وقف على حيلو و قال لي طلاق شنو الإنتِ بتتكلمي عنو دا و اساساً انا متين قلت ليك حـ اطلقك؟ ؟
قلت ليهو راشد ما تستهبل علي و تعمل نفسك رايح ، مش متذكر لمن قلت ليك ما عايزا منك حاجه غير تطلقني و ترجعني لأهلي!؟يومتها انت بلسانك قلت لي حـ يحصل العايزاهو ، جهزي شنطتك حـ اوديك بيت أهلك ! مش جايبني هنا على أساس انك تطلقني؟
ربع يدينو و قال لي اهاااا يعني انتِ فهمتي من الجمله دي إني قاصد أطلقك؟! أبداً والله ، لو دا فهمك فـ شيليهو من راسك و ماف ليك أي طلاق لمن قلت ليك حـ يحصل العايزاهو كنت قاصد اني حـ اجيبك لـ اهلك عشان عرس مرام و بس .....زعلت شديد و قلت ليهو بزهج ما على كيفك ، طلقني يعني طلقني ، افهم يا انسان اني ما طايقه العيشه معاك ، بحس نفسي مخنوقه في بيتكم و ما مرتاحه لا جسدياً لا نفسياً ، ما عايزا ارجع للجحيم داك تاني ، افهمني ياخ....طبعاً قلت كلامي دا و دموعي نازله و صوتي شبه رايح من الزعل ، اتنهد و قال لي ما تفتحي معاي الموضوع دا تاني و طوالي طلع من المطبخ ، و انا طوالي لحقتو بقى ماشي و انا ماشه وراهو و بتكلم معاهو بزهج و بشاكل فيهو و هو ما شغال بي و مكمل مشيهو ، عليت صوتي عليهو ، وصفتو بـ اسوأ الصفات و انا ما منتبها انو صوتي كان عالي و اننا واقفين في نص الحوش ، لمن زهج مني إتلفت علي و قال لي بنهره اقسم بالله اسمع حسك دا تاني ما يحصل خير ، مجنونه انتي ولا شنو؟
عليت صوتي زياده و قلت ليهو ما بسكت ما بسكت عايزا تعمل شنو ؟
على حس أصواتنا دي أمي و ناس مشتهى جوا طالعين ، أمي قالت لينا في شنو يا ناس ؟ ...شويه كدا أبوي و عمر و عمي آدم جوا طالعين من حوش الرجال ، عمي آدم قال ليهو قليلة الأدب دي مالا معاك حسها هناك واصلنا!؟
أبوي قال لي بنهره كدا مالك في شنو بتنبحي كدا ؟
ما رديت عليهو بس كنت بعاين لـ راشد و عيوني مليانه دموع ، أمي ختت يدها على كتفي و قالت لي قولي لينا في شنو يا بتي مالك بتبكي؟
عمر قال لي اتكلمي ياخ....ما عاينت لـ ولا واحد فيهم اتجاهلتهم كأنهم ما واقفين قدامي ، عاينت لـ أمي و قلت ليها و انا ببكي : قال ما بطلقني يا أمي ، ختت يدها على خشمها و قالت لي طلاق شنو يا بتي !! مشتهى قالت لي يطلقك ليه يا مها؟ ...قلت ليهم عديل كدا يطلقني انا ما طايقه العيشه معاهو و تاني ما برجع معاهو هناك ، أبوي لفتني عليهو و قال لي قايله الطلاق دا لعب و على كيفك ؟ ...