة محمد
بسمه بعد سمعة كلام محمد حطت يدها علي قلبها
يالي كان ايدق ابـ سرعه و مصدومه بككككككل
غالية: تي أنت امتى لحقت أتحبها أصلاً
محمد: أمي الله ايربحك خليني علي راحتي و ما تزقبيلي
أنا البنت نبيها ومانيش امطلقها لو ايش ايصير ولو هي وافقت
ح ندفع فيها و انديرلها فرح كيفها كيف أي بنت هيا سلام
وطلع محمد ولع سيارته و رن علي بسمه
بسمه مزالت امصبيه و مش امصدقه الكلام يالي سمعاته من محمد
و قطع عليها فونها يالي ايرن طلعاته من الشطنه لقاته محمد
بسمه زمطت ريقها: نعم
محمد: هيا أنا نرجى فيك فـ سيارة
بسمه: هيا جاية
محمد: تم
و سكر محمد و بسمه حطت فونها فـ الشنطه وطلعت
قابلتها غالية ماسكه منصور و خاشه للحوش
بسمه: صباح الخير
غالية ولا كأن اتشوف فيها خشت للحوش و سيبتها
بسمه وجعتها معاملة غالية الشينة و طلعت ركبت مع
محمد فـ سيارة و عدو شور الجامعه بعد أشوية وصلو
محمد درس: امتى ما اتكملي ديريلي رنة
بسمه: تمام
وجت بسمه تبي تنزل
محمد: اصبري دقيقه
وحط محمد يده في جيبه وطلع منه أفلوس و مدهن الها
بسمه بـ ستغراب: شنو هذين
محمد: كيف شنو , أفلوس
بسمه: عرفتهن أفلوس , قصدي عليش الفلوس
محمد: عشان تفطري بيهن
بسمه: لالا شكراً مانبيش
محمد: أنا قتلك خوذيهن كلمه وحده
بسمه: بس أنـا ...
محمد قاطعها: محمد ابـ صفتي مزلت راجلك
يعني تسمعي كلامي و تاخذي مني الفلوس
بسمه شافلته محمد شيرلها بـ عيونه ع الفلوس يعني خوذيهن
بسمه مدت يدها و خذتهن منه و نزلت
محمد قعد ايشوفلها نين خشت للجامعه علق سيارته و عدى
...............
عند بسمه
خشت للجامعه و عدت شور المِكان يالي ديماً تقعد فيه
هي و صحباتها
زينب: اوووووف أميرة درهتلي كبدي ركزي أمعايا أشوية
أميرة: تي حولي كذا مانفهمش منك سوما خير فـ الشرح
زينب: اصلاً الحق مش عليك الحق ع الكلبة يالي امشيطه ريقها
و تشرحلك
أميرة جت تبي تحكِ علي جيت بسمه
بسمه: هااااااااي بنااااااااااات
زينب و أميرة ابـ صوت عالي: سووووماااااااااااااا
و صباً شورها يجراً و اضبطنها
بسمه تضحك: رآيفت عليكاً والله
زينب و أميرة: و نحن أكثر ياروحي
بسمه وخرت من البنات
أميرة: تي كيف صار وكيف جيتي
بسمه: عندي لكاً موضوع ضروري بكككككككل
زينب: شنو احكِ
بسمه: تعالاً انقعمزو و تو نحكو
و جاً البنات قعمزاً و بدت بسمه تحكيلهن فـ يالي
صار بينها وبين محمد
...............
