لكل شخص حكاية
حلقة الثامنه(⁸)
#كادي🤍.
زيدان طلع لقى هشام نزل من سيارته ومصدوم وخايف ودبشه دم
زيدان: كنك
شافو الشباب ورجاله ف شاليه وطلعو يجرو وانصدمو بشكله
يوسف: كنك هشششامممم
صلاح: تكلم كنك
عمر: عركه ولا شنو؟
هيثم: تي كنك متنح ازح احكي
هشام: يحكي بخوف..انا كنت مروح هنا ف طريق الشالهات وفي بنت طلعت تجري من شارع وانا كنت نجري طريق فاضيه عزقت روحها ع سيارة وبنت في سيارة وكلها دم ماعرفتش نصرف شنو ندير؟؟
شباب: ولاحول ولاقوة الا بالله
هيثم: كيف خبطتها يعن شكلك؟
زيدان: حي علما اسعفوها بسرعه را تموت نطيحو في مشكله اكبر
عمر: اوووف عليك قصه
صلاح: اسكتو شويه مش وقت كلامك الزايد هذا
يوسف: ميته ولا عايشه يرا ومشي يجري شور سيارة لقى بنت لبسه سروال كله دم وقميص مشرط وشاف نبض
يوسف: مازالت عايشه وركب سيارة هشام
هشام: نمشي معاك
محمود: اصبري نمشي معكم
وصوت نقاشهم كان ععالي وملفت حتى ناس في برندة شالهاتهم قاعدو يتفرجو ويسمعو في قصه'
جدتي: سارة امشي شوفي شنو فيه؟؟
سارة مشت تجري ولقت هيثم مصبي احدى سيارته وشباب وعمامه أحدهم وضع مُتوتر
سارة: جدتي حي حي هيثم دبشه دم وفي بنت في سيارة
جدتي: شنووووو
ام هيثم: حي وليدي كنه
وطلعو برا
امير: خشو ازح جوا مافيش شي
هيثم: نوران تعالي شوفيها
جيت نجري وركبت في سيارة
انا: بابا شنطه اسعافات أوليه بسرعه في سيارتك
وبابا جابها بسرعه
يوسف: ركب سيارة وهيثم معه ومشينا وتلحق فينا سيارة بابا وعمي صلاح
انا: هذي تنزف واجد را بسرعهه هيثم مد يدك اسلحلها سلسلتها وحديده لي في يدها انا يدي ع جرح مانقدرش نحودها ويدي تانيه ع راسها(كنت حطى يدي ع راسها وكتفها ويدي ثانيه ع نزيف بيش يوقف )
انا: هيثم صحصح شويه كنك?
هيثم: باهي
يوسف: خلاص اهي عيادة
انا: يوسف انزل انت بيش تكلم ل في طورى لانه مانقدرش نحركوها
يوسف: هيي باهي ونزل بسرعه
.
.
.
في نفس الوقت ف شاليه بعد خشو كلهم في شاليه وعمر وأمير ومعتز برا يحكو على ل صار
ام هيثم صالحه: احكو شنو في شنصار
زيدان: هيثم كان مروح ويجري وفي بنت طلعت تجري عزقت روحها ع سيارة
صالحه: حي عليا وليدي
جدتي: شنو حي عليا وليدي ادعي بنت تقاعد كويسه ويجو هلها وتفض القصة
فايزة: ولاحول الله عليك فجعه اتصالو بيهم شنو صاير
سارة: نعلي هيثم كيف وجه اسود ومصدوم
سيرين جبت ميه ل صالحه: اهدي ياعميمه واشربي مية
صالحه: تبكي..صحيتي
ام عمر : اهدي يصالحه
سارة: ماما اهدي شويه
صالحة: رنو ع قصي توا
زيدان: يعمتي شنو نرن غير شويه نشوفي شنو يصير وبنت شنو يصير فيها بعدين ساهل .
