قيود زاكي

الجزء 1

بقلمي هوس ريجا

الجزء 01

انا اسمي نجاة عمري 23 سنة جوزت الباك وماديتوش قعدت فدار حنا ساكنين فالباطيمات عندي زوج خاوتي كبار متزوجين كل واحد بدارو  وختي وحدة متزوجة ممبعد انا وخويا الصغير عمرو 17 يقرا فليسي وهذا خويا طوايشي وتاع مشاكل كل مايخرج يديرلنا مشكل ماعياو خاوتي يضربو فيه يحبس يامات ويعاود يرجع وحنا الحي لي نسكن فيه تقريبا ڨاع يبيعو الممنوعات كل نهار الدولة طيح تفتيش و تدي واحد  وماما تخاف غير على خويا يتبع هذا طريق والحمد لله لحد الان خاطيه ماياكلهم مايدور بيهم مالغري مشكلجي كيما يقولو بصح الطريق هذه خاطيها .
اليوم عرس عمي صغير ماما وبابا راحو صباح وانا قعدت ندير لغدا لخويا  لعشية باه يجي بابا وصاوني نغلق الباب برك درت لغدا لخويا تغدا وخرج  قعدت انا دوشت سشورت شعري سرحتو طلقتو مكييت ولبست روبة دار ديميمونش وقعدت نستنى في بنت عمي سارة هي ثاني تسكن هنا مقابلينا يعني نخرج من الباطمات تاعنا ندخل فالباطيمات تاعهم يعني البيبان مقابلين بعض بيناتنا طريق فالوسط عيطتلها باه جي عندي توجد روحها معايا ويجي بابا يدينا في زوج لعشية قاتلي ندوش ونجي بقيت نستنى فيها ونوجد في قشي واش نلبس حطيتو حتى نسمع الحس فلبلوك تاعنا ماعمرتش راسي موالفة ديما نسمع الحس تاع لولاد وساعات جيرانا الفوق يدابزو مع بعض كنت قاعدة والباب يطبطب ماشي طبطب تكسر ماحبش يسكت قلت سير سارة هذا هو طبطيبها ديما تجي تجري تكسر الباب وليت نعيط بعقلك راني جيت واشبيك رحت فتحت الباب وانا نلقى راجل ماشي راجل الباب ڨاع مغطيه زربت هربت ورجعت الباب لاح راجلو قالي افتحي تخبيت ورا الباب طبعو دخل وانا ورا الباب عرفتو هذوك تاع دولة يوميا يطيحو مداهمات فالحي تاعنا سورتو فليل شفتو لابس سيفيل ويبان ف 39 ولا 40 باين كبير بصح كي وقف قدامي الله يبارك قد الباب كيما هذوك تاع البياري حتى الوقفة نفس الوقفة يخوف كي يشوفو الواحد تحكمو رهبة انا اول مرة في حياتي نتلاقا بهذا النوع  عن قرب ونهدر معاه قالي واحد ما دخل هنا قتلو لالا قالي سير قتلو والله يشوف معايا بنظرة شك نسيت ڨاع بلي راني بلا خمار وبروبة دار عييت ندور ورايا نجبد خمار شوفتو دير الرهبة قالي عندك خوك صغير ياك قتلو ايه بصح راح يقرأ قالي كيفاه يقرأ وهما شافوه واقف مع جماعة مشبوهة قتلو والله كان هنا تغدا وراح يقرأ بلاك فات لقاهم فالطريق هدر معاهم    قالي راح نفتشو دار قتلو بصح مكان حتى واحد فدار قالي ماشي انتي لي تقوليلي انا لي نشوف بنفسي قتلو ماشي هكذاك بابا وماما مكانش غير انا فدار سكت قعد يشوف فدار ممبعد شاف معايا قالي وينهم قتلو رآهم في بيت جدي نسمع في واحد من برا  يقولو مكان والو هنا قالو هو زيدو فركتو ديار الفوق هذاك نهار الباطمة ڨاع فركتوها قعد يشوف معايا قالي استري روحك باه يدخلو يفركتو هنا قتلو بصح راني غير وحدي قالي ما تخافيش راني معاك كاين شي ناس شوفتهم من اول مرة    تعطي الامان و الثقة درت ورايا كاين خمار والعباية ديجا معلقين قدام الباب ديما نخليهم هنا كي نروح عند سارة  نلبسهم ديراكت جبدت العباية لبستها وغلقتها وحطيت الخماز على راسي طلعت راسي لقيتو يشوف معايا نورمال قالي هذا تسميه خمار شعرك ڨاع برا  اعدلي خمارك استري روحك ماعرف عيط عليا ماعرف هذه هي نبرت صوتو حسيتو نشعني تخنزرت فيه كي نشعني قالي هبطي عينيك وازربي خليني عاودت عدلت خماري مليح قالي وراهي الكوزنية قتلو هاهي وريتهالو بيدي دارلي براسو هيا مشيت وهو ورايا دخلنا راح للبالكو فتحتو طل وجا قالي اوقفي هنا وقفت قدام الحيط وخرج يعيط عليهم دخلو هو وقف قدام باب الكوزينة انا شفت تلفوني هزيتو باه نعيط لخويا حوست عليه عيطتلو لقيتو مغلوق سمع الهدرة تاع تلفون كي بقات تقول مغلق دار عندي قالي هاتي هنا عطيتهولو شافو قالي