قيود زاكي

الجزء الثاني

بقلمي هوس ريجا
#قيود_زاكي
الجزء 2
فات شهر على هذاك النهار وكلش راح غير زاكي مراحش من راسي تمنيت نشوفو يوميا نطل ونعس نقول بلاك نشوفو بلاك يرجع هنا كي قلت لسارة عليه قاتلي منيتك انتي تشوفي مع هذاك الجور وزيد كبير سير متزوج وبولادو غير اخطيك منو بشوية حتى بديت ننساه ورجعت لحياتي طبيعية ، وانا كنت مع واحد من الحومة تاعنا اسمو نبيل علاقتنا باردة أو بالأحرى من عندي مالغري ماعندو ما خصو زين والحطة وخدام عمرو 30، كنت نهدر معاه غير فايس ومن نهار شفت هذاك زاكي زدت بردت من جهتو مليح وتبدلت عليه حتى هو قالي واشبيك مبدلة عليا قليل وين نهدر معاه تلفون منها مانحبش ومنها نخاف خاوتي ومنها يقلقني كي يعيطلي ويبقا يقولي نحبك وتوحشك نكوبي عليه مانحبش نعاف ديجا بشوية نقصت معاه الهدرة يعني درت فيه الراي وعلبالو بلي مانحبوش ونقولو روح اخطيني وماتزيديش تعيطلي هو لالا يبقا لاصق فيا حتى كرهت منو ، فالنهار كنت عند بيت عمي مع سارة حتى نسمع فالعياط برا خرجت للبالكو وبقينا نطلو على البالكو والبالكو كان حيط وفيه شقوق يعني تخرجي طلي واحد ما يشوفك خرجنا نطلو حتى شفنا الحالة مسركلة باطمتنا حنا ولي قدامنا فرحت قلت واقيلا هذاك معاهم بقيت نطل ونحوس عليه بلاك نشوفو بصح مكانش كشغول طاحلي المورال حتى نشوف خويا خرجوه مع جماعة قتلها سارة ياخاه مومن واش دار قاتلي واقيلا لقاوه فالبلوك قاعد مع جماعة هو ديما يقعد فلبلوك ثم مع ولاد البلوك تاعنا تفكرت ماما وحدها وهي عندها الخلعة قتلها ماما وحدها وانا قاعدة هنا خرجت نجري هبطت وخرجت من البلوك تاعهم هبطت راسي ودخلت لتاعنا طلعت نسمع فلعياط جاي من جيرانا الفوق شفت ماما طاحت قدام بابنا وتبكي رحت نجري عندها قتلها ماما لاه داو مومن قاتلي وين علبالي لقاوه قاعد فدروج مع جماعة هزوه قتلها عيطتي لبابا قاتلي ماعنديش باه نعيط حتى انا ماعنديش قتلها نوضي ندخلو حتى يجو بابا وخاوتي قاتلي بعدي عليا انا راح نروح نلحق وليدي نشوف لاه داوه ناضت حكمتها قتلها وين رايحة واش راح ديريلو انتي خلي يجو خاوتي ويشوفو واش تعرفي انتي قاتلي بعدي عليا وليدي داوه وانتي حابتني نبقى نستنى قتلها ماما واشبيك ماعندك ماديرلهم حتى نشوفو في واحد هبط راحت عندو ماما قاتلو لاه ديتو وليدي واش دار قالها الحاجة لقيناها مع جماعة مشبوهة لازم نحققو معاه وراح هبط زادت طاحتلي ثم قاتلي ياخاه وليدي باصا وهو صغير عييت فيه اخطيك منهم ماحبسوش حتى ضيعولو شبابو مالقيت ماندير وليت حتى انا نبكي حتى اينيتي ماعنديش باه نعيط ولات ناضت قاتلي انا رايحة نلحق وليدي حكمتها وين رايحة اقعدي بلاك يجي بابا وخاوتي فجأة شفت هذاك زاكي هبط من فوق شفت معاه جات عيني في عينو نشوف معاه ونبكي كي بقا يشوف معايا هبطت راسي عندو واحد الطلة دير