عند محمد
عدى للمستشفى و بدى يشتغل أشوية ودق باب المكتب
محمد: تفضل
الممرضة فتحت الباب وخشت
الممرضة: دكتور زوجة حضرتك برا تبيك
محمد: زوجتي
الممرضة: اهاا زوجتك دكتور
محمد بـ ستغراب: بسمه شن جابها دوبي حاطها فـ الجامعه
الممرضة: شنو انخليها اتخش
محمد: اهاا خشيها خشيها
الممرضة: تمام
و طلعت الممرضة أشوية و انفتح باب المكتب
محمد رفع راسه قبلاته سمر
سمر خشت و سكرت الباب
محمد بعد شافها كأن شاف جن و صبى علي حيل حيله
سمر: احميده اصبري دقيقه نبي نحكِ أمعاك
محمد ابـ عصبيه و صوت عالي: إنتِ شن جابك هنا
عليش جايه شن تبي , تي مزال عندك وجه اتجيني
سمر تبكي: احميده واللهي كل يالي درته عشان أنحبـك ونبي
انحافظ عليك واللهي كل يالي درته عشانك أنت وبس
محمد ابـ عصبيه: عارفه ادرقي وجك برا مش بس برا المكتب
لا درقي وجك برا من حياتي بكككككككل معش نبي انشوفك
ولا انشوف وجك ورقة طلاقك توصلك لاعندك و منصور
معش تحلمي اتشوفيه فهمتييييييي
سمر جت تبي تحكِ محمد قدم شورها و فتح باب المكتب
محمد: اطلعي برا
سمر: باهي خليني انقولك بس
محمد ايعيط: الطعي براااااااااااااااا
سمر طلعت ابـ سرعه وهي تبكي و محمد طربق باب المكتب
ابـ قوة و رد قعمز ع كرسي و هو امعصب
الممرضة دقت ع باب وخشت
الممرضة: خير دكتور في حاجه تبي حاجه
محمد و هو متعقد: الولية هذي معش نبي انشوف وجها
هنا فهمتي ولالا و حتى لو جت لزيها و رد بالك اتخليها
اتخشلي هنا
الممرضة: حاضر دكتور كيف ماتبي
محمد: عدي شوفي شغلك
الممرضة طلعت و محمد قعد ايحاول يهدى
.............
عند بسمه
أميرة و زينب بحتاً في بعضهن وبعدين بحتاً في بسمه
بسمه: كنكاً بسم الله
أميرة أعيونها أقلوب😍: يعني خلاص تبي تقعدي
زوجة احميدهعن حق و حقيق
بسمه: هو قالي فكري و ردي عليا
زينب: باهي إنتِ شن تبي اتقوليلا
أميرة: أكيده ح اتوافق يعني
بسمه: مزلت ما قررت قاعده انفكر
أميرة: تي فيش اتفكري يا بارده شن تبي احسن من هكِ
راجل كيف احميده و فتكتي من الشغل و التعب
و تفتكيمن حوشكم كلا
بسمه: مانبيش ناخذ قرار سريع و بعدين نندم
زينب: باهي ليش ما سألتيه ليش يبي ايكمل أمعاك
بسمه: كت نبي نسأله و بعدها .......
و سكتت بسمه
أميرة: شنو كملي كنك سكتي
بسمه ساكته
زينب: تي احكِ يابنتي حرقتيلي دمي
بسمه ابتسمت و طبست راسها: سمعته ايقول الـ عمتي
غالية أن هو ايحبني
زينب و أميرة
أميرة ابـ فرحه: تحكِ جد
بسمه هزة راسها ابـ حشم يعني اهاا
زينب ابـ فرحه: وشن تبي احسن من هكِ يا روحي
خلاص دبينا سمعتيه قال الأمه أن هو ايحبك توكلي
علي الله وافقي لأنك مش ح اتحصلي شخص كيف محمد بكل
بسمه: أنا مشكلتي مش في محمد
أميرة و زينب: ها معناها مشكلتك في من ؟
بسمه: عمتي غالية مش متقبلتني بكل و حتى بعد حكالها
ما كانت راضيه أن محمد ايكمل امعايا
أميرة: سوما بلاش اهبال توا إنتِ تبي تزوجي عمتي ولا محمد
زينب: يابنتي غالية سيورها راضيه و طاخه أهم شي محمد
يبيك و إيحبك خلاص فوتي الدنيا كلها
بسمه: مش عارفه مش عارفه مزلت ملخبطه
أميرة: إنتِ فكري في روحك و في مستقبلك لو اطلقتي
وين تبي تمشي , تبي اتردي الحوشكم و جحيم خوتك
من جديد
زينب: كلام أميرة صح , لو ضيعتي محمد من بين ايديك
ح تندمي طول ما إنتِ عايشه
بسمه اقعدت اتبحت فيهن و ساكته
و بعد أشوية بسمه قالتلهن يعطنها يالي فاتها من محاضرات
و اقعداً البنات يشرحنلها فـ كل يالي فاتها و بعد ساعة
رنة علي محمد عشان ايجيها و البنات قاللها أنها اتفكر
و ما اتضيع فرصة كيف هذين
و بعد أشوية جا محمد و طلعت بسمه ركبت امعاه
و روحو للحوش
...............
