قيود زاكي

الجزء 6

#قيود_زاكي
#بقلم هوس ريجا
الجزء 6
فاتت يومين وجات عندي سارة قاتلي قالك البياري منا لغدوا والله وما تفتحيش تلفونك غير نجيك لدار قتلها مانفتحش راني بديت نخاف منو جبت ليل كلو وانا خايفة مرة نقول نهز مرة نقول خليني منو   فلخر قلت خليني منو رقدت وقلبي خايف ،لغدوا نسيت ڨاع لحكاية فالنهار ماما راقدة وانا نتفرج سمعت الباب طبطب نضت درت خماري وخرجت فتحت حتى نلقاه في وجهي جمدت في بلاصتي بقيت غير نشوف قالي لاه غالقة تلفون الهدرة راحتلي تالمو خلعت سمعت صوت جاي من الفوق مانعرف شكون راح يهبط قتلو تعيش روح لايشوفوك قالي لاه ماتهزيش تلفون قتلو روح تعيش وراح نغلق الباب في وجهو خفت منو قالي اقسم  راني رايح نطلع فالطوموبيل نعيط ونلقاه طافي غير نرجع وخلي تخلا قتلو ايه روح هبط جارنا الفوق شافو هو انا ماشافنيش ااا خلاص اليوم اذا سمع مومن وبابا ندي طريحة دار عندو قالو وين يسكن فلان هذا جارنا للتحت ضربوه هذيك المرة قالو حضارات يسكن لتحت دار عندي قالي خلاص الحاجة سمحيلنا غلقت الباب مزية ما شافنيش رحت نجري غلقت الباب جبدت تلفون فتحتو ليزيد يطلع ثاني ياخاه عليه والله مريض صح والله لا عاد نتفك منو يجي لدار نورمال سما  مايخافش وماش داير حساب لواحد بقيت نستنى بصح ماعيطش رحت نطل على التاقة شفتهم يدور وين ااڨراجات مزية مكاش وحدو ،لعشية كنت مع ماما فصالو وخايفة جارنا يوصل لخبر  دخل بابا قعد قال لماما قبيل قالي جارنا الفوق بلي فالنهار جاو يحوسو على فلان وغلطو جاو لدارنا شكون فتح عليهم شفت مع ماما تخنزرت فيا قاتلو انا لاه قالها حسبتها نجاة قاتلو اواه انا نضت خرجت الحمدلله فاتت سلامات لحقتني ماما قرصتني من ذراعي قاتلي انتي تحوسي يقتلوك خاوتك قتلها لاه قاتلي لاه تفتحي الباب عليهم قتلها انتي كنتي راقدة قاتلي لاه ماعيطتلش كون شافك جارنا وقال لباباك وسمع هذاك الفتيلة تاع مومن كيفاه ديري قتلها انتي كنتي راقدة وانا لاه رحت خليتها والله يازاكي هذا غير بديت نطيح فالمشاكل على جالو ،بعد لعشا حكمت بلاصتي ستنيتو يعيطلي مكاش تهنيت مني يخوف رقدت سمعت تلفون فيبرا انا كيفاه نسيت نديرو صيلونص كون فات مومن هذاك نفس عقلية خويا الوسطاني ينشنش على كلش زربت كوبت درتو صيلونص عاود عيطلي كوبيت كي مكان حتى واحد ماعيطش وضك عيط عاود عيط هزيت قلت الو قالي البكاية تاعي كالعادة غير يقولي هكذا نذوب ڨاع ضحكت وسكت قالي واشراكي قتلو لباس قالي حمدالله قتلو وينك من صباح وانا نستناك يااا واش قلت انا هكذا كوبيت ديراكت جايحة هذه عاود عيط بقيت نشوف معاه وليت ريبونديت قالي لاه كوبيتي سكت قالي  واش فيها كي تستنايني قتلو راني نكذب ناض يضحك يا خاه خطفلي قلبي بضحكتو يضحك من قلبو ضحكتو رجولية واشبيه هذا الراجل سبحان الله الكمال لله بصح كامل من كلش كلش فيه حاجة سبيسيال ديجا  اسمو برك يقتل بقيت غير ساكتة قالي نجاة قتلو وي قالي