//
يوسف جا معه دكتور ممرض وممريضه معها باريله ورفعوها
ممرض : خشو ريسبشن ديرو بيانات وسبب الحادت
دكتور:غير هيي خششها بنت حالتها تنزيف
وخشو بيها ونحنا خشينا ريسبشن
ريسبشن : اسم بنت وعمرها
هيثم: بتردد..انا بنت خبطتها بسيارة ومانعرفهش
ع خشت بابا وعمي صلاح
صلاح: شنو صار
انا: خششوها توا
ريسبشن: معليش كمل كلامك؟
هيثم: خلاص هذا لي صار واسعفتها وجبتها لي اقرب عيادة
ريسبشن:اممم خليك يجي نكلمو أمن المستشفى
هيثم: تمام
وجو ادمن ومشو ل هيثم يحكو معاه ويحققو معاه
يوسف: انتي هيي روحك مع صلاح
نوران: بحتت فيه بعصبيه.. عندي اسم
يوسف: نوران را مش طايق روحي اسمعي كلام وامشي ههييي
نا: كانت بنمشي بدون ماتقولي تمام
يوسف: ركز في عيوني زين.. عنادك فيكني منه ونقاش مش وقته
انا ومشيت وسيبته ومشيت مع عمي صلاح
.
.
.
عند يسرا وياسين
ياسين طالع من دوش
يسرا لبسه روب اسود طويل وحلو:حبيبي
ياسين: عيون حبيبك
يسرا: نوريك حاجهه
ياسين: صححح نسيت شنو
يسرا:تعال معايا
يسرا خشت دار مزينتها ورد مشت جيهت الدولاب وفتحته وطلعت منه صندوق صغير لونه احمر
يسرا وابتسامه على وجها
ياسين رن تلفونه لقى هشام
ياسين ورد هو مستغرب من اتصل مش وقته
هشام خير
ياسين: نعم؟
هشامم: شنو جوكم غادي
ياسين: زاد علامات استغرب على وجه.. كيف شنو جونا انا روحت
يسرا خفت واختفت ابتسامتها على وجها: ياسين شنو في؟؟
هشام: اها تمام خلاص
ياسين: احكي شنو فيه ماتحرقش دمي
هشام: غير انا****
ياسين : اطمن شويه..اوووف ماتقولهش؟؟؟ شويه ونجيكم
يسرا: شنو في شنصار؟؟؟
هشامم: مش داعي ماتكبرش موضوع ياسين جيجي شرطي ياخد اقولي ويصير خير
ياسين: شنو حالتها هي؟
هشام: والله ماني عارف حاجه ومعليش رنيت عليك لانه امير خارج تغطيه هو وزيدان وهشام
ياسين: اها غادي مافيش تغطيه
هشام : ماتشغلش روحك ورد بالك تمشي غادي ليل توا وطريق شاليهات عارفها انت بعيد وتوا نرن عليك اول ماتصير حاجه
ياسين: نجيك مستشفى
هشام: ياراجل صبح ربح
ياسين :باهي تمام
وسكر
يسرا: شنو في مش نحكي معاك
ياسين: حبيبي ماتعصبيش غير هيثم ضرب بنت بسيارته حادت
يسرا: حييييي شنصار باهي
ياسين: مازال
يسرا: باهي
ياسين: شنو بتوريني
يسرا: خلاص تنكدت
ياسين: حبيبتي سماطه هكي؟
يسرا:درت عيون قططيس وفتحت بوكس كان اختبار منزلي انها حامل وتحاليل بأنها حامل❤.
ياسين يشوف وفرحان: مبروك علينا😍
يسرا: كنك مش فرحان
ياسين: انتِ عرفتيني كيف نعبر عن فرحتي؟
يسرا ضحكت: هههههههههههه
ياسين:توا تشوفي🤣😍
####
غزاله رايقه مش همهم شي الجماعه ولا حرقين دمهم
.
.
.
