#قيود_زاكي
#بقلم هوس ريجا
الجزء 8
لغدوا عشية ماما راقدة وانا رحت لشمبرتي جبدت تلفون حليتو لقيت شحال من مساج دخل من عندي عيطلي ولقاه طافي وليت عيطتلو لقيتو مغلوق كوبيت بقيت نفاصي فالمساجات وفاصيت الفايس مافقتش كيفاه دخل خويا لكبير عليا مت طرت من بلاصتي طار تلفون من يدي قالي تاع من تلفون هذاك تعڨنت ماجات حتى كذبة في لساني نقولها جا ديراكت هزو بقا يشوف معاه قالي تاع من هذا قتلو تاعي قالي تاعك كيفاه تاعك منين جاك هذا قتلو تاعي ناض يعيط تاع من هذا جات ماما تجري قاتلو واش كاين قالها تاع من تلفون هذا قاتلو تاعها قالها وهي منين جاها هذا ياك تلفونها ماشي هكذا وينو تلفونها قاتلو ياك نحاهولها مومن قالها ايه وهذا منين جاها قاتلو شراتو قالها كيفاه شراتو منين جاوها دراهم هي حتى تشري تلفون ب 4 ملاين دار عندي ضربني قال اهدري شكون عطاهولك قتلو تاعي شريتو قالي ماتهبلنيش انتي ضالة قاعدة فدار منين جاوك 4ملاين حتى تشري تلفون كيما هذا حكمني من شعري جات ماما بعداتو عليا قاتلو بعد عليها انا لي شريتولها بعت خاتمي وشريتولها قالها وانتي لاه تبيعي خاتمك باه تشريلها تلفون قاتلو كي بقات تبكي على تلفونها شريتولها الطفلة ضالة محبوسة فدار عندها غير تلفون تتفرج فيه سكت ولا داه وخرج لصالو دور عندي ماما ضربتني قاتلي منين جاك هذا بقيت ساكتة ونبكي قاتلي اهدري منين جاك تلفون هذا منين جاوك دراهم بقيت غير نبكي قاتلي والله وكاش مانسمع درتي غير نذبحك على رقبتك سمعت خويا يعيط عليا خرجت دخلت عندو قالي نحيلي الكود ياخاه نميرو تاع زاكي شفت معاه قالي نحي سمعت الباب تحل دخل الوسطاني شفتو واقف توال الباب كي شفتو شفت موتي نطيح في بابا وخاوتي وحدهم ومانطيحش في يد الوسطاني هذا قال لخويا واش كاين وتاع من تلفون هذاك قالو يماك باعت خاتمها وشراتلها تلفون ب4 ملاين شاف مع ماما قالها والله وجا عندنا عييت نوقف من الخلعة قال لخويا هات نشوف هزو بقا يشوف معاه حلو قالي هاكي نحيلي الكود قتلو مافيه والو زدت اكدتلو مليح بلي كاينة حاجة قالي نحي الكود قتلك بقيت نشوف ماصبت ماندير حتى يدي يرجفو عيط عليا نحي قتلك قتلو مافيه والو تخنزر فيا وخويا كي يتخنزر فيا خلاص نموت لحت يدي نحيتلو الكود يديا يرجفو بقا يشوف معايا حليتهولو بقا يشوف معاه قالي تاع من نميرو هذا وراهولي بقيت نشوف معاه قتلو تاع سارة قالي والله سكت قالي نعيطلها ونشوف عيطلو لقاه مغلوق قالي اهدري تاع من هذا قتلو تاع سارة دخل مومن بقا يشوف معانا قالنا واش كاين هنا قال لمومن روح جيب سارة ورواح قالو علاه قالو جيبها برك وما تقولها والو قتلو واش دخلها هي قالي بلعي قال لمومن اجري جيبها جي راح خويا شفت مع ماما طاحت قعدت فلرض وتشوف معايا وتضرب في وجها وهما في زوج يشوفو معايا حسيتهم راح يفترسوني انا حتى دخت من الخلعة بزاف عييت نسيطر على روحي وكرشي دم وراح نتقيا واقفة و مهبطة راسي وساكتة نشوف مع الكرلاج في لحظة ندمت ندامة كبيرة قلت ياريت ماحكمتوش ياريت قفلت الباب ياريت وياريت قالي خويا تاع من نميرو قتلو تاع سارة قالي مزلتي برك تقولي سارة سكت سمعت الباب تحل ياريت تفيق سارة درت امل كبير في سارة تنقضني دخلت سارة بقيت تشوف معانا دار عندها خويا قالها واش من بيس عندك قاتلو أوريدو قالها عندك فرد واحد عيات تهدر ومافهمت والو قالها عندك فرد واحد