مشى الوقت
تحديداً فـ الليل ع ساعه 8
كانت بسمه امقعمزة فـ المربوعه و تقرى علي رنة
فونها شفاته لقاته محمد رفعاته و ردت عليه
بسمه: ايوا محمد
محمد: ها بسمه فيش اديري
بسمه: قاعده نقرى
محمد: باهي هيا وتي روحك عشان نطلعو أشوية و انجيك
بسمه بـ ستغراب: وين نطلعو
محمد: إنتِ وتي روحك بس و حطي منصور عند أمي
بسمه: باهي تمام
محمد: هيا فيسع جايك فـ الطريق
بسمه: باهي أوكي
و سكرت بسمه و صبت لمة شيتاتها وخشت طلعت
دبش و لبسة و خذت منصور و نزلت تحت لقت غالية
امقعمزة فـ صاله
بسمه: سلام عليكم
غالية: وعليكم السلام
بسمه ابتسمت: كيف حالك توا يا عمتي
غالية ابـ لوية وجه: الحمدالله , كنك انشالله خير عليش نازله
بسمه: جاية نعطيك منصور عشان طالعه أنا و محمد
غالية ابـ رفعة حاجب: و كان طالعه إنتِ و محمد خوذو العيل
امعاكم أنا مش مسؤولة عليه يا حنا
بسمه: واللهي ما مني يا عمتي محمد هو يالي قالي
خلي منصور مع أمي
غالية: و عاد إنتِ ما صدقتي جبتيه طول
بسمه اقعدت ساكته ومابتش اترد عليها
غالية: وبعدين هذا منظر تطلعي بيه مع راجلك
بسمه بحتت في روحها
غالية: شافيه منظرك إنتِ و ادبشك كيف امهرهر و قديم
و موضته طايحه مش عارفه أولدي شن عجبه فيك عشان
يبي ايخليك علي ذمته آآآآآآآآآآآه و خلاص
بسمه صبت وهي خنقتها العبره وطلعت برا ابـ سرعه
علي خشت محمد من باب الحوش
بسمه مسحت أدموعها ابـ سرعه
محمد: ها كملتي
بسمه ابـ صوت مخنوق: اهاا
محمد: هيا تعالي
وطلع محمد و في جرته بسمه ركبو فـ سيارة
و علق محمد
بسمه كانت طول الطريق ساكته و ما حكتش ولا كلمه
بعد ربع ساعه درس محمد السيارة وبحت في بسمه
محمد: بسمه
بسمه: آه نعم
محمد: وين سارحة
بسمه: قاعده
محمد: باهي هيا أنزلي
بسمه: وين ننزل
محمد: إنتِ أنزلي بس
بسمه فتحت باب السيارة و نزلت و محمد حتى هو نزل
محمد: هيا تعالي
ومدلها محمد يده
بسمه بحتت في يده و بعدين بحتت فيه
محمد هز راسه يعني هيا
بسمه مدت يدها بـ شوية و شدت في يد محمد
محمد ابتسم و عدى هو و بسمه شور المطعم فتحو الباب
وخشو للمطعم كان كبيييييير و ايهبل بكل خشو محمد وبسمه
و عدو شور الطاولة يالي حجزها محمد و قعمزو هما الأثنين
طلبو عشاء و بدو ايتعشو و محمد حاول إخلي بسمه اتهدرز
و اتغير جوها
بسمه حست روحها متريحه في قعدتها و دوتها مع محمد
واقعدو الأثنين منسجمين و ايهدرزو و يضحكو و جوهم سمح
و بعد كملو عشاهم طلبو حلو و بعد كملو سلك محمد الفاتورة
و طلعو ركبو للسيارة و عدو شور البحر درس محمد و نزل
هو و بسمه و اقعدو ايتمشو ع البحر و بعدين جو قعمزو
ع شط أقريب من البحر نين الموج يضرب في كرعيهم
اقعدو ايبحتو فـ البحر و ساكتين و بعد أشوية
محمد: فكرتي
بسمه هزة راسها يعني اهاا
محمد: باهي نقدر نعرف قرارك
بسمه اتبحت فـ البحر و ساكته
محمد قعد ساكت و يرجى فيها تحكِ لكن بسمه
كانت ساكته و مابتش تحكِ ولا كلمه
محمد: تمام مش ح أنزرك علي شي إنتِ ماتبيش اتكملي
امعايا من حقك هذي حياتك و إنتِ حره فيها
و صبى محمد و جا يبي يمشي
بسمه: محمد أنا اموافقه
محمد وقف و ابتسم
.................
