قيود زاكي

الجزء 4

ممنوع النقل
#قيود_زاكي
الجزء 4
فاتت يامات شريت بيس جديدة بصح كل يوم نستنا يجي يطبطب الباب علينا وليت نخاف منو ، على 1 تاع ليل كنا راقدين ونسمع فالباب يطبطب راح يتكسر نضت لقيت بابا خرج يجري فتح دخل الباب دخل خويا لكبير هو يلهج قالو وينو مومن قالو هنا راقد هو رجعتلو روح قالو  وليد جارنا  لي لتحت و صاحبو تضاربو فالڨراجات لي قدامنا واقيلا واحد منهم مات حسبت مومن كان ساهر معاهم خرج مومن قالنا واش كاين قالو وقتاه دخلت انت قالو ملي تعشيت ماخرجت علاه قالو صحابك زوج تضاربو وماعرف شكون مات جا يجري راح يخرج حكمو قالو وين رايح واش دخلك يحكموك ثم يدوك معاهم قالو وانا واش دخلني راح نروح نشوفوهم قالو اقعد هنا راك صاحبهم ديجا لا ماجاش داوك يحققو معاه ماما طاحت ثما تبكي قاتلو قتلك اخطيهم راح يدو شبابك قالو بابا وهو لاه كان راقد واش دخلو فيهم لاه سايبة هنا قالو بابا هذه دولة مكاش لعب معاهم اذا اظطرو حتى يما يدوها لتحقيق مايهمهم حتى واحد غير يشكو في حاجة دنيا يقلبوها على رأسهم حنا نهدرو ونسمع الحس لتحت غلق خويا الباب قالنا رآهم جاو هو يهدر وانا نتفكر في زاكي يا يما والله يخوف شوية طبطب الباب علينا راح خويا فتح الباب قالي ادخلي انت دخلت الكوزنية سمعت واحد يهدر لاح سلام رجعلهم خويا قالو كاين زوج هنا من حومتكم واحد منهم يسكن التحت رآه ضرب صاحبو وهرب ماشفتوش واقيلا جا هنا قالو اواه ما فات حتى واحد هنا قالو معليش سمحولنا على الازعاج قالو خويا معليش وغلق الباب قال لمومن من اليوم تزيد تسهر برا نحيك انا خرجت رحت لصالو باه نطل كاش  ما نشوف خاطر الڨراجات مقابلين تاقة تاع صالو شفت غير دعوة مسركلة ما بينت والو ، لغدوا وقت الظهر طبطب الباب راح خويا فتح الباب لقيناهم لابوليس ماشي هذوك لي موالفين يجو عندنا لاحو سلام قالولو انت مومن قالهم ايه قالو هيا معانا قالهم علاه قالولو عندنا  راح نسقسيوك عط خرجت ماما تجري قاتلهم وين تديو وليدي قالولها الحاجة ضك نرجعوهم بقات لاصقة فيه قالولوها مايطولش ضك نرجعوه داوه وراحو ماما طاحت عطيتلها دوا تاعها وديتها لشمبرة عيطت لبابا قتلو قالي ضك نشوف وليت قلت نعيط لزاكي هو علبالو رحت لشمبرة غلقت الباب هزيت تلفون تابيت نميرو خاطر حفظاتو عيطت ممبعد عاودت رجعت في رايي قلت واش راني ندير انا تهنيت منو بسيف وضك راح نرجعو حطيت تلفون وخرجت قعدت مع ماما قتلها ماما راني خبرت بابا ضك يروحو عندو ويشوفوه سمعت تلفون يصوني قتلها بلاك بابا رحت هزيتو لقيتو زاكي وليت نضرب في خدي ياخاه هذا بحال صونا عندو كيفاه ندير ضك وليت كوبيت عليه زاد عاود عيط عاودت كوبيت بعثلي مساج اقسم بالله وماتهزيش غير ضك نجي لداركم