المهم لمن جيت من الجامعه حبوبه كانت قاعده مع ناس عمتي إشراقه و لمن انا جيت قامت جاتني ، قالت لي اها ناس أمك وصلوا و الحصل معاهم شنو تاني؟ قلت ليها قبيل مرام قالت لي لسه و هسي بكونوا وصلوا ، خليهم يرتاحوا شويه كدا و نتصل عليهم بعدين ، قالت لي سمح، دخلت بدلت ملابسي و جيت ختيت أكل لينا و بعديها عملت جبنه قبل ما نشربها ناس إسراء جوا و شويه كدا هديل جاتنا، حبوبه قالت لي تعالي اسرح ليك شعرك دا اهملتيهو شديد ، قلت ليها لا ما عايزا خليهو كدا، قالت لي حتقعدي طول عمرك مبهدله كدا؟ و هسي غبشه كدا مالك؟ الحنه دي عملوها لشنو؟
قلت ليها حبوبه عليك الله ما تشغليها لي ، حنة شنو ياخ عندي جامعه انا و ما فاضيه للكلام الفارغ دا كلو ، قالت لي فارغ في عينك ، جنس عوارتك و هبالتك دي الخلت راجلك يعرس فيك ، قالت كدا و طوالي عاينت لـ هديل ، قلت ليها خلاص الكلام دا قوليهو لـ هديل ما لي أنا ، طبعاً هديل بقت ساكته ساي و ما قادره تعاين لينا، حبوبه قالت ليها وقت الله جابك لي و بقينا في وش بعض بدور اسألك شناة القلب و عدم الإحساس دا جبتيهو من وين؟ في وحده بتعرس راجل بت عمها كما بقت وحده وسخه و خاينه! هديل بعد مسافه قالت ليها حبوبه بطلي تفرقه و أفضليه و راشد دا ما انا الجيتو و قلت ليهو عرسني براهو جا لغاية بيتنا و قال لأبوي عايز هديل ، مش ربيتونا على الطاعه و عدم الرفض و مجادلة الكبار؟ يلا انا عملت الحاجه الربوني عليها و يا حبوبه لو عندك كلام في حلقك و قلبك قوليهو لـ راشد ما تجي تضايقيني بيهو انا و بعدين انتي ناسيه انو جدي جابك فوق مره ولا شنو؟ ناسيه انك الزوجه التانيه؟
حبوبه قالت ليها العرسوني فيها دا عاد لا بت خالي لا بت عمي و ماف رابط دم بيناتنا ، هديل قالت ليها في الآخر جابوك فوق مره ولا لا؟
حبوبه سكتت و ما اتكلمت معاها و هي طوالي طلعت مننا قلت لـ إسراء انتي اليوم ما مشيتي الجامعه ولا شنو؟ قالت لي اليوم ما عندي ، بعد ما شربنا الجبنه حبوبه قالت لي اتصلي على راشد و فعلاً اتصلت عليهو بس ما رد علي، لمن اتصلت كذا مكالمه من غير رد قلت احسن اتصل على مرام أو أمي ، جربت تلفون أمي بس ما ردت عشان كدا اتصلت على مرام ، قالت لي القيامه قايمه في البيت ، أبوي و عمي آدم سامعاهم بتشاكلوا مع راشد عشان خلى توفيق يطلق مشتهى ، قلت ليها ابوي دا اصلاً قلبو حجر و عمي آدم بتاع فتن و قلبو أسود و أحجر من قلب أبوي ، قالت لي حـ اقفل هسي ، راشد بنادي على مشتهى....بعدين بتصل عليك، قلت ليها آيي عليك الله كلميني أول بأول ، قفلت منها و حكيت لناس حبوبه ، قالت لي أصلهم أولادي ديل ما نافعين ، شويه كدا سمعنا صوت جوطه ، إيلاف قالت لينا دا زي كأنو صوت عمي نصر الدين ، لبسنا تيابنا و مشينا الحوش التاني ، لقيناهو جايب معاهو ولدو توفيق و شايل معاهو عكاز و بتشاكل مع عمي صلاح الدين و بقول ليهو ولدك الكلب داك وين! يجي بيتي و يضرب ولدي و يسوق مرتو بالقوه!؟
رامي قال ليهو عشان تشوف الضرب دا حار كيف، هسي هو راجل و ما اتحمل الضرب فـ كيف المره؟ خاصة لو كانت بت قاصر ، عمي نصر الدين قال ليهو دي مشاكل بين الراجل و مرتو، يضربها ، يكسر رقبتها ماف زول يدخل ، رامي قال ليهو ليه غنمايه هي؟
عمي نصر الدين عاين لـ عمي صلاح و قال ليهو الكلب داك مُدسي مني وين ؟ هو وقت خواف للدرجه دي البخليهو يتحشر بين المره و راجلها شنو ؟