بداً يمشاً الأيام
و محمد و بسمه ايجهزو للفرح طبعاً غالية عارضة
أن ما ايكون في فرح لكن محمد سكر راسه و قال أن
ح ايدير فرح الـ بسمه لو صار ايش
طبعاً صحبات بسمه مش عاطيات فرحتهن الـ حد
و محمد عطى أميرة افلوس وقاللها أنها تطلع مع بسمه عشان
تشري دبش و فعلاً كانت بسمه كل يوم تطلع مع صحباتها
للسوق و يشراً فـ دبش الـ بسمه و عطور و ميك آب
و عرمممممممم حاجات كل يالي في خاطرها شراته
و أجرت الفيلو و الكوفير و بوكيه الورد
أما محمد كان لاهي فـ الشقة يالي عزق كل أثاثها من ضمنهم
دار النوم و دبش سمر حتى هو لمه كلا فـ شكاير عزقة فـ الكناسه
و زوق الحوش كلا و جاب أثاث جديد و دار نوم جديده و ركب
تكييف جديد و شاشات كبيييييييرة المهم الحوش قعد جننننننة
...............
##يوم_الفرح##
كانت بسمة في غرفة العروس يالي فـ القاعه
و الكوفيرة كانت اتعدللها فـ الميك آب و كانت طالعه
جميييييييلةة بكككككككل
(بسمه كانت طالعه كيف يالي فـ صورة بـ زبط)
زينب خشت عليها: روحي كملتي
بسمه: اهاا خلاص تشطيب أخير
زينب: خلاص أشوية و أنجيك أنا و أميرة
بسمه ابـ توتر: في ناس واجد برا
زينب: اهاا املا شنو عليش امسمينه فرح
بسمه: اووووووف خايفه
زينب: عندك عليش خايفه هيا كملي حاجتك علي ما جيناك
بسمه: باهي تمام
طلعت زينب و الكوفيره و بسمه اقعدت اتشوف الروحها
فـ المرايه و فرحانه بكل لأنها كانت طالعه اتجنن
و بعد أشوية دق باب الغرفة و انفتح
بسمه ادور في عطرها فـ الشنطه: تفضلي خشي
و رفعة بسمه راسها و شافت .....
بسمه😳😱
...............
عند محمد
كان في شقة صاحبه مع أصحابه حلقوه و طلعو وسيبوه يلبس
محمد لبس سوريته و قعد ايبطم فيها علي رنة فونه شافله لقاه
رقم غريب
محمد بـ ستغراب: رقم من هذا
و خذى محمد فونه من ع سرير و زر الخضره و رد
محمد: ايوا
.......... : عارف يالي تبي تزوجها اليوم من هي و وين كانت تمشي
محمد بـ ستغراب: من أمعايا ؟
............ : بسمه مراتك بنت ليل يا مغفل و كانت 24 ساعه فـ شقق الـ ##
محمد😳😡
.
.
.
.
.
يتبع ...
من يالي خش علي بسمه ؟
و من يالي رن علي محمد ؟
و شن الكلام يالي قاله علي بسمه ؟
و هل الكلام يالي قاله كذب ؟ ولا فعلاً كلامه صح ؟
هذا كلا ح نعرفوه فـ الحلقه الجايه أنتظروني
و ديرولي متابعه على صفحتي العامه الفرجاني-aody
أودي الفرجاني💚