انا وعمي صلاح وردينا ل شالية
اول ماخشيتا
كلهم: شنصار؟؟؟؟
انا: مازال بس بنت عندها خبطها في راسها قوية نزفت واجد
جدتي: يستر الله
صلاح: وهيثم يحققو معه وبيرفعو ل مركز رد ل مستشفى انا وانتم ملو اروحكم ورحو وطلع يندي..اميرر زززيدان
صالحه: حي عليا وليدي
فايزة: اهدي ياصالحه سادك بكاك
صالحه: شنو بندير غير البكاء
فايزة: معاش تبكي بس
امال: صح اهدي شويه ياصالحه
جدتي: جيبي دواء امك يبنت
سارة: حاضر
امير : نعم؟
صلاح: انا امشي رد ل مستشفى انت وزيدان لمو دنيا ورحو
امير: تمم
صلاح: خلاص انا امشي
امير :تمام
وركب صلاح سيارته ومشي
شوية ولمينا دنيا ع سريع وركبنا السيارات وعيت عُمر حتى هم روحو):
زيدان: سيرين ازح صكري باب كويس
سيرين: صكرته يرا
زيدان: اووف وين صكرتيه
ونزل وفتح باب سيرين كانت حطه يدها لمسها بغلط وسيرين سحبت يدها بسرعه وزيدان صكر باب
زيدان: شفتي اصكر
سيرين في دخله فرحانه : اننن باهي🦥.
نوران: شوفي دبشي حي عليهم مافضنتش بككل ( كان ملبز دم )
سارة: ووكك حتى انا مركزتش معاك من فجعه
صباح: لقنها فجعه شينه
سيرين بصوت واطي ل اسيل: تشلطي حتى في وقت هذا
اسيل ضحكت بصوت واطي: اسسس 🤣.
//
هيثم خدوه الشرطه ل مركز ويوسف مشى معاه
وصلاح ومحمود في مستشفى
في مركز:-
محمد: اوو اوسيفا شورك قصه هذي
يوسف: ولد سيدي
محمد: تمام انا توا نكلم أمن الشاليهات
يوسف: تمام هو يقعد في مركز؟
محمد: هو ضروري لعند تنوض بنت وتقول شنو صار هل خبطها مقصودة او مش قصده والخ
يوسف: تم
محمد كلم أمن الشاليهات وعطول طلعو سيارات وقعدوا يقولو يبرمو في شوراع شاليهات بِ مُكبر الصوت في بنت ضربتها سيارة مش معروفه من لبسه قميص ابيض وسروال امريكي ازرق
//
قُصي وجمانه
جمانه: كنك قفل تلفونك يوم
قُصي :مانبيش صداع يوم لكي انا بس❤.
جمانه: مرايفتلك بككل
قصي: حتنا والله
جمانه: باهي حبيبي لعند امتى هلك مايعرفوش
قصي : غمض عيونه بغصب..جمانه
جمانه: باهي خلاص اسفه
قصي : تعالي قربي بس
جمانه: قربت منه وحست بالأمان وحب كانه طفله في حظن باتها❤.
قصي باسها ع راسها: بهمس ..انحبك
جمانه: نموت فيك.
وباقي مش شورنا تبي ليمون تقولي عندي واجد؟؟🤣😂
//
عند هل بنت كانو كلهن متلمين ف شاليه وسمعو صوت الشرطة ل برا
عيسى: روان اختك وينن؟
روان بخوف: مش عارفه
عيسى : من بدري ندور فيها بعيون مالقتهش
سيف: تحكو جد انتم وين ملاك تكلمي؟
روان: مانعرفش
صبابا نضو يجرو يدوره عليها في شاليه وف كل مكان بس للاسف مش قاعده زي ماقال عيسى
عيسي بصوت عالي: تكلمممميي اختككك وينن يا*****
روان تبكي: طلعت مع معاذ ع اساس يمشو ل شاليه هذا على سريع ويجو معاش ردت لاهو ولاهيي
عيسى: شنووو تحكي سريع شنو يعن*** ي *****
روان ترعش: شوفها توا وين مش وقت كلام هذا
عيسى بعيط: نشوف **** باهي ياعيله** وين **** ها وين معاذ ولدك وين ياصادق؟
صادق : يخبط .. وين نندري عليه علمي علمكم
سيف: مش وقت را توا بكككل انا طالع ل أمن بنسال عليها اين مستشفى
عيسي: شنو تبي فيها ** ها شنو
سيف: قلتلك مش وقتك رااااااا
امها( زمزم) تبكي: شنو درتلك بيش اطيحي روسنا حي عليااا حييي روان كيف تعرفي ماحكيتش
روان تبكي : يماما خلاص
زمزم: مش خلاص مش خلاص حسبي الله ونعم الوكيل فيها
روان: عليش كلكم ركزتو عليها وتحسبو عليها عليش مش هووو هو أساس كان متربي ويحبها ويخاف عليها هي شرفه بنت عمه عليش ماادورو عليه وين عليش ماقلبتو دنيا عليه ؟
زمزم: عشان هييي بنتتت هو ذكر مايعيبه شي
روان: شفتله وردت تبكي مشغوله ع اختها
//
سيف: توا ف سيارة أمن تبرم وتقول ف بنت خبطتها سيارة
شرطي: اها
سيف: تكون اختي وين مكان مستشفى
شرطي : تمام مستشفى ****
سيف: تمام
صادق: وين مكانها بالضبط؟
سيف ضغط ع سنونه مش متحمل صوته.