قاتلو ايه واحد برك ورالها نميرو قالها ملا هذا ماشي تاعك كي شافت تلفون ونميرو باه فاقت مالقات ماتهدر حسيتها خافت كثر مني قالها تاعك ولالا قاتلو ايه تاعي قالها سارة علبالي ماشي تاعك قاتلو تاعي قالها نعيط لخوك يجي هز تلفون راح يعيطلو قالها اخر مرة هذا تاعك ولا خاطي قتلو لالا قالها تعرفيه قاتلو لالا جامي مافقتش كيفاه ضربني خويا لكبير بعدت عليه قالي لاه تكذبي وتقولي تاع سارة سكت طاح فيا ضرب جات ماما تفكني وسارة ماخلاهاش خويا الوسطاني ديجا مارانيش خايفة من خويا لكبير قد ما خايفة منو هذا علبالي جاية دالتو هو جا بعدو عليا وحكمني من شعري ودخلني لشمبرة جات ماما تدخل خبط الباب في وجهم وغلق الباب قالي نسقسيك وجاوبي علبالي تلفون ماشي تاعك اهدري منين جبتيه شكون عطاهولك قتلو تاعي وشراتهولي ماما قالي نجاة شوفي اهدري صح وانا راح نعرف نعرف وانا مانيش حاب نضربك خاطر لوكان نضربك ندير فيك حاجة قولي شكون عطالك هذا تلفون بقيت ساكتة انا من بكري مدية طريحة ومستحيل نستعرف علبالي راح تكبر الحالة برك وراح يوصل عندو و خويا هذا يقتل وما يسالش وهذاك زاكي حتى هو ماشي ساهل مراحش يسكت راح تكبر بيناتهم وراح نحصل خويا برك ممبعد كاش مايصرا لخويا من تحت راسي ماما برك تقتلني تقولي لاه تهدري ووصلتي خوك للموت قالي عطاهولك مول نميرو هذا ياك ديجا شكون مول نميرو هذا بقيت ساكتة قالي اهدري هذا شكون قتلو ماعلباليش مانعرفوش قالي كيفاه ماتعرفيهش وهو ديما يعيطلك ديجا ماعندكش بزاف ملي عيطتيلو بقيت ساكتة بدأ يتنارفا ويرجف ويعيط قالي اهدري شكون هذا بقيت ساكتة وطار عندي وطاح عليا ضرب بالدبازي والكوتبيات وانا نعيط على ماما وهو يضرب ضربني برجلو لوجهي فمي وخشمي ڨاع يسيل بدم حتى بديت ندوخ حتى الشوفة مانشوفش مليح قريب تغاشيت حكمني من شعري وفتح الباب ويجر للكوزينة طاحت عليا ماما وسارة شفت خرج بالموس قالها هذه تتذبح ما تبقاش عندي طفلة سير كاش مادارت ماحبتش تهدر من هنا ديت خويا عدو بقاو يحكمو فيه خاوتي في زوج وما قدرلوش يطير وحدو يحوس يذبحني وخلاص دخل بابا شافني جا يجري وقف قدامو قالو واش كاين هنا قالو شوف بنتك القحبة تضل في دار قاعدة هازة تلفون تاع 4 ملاين وماعرف شكون هذا لي تهدر معاه ماحبتش تقر قتلكم زوجوها هذه راح تجيبلنا العار لدار تخلينا فضيحة وسط ناس القحبة الكلبة ماعرف مع من تخرج ورانا دار عند مومن وانت يا الطحان كيفاه ختك هازة تلفون تاع 4 ملاين وتبات تحكي وانت لاخبر انت راجل انت خليتك راجل هنا ولا قحبة قالو سمعتها تهدر ورحت عندها و بابا كذبني قال لماما كلش من تحت راسك انتي خليتيها على هواها هي تضل تع** برا وكي نعيطلك تقولي راهي قاعدة راهي راقدة قتلكم زوجو ر** هذه راح ديرلنا العار بصح والله اليوم ماتزيدي فيها دقيقة انا لي راح طحني مزال مزادش وهز الموس وجا حكمو بابا قالو واش دخلك قالو واشنووووو قالو واش دخلك بنتك ولا بنتي روح دبر على بنتك مادبرش على بنتي انا عندي علم ببنتي واذا غلطت انا لي نضربها ونحاسبها ماشي انت بقا يشوف قالو بابا واش راك تهدر قالو كيما سمعت دبر على بنتك ومرتك ماشي بنتي برا عليا جامي توقعت بابا يوقف معايا الاب سند في وقت الشدة يوقف معاك حتى كي تغلطي قالو الموس تهزولها نهار تولي تصرف عليها هذا الموس هزو في وجه مرتك وبنتك ماشي بنتي برا عليا عندي خاوتي