الرهبة ثم ثم توترت وفقدت توازني شفت ماما جات رايحة حكمتها قتلها وين رايحة قاتلي هيا نروحو نشوفو خوك جا عندنا هو وليت هبطت راسي غير يكون قريب مني مانفهمش واش يصرالي مانقدرش حتى نشوف معاه قالي واشبيكم قتلو لاه ديتو خويا قالي لقيناه قاعد مع جماعة مشبوهة قاتلو ماما بصح هو مدار والو موالف ديما هذيك هي بلاصتو قالها الحاجة لابغا مدار والو لقيناه مع جماعة مشبوهة كي نوصلو لهيه تبان دار ولا مادارش شافت معايا قاتلي امشي نلحقوهم نشوفوه قالها الحاجة وين رايحة ماعندك ماديريلو راح نحققو معاه ونطلقوه قاتلو انا راح نروح ونشوف وليدي شافت معايا قاتلي راني رايحة وحدي وانتي كي يجي باباك قوليلو قتلها وين رايحة وحدك كاش مايصرالك فطريق قاتلي الموت تديني وليدي راح يباصي وانا قاعدة هنا قالها الحاجة راني نقولك ماعندك ماديريلو مابغاتش تفهم قاتلو راح نروح قتلها اصبري نغلق الباب ونجي معاك قالي وين رايحة قتلو نروح معاها نخاف طيح فالطريق بقا يتخنزر معايا هبطت راسي قدم عندي غير قرب مني ضربتني ريحتو كي وقف قدامي تقول حيط انا صح طويلة ماشي بزاف بصح طولي معقول بالضبط 1,68 بصح هو كي وقف قدامي حتى ظلامت عليا كعاد طويل كثر مني فالحجم حتى تخطفت من بلاصتي وبعدت وجهي شفت معاه همسلي قالي ادي مك وادخلي مكلاه تدخلي هذيك لبلاصة قتلو وخويا قالي ما تخافيش انا راني ثم ضك ساعة نطلقو قتلو صح قالي لا نكذب عوج فمو برك كشغول ضحك عقلي طار معاه دارلي براسو ادخلي قلت لماما هيا ندخلو ضك نعيط لبابا زربت جبدتها معايا دخلنا وجيت نعلق الباب شفت معاه بقا يشوف معايا دارلي براسو اغلقي غلقت الباب وعقلي خليتو معاه دخلت قلت لماما راهو قالي هذاك ساعة برك ونطلقو بسيف باه قنعتها جينا فصالو قاعدين هي مرة تبكي مرة تعيط مرة تدابز وانا عقلي مع هذاك زاكي نخمم غير فيه انا ماجيت نحيه من بالي بسيف اليوم رجعت لزيرو وزيد شفتو عوج فمو وضحك خلاص هبلت كثر من ساعة سمعت الباب يطبطب ناضت ماما تجري فتحت لقاتو خويا بقات تحظن فيه وتضرب هو يضحك قالها راني هنا واشبيك قاتلو أهدر واش درت قالها والله مادرت حاجة لقاوني مع جماعة فالبلوك هزونا وكانو مدابزين وجارنا الفوق هرب ولحقوه جابوه ااا علابيها كان الفوق دخلنا لصالو بقات تسقسي فيه واش دارلكم واش قالولكم قالها لخرين لي تضاربو حكموهم وانا وصاحبي طلقونا قاتلو واش قالولك قالها انا حقق معايا الطويل هذاك لي هدرتي معاه خاطر قالي يماك كانت تبكي عليك وتحوس جي تشوفك ونحالي تلفون فركتو ورجعهولي ما لقا فيه والو طلقونا هو يهدر وانا بالي مع هذاك زاكي ، بعدها بيومين فليل نبيل بقا يعيطلي بقيت نكوبي ونعاود ماحبش يفهم انا من بكري مانحبوش وزدت شفت هذاك زاكي حتى الكره وليت نكرهو يبعثلي فالمساجات هزي عليا واشبيك واش كاين شحال عندي ماهدرت معاه