المملوك الآخير

الجزء الخامس

غيرت منى ملابسها ونامت على السرير وهى بتفكر ازاى هتجيب الفلوس عشان تعمل عمليه والدها .. فكرت اد ايه والدها كل حياتها ديماً كان السند ليها خصوصاً بعد موت والدتها وقتها حست انها فقدت الحنان حنان الام الى محدش يقدر يعوضه الام الى اى بنت بتحكيلها عن كل الى بتحس بيه لما البنت بتفقد امها بتحس انها فقدت كل شئ .. لكن فى الحقيقه والدها كان موجود اداها كل الحنان الى يقدر عليه عشان يعوضها عن فقدان والدتها كان ديماً جنبها فى اى موقف ديماً كان بيسمعها لما تحتاج تتكلم وينصحها لما تحتاج النصيحه لما كانت بتحتاج حضنه كان حضنه ديماً مفتوح ليها .. الحقيقه والدها عوضها عن كل شئ و بقى كل شئ بالنسبالها عشان كده هى مش قادره تتخيل حتى انها ممكن يوم تفقده .
نزلت دمعه من عين منى مسحتها بيدها ووجدت نفسها بتفكر فى كلام احمد والذهب .. الموضوع الى كانها فيه احمد مش سهل وخطر ده لو كان صحيح اصلاً لأن ممكن يطلعوا بيجروا ورا وهم .. بس هى مش عارفه ليه هى منجذبه للموضوع يمكن عشان حاسه ببعض الاعجاب تجاه احمد و يمكن عشان حاسه بشغف كبير تجاه الموضوع من يوم ما اشتغلت فى المتحف وكانت منبهره بالآثار و الاحداث التاريخيه والى قالوا احمد مغامره مثيره بالنسبالها هى مش عارفه توافق ولا ترفض غير ان لو قدروا يوصلوا للدهب هتحل مشكلة فلوس العمليه .. فضلت منى تفكر لحد ما غمضت عنيها وراحت فى النوم
*****************************