مالغري واعرين يشلفطو بصح كي يوصلو عند بابا تحبس وعارتهم قالو بابا واش راك تهدر راني نقولك بنتك لقيت عندها تلفون تاع 4 ملاين وراهي تهدر مع واحد منين جاوها هي دراهم كون ماشي تخرج وتتلاقا بيه وعطاهولها هو قالو واش دخلك بنتي ماشي بنتك قالو بنتك هذه راهي ختي وتمشي باسمنا ڨاع تحوس نديرو لعجار ونمشو فالطريق من تحت راسها بصح والله ماتزيد دقيقة نباصي عليها ولا مانيش راح بعد عليا بابا وهز الموس راح يضربني بيه دارت ماما عندو حكماتو تحاول فيه ويحكمو بابا من تريكو تاعو عطاه واحد الكف قدامنا قالو برا عليا من داري ماك وليدي ماني باباك طيش الموس قالو معليش ضربتني على جالها بصح اشفى كون ماديرلكش فضيحة وتخليك تعيا تهز راسك ملا ضرب تلفون للحيط وراح خبط الباب جا خويا لكبير عندي قالو تهدر معاها كلمة تتحاوز من داري قالو واش راك دير انت تزيد دافع عليها قالو انا لي نحاسبها ماشي انتما يالله امشي لدارك خرج هو ثاني خبط الباب نوضتني سارة عييت نوض كلش فيا مدڨدق بقيت هكذاك مرمية فلرض جات ماما عاونتها نوضوني لشمبرة حطوني على الكانابي رقدت جابت سارة لنجات بقات تمسح في وجهي ماما غلقت الباب وجات قاتلي عجبك الحال هكذا خليتي داري الله لا يتربحك على من درتي الشي هذا ڨاع اه على جال من قالت لسارة تعرفيه قاتلها ايه قاتلها عيطيلو تشوفي نهدر معاه قاتلها واش تقوليلو قاتلها عيطي برك انا غير نازع صوتي مكاش ڨاع ماقدرش ڨاع نهدر حتى التنفس مانيش نتنفس مليح عيطتلو لقاتو مغلوق قاتلي شفتي مغلوق هذا لي درتي على جالو ڨاع هكذا غلق تلفون عليك وراح خليتي داري الله لا يتربحك انتي وياه دخل بابا شاف معايا نظرة ما ننسهاش طول حياتي بزق عليا وخرج ياريتو ذبحني ولا نظرة الازدراء في عينو ياريتو قتلني ولا سكوت هذا تاعو كرهت روحي عفت روحي كرهت زاكي الله يلعن النهار لي شفت فيه زاكي الله يلعنو قاتلي ماما الله ينشف ريڨك انتي وياه كيما نشفتو ريڨي وخرجت قاتلي سارة نجاة سمحيلي والله ماعولت يصرا هكذا قتلها سارة روحي نحي لابيس كسريها وارمي تلفوني راحت خرجت حسيت روحي نلقف جات سارة قاتلي خلاص قتلها نوضي طفي الضو حابة نرقد راحت طفاتو وجات رقدت قاتلي نجاة مراحش تقوليلي راهي صرات ديڨا من تحت راسو قتلك يا نجاة هذا السيد راح يجيبلك غير المشاكل عييت فيك بقيت ساكتة هي تهدر وانا ندامة كلاتني ماكلة بصح ماهمنيش كي ضربني خويا وكي هزلي الموس قد ماقتلتني نظرة بابا عفت روحي حسيت روحي رخيسة مانسواش كون غير ضربني برد قلبو فيا وزيد دافع عليا وليت نشوف في روحي اوسخ إنسانة على وجه الأرض سارة بقات تهدر حتى بدأ صوتها يروح رقدت ، صباح فطنت كلش فيا مكسر نسمع في ماما تهدر مع سارة تقولها مزال تلفون مسكر قاتلها ايه حابة نوض بصح ماقدرتش جسمي مكسر حسيت بمسلاني تكسر ماقدرتش نوض جيت فالفراش ونبكي دخلت عليا سارة نوضتني جات قعدت قدامي قاتلي سارة تلفون زاكي من البارح وهو مغلوق ماشي عيطلو خوك وهرب منو وخلاك وحدك هي قاتلي هكذا وانا كرهتو كره أعمى ندمت على لحظة لي شفتو فيها دخلت ماما قاتلي شفتي لخليتي داري على جالي هرب وخلاك وحدك بقيت غير نسمع فيها هي تعاير فيا تقولي في واحد لكلام خلاتني نتمنى الموت ولا نسمع هذا الكلام جبت يومين وانا فالشمبرة مانتحركش ڨاع من بلاصتي لا ماكلة لا شراب غير نبكي وندامة كلاتني من داخل ونبقى غير نخمم