جبدت روحي عليه نهائيا وليت حطيتو فالروجوتي ورقدت على 1 نسمع فالتلفون يصوني فطنت من نعاس لقيت نميرو جديد علبالي نبيل كي لحتو فالروجوتي عاود عيطلي بنميرو اخر هو يعيط وانا نكوبي بعثلي مساج هزلي عليا خليتو بقا يعيط عاودت كوبيت زاد بعثلي مساج هزي يا البكاية بقيت حايرة لاه يقولي البكاية قلت واش رآه يخرط هذا عاود عيط بقيت نشوف مع نميرو وليت هزيت عليه سمعت قالي الو هذا الصوت ماشي صوت نبيل ومايشبهش ڨاع لصوت نبيل هذا عندو صوت جوهري وحاد و بحة رجالية بقيت ساكتة ونسمع قالي الو اهدري بقيت غير ساكتة وليت كوبيت شكون هذا انا مايعيطلي حتى واحد بغير نبيل وكون مايعيطليش هو تلفون مايتحركش وواحد مايعرف نميرو تاعي بغير هو عاود عيط وليت كوبيت عليه خفت زاد عاود وليت هزيت قالي الو قلتلو وي شكون معايا قالي ياك حنا لي نعيطو بدراهمنا لاه راكي تكوبي قتلو شكون معايا قالي لاه ماحبيتيش تهدري قتلو أهدر شكون انت قالي قولي سع لاه قاعدة تكوبي عليا وماحبيتيش تهدري قتلو وين نعرفك حتى نهز عليك و نهدر معاك قالي ااا قتلو قول شكون قالي زاكي هو قالي زاكي وانا نطير من بلاصتي حتى تلفون طاح فلرض طفا ديراكت ياخاه هذا وين يعرف نميرو تاعي حتى يعيطلي وكفاه لقاه ولاه ديجا يعيطلي خفت منو هو ديجا هيئتو برك دير الرهبة والله عندها الحق سارة انا هذو شكيلات مانيش قدهم غير نبعد روحي ،هزيت تلفون عاودت فتحتو وحطيتو شوية عاود صونا لقيتو هو واشبيه هذا اليوم كوبيت عليه بعثلي مساج هزي نهدر معاك وعاودلي وليت هزيت قالي الو عييت ننطق مانعرف لاه نتوتر منو وندخل بعضايا مانكونش ڨاع على طبيعتي قالي اهدري واشبيك بقيت ساكتة حابة ننطق بصح ماقدرتش صوتي راح مافهمتش حالتي هذا غير فتلفون وصراتلي هكذا قالي اهدري قتلو انعم قالي انا لي راني نعيطلك بدراهمي وعلاه ماكيش حابة تهدري سكت قالي نحاولك باه نسمع صوتك قتلو واش كاين قالي علاه ماحبيتيش تهدري قتلو واش نهدر ماعنديش قالي معليش بقيت ساكتة قالي واسمك شوكاني قتلو علاه تحوس على اسمي قالي جاوبي قتلو مانجاوبش قالي اسمك نجاة قتلو ومدام علبالك علاه تسقسي فيا قالي اسمعي انتي سڨمي اسلوبك راكي قلقتيني واشبيه هذا طايح عليا شيكور ويدبر عليا وليت كوبيت ديراكت ناقصني غير هذا لقيتو عاود عيط كوبيت بعثلي مساج اقسم بربي وماتهزيش المرة هذه غير ما نفوتهالك خفت منو وليت هزيت قتلو واشنو قالي لاه تكوبي في وجهي قتلو واشبيك انت واش تحوس من عندي تعرفني نعرفك كاش ما بيناتنا قالي كنت مانعرفكش بصح وليت نعرفك سكت عييت نفهمو هذا قالي تقراي قتلو لالا قالي عمرك 23 قتلو ايه قالي وماكيش مخطوبة قتلو لالا سكت ممبعد قالي ماعندك حتى واحد في حياتك قتلو علاه قالي جاوبي قتلو حياتي الشخصية حاجة تخصني انا قالي ملا عندك قتلو مايهمش حاجة تخصني قالي