شكون هذا لي عيطتيلو قتلو خويا شاف معايا ومع تلفون بقا يفركت فيه قالي سير خوك قتلو والله خويا عطاهولي ودار لهيه  نسمع في واحد جا  قالو مكان والو نزيد نشوف هنا قالو مكلاه شفت ديجا ماكان والو قالو اك سمعت فلعياط برا ولبكا جارتنا للفوق داو وليدها سير كاش مالقاو عندو هو يتعاطى جاو عندو قالولو مالقينا والو  قالهم اك سمعتهم كي خرجو دار عندي قالي خوك وين يقرأ قتلو فليسي الفلانية  شاف معايا وراح لحقتو شفت دار قلبوها ماعرف واقيلا  يحوس على كاش حب كي وصل الباب دار عندي قالي مخطوبة انتي قتلو لالا قالي شحال عمرك قتلو 23  شاف معايا من الفوق للتحت وراح خرج واشبيه هذا   لحت راسي نطل شفتو هو طلع الفوق لقيت غاشي كبير والباطمة ڨاع فركتوها شفتو هو هبط شافني زربت خبطت الباب جيت نمشي لقيتو طبطب الباب حليت قالي علواه طلي وتلوحي في راسك  قتلو نشوف برك قالي اغلقي الباب ماتزيديش تحليه وليت غلقتو رحت نطل لقيت الدنيا كل مسركلة سير كاش ماحكمو جماعة وهربو نشالله مايكونش خويا معاهم برك والله  ماما يحبس قلبها هي من بكري فيها الخلعة  حتى باطيمات لي مقابلينا مسركلين بقيت نطل ونعس حتى شفت هذاك خرج من البلوك تاعنا واقف بعيد  ويهدر فالتلفون سمعت واحد لابس كيما هو يعيطلو  زاكي ملا اسمو زاكي عيني بقات غير تعس في هذا زاكي كيفاه يهدر كيفاه واقف وين يروح وين يجي قعدت غير نتبع فيه مافقتش  كيفاه هز راسو لقاني نطل ونشوف معاه خاطر لبلاصة لي واقف فيها يقدر يشوفني مليح وليت زربت خبطت التاقة خفت غير يزيد يطلع عندي بقيت نفرز سمعت الباب يطبطب  ياربي مايكونش هو رحت قلت شكون قالي انا حلي خويا لكبير هذا فتحت الباب دخل قالي فاتو هنا ثاني قتلو ايه فاتو قالي هدرو معاك قتلو اواه قالي وين مومن  هذا خويا صغير قتلو خرج وحتى هو يحوسو عليه  قالي ياك مالقاو والو برك قتلو اواه والو هز تلفون عيطلو قالي وينك انت قالو راني فليسي قالو علبالك طاحو تفتيش هنا فالحي قالو ايه علبالي قالو وعلاه واش حكمو قالو حكمو جماعة يبعو ثم وكاين لهربلهم لحقوهم قالو عس روحك برك حتى انت يحوسو عليك ضك يفوتو لليسي يسقسو وقتاش جيت تقرا  قالو ايه ماتخافش وكوبا قالي هيا وجدي روحك نديك ماتبقايش هنا وحدك هما مزالو مطولين قتلو وسارة قالي خوها معاها رحت لبست روبة درت خماري هزيت حوايجي وخرجت انا وخويا لقيتهم مزال يفركتو فالباطيمات حكمو شحال من واحد جيت نمشي انا وخويا لطوموبيل شفت هذا زاكي لقيتو يشوف معانا حنا ركبنا لقيتو جا عندنا انا ركبت وخويا هبط عندو لاح عليه سلام قالو شكون انت قالو دار بابا هنا قالو هذه الطفلة واش تكلك قالو ختي قالو اعطني لاكارت تاعك عطاهالو خويا بقا يشوف معاها هبط راسو الكارو قالي هاتي لكارت تاعك قتلو راهي فدار ماهزيتهاش قالي كفاه تمشي بلا كارت كيفاه نتأكد بلي هذا خوك قتلو والله خويا قالي الثقة بالوثيقة واش يضمنلي بلي هذا السيد خوك  قالي خويا اهبطي جيبيلو لاكارت قالي خلاص اقعدي برك قال لخويا رآهم قالولي بلي خوك صغير معاهم قالو اواه راح يقرأ روحو لليسي وسقسو عليه قالو من بكري رايحين قالو معليش وراح ركب خويا زاد جا عندو قالو كاينة حاجة برك  ماتخليش ختك وحدها فدار حيكم مشبوه وناس ماهداهاش ربي قالو كتر خيرك  هزيت عيني شفت معاه لقيتو حتى هو يشوف معايا هبطت راسي ديمارينا رحنا لبيت جدي حضرت العرس وروحنا  هذيك ليلة جبت ليلي كلو وانا نخمم   في هذاك زاكي مابغاش يروح من عقلي عييت نحيه من راسي نظاراتو ليا مستحيل يروحو من بالي  عندو نظارات حادة عينيه جامي ننساهم  ياريت نعاود نشوفو ولو  مرة غير نشبع من شوفتو حابة نحفظو مافهمتش لاه  بصح علبالي محال نزيد نشوفو هذو الشكيلات مانشوفهمش في حياتي بزاف ديجا باين بلي متزوج وبولادو  رآه كبير  غير نحيه من راسي حتى ولو شفتو ماعندو مايتبدل