مالك وسيريين المصريه والمخابرات الخياليه

الحلقه الثالثة عشر بعنوان(الطموح العلمى قاتل احيانا)

المخابرات الامريكيه حاولت توقع سيريين فى علاقه جنسيه مع مديرها ولكن المدير فشل وانتهى دوره عندما قال لها انتى مغروره لكن هايسكتو لا طبعا

ظهر مدير الاداره الكبير وكأنه تحدى ماحدش عارف يوقع سيريين فى اى علاقه شريفه او غير شريفه سيريين متماسكه وقويه وبتستمد قوتها من صديقها مالك لما تسأله

مدير الادار ده بقى كان دكتور كبير جدا جدا ملياردير وسيم ورياضى وكان زير نساء واى واحده هناك تتمنى تتكلم معاه لانه بخلاف ما ذكرناه كان متفوق جدا فى عمله ومشهور ودايما بيظهر فى التلفزيون الالمانى والمحطات العالميه فى مجال علم النفس وهو مسؤول عن التهيئه النفسيه وجميع الاقسام فى الادراه بتاعت شغلهم وكان بياخد الحالات الخاصه الصعبه جدا والمعقده من اهوال الحروب واللجوء السياسى

اول لقاء كان له بسيريين قال لها انا سمعت عنك كتير وعن شطارتك فى شغلك وسيرين ردت انا لى الشرف انى اعمل تحت ادارة حضرتك واتمنى ان اتعلم كل شئ فى العمل والدكتور اخد الكلمه منها وما صدق قالها انا هاعلمك بنفسى كل شئ وده على غير العاده مع جميع الموظفين اللى بيتمنو يتكلمو حتى مع الدكتور هو كان فاهم كويس ودارس الملف بتاع سيريين وعارف انها بتحب العلم والتعلم وعندها طموح فى التعلم غير عادى وده كان مدخل لسيريين الطموح العلمى لانها بتحب العلم

سيريين فرحت جدا انها هتتعلم تحت ايد دكتور زى ده وبالخبره دى (غباء) من سيريين

الدكتور ابتدى يعلم سيريين وابتدى يفرجها على افلام وثائقيه للعلاج افلام عاديه جدا ممكن تكون للحرب العالميه او صور لخلفيات وراء مذيع تلفزيونى وازاى تقدر من خلالها ترسل اشارات معينه بحركات معينه تعمل من خلالها شلل مؤقت لمخ المشاهد اتعلمت علم رهيب وكانت منبهره بالعلم ده حاجه اشبه بالخيال وعلمها ازاى تكتب التقارير لمحكمة الهجره واصبحت سيريين بتكتب تقارير لمصلحة الهجره بألمانيا وابتدى القضاه يرسلو لها عشان تعمل مقابلات مع مجرمين وتحلل شخصيتهم وكانو منبهريين بها زى ما قلنا من قبل سيريين كان عندها شئ ربانى او هديه ربانيه كانت بتقرء اى انسان من خلال عينه وحركات معينه اثناء تحليل لشخصيته

فيه ناس هاتقولى طب ازاى ماعرفتش تقرء عين الدكتور وده طبعا قليل فهم بالعلم لان الحياه العمليه منفصله خالص عن الحياه الشخصيه سريين كانت بتتعلم شغلها يعنى مش بتركز فى قراءة عين الدكتور تركيزها كلها فى العلم اللى بتتعلمه لكن ماكنتش مرتاحه له ومالك حظرها منه وكان بيقول لها على بعض ايات قرئانيه تقرئها قبل الجلوس مع هذا الدكتور الرهيب القوى فى علمه

سيريين اكتشفت ان الدكتور بياخد التقارير اللى بتكتبها لمحكمة الهجره ويحط عليها اسمه وده اكتشفه احد القضاه وقال لسيريين انا اعرف طريقة الدكتور فى التقارير بس انتى طريقتك مختلفه وممتازه فعلا وحذرها من الدكتور تحذير شديد وسألها اذا كان فيه علاقه بينهم ولا لا وهى ردت على القاضى بالنفى وقالت له انا متزوجه وزوجى مش مخلينى محتاجه اى شئ كانت دايما بتكلم على جوزها بصوره طيبه حتى لا يطمع فيها احد مع انها كانت محتاجه العطف والحنان والحب والوحيد اللى كانت شايفه منه ده صديقها التى ترتاح معه مالك لانه كان دايما جنبها ويصبرها لكنه صديق ومتزوج

سيريين بقيت تشغل كل وقتها فى الشغل وتروح تلعب رياضه وتلعب كيك بوكس عشان تطلع الطاقه اللى عندها وعشان ماتفكرش فى العلاقه الحميمه اللى مفتقداها مع جوزها وتتكلم مع مالك وتحكى له وهو يتكلم معاها وكانت سيريين لما تسأل مالك عن زوجته كان يقول لها انا مش هلاقى زيها دى ست رومانسيه ومش مخليانى عايز حاجه طبعا على غير الحقيقه

مالك من الرجاله اللى بتستحكر اى راجل بينفصل عن زوجته ويطلع يتكلم عليها او يتكلم عليها بشئ سئ كان مؤمن ان الواحد لازم يذكر شريكة حياته بالخير امام الناس حتى لو كان مش مرتاح او مش هى دى العيشه اللى كان بيحلم بها ماينفعش الراجل او الست يتكلم عن شريك حياته بالسوء حتى لو كان فيه خلافات او تنازع او طلاق

مالك كان شايف ان دى اخلاق لازم الكل يتحلى بها

المهم الدكتور بدء يتصرف مع سيرين تصرفات غريبه وكلام غزل وسيريين من داخلها بتقول اهو بدء يظهر الدكتور على حقيقته القذره

اصبح الدكتور لا يريد العمل الا من خلال سيرين ومع سيرين وبقى يعلمها اسرار الشغل وادق التفاصيل فى اسرار الشغل

اسرار الشغل دى طلعت اسرار بشعه وغسيل مخ فظيع لناس جايه اساسا مدمره من ظروف حياتها والحروب اللى فيها طلعو بيغسلو مخهم بحاجات تانيه خالص حاجات بشعه لدرجة انهم بيرجعو بلدهم بأفكار عنف وقتل وده كان لشخصيات الكبيره اللى جايه لجوء سياسى بالاخص بيتعملهم شلل فى مخهم وبينفذو اللى يطلب منهم علم تنويم مغناطيسى متطور جدا جدا

فى الفتره دى سيريين قربت اوى من مالك واصبحت تشتاق له اكتر عندما تكون فى الشغل اصبح مالك له حيز كبير فى تفكير سيريين وكانت مش مصدقه ان مالك ده حقيقى من حسن معاملته معها على مدار الثلاث سنوات صداقه وازاى هو مازال محترم ومؤدب معها وكلامه لم يخرج عن اطار الادب والاحترام

وفى يوم سيريين كانت مضطربه اوى بسبب غزل الدكتور وبقت تحس انها بتضعف لانها محتاجه الكلام ده محتاجه حد يحسسها بأنوثتها نفسها تعيش الحب الحقيقى لكن فى نفس الوقت هى عارفه ان الدكتور كلب وماينفعهاش لانه زير نساء وكان بيحاول يعملها غسيل مخ لصالح الشغل

لكن سيريين عملت ايه وايه المفاجئه اللى حصلت لما اتكلمت مع مالك

هانعرف ان شاء الله الحلقه القادمه

تحياتى لكم جوربجى الجوربجى