ရာဇဝင်ထဲက ကျွန်တော့်ချစ်သူ(Complete)

Extra-3

ရီဟွား နောက်သို့ ခြေလှမ်းအနည်းငယ်ဆုတ်သွားရသည်။ ရှင်းက ဒီဆွဲကြိုးကို မေ့နေခြင်းက လုံးဝအဓိပ္ပါယ်မရှိပေ။ သူ၏ရှေ့မှ ရှင်းသည် သေချာပေါက် အယောင်ဆောင်ရှင်းပင်။

"မင်းဘယ်သူလဲ"

သူ၏ အမေးကြောင့် ရှင်း အယောင်ဆောင်ထားသူ၏မျက်နှာ ကွက်ခနဲပျက်သွားသော်လည်း ချက်ချင်းပြန်ပြုံးလိုက်လေသည်။

"ကိုယ်လေ...ရှောင်ဟွားရဲ့ ရှင်း"

ရီဟွား သံသယမျက်ဝန်းများဖြင့်ကြည့်ကာ ခေါင်းခါရမ်းပြလိုက်၏။

"ရှင်းက ဒီဆွဲကြိုးကို မေ့တာ လုံးဝ မဖြစ်နိုင်ဘူး...မင်း ဘယ်သူလဲ...ဘာလို့ ငါ့ကို ဒီနေရာ ခေါ်လာတာလဲ"

သူ၏ ရှေ့မှ ပြုံးရယ်နေသော မျက်နှာက တဖြည်းဖြည်းနှင့် ဒေါသထွက်သော မျက်နှာအမူအရာသို့ ပြောင်းလဲသွားသည်။

"မင်း အသက်ကို လိုချင်တဲ့သူ"

ထို့နောက် လျင်မြန်သောအရှိန်ဖြင့် သူ၏ရှေ့ရောက်လာသောကြောင့် ရီဟွားကြောက်လန့်ကာ မျက်လုံးတို့ စုံမှိတ်လိုက်သည်။ သို့သော် တော်တော်ကြာထိ သူ၏ ကိုယ်ပေါ် ဘာမှကျရောက်လာခြင်း မရှိသောကြောင့် ထူးဆန်းကာ မျက်လုံးတို့အား ဖြည်းဖြည်းချင်းဖွင့်ကြည့်လိုက်သည်။

သူ၏ရှေ့တည့်တည့်တွင် ရှင်းအယောင်ဆောင်ထားသူရှိနေပြီး ထိုသူက လက်သည်းရှည်များဖြင့် သူ့အား ကုတ်ခြစ်ရန်ကြိုးစားနေသည်။ သူနှင့်ထိုသူကြား မမြင်ရသောအလွှာပါးတစ်ခုကာရံထားသလို ထိုသူ၏လက်သည်းတို့က သူ့ဆီ မကျရောက်။ ထိုအလွှာပါးကိုသာ ဒေါသထွက်စွာ သည်းကြီးမည်းကြီး ကုတ်ခြစ်နေသည်။

ရီဟွား လွန်စွာအံ့အားသင့်သွားရသည်။ ဘေးပတ်ပတ်လည်အား ကြည့်မိတော့ သူ၏ဘေးတွင် လိပ်ပြာနက်လေးတစ်ကောင်က ရွှေရောင်အလင်းများနှင့် ပျံသန်းနေ၏။ ထိုလိပ်ပြာလေးဆီမှ ရွှေရောင်အလင်းတန်းများက ကာရံထားသောအလွှာပါးဆီသို့ ဦးတည်သွားနေကြသည်။

သူ့အား ထိခိုက်အောင် မလုပ်နိုင်သောကြောင့် အယောင်ဆောင်သူက လွန်စွာ ဒေါသထွက်နေပုံရသည်။ ဘာမှမဖြစ်တော့သောကြောင့် ရီဟွားစိတ်သက်သာရာရသွား၏။