عمي آدم قال لي ماف ليك أي حاجه اسمها طلاق ، اضايقت شديد و انفجرت فيهم ، قلت ليهم متين تخلوني على راحتي ، متين تبطلوا تفرضوا علي حاجات انا ما عايزاها ، متين تخلوني اعيش زي باقي الناس ، متين تخلوني اتنفس !!...ما كفاكم الجامعه الحرمتوني منها؟ ما كفاكم الذل و الإهانه المعيشننا ليها ، انتوا عايزين توصلونا لشنو قولوا لي ، عشان لو هدفكم تتخلصوا مننا فأنا عندي طريقه اريحكم بيها من نفسي و من مسؤليتي و.....قاطعني عمي آدم و هو رافع اصبعو علي قال لي قلة أدب كتيره ما بتنفع معانا و تاني لمن تجي تتكلمي اوعك تعلي صوتك علينا ...و انت يا راشد ساكت ليها ليه؟ معقوله مره تغلبك؟
راشد قال ليهو خليها تقول العايزاهو و انا على كل الأحوال ما حـ أطلقها .... قلت ليهو ما على كيفك انا لو بالمحكمه حـ اخليك تتطلقني و....ابوي هرشني و قال لي قفلي جردلك دا احسن ما اجي اربيك من جديد ، عمي آدم قال ليهو لو من زمان ربيتها ما كانت هسي واقفه قصاد اربع رجال و بترفع صوتها عليهم ، انا اللحظه ديك كنت زعلانه شديد و في الحاله زي دي أي كلام يخطر على بالي بقولو طوالي من غير ما افكر فيهو مرتين عشان كدا قلت ليهو قصدك اربع ذكور صح؟
قال لي احسن ليك تحترمي نفسك ، قلت ليهو انا محترمه نفسي بس انت متين تحترم نفسك و شيبك و تخلي حركات النسوان دي و تبطل فتن و خراب بيوت !؟، متين تخلي الناس في حاله و تتلفت لـ حياتك ، انت وقت راجل بالجد ليه مخلي بيتك و بناتك و مرتك و جاي تحرس بنات الناس يعني دي......قبل ما أتم كلامي ضربني كف لمن حسيت الدنيا دي كلها لافه بي ، عاين لـ أبوي و قال ليهو دي نهاية تربيتك الفاشله في بت بتتكلم كدا مع عمها قدام أبوها و اخوها و راجلها كدا لو ما ضامنه انهم ما حـ يعملوا ليها حاجه؟ دي لو عندنا هناك في البلد اقسم بالله كان ضبحناها عديل ، لكن يا خوي دامو كلام بتك عاجبك عشان كدا ساكت انا دقيقه واحده ما بقعدها في البيت دا ....قال كلامو دا و مشى بهناك ، ابوي عاين لي بغضب و قال لي ياريت لو جيتو كلكم أولاد أو ما جيتوا من الأساس ، عاين لأمي و قال ليها جهزي ليها حاجاتها خليها تطير من هنا و خلقتها دي تاني ما داير اشوفها ، قال كدا و مشى لحق عمي آدم ، عمر قال لي ما كان تتكلمي مع عمك بالطريقه دي ، قلت ليهو انت مش طول عمرك كنت ساكت و بتعاين بس بعيونك؟ هسي اعمل كدا و اسكت ساي و ما تتناقش معاي في أي حاجه ، كنت خاته يدي على خدي و ببكي بس و راشد بعاين لي ساي بس ما قال حاجه كل العملو انو مشى لحق ناس أبوي ، اصلاً حـ اتوقع منو شنو مثلاً؟!!
