شرفي عندك

البارت التاسع والعشرون

گتله / باجي اني شنو ذنبي

گالت/ بنتي ما الچ ذنب بس بعد صارت هذا قدرچ

اجتي جرتني من أيدي ودخلتني ومن دخلنه للمطبخ گاعد يزن ويمه ابنه من شافني دخلت ما حچى شي اخذتني زوجة يزن للاستقبال دخلت يم أطفالي وعلى الرغم ما يزن زوجته الأولى مطلگه منه بس يحترمها أحترام مو طبيعي وهي كذلك حتى منو افترقوا چان بإحترام

اني بس ستقريت بفراشي فتحت الموبايل اتصل بي گبل صائب وبده يحچي على شلون سدين الموبايل واني بعدني احچي

گتله/ العفو اجتي يمي زوجة يزن وغلقت وياك الموبايل بس اعذرني اني ما أروح أشهد ضد ياسين أبد لان ما راح يعوفوني وياخذون اطفالي مني

بس صدمني من يگلي / يمعوده يا أطفال هسه شسوين بيهم ذبيهم على يزن واخلصي شنو قابل اخذچ انتي واطفالچ لا انسي مستحيل يصير هذا الشي

گتله/ شنو اذبهم على يزن وأنت شنو تريد تخلص شغلك براسي وبعدين منو گلك اني اريد اشهد ضد ياسين عندك شي روح عليهم اني شنو بعدين انداس بالرجلين اني وأطفالي وانت ما گتلي شگال ياسين بالتحقيق

گال / ورا يزن النغل وما يطلع منها وانطيچ علم بشغله ترى السالفه كلها مرتبلها يزن

گتله/ چذب أصلاً يزن ما يدري بآي شي

گال / اني ضابط شرطه واعرف شحچي ويزن بالشرطة ومخططلها مضبوط لان شلون يعرب صور لما اكو واحد مخططلهم

گتله/ شلون مصورهم گالولي بس ما فهمت

گال / من واصلين للبيت هناك وهذا ياسين كاسرالباب عليهم من داخلين يعرب مصورهم وياسين طالع وعايفهم ويا يعرب بموقع الي نقتلوا وسلم نفسه وناطين التصوير للشرطة يعني قضية غسل عار لهذا ما ياخذ بيها قانونًا غير سنه فهمتي

گتله/ مالي شغل بشي اني ما أعرف منو الظالم ومنو المظلوم

گال / عندي أقتراح ثاني أريد اعرف لو مكان يعرب لو ولد يزن من زوجته الأولى وشتريدين اني حاضر

ما جاوبته وتحججت انه نعسانه وأريد انام وأفكر بالموضوع وارجعله خبر وبذيچ الليله نومي صار متقطع ساعه أحلم بموج وساعه بصائب وساعه بيزن حدود الساعه 5 الفجر گعدت عرگانه وعطشانه گمت طلعت من الاستقبال أسحب أخاف لا يگعدون اطفالي الى ما مريت من يم الصاله وأسمع يزن يحچي ويا واحد بس خمنت انه محامي لانه چان يحچي بقضية ياسين رحت للمطبخ من رجعت صار يزن بوجهي

گال / آيسن انتي بعدچ بعلاقة حب ويا صائب

گتله/ والسبب من سؤالك يزن

گال / احنه حاليًا مطلوبين لعشيرة صائب واهله وهو هم لهذا اي شخص من عشيرتنه يعتبر مطلوب إلهم وألي سمعت بي انه حتى اقاربنه مطلوبين حاليًا