شرطي: قريبه من هنا هي )*¥¥%/
صادق: تمام
ومشو مستشفى خشو لِ ريسبشن
سيف: في بنت جتكم توا خبطتها سيارة
ريسبشن: اها توا طلعت من عمليات ومازالت تخت تأثير البنج معليش كان حد من هلها بيش تملى بياناتها
سيف: تمام اسمها ملاك ال****
صادق : قطعه ..وين ل اسعفوها
ريسبشن: ف غرفه الانتظار ع يدك يسار
صادق : تمام
ومشى وخش انصدم ل قعمز محمود
صادق: محموددد؟؟
محمود رفع راسه : صادق 😳
صادق سلم عليه : تي وينك
محمود: صادق شنجوك
صادق: مازالت مذكرني؟
محمود:معقوله يرا في واحد ينسى إيام ثانويه🤣
صادق : ايام العار
محمود: 🤣🤣.. عليش جاي ان شاءالله خير
صادق: بنت خويا خبطتها سياره وسعفينها هنا
محمود: ماتقولهش؟؟ انا ولد خويا ضربها بنتكم
صادق : والله كيف صار ومن ضربها
محمود: والله خبطها ف مركز يحققو معاه
صادق : تي لا معقوله توا نمشي المركز ونصكرو المحظر
صلاح جاي كان يجيب ف ميه من كافتيره
صلاح: خير
محمد: صادق صحبي زمان
صلاح: سلم عليه
صادق: تي هي ياراجل شنو ترجي معقوله ولدكم ف مركز مش شوره شي بككل موضوع
محمود: هي باهي تمام
صلاح: كيف شنفي فيه
محمود: ل صار****
صلاح: اها معناها امشو ل مركز انا خلوني هنا لعند تطلع بنيه
صادق: خلاص تمام
وطلع هو ومحمود
صادق: سيف انا مشي نصكر محظر ل في راجل ل خبط ولد خوه صحبي ماعندش ليش قعد في مركز مش شور شي هكي !!
سيف بدون مايرفع راسه فيه ويفكر في مليون حاجه وفي اخته ولد عمه ل يفكر يقتله .. باهي
وطلعو
.
.
.
