ဘုန်းပြည့်ချမ်းဟန် (Complete)

Part - 10 (U+Z)

ဒုန်း ဒုန်း ဒုန်း!!!

"ကိုကို..! ကိုကိုရေ! ..ကိုကို!!!"

ရေချိုးခန်းတံခါးခေါက်သံနဲ့တစ်ဆက်တည်းထွက်ပေါ်လာတဲ့အသံလေးတစ်ခု။ ငယ်ငယ်တုန်းကအသံလေးနဲ့မတူတော့ဘူး နည်းနည်းအောအောလေးဖြစ်လာပြီဗျ။

"ဝေး !"

"လေးနာရီထိုးပြီးနေပြီ မြန်မြန်လုပ် အအေးပက်မယ်"

"ဟုတ်ကဲ့...ကိုကြီး"

ဘုန်းပြည့်,ရေချိုးခန်းထဲမှလူကိုရည်ရွယ်ကာနှာခေါင်းတစ်ချက်ရှုံ့လိုက်ရင်း အဝတ်ဗီရိုဆီလျှောက်လာလိုက်သည်။

ဒီနေ့ကျောင်းမှာဒီဇင်ဘာလမ်းလျှောက်ပွဲရှိတယ်။ ၅နာရီအရောက်ကျောင်းမှာစုရမယ်လို့မှာထားတဲ့အတွက် သူတို့စောစောထပြီးပြင်ဆင်နေကြခြင်း။

(လေးနာရီကြီးရေထချိုးနေတယ် မအေးဘူးလားမသိဘူး..ကိုကိုကတော့သူထင်ရာလုပ်နေတော့တာဘဲ )

ကိုကို့အတွက်ဗီရိုထဲမှအဖြူအစိမ်းယူနီဖောင်းရယ် ကျောင်းတံဆိပ်ပါတဲ Hoodieတစ်ထည်ရယ်ထုတ်ယူလိုက်ပြီးကုတင်ပေါ်အသင့်တင်ပေးထားလိုက်၏။ ကုတင်ဘေးကစာကြည့်စားပွဲဆီအကြည့်ရောက်တော့ ချစ်စဖွယ်ရယ်ပြနေတဲ့ကောင်လေးနှစ်ယောက်ရဲ့ဓာတ်ပုံလေးကမပြောင်းမလဲရှိနေဆဲပါ။ ပြောင်းလဲသွားတာဆိုလို့တစ်ယောက်တစ်ခန်းဖြစ်သွားခြင်းပင်။ ဖေဖေကအရွယ်ရောက်လာတဲ့သားယောက်ျားလေးနှစ်ယောက်အတွက်ဤအခန်းကကျဉ်းတယ်ဟုဆိုကာ ကျွန်တော့်ကို,ကိုကိုနဲ့ကပ်ရက်အခန်းမှာနေစေသည်။ အင်း..ကိုကိုကအအိပ်ကြမ်းတော့ကျွန်တော်လည်းတစ်ယောက်တည်းအိပ်ချင်နေတာတော်တော်ကြာပြီ။

အခန်းပြောင်းတုန်းကလည်းကိုကိုတစ်ယောက်ဂယက်တွေထနေခဲ့သည်။ အခန်းနံရံဖွင့်လိုက်ရင်ရတာဘဲပြောလို့ ဖေဖေနဲ့စကားနိုင်လုနေကြသေးသည်။ အခန်းနံရံဖွင့်လိုက်ရင်လည်းတစ်ယောက်တည်းဘဲအိပ်ပါရစေ။ဘာလို့ဆိုကိုကိုတစ်နေ့တခြားကြီးထွားလာလိုက်တာ တခြားဆယ်တန်းအစ်ကိုတွေနဲ့မတူဘဲသူတစ်ယောက်တည်းနည်းနည်းထွားထွားကြီးဖြစ်နေ၏။ ဘာစိတ်ကူးပေါက်လဲမသိပါဘူး ကိုးတန်းကျောင်းပိတ်တည်းကဆော့လိုက်တဲ့ gym..အခုဆယ်တန်းရောက်လာပြန်တော့လည်းတစ်ပတ်တစ်ရက်သွားနေတုန်း။ ဖေဖေကစာအာရုံစိုက်ဖို့ပြောတော့တစ်နှစ်တည်းအောင်ရင်ပြီးရောမလားတဲ့။ မအောင်ရင်အိမ်ပေါ်ကဆင်းဆိုတော့ အသက်မပြည့်သေးတဲ့သားကိုအဲ့လိုလက်လွတ်စပယ်ပြောလို့ရလားတဲ့...။ ကဲ...မခက်ဘူးလား။ ဖေဖေကတော့ကိုကို့ကိုလက်ရောခြေရောမြှောက်ပါတယ်တဲ့။