أمي جرتني معاها لـ جوه و قالت لي شفتي هسي جبتي لنفسك كف من ماف! طلاق شنو يا بتي الإنتي بتتكلمي عنو! مشتهى قالت لي هو عمل ليك شنو؟ يعني ليه عايزا تطلقي منو؟
قلت ليهم و انا بشهق من البكى بس ما عايزاهو ما عايزاهو انا ما بقدر ارجع معاهو تاني و اشتغل ليهم زي الخدامه ما عايزا ارجع للجحيم داك تاني ، انا هناك ما ماخده حريتي و دايماً ممشيني على كيفهم حتى الراحه دي انا ما بضوقها معاهم و الزمن كلو واقفه و شغاله ليهم و بعد دا كلو ما مقدرني ، امي قالت لي دا كلام شنو دا؟ بشاكلوك يعني ؟طيب انا لمن كنت بتصل عليك و بسألك عن تعاملهم معاك ليه ما كلمتيني و قلتي لي تعاملهم كويس؟حتى لمن جيتي هنا وقفت معاك و سألتك ليه ما حكيتي لي؟
قلت ليها اقول ليك شنو و انتِ و خالي براكم الخليتوني معاهم! انا مش قلت ليكم سوقوني معاكم ما عايزا اقعد دقيقه وحده هنا ؟ بس انتوا ما اشتغلتوا بي ، قالت لي خالك سألك قدامو اذا شفتي منو شي كعب ليه ما اتكلمتي ساعتها؟ و بعدين انتي قايله لو كان جبناك معانا أبوك و عمك حـ يخلوك على راحتك؟ اقسم بالله زي ما عرس ليك بالغصب يرجعك ليهو بالغصب ، هسي انا بسألك و احكي لي هو و أهلو عملوا ليك شنو عشان اقدر أواجه ابوك و عمك ، سكته ما اتكلمت ، زينب قالت لي احسن ليك تتكلمي يا مها ما تضيعي نفسك ساي ، شويه كدا سمعنا صوت أبوي بتكلم و بقول هسي دي ترجع معاهو و قلة أدب انا ما بتنفع معاي ....كدي اقيف انت ماشي وين؟....يا اخوي كلام شنو البمرقك من بيتي؟ ...الأكبر انت ولا هي لمن كلامها يأثر عليك و بسببو تقول داير تطلع من البيت؟....
المهم هم قعدوا يتناقشوا و واضح انو دي حركات ساي من عمي آدم ، عامل نفسو زعلان و عايز يمشي من بيتنا و كلو عشان يحرش أبوي علي ، أمي قالت لي سامعه؟ احسن ليك اتكلمي قبل ما يجوا و يجروك بالغصب لـ راشد ، اتنهدت و قلت ليها أمو ما مريحاني ، الزمن كلو بتشاكل فيني و واقفه لي على الحرف حتى إنها.............الخ و هو ذاتو ما مقصر مني و عامل زي أمو كل يوم...........الخ
المهم حكيت ليهم كل شي ما خليت حاجه ما قلتها ، أمي قالت لي كًر علي متحمله دا كلو و ساكته ليه يا بتي ؟غلطانه والله غلطانه ، زينب قالت لي كان تتكلمي يا مها و ما تسكتي ، قبل ما اقول حاجه أبوي توش جا داخل و جراني من يدي و طلع بي برا الغرفه و أمي وراهو بتتكلم معاهو و هو ما شغال بيها و انا ببكي بس و بقول ليهو خليني يا أبوي ما ماشه معاهو....ما ماشه انا ، أمي مسكتني من يدي التانيه و جرتني عليها بس أبوي كمان حالف كان يفكني بقوا هم الإتنين كل واحد ماسكني من يد ، أمي قالت ليهو هسي بتك دي قعدت معاها عشان تعرف هي رافضه تمشي ليه؟ دي بتك و لا انا جايباها من الشارع؟
قال ليها بنبره عاليه ما عايز اسمع أي حاجه و شنطتها الما جهزتيها ليها دي خليها تمشي من دونها....راشد....يا راشد ....
