Application For Divorce [ 离婚申请 ]

၅၁

ပြန်ဖြေလာသော သူ၏အသံမှာ အနည်းငယ် မပြတ်မသား။

ထိုအခါ ချန်းကျင်းက ရှက်ရွံ့စွာဖြင့် ခပ်ဖွဖွ ဆိုလေ၏။

"ဒါဆိုလည်း ကျွန်တော့်ကို လွှတ်ပေးတော့။ အခုချက်ချင်းကြီး ထပ်လုပ်လို့ မဖြစ်သေးဘူး"

သို့နှင့် လုထောင်က သူ့အားပွေ့ဖက်ထားရာမှ လွှတ်ပေးပြီးနောက်တွင် ချန်းကျင်းသည် လဲလျောင်းနေရာမှ ထထိုင်လိုက်၍ ခင်ပွန်းဖြစ်သူ၏ နှုတ်ခမ်းလွှာထက်သို့ ခပ်ဖွဖွ အနမ်းခြွေလာခဲ့ပေ၏။

"တကယ်လို့ ဒါလင်က လိုချင်တယ်ဆိုရင် ညကျမှ ထပ်လုပ်မယ်လေ နော်?"

လုထောင်က သူ့အား စိုက်ကြည့်လာပြီးနောက် သူ၏ပါးပြင်ကို ထုံးစံအတိုင်း ဖျစ်ညှစ်လာခဲ့ကာ နူးညံ့စွာ ဆိုလေသည်။

"ကောင်းပါပြီ"

သို့နှင့် ထိုနေ့တွင်ပင် သူတို့နှစ်ယောက်သည် တစ်နေရာရာထံသို့ သီးသန့်သွားရောက်လည်ပတ်ရန် စီစဉ်ခဲ့ကြ၏။ ရီကျောက်ကမ္ဘာထံသို့ ရောက်ရှိနေသည့် ဤရက်ပိုင်းအတွင်းတွင် ထိုလူသားနှစ်ယောက်မှာ ကောင်းကောင်း အလည်အပတ်မပြုရသေးသည် မဟုတ်ပါလား။ သူတို့အားဂိုက်လုပ်ပေးမည့်လူမှာ တက္ကစီသမားဦးလေးကြီး၏ ညီဖြစ်သူ ဖြစ်၍ သူသည်လည်း အစ်ကိုဖြစ်သူကဲ့သို့ တက္ကစီသမား တစ်ယောက်ဖြစ်၏။ မနေ့က သူ၏အစ်ကိုအား လုထောင်က ကယ်တင်ပေးခဲ့သောကြောင့် ကျေးဇူးတင်သည့်အနေဖြင့် ဤနေ့တွင် သစ်သီးခြံတစ်ခြံသို့ အခမဲ့ လိုက်ပို့ပေးခြင်းပါပင်။

အဓိကရုဏ်းမှာ အချိန်ကာလအားဖြင့် တစ်ညမျှသာ ကြာမြင့်ခဲ့ရခြင်း ဖြစ်သည့်တိုင် လမ်းမများထက်၌ ရှင်းလင်းနေပြီဖြစ်၍ သွေးရောင်များကလည်း စွန်းထင်းမနေတော့ပါချေ။ ပြောင်းလဲသွားသည်မှာ ယခင်ကထက်ပို၍ လူသူအသွားအလာနည်းသွားခြင်းသာ ရှိလိမ့်လေမည်။ မည်သို့ပင်ဆိုစေကာမူ ၎င်းပြောင်းလဲမှုမှာလည်း တစ်နည်းတစ်ဖုံအားဖြင့် ငြိမ်သက်အေးချမ်းသွားသကဲ့သို့ ခံစားရနေပြန်၏။

ချန်းကျင်းသည် တွေးတောရင်းနှင့်ပင် မနေ့ညက အဓိကရုဏ်းကိစ္စအား လုထောင်က မည်သို့မည်ပုံ ဖြေရှင်းခဲ့ပါကြောင်း သိချင်လာမိတော့သည်။ ထို့ကြောင့် သူက မနေနိုင်ပါဘဲ မေးလိုက်မိသောအခါ လုထောင်က "လျှို့ဝှက်ချက်" ဟူသော အဖြေတစ်ခုကိုသာ ပေးလာခဲ့ပေ၏။ ၎င်းမှာ စစ်တပ်၏ အတွင်းရေးကိစ္စများ ဖြစ်ဟန်တူသဖြင့် ချန်းကျင်းသည်လည်း ဆက်၍ မေးမြန်းမလာခဲ့တော့ပါချေ။