قلت ليهو خواف؟ هو من هنا مشى ليكم هناك و في نص بيت ولدك و قدام عيونو و عيون ناس الحله ساق مشتهى و جابها ، ولدك لو كان راجل بالجد ما كان بضرب ليهو مره، لو كان راجل بالجد ما كان راشد ضربو و خلاهو بالغصب يطلق مشتهى ، قال لي انتي بالذات اسكتي عمايلك و قلة أدبك واصلاني في مكاني و أختك العناد و قلة الأدب ما جايباهم من بعيد ، قلت ليهو و ولدك الخيابه و البطاله و عدم الرجاله ما جايبهم من بعيد 😊
غضب غضب بعد كلامي دا ، رفع عكازو و جا علي بإندفاع و كان حيضربني بيهو لو ما رامي مسك العكاز و قلعو منو ، قال ليهو فكني انت التاني يا حيوان ، رامي قال ليهو انا لغاية اللحظه دي محترمك يا عمي و ما عايز اقلل من احترامك و أغلط معاك ، قال ليهو ما تقول لي عمي ، انا ما عمكم يا كلاب ، شويه كدا عمي رضوان و صديق و نسوانهم جوا و بقوا يحاولوا يهدوا عمي نصر الدين و هو مُصر يشاكل و يشتمنا ، عاينت لـ توفيق و قلت ليهو أحمد الله انو في رابط قرابه بيناتنا و إلا والله كنت ناويه أخليك تعفن في السجن و هسي كان قليت أدبك حتلقى نفسك مرمي في السجن ، عمي نصر الدين قال لي بنبرة غضب بتهددينا يعني؟.....هسي دي امشي و افتحي فيهو بلاغ اصلاً السجن دا مكان الرجال ، قلت ليهو لكن ما مكان ولدك والله 😂😂
قال لي اقسم بالله ما أخليك و.....جا علي و كل ما يحاول يقرب مني رامي و عمي صلاح بمسكوهو مني و هو عايز يطق من الغضب و توفيق الخواف ساكت ساي ، عمي رضوان قال لـ عمي نصر الدين كدي اهدى شويه يا أخوي و خلينا نتكلم بهداوه ، قال ليهو كلام معاكم انا ما عايزو ، بس قولوا لي الكلب الخايب داك مشى وين ، قلت ليهو ياريتك جيت أبدر من كدا عشان تقابلو، هسي هو مشى يرجع مشتهى لـ بيتنا 😏 بس كان قعدت لغاية المغرب كدا حـ تلقاهو قدامك ، قال لي والله....عمي صديق قال ليهو ياخ بطل البتسوي فيهو دا و انتي قفلي جردلك دا قبل ما أقبل عليك ، حبوبه قالت ليهو الله يلعنكم كلكم يا ولادة السجم و الرماد و أصلكم ملعونين ، والله دي ولادة الذنوب ذاتها البقولوا عنها ، الواحد يكون شايف الحق بس بقيف مع الباطل ، رجال على شنو انتوا اذا ما قادرين تفرقوا بين الصح و الغلط؟ واحد ضرب مرتو و شوه ليها وشها عديل و ما باقي ليهو إلا يقتلها تجوا انتوا و تقولوا نتناقش في الموضوع! شنو العايزين تتناقشوا فيهو يا خايبين ، كبار و ما عاقلين ، راشد نهاي ما غلط لمن طلقها منو بالغصب ، كويس انو فتح عيونو و قدر يشوف الإنتوا ما شايفنوا ، رامي قال ليها ما تتعبي نفسك معاهم ساي يا حبوبه، الإسمهم اعمامي ديل امخاخهم فاضيه و قلوبهم متحجره و انت يا عمي نحنا ما عندنا كلام نقولوا ليك و ماف شي نتناقش فيهو معاك لو عايز تمشي الباب فاتح و لو عايز تنتظر راشد أهلاً و سهلاً بيك و صالونا فاتح ، قال ليهو بتطردني يا عديم التربيه انت؟ ....دي تربيتك يا صلاح! دا القدرت عليهو! أولادك كلهم خايبين بسمعوا كلام النسوان، رامي قال ليهو والله انا فترت عديل ما الشرح بعد دا أي حاجه تخطر على بالك فإنت حر فيها تصدقها ولا لا ماف زول حـ يحاول يصلح ليك فهمك الغلط و هسي قررت شنو؟ ماشي و لا قاعد؟
