Conrad Series 1: The Servant

Kabanata 21

Doon ko nakitang may kasama siyang isa pang kasambahay na kasing edad lang din niya siguro. Sinenyasan ko silang ipatong na lang sa kama, akala ko ay si Mersita ang magdadala mukhang inutusan siya ni Mamá. Hindi ko rin kasi masiyadong nakakasama na si Mersita lalo't nandito na si Mamá.

"Bakit ba kasi tayo pa ang inutusan nito, hindi naman na natin siya amo, wala ba siyang kamay, laki-laki ng katawan." Narinig kong bulong ng kasama ni Anna.

Nilingon ko kaagad sila, naningkit ang aking mata dahil malinaw na malinaw iyon sa akin.

Kaagad kong nakita ang takot sa mukha ni Anna, siniko niya ang kasamang babae, palibhasa ay nasubukan niya ang galit ko noon.

Wala akong planong magtaray, pagod ako makipag-away.

"Anong pangalan mo?" kalmadong tanong ko sa nagsalita.

Napakamot siya sa batok. "K-Keisha po."

"Sa susunod lakasan mo ang boses mo, medyo mahina ang pandinig ko. Siguraduhin mong maririnig ko," kalmadong sabi ko.

Kaagad siyang napayuko. "S-Sorry po."

"Ayan ikaw kasi," narinig kong bulong ni Anna bago hinawakan sa braso ang kasama niya. "A-Ah, Senyora. Aalis na po kami." Nagtutulakan at nagmamadali pa silang lumabas ng kwarto.

Napailing ako bago ayusin ang aking mga gamit sa ibabaw ng kama, balak kong ayusin sa cabinet iyon, walang walk-in closet ang kwartong ito katulad sa dati kong kwarto.

Nakita ko sa aking bag ang cellphone, umupo ako sa kama upang buksan iyon.

I smiled when I remembered that they took down all my photos on social media and my accounts were deleted too. I think they're planning to make new ones for the new heiress.

Humugot muna ako ng hininga, sinubukan kong tawagan muli si Elias pero katulad din kahapon, nag-ring naman iyon bago namatay.

"P-Please, Elias. I need someone to talk, mababaliw na ako," bulong ko.

Nang sunod kong tawag ay tuluyan ng nakapatay ang kaniyang phone, ni ring ay wala na.

Bumagsak ang aking balikat at napatulala ako habang nakatingin sa numero niya sa contact ko.

'Bestfriend'

Siguro ay nakarating na sa pamilya nila ang balita, baka alam na nila ang tungkol dito. Mahigpit ang nga Lavelle ngunit paniguradong hindi naman ito ililihim nila Papá lalo't para ito sa tigapagmana nila, baka alam na nilang hindi ako totoong anak ng mga Lavelle kaya naputol na rin ang pagkakaibigan namin ni Elias.

"Elias, ba't naman p-pati ikaw," I whispered. Akala ko iba siya, akala ko mananatili siya.

Maiintindihan ko pa sila Mamá kasi totoong kadugo nila si Adilyn, talagang iyon ang pipiliin nila kahit mas matagal akong kasama. Si Gavril, mas matagal at madami silang pinagsamahan kaysa sa akin na halos isang buwan lang, hindi ako umaasang ako ang pipiliin niya pero si Elias, kaibigan ko siya e, alam niyang siya lang ang nag-iisa kong lalapitan pero tumalikod din siya.

My chest hurts, but there are no tears anymore.

Imbes na kulitin pa siya ay pinatay ko na lang ang phone ko saka inayos ang aking mga gamit.

Pilit kong tinatandaan ang mga tinuro ni Mersita kung paano magtupi ng damit. She thought I didn't listen to her rant and lesson, but I always did. I always listened and practiced it when I'm alone.

Nang matapos ko iyon iayos sa cabinet ay isusunod ko sana ang personal na gamit ko sa banyo pero napukaw ang atensyon ko sa ingay galing sa labas ng aking bintana.