اهدري علاه تبقاي غير ساكتة قتلو ماعنديش واش نهدر قالي لالا عندك جيست ماتحبيش تهدري معايا سكت حبيت نسقسيه على اذا رآه متزوج وخايف يقولي متزوج كيفاه ندير لعمري قتلو اسمع قالي نجاة عندي اسم قتلو والفت قالي معليش واشنو قتلو انت متزوج ضحك ياربي رجال ڨاع عندهم ضحكة كيما هذه ولا زاكي برك قتلو علاه تضحك قالي عليك قتلو علاه قالي هكذا قتلو جاوب قالي وانتي واش رايك قتلو ماعرف قالي واش راكي حاسة قتلو متزوج قالي اممم قتلو متزوج قالي ايه هو قالي ايه وانا طاح مني نص قتلو متزوج ولاه تهدر معايا واشبيك ماتحشمش تزيد تعيط عندي نطيحلك وكوبيت وغلقت تلفون متزوج وجاي عندي مايحشمش وليت نبكي ماعرف لاه ماعجبنيش الحال ماعرف  كنت دايرة امل فيه ماعرف كنت طامعة فيه ولا طحت فيه نضت خبيت تلفون ورحت رقدت بصح واش يرقدني مافهمتش واش بيا قلقت كي لقيتو متزوج ماجيت نرقد بسيف لغدوا صبحت ماما تنوض فيا نضت ماشي عبد لي يهدر  معايا ناكلو مانيش حاملة روحي كملت شغلي برك درت لغدا حطيتو قلت لماما راني رايحة عند سارة قاتلي احكمي بلاصتك واش راح ديري عند سارة قتلها سارة ثاني وراح تحرموها نروح عندها لا تحواس لا دوران نضل فدار مخزونة وتزيدو تمنعو عليا سارة قاتلي واشبيك انتي من صباح وانتي تاكلي في روحك سكت رحت لبست وخرجت رحت عند سارة قعدت معاها قاتلي واشبيك بقيت ساكتة قاتلي اهدري ولا بيك البياري باينة قتلها الخداع ظهر متزوج ناضت تضحك قالي باينة بلي متزوج وبولادو لاه حتى يقولك سكت قاتلي وانتي واشبيك قلقانة بقيت ساكتة قاتلي نجاة طحتي فيه باينة قتلها ما طحت ماوالو بصح لاه يكذب عليا ديجا واش جابو عندي رخيس مايحمش كبير ومتزوج وجاي عندي قاتلي نجاة من نهار لول باين علاه انتي واش كنتي حاسبة سكت ديجا مزية صارحك ملول خير مايطيحك فيك وتحصلي معاه ملول اجبدي روحك هذو ماشي تاوعنا يا نجاة هذو حنا ما نقدرولهمش سكت ،فوت نهاري ماشي عبد قلقانة وراح نفرفر تقول نار شاعلة في قلبي عييت نحمل ،بعدها فاتت يومين وانا مانيش ڨاع راكحة غير نزيد راح نهج من دار حابة نخرج بلاك يتنحا عليا رحت لماما قتلها هيا نخرجو ندورو شوية قاتلي وين ندور قتلها هيا نهبطو لتحت ندورو ضاق خاطري قاتلي مانيش قادرة نهبط واش راح نهبط نضت نعيط ونبكي انتي ديما هكذا غير راقدة ماتخرجيني ماتخليني نخرج لاه لبنات كل فالزنق يدورو وانا محبوسة هنا الشمس مانشوفهاش بقات تشوف معايا قاتلي واشبيك أطفلة هبلتي لاه ديري هكذا قتلها حابة نخرج حابة ندور ضاقت روحي حابة نشوف دنيا قاتلي وانا لاه خاوتك لي مايحبوش وزيد وين تخرجي وحدك ولاد لحرام سايرين دايرين قتلها ولاد لحرام شافوني غير انا بنات الحومة هذه ڨاع ماشي بنات رحت خليتها كرهت مافهمتش واش بيا راح نهبل جامي ضاقت روحي من دار كيما اليومين هذا سمعتها تعيط عليا خرجت قاتلي روحي البسي نديك دوري ساعة وجي رحت لبست سروال وبودي وفاست طويلة درت خماري