عمي نصر الدين عاين لـ توفيق و قال ليهو اتبعني ، طلعوا من البيت غضبانين و نحنا طوالي مشينا دخلنا جوه طبعاً عمتي إشراقه كانت بتعاين لينا ساي و بتضحك ، أما عبير جات عاينت للشكله الحاصله و رجعت دخلت جوه ، المهم لغاية المغرب ناس حبوبه قاعدين معاي ، و مرام تاني ما اتصلت علي و لمن اتصل عليها ما بترد و راشد برضو ، بعد المغرب ، سمعنا صوت رامي بتكلم مع زول و بحكي ليهو الحصل، حبوبه قالت لي بكون دا راشد جا؟
قلت ليها ما عارفه والله، إسراء قالت لي حـ امشي اشوف و أجي و فعلاً مشت و جات قالت لي آيي راشد جا لبست توبي و طلعت برا و بقيت منتظراهو في الحوش لغاية ما جا داخل ، قلت ليهو أها الحصل شنو؟ .....مسح وشو بيدينو و قال لي انا هسي تعبان و ما عندي قدره اتكلم مع زول ، قلت ليهو راشد ياخ قول لي الحصل شنو! قال لي بضيق مها عليك الله دا ما وقتك ما تقعدي تنقي لي في راسي قلت ليك تعبان يعني تعبان ما تناقشيني، قال كدا و طوالي رجع و طلع، حبوبه و إسراء جوا طالعين و قالوا لي مالكم في شنو؟
قلت ليها قال تعبان و ما قدرت افهم منو الحصل، حبوبه قالت لي خلاص خليهو يرتاح شويه و بعدين اتفاهمي معاهو ما تبقي نقاقه، قلت ليها انا من قبيل مقلقه و منتظراهو يرجع و هسي يقول لي ما عندي قدره اتكلم بيها مع زول؟
قالت لي ما تخليك عديمة احساس كدا واحة اسم الله الراجل دا بجنس طريقتك دي بطفش منك ، اسمعي كلامي و ما تبقي نكديه، الراجل دا برضو بدور اللين و الكلام الطيب ، خليك مفتحه و اعرفي اتصرفي ، إسراء قالت لي صح كلام حبوبه ، حبوبه قالت لي بعد دا نحنا ماشين، قلت ليها اقعدوا معاي شويه قالت لي بري بعد دا خلاص نعست و بدور أنوم ، طلعت معاهم قدمتهم و جيت راجعه و أول ما ختيت رجلي في عتبة الباب حسيت بكتله دفرتني و دخلت قدامي ، لمن رفعت راسي لقيتهم ديل عمي نصر الدين و توفيق، معناها هم ما رجعوا البلد و كانوا منتظرين راشد في مكان قريب من هنا ، وقف في نص الحوش و قال بصوت عالي الكلب الجبان داك لسه ما رجع! عمي صلاح جا طالع و قال ليهو لا إله إلا الله، تاني يا نصر الدين؟ قال ليهو تاني و تالت لغاية ما ولدك الحيوان يطلع و يقيف قدامي ، طبعاً اعمامي ديلك كانوا قاعدين و جوا طالعين مع رامي ، و بقوا يجوطوا معاهو ، عمتي إشراقه و عبير جوا طالعين، عمتي إشراقه قالت ليهو عليكم الله ما تزعجونا ساي هسي نحنا ذنبنا شنو نوم ما قادرين ننوم زي الناس ، البت و رجعوها لأهلها لو عندك كلام يا نصر الدين امشي ليها هناك في بيت أبوها ، ما رد عليها و ما اشتغل بـ كلامها و بقى يقول جيبوا لي الكلب داك انا عارف إنو جا راجع بس الخوف يخليهو لـ منو؟
ما عارفه ليه بس ملامو عن راشد وجعني شديد مشيت عليهو و قلت ليهو انت عايز تعمل شنو يعني؟ مشتهى و طلقناها من ولدك و تاني ذاتو ماف طريقه ترجع ليهو و لو في نحنا ما عايزنها و ولدك الخايب دا ما بشرفنا نديهو أختنا، فجأه كدا رفع يدو عشان يضربني و في نفس اللحظه و قبل ما يضربني راشد مسك يدو ، وقفني وراهو و قال لي انتي خليك ساكته، عاين لـ عمي نصر الدين و قال ليهو: قالوا لي انك بتسأل عني! قال ليهو ضارب الولد دا و سايق مرتو من نص بيتو ليه ، أصنام نحنا لمن تجي تسوق مره من نص بيوتنا و تضرب ولدي كمان و تطلقها منو؟
قال ليهو لو كان في حاجه اسوأ من الضرب كنت عملتها ليهو و مفروض تحمد الله اني اكتفيت بالضرب لأنو لسه ما وريتو شي ، .....عمي نصر الدين غضبو زاد و بقى يتناقش مع راشد و أصواتهم واصله السما لغاية ما فجأه كدا عمي نصر الدين طلع سكين....
يتبع.....