-خد ولع يا حسن
*يعنى انت كلمتها يا احمد وقولتلها اننا ندور على الدهب
-اه
*والله حاسس انى هروح فى داهيه بسببك
-يا عم متخفش كل حاجه تحت السيطره
*سيطره ..! انت بقالك اد ايه فى الشغل ده عشان تثق فى حد اصلا
-لا منى دى حاجه تانيه
*ايه ليها اجنحه مثلاً
-يا بنى منى دى بونبنايه ملبسايه
*ده انت معجب بقى
-إلا معجب ده انا معجب اوى
*بس دى ممكن تبلغ عننا وتودينا فى داهيه يا فالح
-هتبلغ عننا تقول ايه هو احنا لسه عملنا حاجه
*مش عارف بقى ربنا يستر
-لسه احنا لو منى وافقت هيبقى معانا منى وخالى
*كمان خالك
-ايوه يا بنى خالى ده طيب بس بيحبنى ودماغه حلوه
*دماغه حلوه ليه دماغ ياسمين صبرى
-ايه يلا الخفه دى مش كفايه ان دخلت واحد زيك فى الموضوع مدمن وبيحشش
*مدمن ..! ده على اساس انك بتشرب ليمون بالنعناع يعنى
-يا بنى افهم احنا مينفعش ندور لوحدنا لازم نبقى مجموعه عشان نقدر نساعد بعض .. انت عارف انا اخترتك ليه
*ليه
-عشان السطح بتاعك .. عشان نتجمع فيه
*يعنى انت اخترتني عشان السطح بتاعى بس
-اه .. وكمان لما حكتلك لقيت عينك لمعت فعرفت انك كلب فلوس
*كلب فلوس ..! .. بقولك ايه يا احمد هو انا ينفع اطردك من السطح
-اطردنى يا حسن بس يوم ما هبقى مليونير هشترى البيت بتاعكوا ده وادوس عليكوا
*مهو طول ما انت قلبك اسود كده عمر ما ربنا هيكرمك وهتفضل شحات جربوع
-المهم بقى اكيد واحنا بندور هنحتاج عربيه
*مش كنت بتقول خالك عنده عربيه
-عربية ايه يا بنى دى ميداليه .. دى بتمشى على مزاجها مش على مزاجه وبتعطل أكتر ما بتشتغل
*لا يا عم مش ناقصه غلب .. بص احنا عندنا عربيه ڤان بتستعملها لما بنجيب بضاعه للمحل ممكن نستعملها
-دى الميكروباص الصغير السبعه راكب
*أيوه
-بس دى عامله زى علبة السردين
*يا عم انت هتتأمر .. خلاص هات انت المرسيدس بتاعة ابوك
-يا عم خلاص ڤان ڤان اهى تقضى الغرض بردو
*طيب هو احنا مستنين ايه
-مستنى رد منى عليه
*صحيح انتوا محدش قالكوا حاجه على موضوع الكرونا ده فى الشغل ؟
-لحد دلوقت لسه
*أكيد هيقولوا انا سامع ان رئاسة الوزراء هتنزل بيان بكره و احتمال يبقى فى حظر
-حظر ونتحبس فى البيت وكده
*انت فارق معاك انت راجل موظف نزلت الشغل منزلتش الشغل مرتبك ماشى لكن احنا بقى لو حصل حظر هنقفل المحل ويتهرب بيتنا
-اكيد الحظر ده مش طول اليوم يعنى وبعدين هى الناس بتبطل تاكل
*يا عم ما وقت البيع هيقل جدا وده هيأثر علينا ان جداً
-عموماً ماتقلقش نلاقى  بس الدهب وهخليك مليونير
*ماشى يا عم على بابا
***************************
-صباح الخير يا منى
*صباح الخير يا احمد .. متحجزش اى تذاكر للمتحف من عندك
-ليه يعنى
*وقفوا الزيارات للمتحف عشان موضوع الكرونا
-امال احنا هنقعد نعمل ايه هنا
*انت ممكن تشتغل على الموقع عادى لكن متحجزش اى زيارات للمتحف
-طيب وانتى هتعملى ايه
*مش هعمل حاجه
-حلو اوى الكلام ده
*وايه الحلو فى كده
-الحلو انك يا هتقعدى معايا فى المكتب
*هههه وهتستفيد ايه لما اقعد معاك فى المكتب
-احلى 3 حاجات فى الدنيا للماء والخضره والوجه الحسن .. ومفيش ماء ولا خضره عوزانا نتحرم من الوجه الحسن كمان
*بس يا احمد عشان بتكسف وانت بتقعد تقول كلام غريب
-طيب يبقى نشرب حاجه بقى .. تشربى ايه
*ماشى نسكافيه
-رفع احمد سماعة التليفون .. ايوه يا عم عاطف واحد نسكافيه لأنسه منى وواحد قهوه مظبوط ليه .. مقولتليش فكرتى فى الى قولتلك عليه
*اه فكرت بس قلقانه بصراحه
-متقلقيش وانا معاكى
*هى المشكله انك معايا يا احمد ..المشكله اننا بندور على آثار وكمان هندور فى اماكن آثريه يعنى مش بنحفر تحت البيت احنا
-يعنى تفضل الآثار دى تحت التراب ولا ندور عليها
*عارف ايه الى مشجعنى انى ادور معاك يا احمد
-ايه ..؟
*المغامره احساسى بالمغامرة فى البحث واننا ممكن نوصل لحاجه والشغف انا عندى شغف كبير بالتاريخ و الآثر الى بتسيبه كل حقبه تاريخيه
-يبقى اتفقنا
*اتفقنا على ايه هو انا لسه قولت اه او لا
•القهوه والنسكافيه يا استاذ احمد .. قعدنا بقى ومفيش شغل ومش هيبقى فيه غير شاى يا عم عاطف قهوه يا عم عاطف
-فى أيه يا عم عاطف هو انت شغال هنا طيار مثلاً
*هههههههه .. معلش يا عم عاطف
•لا ولا يهمك يا أستاذه منى انتى تطلبى الى انتى عوزاه وانا اجبهولك على عنيه
*تسلم عنيك يا عم عاطف
-انا عاوز اعرف هو انت كنت عاوز تعين ابنك هنا وانا خدت مكانه يا عم عاطف
•لا انا عندى بنت متجوزه والباقى صغيرين
-يا سيدى ربنا يباركلك فيهم .. طيب مش طايقني ليه
•يا استاذ احمد انا بهزر معاك
-لا ان كان كده معلش
•بس بردو متطلبش طلبات كتير انا عاوز اريح زى ما انتوا مريحين
-حاضر يا عم عاطف بعد كده هبقى اعمل القهوه بنفسى
•لا انا هعملهالك بس كفايه مره واحده فى اليوم عشان صحتك
-حاضر يا عم عاطف
•عاوزين حاجه تانى
-تسلم يا عم عاطف