الحلقه الثانيه...(2)
كمال بعد نص ساعه تقريباً وصل للجامعه
درس سيارته و نزل و خش و من أول ما خش
البنات كلهن كانن أعيونهن عليه و طبعاً كمال كان
خاش و رافع خشمه و مش شايف حد قدامه
كمال طلع فونه و رن علي حسن
حسن رد: ايوا يا ريس
كمال: وينك أنت
حسن: كيف وصلت للجامعه
كمال: تي اهاا وينكم أنتو
حسن: تعال قاعدين فــ الكفيتريا
كمال: هيا جاي
و سكر كمال من حسن و عدى شور الكفيتيريا
كمال كان ماسك الفون في يده و ايبربش فيه و مش
فاطن الــ شيء قدامه و هوووووووب يخبط في بنت قدامه
نين فونه طاح منه و البنت طاحت ع الأرض
........
عند بسمه
بسمه صبت و هي امطبسة راسها و متحشمه بكل
و فتحت باب القاعه وطلعت ابــ سرعة وهي تبكي
طلعت من القاعه وهي تجري و تبكي
و ما حست الا وهي خابطه في حد ابــ قوة
ومن قوة الخبطة نين طاحت ع الأرض و كتباتها
و شنطتها طاحاً ع الأرض
كمال ابــ عصبيه: تي هااااااااااااااااي أنتِ ما أتشوفيش
قدامك كنك عندك ضعف نظر ولا عميه
و طبس كمال خذى فونه و رد صبى
بسمه كانت طايحه ع الأرض و تبكي
كمال: أساساً أنا عارفهن أطروح البنات بعد ايتليساً دوري
غيري اتلصقي عليه
بسمه اقعدت ساكته و تمسح فــ أدموعها
و بعدين رفعت راسها و بحتت في كمال بــ أعيون بريييئه
بسمه أعيونها مليانه أدموع: واللهي ما قصدي آسفه
كمال بعد بسمه بحتت فيه و حكت أقريب مات في مِكانه
كمال بدون وعي طبس عليها و مدلها يده
كمال: تعالي صبي
بسمه بحتت في يده و بعدين بحتت فيه
كمال ابتسم: هيا صبي
بسمه: نقدر انصبي ابـروحي شكراً
و صبت بسمه و وخرت قعمزة ع كرسي و كمال
برم لم الشيتات و الشنطه و قدم عطاهن الها
بسمه خذتهن منه: شكراً
كمال: هذا واجبي لا شكر علي واجب آسف لأنِ
هزبتك من أشوية غير كنت راقيلي معلش سامحيني
بسمه: لالا عادي الغلط منِ أنا , أنا يالي كنت مش منتبها
كمال حط يده علي يد بسمه
كمال: خلاص صار خير
بسمه حولت يدها من تحت يد كمال
كمال صبى: احم أنا نبي انعدي تبي حاجه
بسمه هزة راسها يعني لالا
كمال: هيا سلام
و عدى كمال شور الفيتيريا علي طلعت زينب
بعد شافت بسمه جت شورها
زينب ابـ خوف: بسمه أنتِ أكويسه
بسمه: اهاا أكويسه بس أنتِ عليش طلعتي من المحاضره
زينب: بعد طلعتي بالي قعد مشغول عليك معش قدرت أنتحمل
و طلعتلك
بسمه: أنا أكويسه خلاص ردي كملي المحاضره
زينب: أكيده أنتِ أكويسه
بسمه: اهاا واللهي اكويسه تو نرجاك نين تطلعي
زينب: خلاص تمام و كان احتجتي الأي حاجه رني عليا من عند أميرة
بسمه: وينها هي طولت اليوم
زينب: أشوية و تلقيها خاشه عليك
بسمه: خلاص تمام
صبت زينب و خشت للمحاضره و بسمه
اقعدت اتنضمفي شيتاتها فوق بعضهن
.............
عند كمال
خش للكفيتيريا و سلم ع الشباب و قعمز أمعاهم
حسن و كمال كانواْ ايهدرزو مع بعضهم و بعدها
كمال: زمممممممري
أسمه: تي كنك شن في
كمال: بحت وراك بس بدون ما حد ايشك فيك
حسن قعد أشوية و بعدين برم
حسن رد بحت في كمال: كنك شن في ورايا
كمال: شفت البنت يالي لابسه أسود هذي يالي جايه شورنا
حسن: اهاا
كمال: هذي الدراه بنت خالي
حسن: باهي كنها عليش راقيلك منها
كمال: أس جت تو أنقولك بعدين
أميرة مع أبتسامه: صباح الخير
كمال و حسن: صباح النور
أميرة: كمال كيف حالك
كمال ابتسم بــ مجامله: الحمدالله كنك تبي حاجه
و شير علي حسن
أميرة فهمت قصد كمال
أميرة: لالا حبيت أنصبح عليك
كمال: تمام خلاص
أميرة: هيا باي
و برمت أميرة عدت
كمال ابــ قرف: خزي مبرد دمك
حسن: كنك أمعاها يا راجل
كمال: عارف عمري ما شفت وحده لصقه كيفها
املصقه فيا تلصيقه سوده يا راجل حتى حوش عيت جدي
كرهت نمشيله منها هي
حسن: كيف اتحبك هي
كمال ايسقم في سوريته ابــ غرور: أساساً أنا من البنت يالي ما أتحبني
جيبلي وحده بس ما أتحبني نعطيك يالي تبيه
حسن: عليك غرور فيك الزح
كمال: مش مني ننغر حتى أنا شخصية يا طعمه
حسن: المهم يا جنتل مان كنك اليوم جوك مش أوي
كمال: تبي الحق
حسن: قول
كمال: شفت بنت و أنا خاش للجامعه قلبتلي عقلي يا راجل
حسن يضحك: وين شفتها
كمال: أنا خشيت و أنبحت في فوني و ........