هزي ازربي هذا كفاه عرفني انا  ندمت ندمت واش داني نخمم نعيطلو واش يفكني منو عيطلي هزيت قلت الو عيط عليا قالي لاه تكوبي عليا اه سكت سمعتو يستغفر قالي انعم تفضلي لاه عيطتي قتلو سامحني غلطت باي قالي تكوبي تشوفي واش ندير فيك سكت قالي اهدري لاه عيطتي كاش ما تحتاجي قتلو والو قالي نجاة قولي واش تحتاجي قتلو والو قالي نجاة هيا قولي واش تحتاج كاش ما خصك قتلو خويا داوه قالي شكون داه قتلو البارح تقابضو زوج صحابو ضربو بعضاهم واحد منهم هرب وقبيل جا داوه خويا مالغري مكاش معاهم قالي شكون لي داوه
قتلو ماعرف قالي جماعتنا قتلو لالا ماشي هذوك لي يلبسو كيما تلبس انت قالي جاوه لدار قتلو ايه قالي ملا  لابوليس ملا قتلو ماعرف قالي  كيفاه ماعرف ياك تعرفاي تقراي تلقاي الكومبا تاعهم مكتوبة فيها لابوليس قتلو ايه هذوك قالي ضك مانيش فالخدمة ضك نعيط نسقسي ونقولك قتلو ازرب تعيش قالي ماتخافيش غير  يقولي ما تخافيش منخافش نطمن ديما يعطيني الامان قتلو  اك كوبا شوية عاودلي قالي مكان والو كعاد صاحبهم برك سقساوه كاش ما بيناتهم برك ضك يطلقوه قتلو صح قالي لا نكذب ضحكت قتلو تعيش قالي راني مانسيتلكش جاست لي درتي معايا قتلو هيا نخليك سامحني قالي اهربي اهربي ضحكت وكوبيت عقلي طار ماعرف لاه نفرح كي نهدر معاه حطيت تلفون ورحت عند ماما قتلها رآهم قالولي بلي مكان والو ضك شوية يطلقوه ،ساعة طبطب الباب رحت نجري فتحت الباب دخل خويا وبابا دخلو لصالو عند ماما ناضت ماما عند خويا تحظن فيه وتبكي قالها واشبيك كل ما نخرج ديري ورايا هكذا قعد هو وياها قاتلو واش قالولك قالها والو سقساوني برك على صحابي وكاش ما بيناتهم وانت وين كنت هذا مكان قاتلو ماليوم تقطع علاقتك بيهم ماشي كل ليلة تركبلي الخلعة ، جاو خاوتي في زوج وخواتاتي غير شفت الوسطاني رحت نجري فاصيت النميرو درت الكود وفاصيت الفايس خويا لكبير والصغير مايحوسش عليا ماعلبالهمش بلي درت فايس وماحوسوش عندي ولا ماعنديش بصح كون يسمعو يضربوني أما خويا الوسطاني ينشنش على كلش كل صغيرة وكبيرة يجيبها غير يحضر هو نصفي تلفون ڨاع خاطر ساعات يقولي وينو تلفونك ويفركتو ويقولي حذاري نسمع عندك فايس ولا انستا ،درت لعشا تعشينا بقاو سهرانين ل 12 وراحو روحو ،رحت لشامبرتي نحيت الكود وعدلت روحي راح نرقد شفت تلفون شعل الضو كي يكونو بابا وخاوتي ندير صيلونص كي يروحو هما ندير صونيري نورمال هزيتو لقيتو زاكي نضت غلقت الباب وجيت نهز ولا ما نهزش وليت كوبيت كون يسمعني بابا ولا خويا عاود عيط كوبيت بعثلي مساج هذا وين كملتي الهدرة واش من هدرة مافهمتش زاد عيطلي وليت ريبونديت عليه قتلو وي قالي هذا وين خلصتي قتلو واش خلصت قالي الهدرة مع حنونك قتلو واش من