وهزيت صاكي وخرجت شافتني ماما واش اللبسة هذه قتلها واشبيها قاتلي  تحوسي يقتلوك خاوتك قتلها لاه يقتلوني واشبيها قاتلي كيفاه واشبيها شوفي سروال راح يطرطق عليك قتلها راني لابسة الفيستا قاتلي واش من فيستا هذه واش غطات امشي البسي حاجة طويلة يالله قتلها لاه نبدل لبنات كل يلبسو هكذا قاتلي كون يشوفوك خاوتك مومن برك يجيبك من الشعر امشي يالله رحت نحيت الفيستا ولبست كاب طويلة جاني تقول روبة خرحت قتلها هي خرجنا جينا نمشو كل كوانة نلقاو جماعة قاتلي كون خرجتي بالفيستا كون طيروك هي تهدر وانا عيني تحوس علي زاكي نمشي وندور ورايا قاتلي ماما علواه تحوسي انتي قتلها والو نشوف برك رحنا درنا وجينا بصح ماتبدل فيا والو صماطلي كلش مافهمتش علواه نحوس بالضبط بقيت نفس الحالة قلقت وراح نبكي قلت لماما امشي روحو قاتلي واشبيك ثاني درتيلي سوق فالدار باه نخرجك وكي خرجتك ماعجبكش الحال قتلها هيا ماعجبنيش الحال قاتلي تزيدي تقوليلي خرجني ناكلك عاودنا رجعنا وانا عينيا غير تغرغرو بدموع وزيد شتا والهواء بارد راح نبكي وخلاص جينا نمشو حنا درنا فجأة شفت طوموبيل زاكي عرفتها تاعو غير شفتو فرحت وطلعلي المورال جينا نمشو حنا قريب نوصلو هو حل الباب هبط شافنا وتكا ع الباب كالعادة لابس غير لكحل بقا يشوف معايا قاتلي ماما وهذا لاه يشوف معانا هكذا ماما ماعرفتوش كي عاد لابس نورمال قريب نوصلو عندو هزيت عيني عندو شفت معاه شاف معايا عوج فمو وضحك نزلو دموعي وفت عليه سمعتو قال اسمع ياربي ونعيطلك ونلقا تلفون مغلوق غير ضك نجي ليك لدار علبالي قصدو عليا ضحكت قاتلي واشبيه هذا يعيط هكذا قتلها ماعرف بصح سبحان الله غير شفتو تنحالي وليت مليحة ظاهرة كنت نحوس على زاكي وحابة نشوفو هو رحت لدار بقيت كل مرة نقول نحل تلفون وما نحلش ممبعد قلت كي نحل تلفون واش راح يتبدل زعما السيد متزوج واش نطمع فيه واذا دار بيا غير لمصلحتو يلعب بيا ويرميني عاودت وليت لحالتي كيما كنت فليل كنت نتفرج سمعت الباب يطبطب نضت فتحت لقيت سارة وختها قتلها أخاه واشبيكم لاه جيتو وحدكم قاتلي على جالك واش نقولك يا نجاة قتلها واش كاين قاتلي البياري تاعك هبلني قتلها لاه واشبيه قاتلي بعثلي مساج ضك تروحي عند نجاة تقوليلها تحل عليا تلفون قتلها وانتي لاه سمعتي هدرتو وجيتي قاتلي يا حمارة رآه يتحلف كون ماتحليهش يجيك لدار خفت يجي لدار ويديرلك مشكل كيفاه ديري سكت قاتلي نجاة حصلك ربي مع واحد الراصة الله يسترك منو وخلاص سكت قاتلي هيا هزي عليه قبل ما يجي قتلها مانهزش خليني منو قاتلي دبري راسك لا جاك لدار شوفي كيفاه ديري قتلها يجي على روحو جات رايحة قتلها اقعدو تباتو عندي قاتلي انا نبات بصح ختي تصبح تقرأ قتلها ضك يجي مومن يوصلها قعدنا نسهرو حتى جا مومن وصل ختها صغيرة ورجع بت انا وياها فالشمبرة هي رقدت على الكانابي وانا رقدت فلرض بقينا نهدرو صونا تلفونها قاتلي نجاة البياري تاعك قتلها