حسن: قصدي راك أتقولي حب من أول نظره تي أنا كان انشوفك
ابــ عيني واللهي ما أنصدقكك
كمال: حب عينك أنقولك البنت خشت خاطري
حسن: خشت خاطرك من اي ناحيه
كمال: كان مش حب معناها شنو
حسن سكت أشوية و بعدين
حسن: ما أتقولش يالي في بالي
كمال: بضبط يا قدع
حسن: تحكي جديات
كمال: تي اهاا جد الجد
حسن: بس أنت من نوعيتك مش اي وحده اتخش خاطرك
كمال: بس هذي غييير يا راجل طنت هنا طول و شير علي راسه
حسن: باهي الملخص شن تبي ادير
كمال: امفكر نصبي نشري نسكفيه ولا قهوه و امعاها حاجه حلوه
و نمشي داير روحي نبي انرد نعتذر منها و نعطيهن
الها و انحاولانبرمها و ناخذ منها رقمها
حسن: بــ السرعه هذي تبي تمشيلها
كمال: تي اهاا املا تبيها اتريح مني ومعش نلقاها
حسن: باهي حتى هي فكره
كمال صبى: هيا خليني نمشي قبل لا اتحرك من مِكانها
و عدى كمال خذى طاسة نسكافيه و خذى بريوش و كريبو طلع من الكفيتيريا و عدى شور المِكان يالي تلاقى فيه مع بسمه
..............
عند محمد
كان غارق فــ الشغل علي رنة فونه رفع الفون يحسابها
سمر لكن لقاها خالته فتحيه
محمد رد: ايوا خالتي
فتحيه ابــ خوف: محمد الحق عليا أمك جيتها القيتها مغمى عليها
و طايحه فــ المطبخ
محمد ابــ صدمه و خوف: أمي كنها
فتحيه ابــ خوف: مش عارفه جيت لقيتها مغمى عليها
توا شيلتهاأنا و أسامه للمستشفى تعال ابــ سرعه
محمد: هيا هي جاي
صبى محمد ابــ سرعه و سكر فونه و سلح البالطو
و خذىمفاتيحه و طلع ابــ سرعه
..........
عند أميرة
بعد طلعت من الكفيتيريا رنة علي زينب لكن ما ردت عليها
أشوية و دزتلها زينب رساله قالتلها أنها قاعده
فــ المحاضرهو بسمه قاعده قدام القاعه
عدت أميرة شور بسمه سلمت عليها و قعمزة هدرزة
امعاها و حكتلها كل يالي صار امعاهن
طبعاً أميرة تقعد صحبت بسمه و زينب لكن مش
امعاهن في نفس التخصص هي تخصصها طب عيون
أميرة: خلاص قلبي ساهله أنشالله ح اتعوضيها في محاضره ثانيه
بسمه: أنشاء الله , بعد خطرها
أميرة: شنو
بسمه: شن صار في ولد عمتك
أميرة تنهدة تنهيدة طوييييلة كلها هم و حزن
بسمه: كنك شكلها في حاجه
أميرة: لا واللهي ما في شي كل حاجه مزالت كيف قبل
بسمه: للدرجه هذي أتحبيه
أميرة: بككككككككل يا سوما بككككككككل أنموت فيه
مستعده نعطيه حياتيي و عمري كلا واللهي لو ايقولي
نبي قلبك نعطيه لاه و أنموت أنا
بسمه ابتسمت
أميرة ابـ حزن: بس هو مش امدورني ولا امعدل عليا
حاولت نعترفله كم مره بس ما قدرت معني حاسه أن
هوعارف بس مش امعدل
بسمه: باهي حاولي اتقوليلا و شوفي شن ايقولك بيش
ما تقعدي متعلقه بــ أوهام
أميرة ضحكت ضحكة حزن و سكتت
بسمه: أميرة
أميرة اقعدت تبكي
بسمه ابــ خوف: أميرتي حبيبتي احكي و فشي كل يالي في قلبك
ما تقعدي كامده مش اكويس عليك
أميرة تبكي: علي أساس كان سألته و قالي أن هو ما ايحبني
أنا ح نقدر انسيبه واللهي روحي فيه ما نقدرش انشوفه مع غيري
واللهي مليت من هــ الحاله هو مستحقرني و مش امعدل عليا
و أنا نجري في جرته لعند توا شفته فــ الكفيتيريا يدوي امعايا
فوق من النفس و بعدين هذا مش اول موقف ايديره ليا كل مره
انشوفه فيها ايدرلي في موقف نين نكره روحي حاولت ننساه حاولت
انفوته حاولت نذكر كل المواقف السخيفه يالي حطني فيهن و نكرها
لكن عبث ما قدرتش ننساه ولا ننسى حبه
بسمه قدمت علي أميرة و ضمتها
بسمه: خلاص يا عمري اهدي و يالي كاتبها ربي تبي اتصير
و اقعدت بسمه اتهدي في أميرة و اتقوللها أن اتخلي عندها أمل
في ربي و أن ربي ما ايدير الشيء الا لِــ سبب الصالحنا