هدرة واش من حنوني قالي ااا ضك وليتي ماتعرفيش حنونك قتلو اقسم بالله ماهدرت مافهمتش لاه ديما نبررلو باه يصدقني قالي ولاه درتي الكود قتلو درتو خاطر خاوتي كانو هنا وخفت تعيطلي قالي من اليوم مانعيطلكش حتى تبيبيلي انتي قتلو علاه واش بيناتنا حتى تعيطلي قالي نضل نعاودلك قلقني قتلو اسمع انت واش تحوس عندي قالي نحوس عليك نسيت روحي و عيطت عليه قتلو روح اخطيني ماتزيديش تعيطلي مافقتش حتى مومن طبطب عليا الباب كسرو وعيط حلي الباب من الخلعة طاحلي تلفون قالي حليييي اليوم نقتلك زربت هزيتو فاصيت نميرو سمعت ماما تعيط تقولو واشبيك قالها مع من تهدر قاتلو مع من راح تهدر فنص ليل خبط عليا الباب سمعت بابا يهدر قالو واشبيك قالو نجاة معرف مع من تهدر فتلفون طبطب عليا الباب نجاة حلي انا مت خفت غير يزيد يعاود وليت نضت فتحت الباب طار عندي قالي مع من تهدري طبعتو قتلو بعد عليا مع من راح نهدر قال لبابا والله سمعتها تهدر شاف معايا بابا قتلو بابا هاو تلفون اديه وشوفو اذا هدرت كنت غير نتفرج المسلسل في اليوتوب سمع صوت قالي هاتي تلفونك عطيتهولي وقلبي راح يطيح بين رجليا بقا يفركت فيه قالو خويا والله سمعتها تهدر وراح يطير عندي يضربني قتلو واشبيك انت مع من راح نهدر نحا تلفون الباب بقا يفركت مالقا والو مزية نحيت الفايس من قبل ومكاش حتى فالدوصي لازم حتى نتيليشارجي قالي والله كنتي تهدري عيط عليه بابا قالو خلاص مع من راح تهدر هاو تلفون في يدك مافيه والو واقيلا كي سمعت حس المسلسل حسبتها تهدر قالو لاه مانميزش راني نقولك سمعتها تهدر قالو امشي ترقد امشي شاف معايا قالي تلفون والله ماتديه قتلو هات تلفون واش دير بيه داه وراح قتلو بابا لاه يعني داه وراح قالي ضك رجعهولك غدوا وراح خرج جات عندي ماما قرصتني على ذراعي قاتلي واشبيك تهدري وباباك وخوك هنا قتلها ماهدرتش قاتلي بلعي سمعتك تهدري جيت نقولك لقيتو سبقني اليوم راهي فاتت الخطرة الجاية تشوفي مشات وزادت دارت قاتلي لي يحبك يقصدك لدار ماشي يجيب بك ليل وزواج مكتوب والراجل يجيبو ربي ماشي الهدرة فالتلفون والزنق  ديريها مليح في راسك  وراحت خلاتني مصدومة مالقيت ما نقول عطاتني نصيحة صحيحة بصح ماشي في بلاصتها انا ماني ميتة على زواج ما نضل فالزنق باه نتزوج كون عيني نتزوج راني قبلت بنبيل وعلى سيرة نبيل مانعرف وين راح اليامات هذو ماعيطليش رحت رقدت بقيت نخمم حتى طرت من بلاصتي قلت كون يعيط زاكي لخويا لازم نهدر معاه كيفاه ندير رحت جبت تلفون ماما هي عندها غير سامبل شفت لينيتي لقيتها معندهاش وليت بعثت مساج لسارة عاودتلي هي يديرلها صاحبها ديما تاع شهر شوية عاودتلي علبالي كانت تهدر معاه حكيتلها قاتلي ياخاه عليك قتلك بركاي من الهدرة معاه قتلها سارة نعطيك نميرو تاعو وبعثيلو مساج باه مايعيطش عندي تلفون عند مومن شبعتني سبان قاتلي اصبري وين توصلي مع زاكي هذا قتلها روحي برك كوبات شوية بعثتلي قاتلي خلاص راني بعثتلو ،