خلينو منو زاد عيط ماهزتش بعث مساج قالها قوليلها تحل تلفون صينو اقسم بربي غير نطلع وراني برا مڨاري قراتهولي  نطير من بلاصتي طليت على تاقتي مكاش خرجت لصالو لقيت مومن راقد ثم ماما وبابا راقدين رحت للكوزينة خرجت للبالكو حنا البالكو تاعو درنالو الكارو هذوك لي كيما تاع الفيترينات طفيت ضو باه ما نبانش وخرجت طليت حتى شفتو طوموبيلتو بعيدة والله غير صح جا خرجت سارة تجري قتلها والله غير رآه هنا قاتلي امشي هزي عليه هذا راح يباصينا انا وياك خرجت غلقت الباب جبدت تلفون حليتو عيطلي ريبونديت قتلو الو قالي هذاوين عرفت الكود تاعك انتي تمشي بالتهديد قتلو واش تحوس قالي اعدلي لفمك لا نجي ليك قتلو واش تحوس عندي سبحان الله قالي اعدلي فمك وماتعيطيش لا يسمعوك سكت قالي لاه غالقة تلفون قتلو هكذا تسالني قالي نجاااة اقسم بربي غير نطلع ليك اعدلي فمك قتلو ارواح قالي اسمعيي غير ماجربيش ز** راني صح نطلع عندك كوبيت عليه قاتلي سارة واش قتلها كلامك بدا يخرج والله صح بديت نحصل معاه زاد عيط كوبيت بعثلي مساج هزي ماتقلقيش ر** قاتلي سارة هزي عليه اهدري بالعقلية بركاي ماتعاندي فيه لا ليوم تخلا علينا في زوج هذا باين ما داير حساب لحتى واحد عيطلي هزيت عليه قالي اقسم بالله وتزيدي تكوبي على ز** غير تسلكيها غالية سكت ظهر صح راصا قالي اهدري واشبيك ساكتة قتلو مانيش حابة نهدر قالي كي نهدر معاك جاوبي سكت قالي نجاة مانيش كلب فهمتي باه تسمطيني قتلو واش تحوس عندي مانيش حابة نهدر ياك هدرنا وصاي قالي انتي لهدرتي انا ماهدرتش قتلو واش دخلني فيك انا قتلك ماتزيدش تعيطلي صاي مراحش نبقاو هكذا قالي ماشي كيما تحبي انتي سكت كيما درت معاه ما سلكتش بعدت تلفون عليا سارة بقات تسمع قاتلي واشبيك تعاندي فيه اهدري بالعقلية وقوليلو مانقدرش وخويا ومنا بركاي ماتعاندي فيه هذا ماشي تاع معاندة سمعتو يقول الو قتلو وي قالي لاه ماحبيتش تهدري قتلو خويا برك قالي ممبعد نعاودلك قتلو لا معليش أهدر ضك قالي انتي لي اهدري قتلو زاكي تعيش ياك رانا كبار ونفهمو قالي  ايه قتلو ياك قتلك والله مانخرج عليك  مانيش انا لي تحوس عليها وانت راك كبير عليا اولا ومتزوج وبولادك ثانيا والله ما يجوز الشي لي راك ديرو قالي علاه واش راني ندير قتلو علاه ولي ديرو فيا ضك  قليل كل ليلة تبقى تهدد فيا ومركبلي الخلعة علواه قالي خاطر انتي لي تخليني ندير هكذا مالقيت حتى طريقة نوصل ليك بغير تهديد قتلو ماتوصلش عندي مانيش حباتك توصل عندي قالي نجاة انا الحاجة لي نحطها في راسي نجييها وين كانت تكون هكذا تربيت قتلو بصح انا مانيش حاجة انا انسان قالي علبالي راني نهدرلك عموما حبيت نفهمك بلي كي حطيت في راسي نوصل ليك يعني نوصل ليك قتلو زكي كي توصل عندي ممبعد واش قالي المهم خليني نوصل عندك وتشوفي ممبعد واش واش يخوفني هدرتو ڨاع الغاز ومعاني مانفهمش ڨاع بقيت ساكتة واش يفكني منو هذا ماصلح بالعقلية