عندنا وصلنا حوش جدي وضع متوتر لقينا عمي فؤاد مايندري ع شي وانفجع مسكين
انا خشيت دوشت ع سريع وطلعت لقيت كلهم ف صاله يحكو مع بعضهم خشيت دار مانحبش هرجه وجو بلا يوسف شين🤣😍❤
زيدان: سيرين بالله عصير هكي مصقعه يبرد
سيرين: ماهو نخدم عندك
زيدان: نوضي بلا كلام كثرة دوه
سيرين: ربي يصبرني ونضت وجبتها ومدتله رن تلفونه مكتوب( حنين💔)
زيدان ناض بسرعه: لااا خلاص معاش نبي وطلع
سيرين غصه في قلبها ودموع في عيونه وخشت مطبخ
اسيل: اوووي كنك
سيرين: شي
اسيل: غير كنك
سيرين: شي وين نوران؟
اسيل:في دار خشت
سيرين: اوك
ومشت ل دار
سيرين: نوران
انا نمشط في شعري: نعم
سيرين اتكت ع سرير جدتي: رنت عليه حيوانه
انا: حنين
سيرين: اها خزي هو ناض يجري طلع برا
انا: سيرين يعيوني فوتي معاش ادققي معاه
سيرين: ماقدرتش
انا: نضت وقعمزت احدها.. باهي ماتزعلش روحك بس وتندريش بعد هذا كله مرات ياخدك انتِ نصيب الحكايه را مايلقش خير منك
سيرين: ان شاء الله
انا: مش قلتلك ديما ادعي وصلي ان شاء الله يكون من نصيبك
سيرين :لقني حولت نحب غيره مافيش مش كيفه وبحتت في يدها اذكرت لمسته وابتسمت
انا: كنك انكلبتي مش كنتي تبكي
سيرين:شي🤣
اسيل خشت: خير عليكم نبي مستكه من عندها؟
انا: ماعنديش
سيرين: انا مانحبهش اصلا
اسيل: باهي محد سألك 😒
وطلعت
انا: نفسيه بنت هذي
سيرين :بككل
وطلعت تلقت مع امير ل خش كان مع عُمر برا
امير ع طول ابتسمه ع وجه بعد شفها: اووي كنك زعلانه
اسيل: نبي مستكه ومحد عنده
امير: ضحكت.. من جدك
اسيل: اها كنك؟
امير : باهي توا نجيبلك
اسيل فرحت: نجكليا والله بجد انت احسن واحد في عيال سيدي وربي 🥺🤣❤
امير: مصلحجه
وطلع ل قراج جاب من سياره
امير: خودي
اسيل: منور
امير: جالطه وتتمضغ في مستكه منظر تحفه😂😒
اسيل: اسكت ي متخلف وخشت تجري
امير: توا مش كنت احسن واحد فيهم؟😂😳
هيثم: كنك تحكي بروحك
امير : ماكنيش
هيثم: ماريتش فرخه زينب
امير :لالا عليش
هيثم: خدت تلفوني وهربت معاش لقيتها
امير : لقنكم مكلوبين🙂
هيثم: هي شيطانه هبله مكلوبه
امير: توا بعد نشوفك مسجلها ع تلفونك دبدوبتي😂😂😂😂😂😂😂😂😂😂😂😂😂😂😂😂😂😂😂😂😂😂
هيثم: سكرفمك ناقصني خير نحب انا
امير: 🤣🤣🤣
هيثم: انت كنك تضحك من شفت بيش شفنا سنونك
امير:محد تي مبردك يرا امشي شوف تلفونك وين
وطلع ل عمر
عُمر : وين شكلك شفتها ل تضحك
امير: زمري عليك قصه
عمر: غير قولي شفتها?
امير : شندخلك **** ا***
عمر: خلاص معاش تسب ازح سألت بس ربي يكون في عونها ل يحبها مريض امير
امير شفله ع جانب وتذكر حاجه مايحبيش يذكرها احمد وضغط ع يده بغصب وتغيرن ملامح وجه من مبتسم وفرحان آلى ملامح غاضب
عمر: مش قلت مريض
امير: سكر فمك ورن عليه هشام
هشام: را طلعت من مركز
امير : كيف ناضت ولا ايش
هشام: لا عمها صاحب عمي محمود
امير :تمام
هشام :باهي
.
.
.
سيرين: نوران بنطلع نسمعه شنو يحكي معاها ونجي
نوران: حتندمي را
سيرين مش حنندم
وطلعت قاعدت تسمع
YOU ARE READING
لكل شخص حكايه
Romance(روايه لكل شخص حكايه كل شخص في روايه عنده قصه وعنده ماضي وكل قصه حستفيدو منها روايه كوميديه ودراما وحب وأجواء عائلات الييبه ) بلهجه العامية اليبية الشرقاوية وقليل من لهجه الغرباوية. الكاتبه:- كـــــــادي إبراهيم .