لغدوا وقت لغدا حنا نتغدوا سارة طبطبت الباب نعرف طبطيبها نضت فتحت عليها الباب دخلت بقات تضرب فيا قتلها واشبيك قاتلي البياري تاعك عيط قتلها شكون هذا قاتلي زاكي شكون قتلها ولاه يعيطلك وين يعرف نميروك قاتلي يا حمارة ماشي بعثتلو مساج البارح عيطلنا بابا قالنا ارواح هنا قاتلي نروحو لشمبرة يحوس يهدر معاك قتلها انا لاه قاتلي ماعرف عليك امشي اهدري معاه قتلها بابا هنا زاد عيطلنا بابا ارواحو هنا واش راكم توتوتو رحنا دخلنا قالنا واش بيكم قاعدين ثم قعدنا حطيت لسارة تاكل تقعد تقعد وتشوف معايا ديرلي براسها هيا جبدت تلفونها من الجيب تحت طابلة وراتهولي بلي رآه يعيط وليت حكمتو ولحتو في جيبي وخرجت قلت لسارة نوض نجيبلك حوايجك قاتلي ايه روحي زريت نضت رحت غلقت الباب وهزيت عليه قتلو الو قالي وي البكاية تاعي كي قالهالي قلبي رفرف قتلو وي واشنو قالي لباس قتلو لباس قالي ماصرالك والو البارح قتلو لالا سترني ربي قالي ضربوك قتلو لالا قالي ايه الحمد لله احكيلي واش صرا حكيتلو قالي وانتي لاه تعيطي قتلو انت لي قلقتني قالي وعلاه تقلقي سكت قالي نجاة قتلو وي قالي كيفاه ضك ماعندكش تلفون قتلو لالا قالي معليش قتلو زاكي ماتزيديش تعيط قالي ايه علبالي سكت قالي ماعندكش وين تحلي فايس قتلو لالا قالي معليش قتلو زاكي تعيش ماتزيدش تعيطلي والله راح ديرلي غير مشكل قالي علاه تهربي مني هكذا سكت قالي قولي نجاة قتلو نخاف منك قالي وعلاه تخافي مني سكت قالي نجاة والله ما تخافي مني سكت ممبعد قتلو تعيش بعد عليا وماتزيدش تعيطلي لا عندي لا عند بنت عمي اك وكوبيت عليه راني غير نزيد نحصل معاه كل ما قربت منو وعطيتو مجال كل ما زدت حصلت معاه ، جات سارة عطيتولها قتلها راني قتلو مايزيدش يعيطلك قاتلي نجاة والله يا هذا زاكي غير راح يصرالك مشكل كبير من تحت راسو سكت، لغدوا لعشية انا كنت قاعدة ندير فلعشا ولباب طبطب عرفتو طبطيب سارة واقيلا زاد عيطلها زاكي هذا اذا ما سباتوش هي تخاف من صاحبها تموت  راحت ماما حلت سمعت صوتها تقولها وراهي نجاة قاتلها راهي دير فلعشا دخلت عليا هي وماما شفتها تتخنزر فيا غير خرجت ماما وتتلاح فيا تضرب قتلها واشبيك قاتلي حابة تباصيني قتلها لاه قاتلي امشي لشمبرة دخلت معاها لشمبرة غلقت الباب جبدتلي باطة تاع تلفون كبير عطاتهولي قتلها تاع من هذا قاتلي في ميزك تاع من قتلها تاع من قاتلي تاع زاكي قتلها وانتي وين لقيتيه قاتلي بعثهولي مع ختي صغيرة كان هنا يدور كي شافها دخلت لحقها