طوالي راشد و عمر و عمي آدم جوا طالعين ، أبوي جراني و لزاني على راشد قال ليهو سوقها معاك و كان قلت عليك أدبها اتصرف معاها و ما تشاورني ، أمي جات وقفت ليهم في النص و قالت ليهم بتي شبر ما بتطلعوا من هنا ، انا بتي ما بوديها للجحيم بنفسي ، انت ما عارف هي كانت عايشه كيف ، كانت على الطالعه و النازله بسمعوها كلام و مشغلنها زي الخدامه ، بتي التعب و الشقي الما شافتوا الشديد في بيت أبوها شافتو هناك ، لشنو و عشان شنو نخليها ترجع معاهو؟ الجابرنا شنو؟
عمي آدم قال ليها في ذمتها دا سبب يخليها تقول عايزا الطلاق؟ أمي قالت ليهو بنبره عاليه انت اسكت يا آدم انا بتكلم مع أبوها ، عمي آدم طوالي سكت و عاين لأبوي ، ابوي قال ليها أوعك ترفعي صوتك دا تاني ، اصلاً بتك دي ماف زول معلمها قلة الأدب و ركوب الراس غيرك ، يعني شنو لو بتشتغل زي الخدامه ؟ خليها تشتغل ان شاء الله اليوم كلو، هو النسوان شغلتهم شنو غير يمسكن بيوتن و شغل البيت؟ ..يعني هي عايزا تنوم و تاخد راحتها و عمها ولا مرتو هم يشتغلوا ليها؟
أمي قالت ليهو انا اول مره اشوف لي أب برخص بناتو للدرجه دي ، بقول ليك ديل مكرهنها حياتها و عادنها خدامه و هي ساكته ليهم و دا برضو ما كفاهم بقوا على الطالعه و النازله مسمعنها فارغه .....عاينت لـ راشد و قالت لأبوي حتى العايز تسلمها ليهو دا ما مقصر منها و عامل زي أمو ، هسي دي اسألو بعاملها كيف ، انت كان قنعان من بتك انا ما قنعانه منها و لو غالباك مسؤوليتها انا ما غالباني ، عمر أخوي لأول مره يدّخل جا وقف قصادي و خت يدينو على اكتافي و قال لي عملوا ليك شنو يا مها قولي لي ، كنت ببكي و ما قادره اتكلم ، تاني كرر لي السؤال ، لمن ما اتكلمت أمي حكت ليهم كل الكلام القلتو ليها ، أبوي قال لأمي هي لو ما قلت أدبها زول واحد بسألها ماف ، قوة راسها دي نحنا عارفانها كويس و ما متحملنها ، عاين لـ راشد و قال ليهو سوقها ، طوالي مسكت في عمر أخوي و قلت ليهو ما ماشه معاهو و زدت زياده في البكى، أبوي جا جراني منو و ساقني على باب الشارع و هو بقول لـ راشد ألحقني ، و انا بس بعاين لـ عمر اخوي و بنادي عليهو ، جا لحقنا جنب الباب ، فكاني من أبوي و قال ليهو خليها عايز اتكلم معاها ، ساقني على جنب و قال لي ، شوفي يا اختي المشاكل دي بتحصل في أي بيت و كونك تشتغلي في بيت نسابتك يلي هو بيتك دا ما سبب يخليك تقولي عايزا الطلاق ، أما بالنسبه لـ راشد فهو طبعو حاد كدا و ما بحب زول يتطاول عليهو و يخت راسو براسو فإنتي مفروض تكوني واعيه شويه و تبطلي عناد و قوة راس يا مها عشان تقدري تتعاملي معاهو ، الطلاق ما حل و الله و بكون كضبت عليك لو قلت ليك احسن ليك تطلقي ، الرجال بناسبوا الرجال و راشد دا راجل بكل معنى الكلمه بس انتي خليك زوله واعيه و ما تركزي مع الحاجات الهايفه دي و ما تخلي أقل مشكله تخليك تجوطي و تعلي صوتك و تطلبي الطلاق، ما تكوني زي النسوان المشلهتات الكل ما تحصل مشكله بينها و بين راجلها تشيل توبها و تجي بيت أهلها ، البنى آدم دا......