မြွေသားရဲ၏ဇနီးသည် 【MM Translation】

(15.2)

ထို့ပြင် ရှုကျင်ထျန်းသည် မြွေကြီးနှင့်နှိုင်းယှဉ်လျှင် ပို၍အိပ်လေ့ရှိသော်လည်း သူသည်မြွေပေါ်တွင် လဲလျောင်းနေရသောကြောင့် သူအလိုရှိသည့်အခါတိုင်း အိပ်ပျော်နိုင်သဖြင့် အဆင်ပြေနေလေ၏။

မြွေကြီးသည် သူ၏အလျင်လိုမှုကြောင့် အနည်းငယ်မောပန်းနေသဖြင့် သူ့(ကျင်ထျန်း)အားရစ်ပတ်လိုက်သည်။ အများအားဖြင့်သူ(ဟန်ယွီ)သည် သူ့အားရစ်ပတ်ကာ အိပ်ပျော်သွားတတ်သည်။

ထို့နောက်သူသည် လှိုင်းတံပိုးသံများကို ကြားလိုက်ရပြီး အလင်းရောင်သည် ဝေးကွာသောတောအုပ်များအတွင်းသို့ တဖြည်းဖြည်းထိုးဖောက်လာသည်။ ရှုကျင်ထျန်းသည် တစ်စုံတစ်ခုကို ယောင်ဝါးဝါးမှန်းဆမိသော်လည်း ရှေ့ကိုမမျှော်မှန်းနိုင်ခဲ့ပေ။

သူတို့ တောတွင်းမှထွက်လာသောအခါ ရှုကျင်ထျန်း၏မျက်လုံးများမှာ ရှင်းလင်းလာသည်။ သူ့ရှေ့တွင် အပြာရင့်ရောင်သမုဒ္ဒရာတစ်ခုရှိပြီး ၎င်းသည်အလွန်ကျယ်ဝန်း၍ အဆုံးသတ်ကိုပင် တစ်ချက်မျှမမြင်နိုင်ပေ။ ကမ်းရိုးတန်းသည် အဖြူရောင်တောက်ပသောမိုးကုတ်စက်ဝိုင်းနှင့် အဝေးတစ်နေရာသို့ဆက်သွယ်ခဲ့သည်။ တောက်ပသောနေရောင်သည် လှိုင်းတံပိုးမရှိသော ပင်လယ်မျက်နှာပြင်ကို ထွန်းလင်းစေပြီး အလင်းရောင်များကြောင့် ပိုမိုတောက်ပစေခဲ့သည်။

ထို့နောက် အနီးအနားမှာ ပင်လယ်လှိုင်းတွေက ပြင်းပြင်းထန်ထန်မြင့်တက်လာပြီး ကမ်းခြေကိုတိုက်ခတ်သွားကာ လှိုင်းပုတ်သံတွေထွက်လာသည်။ သိပ်မကြာခင်မှာ ခွဲခွာရမယ့်ချစ်သူတွေလိုပဲ နောက်ဆုတ်သွားပြန်သည်။

“ပင်လယ်ကြီးက အံ့သြစရာကောင်းလိုက်တာ! တကယ့်ကို မျှော်လင့်မထားမိဘူး!”
ရှုကျင်ထျန်းသည် အလွန်အံ့သြသွားပြီး အသက်ပြင်းပြင်းရှူရှိုက်လိုက်သည်။

ပြာလဲ့လဲ့ပင်လယ်ကြီးသည် လောင်ကျွမ်းနေသောနေရောင်အောက်၌ တောက်ပသောရေပြင်ကို စီးဆင်းစေခဲ့သည်။ စူးရှတောက်ပသော အလင်းရောင်ကြောင့် သူဖြောင့်ဖြောင့်မကြည့်နိုင်ခဲ့ပေ။ ရှုကျင်ထျန်းသည် သူ၏မျက်လုံးများကိုအုပ်ရန် လက်တစ်ဖက်ကိုသုံးကာ သူချစ်သောသမုဒ္ဒရာကို ကြာမြင့်စွာကြည့်လိုက်သည်။