وسقساها عليك قاتلو بلي بنت عمي لاحلها تلفون في الكارطابال قالها اديه لختك تمدو لنجاة بقيت غير نشوف قاتلي نجاة والله هذا راح يباصينا انا وياك قتلها وانا لاه قتلو زعما ماتزيدش تعيطلي سمعت ماما تعيط زربت خبيتو خرجنا انا وياه رحنا للكوزينة قاتلي نجاة تعيشي اخطيك منو والله راح تحصلي معاه برك قتلها والله قتلو خطيني بصح هو يعيط قاتلي نجاة الراجل رآه كبير عليك باين متزوج مكلاه يطيحك فيه قتلو ايه كبير عمرو 40 قاتلي اييي ياخاه باباك وهذا واشبيه مايحشمش يشوف مع وحدة قد بنتو قتلها وين بنتو بيناتنا 17 سنة قاتلي وتزيدي تحلي في فمك واشبيك انتي هو وين وانتي وين انتي بنت العشرين وهو فالربعينات قتلها نورمال قاتلي نجاة ما تقوليليش طحتي فيه قتلها ماعرف قاتلي نجاة راجل 90٪ متزوج وبولادو اخطيك قتلها وين علبالك بلي متزوج قاتلي باين رآه فالربعين ماعرف لاه زعفت قاتلي متزوج قاتلي نجاة نحيه من راسك فهمتي وشوفي كيفاه ترجعيلو تلفون هذا يتحكم عليك تموتي قتلها ايه خرجت شفت ماما تصلي قتلها انتي عسي منا وانا نروح نهدر معاه قاتلي اجري رحت غلقت الباب جبدتو هذا كفاه نخبيه في صدري قد تابلات شعلتو لقيت ديجا فيه لابيس عيطتلو ثم ثم كوبا عليا وعاودلي قتلو الو قالي وي البكاية تاعي غير قالي هكذا فرفر قلبي  فرحت وضحكت ماعلباليش لاه يصرالي هكذا معاه  قتلو علاه عليك هكذا حابني نموت قالي بعيد الشر على البكاية تاعي قتلو تعيش ارواح ديه قالي لاه رجعتي تلفونك قتلو لالا قالي وكفاه ملا قتلو والله يحكموه عليا يقتلوني قالي مايحكموش عليك فالنهار خبيه حليه غير فليل أهدري معايا كلمة ولا زوج وكوبي واذا تحبي هاتي نبدلهولك نجيبلك واحد صغير قتلو ياخاه والله غير راح نموت من وراك قالي واش نديرلك حاب نهدر معاك قتلو وانا مانيش حابة نهدر معاك تعيش غدوا ضك نبعثهولك مع بنت عمي اديه قالي احكميه كي ترجعي تلفونك نجي نديه قتلو لالا غدوا جي تديه قالي والله مانجي اذا تحبي نبدلهولك نجي قتلو واشبيك دير هكذا خاف عليا شوية قالي راني قتلك حليه غير فليل سمعيني صوتك وكوبي بقيت ساكتة قالي وي قتلو علاه دير هكذا قالي راني قتلك علاه قتلو والله ما يجوز قالي علبالي حرام بصح اصبري شوية معايا مافهمتش علواه نصبر سكت سمعت ماما تعيط كوبيت عليه ودرتلو وضع طيران باه ما يصونيش خبيتو تحت سرير الباط قطعتو وخرجت طيشتو فلابوبال قاتلي واش كنتي ديري قتلها والو رحت لكوزينة قاتلي سارة واش وقتاه ترجعيه قتلها ماحبش قاتلي ياخاه عليك راح تحكميه قتلها واش ندير ماحبش راحت لطابلة ودارت خط بصبعها قاتلي اشفاي على هذه العلامة راح يصرالك  مشكل كبير من تلفون هذا وزاكي هذا تولي تبكي باه تخلصي روحك منو وخرجت هدرتها ڨاع صح