طوالي رفعت ليهو يدي بمعنى كفى و رجعت منو لـ ورا و انا دموعي ذاتا كملت ، قلت ليهو ياريتك ما اتكلمت و فضلت انك تكون صنم زي عادتك ، عاينت ليهم كلهم و قلت ليهم كلكم أنانين و ما نافعين ، مع الكلمه دي أبوي ضربني كفين ورا بعض ، بس ما بكيت لأنو الفيني كملت و الضرب ذاتو ما جديد علي ، قلت ليهو برضو ما حـ تسكتني ، ايوه انتوا انانين و ما نافعين في اللحظه دي انا بطني طمت منكم كلكم ، حالياً انا بلعن في اليوم الإنولدت فيهو و في القدر الخلاني انخلق في الأسره الفقر دي ، يمكن لو كنت جايبني من الشارع يا الإسمك ابوي ما كان جدعتني الجدعه دي ، تعاملك الزفت معانا و قساوتك المفرطه شككتني في حتة انو نحنا بناتك مرات كتيره كنت بمشي و بشوف اوراقنا الثبوتيه عشان اتأكد انو نحنا فعلاً بناتك ، بس انا عايزا اسألك عملنا ليك شنو نحنا ؟ ليه كل الحقد و الكراهيه دي؟ جايبنا من الشارع انت ؟ طيب نحنا بنات راجل تاني؟ ....عاينت لأمي و قلت ليها كنتِ معرسه راجل غير أبوي و نحنا بناتو؟ ...أمي قعدت تبكي بس ، رجعت عاينت لأبوي و قلت ليهو اذا الإحتمالات دي كلها غلط معناها نحنا "بنات حرام " ....ياهو دا الإحتمال الأصح لأنو حقدك و كراهيتك لينا ماف تفسير ليها غير اننا بنات حرام ، كلنا ولا انا بس؟ عمر جا مسكني و قال لي مها ما.....دفرتو و قلت ليهو انت زح مني ، ما تقرب مني، انا هسي بتكلم مع الراجل دا ، عاينت لأبوي و قلت ليهو جاوب ، ساكت ليه؟ .....بتكلم معاك انا جاوبني عشان ألقى جواب لسبب الحقد دا كلو ، جاوبني ياخ ، عمر لفتني عليهو و قال لي ما تتجنني فينا ، دا كلام شنو البتقولي فيهو دا ، قلت ليهو لأنو ماف تفسير غير كدا ، قولوا لي الحقيقه ياخ عشان ما اعتب عليكم ساي و اقعد عمري كلو أدعي عليكم و....عمر أشر على راشد عشان يجي يسوقني ، قلت ليهو ما تستعجل اساساً ماشه انا ، إتلفت على ابوي و عمي و قلت ليهم حـ يحصل العايزنوا ، البيت الطردتوني منو دا تاني الموت ما حـ يجيبني ليهو ، من اللحظه دي لا انتوا أهلي لا أنا بعرفكم و حسبي الله و نعم الوكيل فيكم ، قلت ليهم كدا و طوالي طلعت برا الشارع و ركبت في عربية راشد و انا حاسه قلبي دا بنزف عديل و عايزا أطرشك من شدة الزعل و الغضب، جواي كلام كتير كنت عايزا اتفشى و اقولو ليهم بس حـ ينفع بشنو ؟ نسيت اني بتكلم مع أصنام ، أمي و مشتهى و زينب جوا لاحقني برا يبكوا ساي ، امي جاتني بالشباك و قالت لي انزلي يا بتي و ما تسمعي كلامهم، لو ابوك واحد احمق و مخو فاضي انتي ما تبقي زيو لأنو ماف زول غيرك حـ يضوق الوجع هناك ، قلت ليها ما فرقت هنا في وجع و هناك في وجع ، قالت لي اسمعي كلامي و انزلي يا بتي و فتحت لي الباب ، قفلتو و قلت ليها ما نازله كلامي واضح و تاني ما عاينت ليها ، قعدت على الأرض و بقت تبكي و مشتهى و زينب بحاولوا يرفعوا فيها ، شويه كدا عمر جا طالع عاين لي مسافه بس نهاي ما إتلفت عليهو ، راشد جا ركب و قفل الباب بغضب و طوالي ساق العربيه بأقصى سرعه ، و انا رغم اني بخاف من الحاجه دي بس نهاي ما اتكلمت معاهو