جاوبي كي ناس هذا بصحو قتلو انت بصحك تستنا فيا نجاوبك قالي ايه تجاوبي وملا قتلو انت واقيلا راك فارغ شغل هيا تصبح على خير وماتزيدش تعيطلي وكوبيت عليه عاود عيطلي وليت غلقتو ديراكت واشبيه هذا منيتو طايح عليا تقول تحقيق والعجب عندو ثقة كبير في نفسو يسقسي فيا نورمال ، لغدوا فتحت تلفون لقيتو ما عاودش عيط جات عندي سارة حكيتلها قاتلي نجاة اخطيك من جور هذو والله غير يخوفو انتي ماكيش قدهم غير بعدي عليه راح تحصلي غير معاه هذو رآهم شايفين وعايفين ويعرفو كلش واعرين قتلها علبالي حتى انا خفت منو هذا غير صوتو يخوف ، فليل قاعدة فالفايس حتى نشوف بلي دخلي مساج قريتو واش راكي ديري مارجعتلوش زاد بعثلي اذا ماعندكش اينيتي قوليلي نبعثلك واهدري معايا رجعتلو قتلو واش تحتاج قالي لاه ماتهدريش بعثتلو قتلو واش تحوس عندي زاد بعثلي هذا اسم فايس تاعي ابعثيلي فيه عاودت بعثتلو قتلو ماتزيديش تبعثلي اك مارجعليش رحت حوست على الفايس تاعو دخلت ديراكت نشوف حتى نشوف فوطوه قدامي تقول صح راهي واقف قدامي لقيتو عيطلي كوبيت عليه بعثلي مساج اشفاي عليها هذه لولا تاعك خلعت حتى يدي رجفت يما شكون هذا لي حصلت معاه بقيت نشوف مع تلفون زاد بعثلي علاه راكي ساكتة قتلو واش نهدر قالي معليش تصبحي على خير وماتسهريش بزاف واشبيه هذا واش يحساب في روحو يدبر عليا نورمال مارجعتلوش خليتو والله هذا بدأ يخوفني حتى انا بديت نحصل معاه جاني الفضول ندخل لبروفيل تاعو لقيت فوطو بروفيل تاعو عندها يامات ملي مصورها لابس سروال جين نوار وتريكو بيض وفاست كوير نوار وصباط بيض وداير كاشني مصور فالثلج قعدت نشوف معاه تقول رآه واقف قدامي عندو كريزما ڨراف بصح شوفتو دير رهبة داني الفضول نشوف تعليقات ونشوف لي جام أو بالأحرى نحوس على كاش وحدة لقيت بزاف تعليقات ولي جام كثر من 300 جام اووو هذا وين يعرف الغاشي هذا كامل لقيت شحال من وحدة دارتلو جام لقيت غير ام فلان وام فلان غير وحدة دارتلو جادوغ زدت دخلت بروفيلها مافيها والو ملا تكون مرتو انا واش دخلني فيه خرجت بعثلي مساج علاه مزلتي سهرانة زربت خرجت و غلقتو ديراكت واش بيا انا هكذا سمعت هدرتو بصحي خايفة من واحد مانعرفوش وليت حطيتو ورقدت ، لغدوا فليل كنت قاعدة مع ماما نتفرجو وتلفون فيبرا في صدري زربت خرجت بالي راح ديراكت لهذاك زاكي دخلت الشمبرة غلقت الباب لقيتو هو ماعلباليش واش يصرالي غير نشوف نميرو تاعو نتوتر وندخل بعضايا حتى يدي ترجف ونخلع بقيت نشوف معاه نهز ولا مانهزش كوبا وعاود عيطلي وليت قلت خليني منو هذا يخوف مانزيدش نهدر معاه، درتو صيلونص حطيتو وخليتو رجعت لماما نتفرج بصح عقلي معاه اوووف واشبيا انا ثاني ملي شفتو وعقلي معاه نخمم غير فيه تقول جامي شفت راجل بصح يعني الصح الصح برك راجل كيما شكيلاتو هو جامي شفتو كملت المسلسل لي