" မင်းတို့တွေ ဝင်လာမှာစိုးလို့ ကာထားတာ သွားတော့ သွား "
ရန်း ပြတင်းပေါက်ဆီသွားလိုက်ကာ ထိုငှက်လေးနဲ့မျက်နှာချင်းဆိုင်လိုက်ပြီး ပြတင်းပေါက်ကို ရိုက်ကာမောင်းလိုက်တော့ အလန့်တကြားဖြင့် အဝေးဆီသို့ပျံသန်းသွားသည်။
တိမ်တွေကြား ပျံလွှားသွားတဲ့ငှက်ကလေး ကို ရန်း လက်ဝှေ့ရန်းကာ နှုတ်ဆက်လိုက်သည်။
" မင်းကကောင်းကင်နဲ့မှ လိုက်ဖက်တာ ဒီအခန်းကျဥ်းလေးက မင်းနဲ့မသက်ဆိုင်ဘူး "
ပြတင်းပေါက်ဘောင်ထက်က ပန်းအိုးလေးထဲမှာ နေကြာပန်းလေးတစ်ပွင့်ဟာ ငွားငွားစွင့်စွင့် ပွင့်နေလျက်ရှိသည်။
ပြက္ခဒိန်စာရွက်ရဲ့မျက်နှာပြင်ပေါ်က Heart Sticker လေးက လူကိုနာကျင်စေပြန်သည်။ မနေ့ကထိ...မနေ့ကထိ
ဒီနေ့အတွက်ကို အများကြီး မျှော်လင့်ပြီး စိတ်ကူးယဥ်ခဲ့တာ။ဒီနေ့ကို မြန်မြန်ရောက်လာချင်ခဲ့တာ။ဒီနေ့မှာ ကြည်နူးစရာတွေနဲ့ ပြည့်နှက်နေလိမ့်မယ်လို့ထင်မှတ်ထားခဲ့တာ။ ဒီနေ့မှာ ဝန်းနဲ့အတူရှိနေမယ်ထင်ပြီး ပျော်နေခဲ့မိတာ။
ဘဝဆိုတာ ဖြစ်ချင်းတိုင်းမှ မဖြစ်ရဘဲလေ။
ဂျင်းဘောင်းဘီအပြာနုလေးနှင့်ဆွယ်တာအဖြူစွတ်စွတ်လေးကို တွဲဖက်ကာဝတ်ဆင်လိုက်သည်။ ထိုတွဲဖက်မှုမျိုးကို ဝန်းကသိပ်သဘောကျသည်။ရန်းနှင့်အင်မတန်လိုက်ဖက်သည်ဟု မကြာခဏ ဆိုဖူးသည်။
မနက်စာ စားဖို့ရန်အတွက် " တောင်ကြီးရှမ်းရိုးရာ စားသောက်ဆိုင် " ကိုထွက်လာခဲ့သည်။ စားသောက်ဆိုင်ထဲဝင်လိုက်တာနဲ့ ဖက်နံ့သင်းသင်းလေးကိုရသည်။အစားအစာများကို ဖက်ဖြင့်ထုပ်ပိုးတည်ခင်းတာကြောင့် ပို၍ အနံ့သင်းပြီး အရသာရှိလှသည်။ ဝန်းက ဒီဆိုင်လေးကနေ ရန်းအတွက် ရှမ်းအစားအစာတွေ ဝယ်လာပေးနေကျ။နှစ်ယောက်အတူတူ တစ်ခါမှလာမစားဖူးတာကြောင့် ဒီနေ့မှာတော့ အတူတူလာစားမယ်ဆိုပြီး ပြောထားသည်။ဟိုတစ်ချိန်ကပေါ့...။
အငွေ့တထောင်းထောင်းနဲ့အညိုရောင်ကောက်ညှင်းပေါင်းက တို့ဟူးကြော်နှင့်သိပ်လိုက်ဖက်သည်။ ရှမ်းတို့ဟူးနွေး
နှင့် ကောက်ညှင်းပေါင်းကို မှာလိုက်ပြီး ဆိုင်ထဲကို သိသိသာသာ မျက်စိကစားမိသည်။ဝန်းများ ရှိနေမလားဆိုသောစိတ်နှင့်။
Part - 30
Start from the beginning