كون دريت هكذا ومادرتش هكذا دارنا من تحت راسي ولات ماشي دار واحد مايقدر يقعد فيها بابا يدخل دقيقة تحطلو ماما ياكل يقلب الماعين ويخرج مالغري بابا ماشي عوايدو يكسر ولا يقلب على الحوايج على ماما خويا كيفكيف يدخل يسب يسب ويخرج خويا لكبير كيفكيف يبقا يسب فيا ويخرج ماما جي تشبعني سبان وعياط وحسسوني ارخس وحدة حطمولي نفسيتي غير سارة جي تونسني جات عندي قاتلي لاه ماتقبليش بنبيل رآه يحوس يجي يخطبك غير تتزوجي تولي داركم كيما كانت ويرجعو معاك كيما كنتي بقات تقنع فيا حتى قنعت قتلها ايه نقبل ممكن هذا احسن حل قاتلي كي يعيط صاحبي نمعنيلو خاطر ديما يقولي نبيل يسقسي على نجاة قتلو ماعندهاش تلفون قالي قوليلها قالك اذا تحبي نبعثلك تلفون اليوم كي يسقسيني نقولو قاتلك اذا يحبني يقصدني لدار ضك هو يوصلهالو اذا خطبك اقبلي ،فاتت سمانة جبتها غير فراش هذاك ماعيطش ڨاع كل يوم نتأكد بلي ممكن عيطلو خويا وهرب خلاني وحدي وكرهي غير يزيد قلت نوض ندوش لصقت فالفراش ماجيت نوض حسيت عظامي ڨاع مفتتين عييت نلم روحي ديت حوايجي ورحت دوشت وخرجت نشفت شعري ودخلت للكوزنية لقيت بابا شافني عيط عليا برا عليا تزيدي توريلي وجهك نقتلك بقيت نشوف معاه قالي براااا درت خرجت نبكي زدت فت لصالو لقيت مومن قالي اخرجي عليا ماكي ختي ماني خوك خرجت حطمولي نفسيتي للحظة خممت نقتل روحي ونتهنى من هذا المعاملة وهذا الذل دخلت لشمبرتي وغلقت الباب جيت ثم وقعدت ،لعشية جات سارة عندي قاتلي هاكي اهدري مع نبيل هدرت معاه قالي نجاة راكي قابلة نجي نخطبك قتلو ايه حسيتو صح فرح قالي غير يروح بابا يهدر مع باباك قتلو نشالله قتلو هيا صحا قالي وين رايحة اقعدي نهدرو ونتفاهمو عييت نسمع صوتو هو يهدر وانا قلبي راح يخرج من هدرتو حتى عفتو وليت نبعد تلفون على وذني ونخليه يهدر وحدو حملت حملت وكوبيت عليه وليت نكبي قاتلي واشبيك قتلو كيفاه راح تتزوج براجل ومانيش حتى طايقة نسمع صوتو قاتلي نجاة والله نبيل يحبك وليد حلال وناويك قتلو علبالي بصح ماطقتوش قاتلي انتي ماشي تحبي زاكي سكت قاتلي واشبيك انتي تخلي لي ناويك وتبعي في زاكي حنا نسا لاه هكذا نخليو لي يحبنا ونتبعو في لي يجرجرنا ويعذبنا قتلها سارة زاكي ماشي متزوج قاتلي شكون قالك قتلها هو قالي قاتلي ايه ومابعد وينو ضك لاه هرب خلاك قتلها شكون هرب تلفون مغلوق قبل ما يصرا هذاك المشكل قاتلي ايه وامبعد راح يبقا غير مغلوق متأكدة بلي عيطلو خوك وغلق عليه تلفون قتلها وكي يحلو واش قاتلي يلقالك حل قتلها واش من حل قاتلي يجي خطبك قتلها لاه يجي يخطبني مجبور بيا قاتلي المشكل صرا غير من تحت راسو هو وهو لي يلقاك حل قتلها سارة بركاي من دراما تاعك عليا لاه يجي يخطبني حكموني معاه ولا كاش ما دارلي قاتلي بصح هو لي جابلك تلفون ولقاو نميرو تاعو عندك قتلها وامبعد انا لي رخيسة كنت نهدر معاه قاتلي حتى يماك قاتلي عيطيلو باه تقولو ارواح تخطبها قتلها سارة بلاكي ديريها راح ترخسيني كثر ماني رخيسة خليني على الأقل بقيمتي قدامو سكتت
ESTÁ A LER
قيود زاكي
Romanceنجاة بطلة القصة عمرها 23 من عائلة بسيطة ومتوسطة نسبيا زاكي بطل القصة في 40 من عمره رجل غامض من عائلة كبيرة ذو وضع مادي ممتاز هل ياتري يستطيع كل من زاكي ونجاة لتجاوز كل الفروفات التي بينهما والنجاة بعلاقتها ام ان النوع من هذه العلاقات دائما تنتهي...