ما شفت منو والو عقلي غير مع هذاك رحت لشمبرتي حكمت بلاصتي هزيت تلفون لقيتو مزادش عيط وليت فتحت الفايس بصح قعدت نستنا فيه يعيطلي واشبيا انا نستنا فيه يبعث لقيت نبيل بعثلي قالي نجاة نحيني من روجوتي نهدر معاك قتلو نبيل واشبيك دير هكذا ماتزيدش تعيطلي قالي نجاة انتي لي علاه ديري هكذا واشبيك تبدلتي ڨاع هكذا قتلو علاه كيفاه كنت معاك حتى نتبدل عليك قالي بصح على الأقل كنتي تهدري معايا بقيت شي ساعة وانا نهدر معاه ونفهم فيه فجأة شفتو مساج دخل غير دخل رحت نجري دخلت ليه قريتو كتبلي علاه راكي سهرانة ضك قريتو وقعدت نتفرج فيه هو وين علبالو بلي راني سهرانة بديت نتوسوس واقيلا يراقب فيا واشبيا انا والله هبلت صح زاد بعتلي واشبيك ساكتة بقيت غير نشوف ولات تحكمني نفس الحالة نتوتر وندخل بعضايا حتى تعڨان ونتعڨن حطيت تلفون وغطيت راسي رقدت هذا نكمل معاه هكذا نهبل ، راح سمانة لاحس لا خبر وانا ماعرف لاه لاهفة عليه هكذا حابة يعيطلي مكان والو ،لغدوا درت لغدا تغديت انا وماما هي رقدت وانا بقيت نتفرج سمعت الباب يطبطب رحت درت خماري وحليت الباب حتى نشوفو واقف قدامي تخلعت بقيت نشوف معاه مصدومة حتى الرميش مانرمش شفت جارنا حل الباب خرج بقا يشوف معانا دار شاف مع جارنا ممبعد دار عندي قالي فلان عبد المومن يسكن هنا قتلو ايه هنا جا جارنا عندنا قالو تفضل حضارت يسكن هنا وباباه مكانش غير هي ومها قالي ااا قالي جارنا ادخلي بنتي راني هنا نهدر معاه شفت معاه خفت قالي هو معليش وغلقت الباب ياخاه هذا واش جابو هنا رحت نطل لقيت لابوليس في جهة وزوج طوموبيلات نوار كي العادة ديما يضربو دورة في هذه الأحياء المشبوهة وانا وين نسكن غير الخلا ڨراجات مهجورين ديار خاليين كي يطيح ليل ڨاع يجمعو فيهم السكارجية وولاد لحرام ڨاع ثم علابيها كل ليلة لابوليس والدرك والاسعاف غير تقريب كل خطرة تصرا قتيلة ، بقيت نطل شفتو هو خرج بقيت نشوف مع مشيتو الثقة والغرور لي يمشيو ماشي عبد يمشي شفتو راح فالطوموبيل الكحلة ركب سمعت بابنا يطبطب رحت فتحت لقيتو جارنا قالي علاه يحوسو على مومن قتلو ماعرف قالي بنتي كي يزيدو يجو اذا مكانش باباك وخاوتك هنا ماتزيديش تخرجي انتي خلي يماك عجوز تخرج عندهم اك بنتي قتلو ايه قالي هيا تهلاو في روحكم ،لعشية كي روح بابا قالي كي جاو يحوسو على مومن شكون لي هدر معاهم قتلو انا جا واحد برك يحوس عليه قالي ماليوم كي يجو ماتزيديش تفتحتي انتي اك خلي يماك كبيرة وعجوزة تهدر معاهم انتي لالا قتلو ايه علبالي جارنا وصلهالو خرجت سمعتو يهدر مع ماما قالها ماتزيديش تخليها تخرج تهدر معاهم الطفلة صغيرة حذاري قاتلو ايه فليل جا خويا مومن دخل ديراكت يعيط عليا قالي تزيدي تحلي الباب على هذوك نقتلك قتلو كون ماشي انت واحد ما يجي عندنا راح يضربني قالي زيدي عاودي حلي