ခြံထဲသို့ကားကွေ့ဝင်လိုက်သည်နှင့် လက်ကလေးကိုကားမှန်သို့အားပြုလျက်ဒူးလေးထောက်ကာ မြင်သမျှအရာရာကိုပါးစပ်လေးဟကာငေးနေသူက အောင်ဘုန်းဟန်ရဲ့အသစ်ကျပ်ချွတ်ညီလေး ဘုန်းပြည့်ချမ်းဟန်...။
"ဘုန်းပြည့်လေးကဒီနေ့ကစပြီး ဒီမှာဘဲတစ်သက်လုံးနေရတော့မှာ"
သူ့အသံကြောင့်ပါးစပ်လေးဟကာငေးနေသူက နောက်လှည့်ကြည့်လာပြီး...
"ထုန်းကျေ့ရေးဂဘယ်ဒူရဲ"
"ညီလေးနာမည်...ညီလေးနာမည်ကဘုန်းပြည့်ချမ်းဟန်ဖြစ်သွားပြီ မှတ်ထားနော်"
"တားနာမည်ရား..."
"အင်း...ညီလေးနာမည်"
"ဟုတ်ကဲ့..."
ထိုစဥ်အိမ်ရှေ့သို့ရောက်လာပြီဖြစ်တဲ့ကားလေးသည် ငြိမ့်ခနဲထိုးရပ်သွားသည့်အတွက် ကိုကိုကညီလေးလက်ကိုဆွဲကာကားပေါ်မှဦးဆောင်ဆင်းသွားလေတော့သည်။
"ဖွားမှုံရေ !!! ဖွားမှုံ ဒီမှာလာကြည့်ပါဦး ! ဘယ်သူပါလာလဲလို့"
အိမ်ရှေ့မှအော်သံစူးစူးကြောင့် ကြီးမှုံလည်းမီးဖိုခန်းမှကပျာကယာထွက်လာတော့ တွေ့လိုက်ရသည်က ကလေးလေးတစ်ယောက်ကိုလက်ဆွဲခေါ်လာသော မြေးဘုန်းကိုပင်။ ကလေးတစ်ယောက်ပါလာမည်မှန်း မနေ့ကတည်းကကြိုသိထား၍သိပ်တော့မအံ့ဩမိပေမယ့် ထိုကလေးကိုလက်ဆွဲထားသူက မြေးဘုန်းဖြစ်နေ၍ ကြီးမှုံတစ်ယောက်ဘုရားတ,ချင်ချင်ဖြစ်သွားရပါသည်။သူမ,ရော မောင်မြတ်ဟန်တို့ဇနီးမောင်နှံပါကလေးတစ်ယောက်ခေါ်လာလျှင် မြေးဘုန်းမကျေမနပ်ဖြစ်နေမှာကိုတွေးပူထား၍ပင်။သို့သော် ယခုမြေးဘုန်းပုံစံကြည့်ရသည်မှာ ကလေးကိုကြည်ဖြူပုံရရုံမက မကြားရတာကြာပြီဖြစ်သောအော်သံစူးစူးလေးများထွက်ပေါ်လာသည်အထိအခြေအနေကောင်းနေပါ၏။
အဝါဝမ်းဆက်နှင့်ကလေးလေးအနားရောက်လာတော့ ကြီးမှုံတစ်ယောက်သေချာကြည့်မိရင်း တစ်စုံတစ်ယောက်ကိုသတိရမိလိုက်သည်။
"ပြောပါဦး...မြေးကဘယ်သူလေးခေါ်လာတာတုန်း"
"ညီလေး...သားညီလေးခေါ်လာတာ သားနဲ့မတူဘူးလား"
YOU ARE READING
ဘုန်းပြည့်ချမ်းဟန် (Complete)
Fantasyဘုန်းပြည့်ချမ်းဟန်ဆိုတာ ချမ်း, တစ်ယောက် တည်းရဲ့အမည်နာမပဲဖြစ်စေရမယ်...။ 1.10.2021 >> 6.2.2022
