المملوك الآخير

الجزء الاول

-صباح الخير يا فندم
•أهلاً صباح الخير
-حضرتك انا احمد المصرى الموظف الجديد
•اه جواب تعيينك جانى .. الورق بتاعك جاهز يا أستاذ أحمد
-أه يا فندم اهو
•ورينى كده .. تمام
-ضغط على زر أمامه فحضر ذلك الساعى من جديد
•عم عاطف خد أستاذ أحمد عشان يستلم الشغل مكان الاستاذ فؤاد
~اتفضل يا أستاذ أحمد
-خرجت مع عم عاطف ومشيت جانبه .. أزيك يا عم عاطف
~أهلاً يا بنى
-هو أستاذ فؤاد طلع معاش ولا أيه
~لا أبداً ده جاله شغل فى السعوديه الله يمسيه بالخير كان راجل ملو هدومه الشغل دلوقت بقى كله عيال
-عيال..! فى ايه يا عم عاطف هو انا جايلك بشورت
~أهو ده الى كان ناقص
-انت قرفان منى ليه يا عم عاطف .. منك لله يا خال
~تعال يا بنى
- دخلنا احد المكاتب كانت تجلس فتاه على مكتب .. فتاه فى نهاية العشرينات من العمر ذات شعر أسود كانه الليل بيضاء لها عينان واسعتان ذات جسم متناسق ترتدى نظارة نظر أنيقه
~اتفضلى يا أستاذه منى استاذ احمد الموظف الجديد الى مكان أستاذ فؤاد
*اه اهلا أهلاً اتفضل اقعد على المكتب التانى ده المكتب بتاعك .. اتفضل انت يا عم عاطف ..الغرفه هنا تعتبر بتاعتك انا شغلى مش ديماً بكون على المكتب على حسب الشغل
-هو انتى شغلك ايه
*مضيفه
-بجد .. وايه علاقة مضيفة الطيران بالشغل هنا
*مضيفة طيران ..! يا أستاذ مضيفه بستضيف الزوار ولو احتاجوا أى شرح بكون مرشده ليهم
-شكلى غبى أوى بس انتى بردوا صعبتيها ماتقولى مرشده .. هو مكتوب ايه فى البرواز الى وراكى ده
*مكتوب
ألا لا يعلم الاقوام أَنَّا       ..     تضعضعنا و أَنَّا قد ونينا
ألا لا يجهلن احد علينا.   ..    فنجهل فوق جهل الجاهلينا

ده بيت شعر من معلقة عمرو بن كلثوم
-ايه ده هى ام كلثوم كان عندها ابن تانى غير كلثوم ؟
*ايده فى ايه يا عم ام كلثوم مين وابن تانى مين ، ده شاعر عربى ملك غلط حاول يهين امه فقتله وعمل قصيده من الاشهر القصائد عند العرب .. هو انت خريج ايه يا أستاذ أحمد
-هو انا خريج كلية حاسبات ومعلومات بس طبعا انتى مش هتصدقينى بعد الشويه الى اتكلمت فيهم معاكى واكيد مفكره انى خريج تربيه فكريه
*هههههه انت دمك خفيف أوى يا أحمد .. انا هطلبلك أهو و بعدين هعرفك شغلك بقى
-قبل ما تطلبيلى القهوه كنت عاوز أسألك سؤال
*ايه هو
-هى ام عمرو بن كلثوم دى اسمها ايه
*ههههه مش فاكره .. هروح بقى اطلبلك القهوه

*****************************
*القهوه يا عم احمد اهيه لفيت السجارتين ؟
-اه لفيتهم خد ولع .. عارف يا حسن انا مصاحبك ليه
*ليه ؟
-عشان اقعد معاك ع السطح ده
*هههههههه تصدق كنت حاسس
-هههههههه مش عارف ازاى العماره دى بتبص على الاتوستراد فى صقر قريش وصاحب العماره منزلهاش وطلع مكانها عماره تخليه مليونير
*يا عم العماره كلها ايجار قديم زى حلاتنا هو لو عارف يخرجنا كان هيستنى يعنى
-انا لو مكانه اقتلكوا
*وانت يعنى يا عم السفاح شايف لينا مكان تانى ومرحنهوش وبعدين انت عاوز تتحرم من قعدة السطح ولا ايه
-لا انا لو خسرت قعدة السطح ممكن اخسرك انت شخصياً
*هههههه المهم استلمت الشغل
-اه يا عم استلمت النهارده
*هو خالك ده ميعرفش يوظفى زيك كده
-انت فاكر خالى ده وكيل وزاره يا بنى .. دى هيه جت معاه كده وبعدين انت مش عندك مطعم فول وطعميه بيأكلك الشهد
*ده كان يا بنى اول لما اتخرجت من الجامعه نزلت وقفت مع ابويا والمحل فعلا كان بيأكلنا الشهد لكن دلوقت المحل لاعارف يأكلنى ولا يأكل ابويا
-ليه يعنى
*يا ابنى كل حاجه غليت النور والمياه بقوا أضعاف الى كنا بندفعه الخامات كمان غليت
-طب ما تغلوا انتوا كمان يا بنى
*الفول والطعميه دول اكلة الفقير يا أحمد مينفعش يغلى زياده عن اللزوم وقتها الفقير هيختار مياكلش
-يخربيتك شيلتنى الهم وفوقتنى انا هقوم اروح يا عم
*ماشى خلى بالك من نفسك وانت مروح
-سلام يا حسن .. بقولك ايه انتوا أكلكوا ميتاكلش على فكره