ولا عاينت ليهو اساساً كنت ثابته بس حاسه بنار جواي و قلبي حاسه بيهو بتقطع حته حته و سبحان الله دموعي دي نهاي ما نزلت ، مشينا مسافه طويله و كل واحد فينا شامي التاني ، المره دي خالص ما وقفنا لا لـ فطور لا لـ غيرو ، لغاية ما وصلنا الأبيض انا لا أكلت لا شربت مويه و اساساً الجوع ذاتو طار لي بقيت ما حاسه بشي غير كميه من الكراهيه لـ أهلي و راشد ، لمن وصلنا نزلت و قفلت الباب بقوه و طوالي دخلت جوه و مشيت بيت راشد ، قفلت الغرفه علي و بديت اكسر في كل حاجه عيني تقع عليها ، يمكن ساعتين و انا لسه بكسر و ببهدل في الغرفه و عصبيتي لسه ما خفت ، بقعد شويه و تاني بقوم اكسر و اكسر ، يمكن ما وقفت إلا لمن سمعت صوت الباب ، ما فتحتو ، شويه كدا جاني صوت عبير و هي بتقول لي افتحي الباب يا مها ، و انا بكسر ساي و ما رديت عليها، شويه كدا سمعت صوت رامي و عمي صلاح الدين ، شغال لي استهدي بالله يا بتي و افتحي الباب، كدي اتفاهمي معانا ، رامي قال لي مالك انتي كدي خلينا نتكلم و بطلي جنك دا ، ما رديت عليهم اساساً ما كنت حاسه بشي غير نار بتحرق فيني ، بقوا يضربوا في الباب و انا اكسر و كل ما الضرب يزيد انا بزيد زياده في التكسير ، شويه كدا سمعت صوت صوت راشد و هو بقول لي بغضب احسن تفتحي الزفت دا ، لمن ما رديت عليهو ، شويه كدا احس ليك بضربه قويه على الباب لمن انخلقت، اتكررت نفس الضربه لغاية ما الباب اتشق نصين، شفت راشد و وراهو عبير و رامي و عمي صلاح و خالتو إشراقه، طبعاً انهجمت شديد لمن شفت راشد شايل الفاس ، عاين للغرفه و جاني مندفع و في يدو الفاس ، قال لي بنبره عاليه دا شنو العملتيهو دا ، كنت زعلانه و مضايقه شديد فطوالي بكل قوة لزيتو و دا الخلاهو يغضب أكتر، جا جراني شديد من شعري و قال لي قلت ليك حركاتك و قلة أدبك دي ما تعمليها لي ، عمي صلاح جا مسك يد راشد و بقى يحاول يفكني منو و شغال لـ راشد فكها ياخ الأمور ما بتتحل كدا ما تجن انت كمان ، رامي جا و بالقوه قدر يفكني منو و قدر يطلع راشد برا و انا طوالي قعدت على الأرض و بقيت ابكي، عمي قال لي انتي ذاتك ما تبقي زوله عنيده و مخك فاضي، راشد دا قايلاهو بهاظر! خالتو إشراقه قالت لي والله لو ما عمك و رامي مسكوهو منك زي ما شق الباب بشقك عشان كدا جنك دا ما تعمليهو لـ راشد ، عمي طلع مننا و عبير جات قعدت جنبي و شويه كدا قعدتني في السرير و انا ببكي بس و شغاله تحنس فيني، خالتو إشراقه قالت لي هسي الغرفه دي ذنبها شنو؟ الحاجات دي قايلاها جايه ببلاش ولا ابوك هو الجايبهم؟ عبير قالت ليها أمي! دا ما وقتك عليك الله!
بعد العصر كدا عبير قالت لي أبوي بناديك لكن قبل ما تمشي ليهو أكلي من قبيل بحنس فيك يا مها اسمعي الكلام بطنك ما ليها ذنب ، قلت ليها ما عايزا و طوالي وقفت على حيلي و مشيت لـ عمي ، لقيت معاهو خالتو إشراقه و رامي و الفقر الإسمو راشد ، بقيت بكرهو أكتر من الأول و شاماهو شديد و هو نفس الشي لأنو من دخلت بعاين لي بغضب و عيونو زي الشرار و لو عليهو يجي هسي و يخنقني...
يتبع.....