ماصلح بالعياط قتلو اسمع تعيش اخطيني والله ما يجوز الشي لي راك ديرو راني نحاول فيك سبحان الله اخطيني قالي نجاة بصح علاه هاربة مني هكذا قتلو ملخر خاطر نخاف منك قالي لاه تخافي واش راح نديرلك انا والله ما نقيسك بحاجة جيست خليني مرة على مرة نسمع صوتك ونشوفك ولو مالبعيد ماني حاب والو منك ماقتلك اخرجي معايا ماقتلك اركبي معايا ماقتلك دوري معايا ماقتلك باتي معايا غير سمعيني صوتك ونشوفك مالبعيد هذا مكان مالقيت مانقول شكون يقدرلو وليت قتلو خويا جا راح نكوبي قالي مهم ماتغلقيش تلفون باه مانهبلش برك خاطر لهبلت توقعي مني كلش سكت قالي هيا صحا كوبيت طيشت تلفون ورقدت ماعرفت ماندير عقلي يقولي حاجة وقلبي حاجة مالغري علبالي متزوج وبولادو والشي هذا غالط بصح ماقدرتش نقاومو ديجا شكون يقدرلو فالهدرة وماقدرتلوش قاتلي سارة حذاري منو قتلها سمعتي واش قالي قاتلي سمعت سمعت بالصح حذاري يلعبلك براسك السيد كبير ويعرف بزوج كلمات حلوين يخليك بايتة عندو قتلها سمعتي هاو قالي ماني طالب منك والو غير يسمع صوتي ويشوفني ملبعيد قاتلي جايحة وانتي صدقتي المرة لولى ڨاع هكذا ماني طالب منك والو انتي طيحي فيه هو يبدأ كل مرة يطلب حاجة حتى يطلب حاجة كبيرة قتلها كشغول انا راح نلبيلو طلبات قاتلي وراس ختي شفتي كي طيحي فيه تولي كالعمية تولي مهبولة عليه واش يقولك ديري وزيد هو يخدم غير بتهديد كون ماديرلوش واش بغا يهددك ديجا رآه فاقلك بلي تخافي منو شفتي ياك قلهالك بلي عرفلك الكود وانتي زدتي استعرفتيلو كالجايحة قتلها واش ندير قاتلي معليش خلينا مالخرجة ورانديفو ممكن تقدري تتلقايه مرة على مرة بصح نجاة السيد متزوج فهمتيها متزوج ولالا يعني اولا دايرك عشيقة يجوز بيها الوقت كي يكره يرميها ثانيا مكلاه تطمعي يديك لدارو راح تبقاي غير عشيقة ليه فالسر ومرتو هي الصح هي لي يقابل بيها الغاشي ويقول مرتي حلالي هي لي هازة اسمو وهي يمات ولادو هي لدايرها في دارو ماشي  انتي يالجايحة ضك  زعما يقولك نحبك ومنا ومنا نهار يدي واش يحوس منك يرميك كالكلبة وانتي تبقاي فضلة تاعو بقيت نشوف معاها وساكتة قاتلي ابقاي تفرجي فيا هكذا هذا لوكان ماتزربيش تلكيديه عليك راح يرجعك فضلة تاعو فهمتي ديجا هاه هدر غير معاك زوج كلمات انتي صدقتيه وطحتي ديجا فيه زيدي معاه سمانة هكذا اقسم بالله ومايخرجكش تباتي عندو ملا ومن الفوق تروحي برجليك السيد قاري و معاود شابع كلش من لفراش لحنانة وروح انتي كيما اي وحدة صغيرة تحلم احلام وردية ويديها زف تاع الحب والحنان حتى تفيقي تلقاي روحك غير صالحة هي قاتلي هكذا وانا نطير من بلاصتي حكمت تلفون بعثتلو مساج ماشي من تربيتي نمشي مع واحد متزوج وغلقت التلفون قتلها عندك الحق السيد طامع فيا برك من اليوم مانزيدش نهدر معاه واذا حاب يطلع خلي يطلع قاتلي ايه خليك منو سلكي روحك قبل ما تكبر الحالة وتعياي تفكي روحك هذا النوع الحصلة معاه تجيب الندامة