الباب خرج بابا قالو واشبيك قالو قولها ماتزيدش تفتح الباب وتهدر معاهم خلي يما كبيرة لي تهدر معاهم قالو اسكت برك راني هدرت معاها سير كاش ما سمع ، رحت لشمبرتي لقيتو يعيط خلعت هما كون يسمعو بلي رآه يعيطلي هنا يقتلوني هذا غير فتحت الباب شعرة ضربوني وليت كوبيت ديراكت ورحت فتحت الفايس وبعثلو انفي باه نقولو ماتزيدش تعيطلي هذا راح نتذبح على جالو كون يسمعو خاوتي لكبار والله يقتلوني سورتو الوسطاني كون يصيب يدفني فالدار غير يسمعني خرجت ندي طريحة حتى مع ماما مايقبلش يقولها وين تديها معاك و توري فيها وعيا يزوجني انا ماحبيتش ساعات نحسو يكرهني ، بعثتهالو شوية لقيتو رجعلي قالي هذا فايس تاعك ملا قتلو اسمع ماتزيدش تبعثلي رجعلي قالي واشبيك ماحبيتش تهزي عليا كتبتلو قتلو انت واش تحوس عندي لاه راك تعيطلي قالي علاه قتلو راك درتلي مشكل علبالك قالي علاه قتلو شعرة ضربوني على جالك قالي لاه قتلو تعيش ماتزيدش تعيط عندي والله راح ديرلي مشكل قالي معليش مانعيطش بصح فهميني علاه درتلك مشكل قتلو كي شافني جارنا فتحت عليك راح قال لبابا وخويا كي سمع شعرة ضربني قالي معليش مانزيدش نعيط بعثتلو جام وخرجت منو خليتو عندنا واحد الجيران يا لطيف يخدمو خدمة صحافة اي حاجة تافهة تصرا ينقلوها ، لغدوا جات عندي سارة حكيتلها قاتلي نجاة هذا الراجل بعدي عليه راح يصرالك غير مشكل من تحت راسو بعدي عليه رآه واعر وانتي ماتقدريلوش قتلها لاه انا واش راني ندير معاه قاتلي بلوكيه فالفايس وحطيه فالروجوتي لاه راكي تهدري معاه ديجا رآه كبير عليك وباين متزوج وبولادو اخطيك منو ما راح تربحي منو والو غير المشاكل، بعد لعشا غسلت لماعين رحت نتفرج كملت تفراج رحت حكمت بلاصتي بقيت نخمم في هدرة سارة خوفتني منو والله صح يخوف ديجا هو غامض بزاف يدير الرهبة وزيد واحد في عمرو اكيد متزوج وبولادو اوااه غير نليكيدي روحي عليه انا بقيت مع الفايس دخلي مساج من عندو كالعادة غير نشوف حاجة من عندو تحكمني نفس الحالة دخلت قريتو علاه راكي سهرانة حتى لضك قريتو بصح مارجعتش مالقيت ما نكتبلو عاود بعثلي غير جاوبيني بحرف وريحي قلبي بزاف عليا نظرة عينيك لا إراديا خرجت ديراكت من المسنجر ماعرف لاه رجفت واشبيا هكذا مافهمتش حالتي اول مرة يصرالي هكذا نحس واحد الاحساس عييت نفهمو عاود بعثلي مساج دخلت كتبلي واشبيك جاوبي كتبتلو تصبح على خير زاد بعثلي قبل ما تروحي راح نقولك هدرة وما تنسيهاش قتلو واشنو قالي قد ماهربتي مني اخرتها راح طيحي في حب زاكي وليت خرجت ديراكت وغلقت الفايس واشبيه هذا يهدر هكذا والله يخوف صح طيشت تلفون تولهت لروحي لقيت روحي عرڨانة ونرجف وقلبي يخبط اول مرة نعيش حالة كيما هذه والله الراجل هذا يخوف اخر مرة نزيد نهدر معاه هذا ماني قدو ماني قد عمرو ماني قد كبرو هو في لرض وانا فالسما