South Boys #2: Heartbreaker

Chapter 26

"Hello po," bati ko. Sa tagal kong labas-masok sa bahay nina Isaiah ay nasanay na ako sa mama niya. Mukha lang masungit at matapang ang babae pero mabait naman. Prangka lang talaga.

"Ikaw si Carlyn, no? Iyong laging present dito pag fiesta?" tanong niya. "Ikaw iyong umubos ng salad ko nang nakaraan."

Ang ngiti ko ay pangiwi. "Opo. Good evening po." Namumukhaan niya ako. Pero mabuti na lang at hindi niya nabanggit na kasama rin ako noong napaaway sina Isaiah kina Wayne.

"Girlfriend ka na ba nitong tamad na ito?" Inginuso niya si Isaiah. "Alam mo bang hindi marunong maglaba ng pinagbihisan niya 'yan."

Nagusot naman ang matangos na ilong ni Isaiah. "Ma!"

"O e totoo naman. Saksakan ka ng tamad na lintek ka, mana ka sa ama mo."

"Ma, isang anak mo lang ako. Gasino lang iyong isama mo sa paglalaba ang mga damit ko e."

"Oo pwede sana kung di ka maya't-maya magbihis. Panay ang ligo mo, puro ka papogi, di ka naman makapaglaba kahit underwear mo."

Mula sa pinto ay pumasok si Mr. Gideon Del Valle, papa ni Isaiah. Matangkad ang lalaki, gwapo at bata pa. Mabait din ang aura na kabaliktaran ng sa asawa. May bitbit siyang paperbag ng Andoks.

"O bat ang ingay na naman ng mag-ina ko?" Inilapag niya ang dalang Andoks sa mesa. "O ito ulam natin, Mahal. Wag ka nang magluto at mabadtrip ka na naman sa amin ng anak mo."

"Pa, si Mama, pinapahiya ako sa GF ko!" sumbong ni Isaiah sa ama.

Napatingin naman sa akin si Mr. Del Valle. "O bago itong girlfriend mo, ah. Nasaan na iyong isa?"

"Malamang na-turn off na," sabat naman ng mama niya.

Ngumiti sa akin ang papa ni Isaiah. "E pamilyar ito. Parati ka rito, 'Ne? Ikaw na ba bagong girlfriend ng binata ko? Di naman ba nanunugod ang daddy mo?"

Nakita ko na napangiwi si Isaiah. Na-gets ko na ang tinutukoy ng papa niya ay daddy ni Vivi. Iyong babaeng iyon lang naman ang ex ni Isaiah sa pagkakatanda ko.

Niyaya ako ng parents ni Isaiah na sa kanila mag-dinner na magalang kong tinanggihan. Nag-text kasi sa akin si Mommy. Pinapauwi na ako dahil nagluto raw siya ng hapunan.

Mommy:
Darling, uwi na. Nagluto ako. May desserts pa. Iyong favorite mong maja. Di ko lang alam kung na-perfect ko ba kasi sa Youtube ko lang ginaya.

Bakit ba naging hands on mother siya bigla? Pakiramdam ko tuloy ay elementary ulit ako. Napapailing na lang ako pero nakangiti. Sa totoo lang, namiss ko na ganoon si Mommy.

Hindi na ako nagpahatid kay Isaiah dahil kakain na sila. Ako na lang ang lumabas sa bahay nila.

Sa loob ng compound nila ay nadaanan ko ang bahay nina Arkanghel na pinsan ni Isaiah.

Nakatambay ang lalaki sa tapat ng screen door sa bahay nila. May hawak na cellphone habang nakasimangot. Lagi na lang talaga siyang nakasimangot. Nang mapatingin siya sa akin ay nginitian ko siya.

"Hi, Arkanghel! Nagsaing ka na?"

Tinaasan niya lang ako ng kilay at saka siya bumalik sa pagse-cellphone.

Kahit suplado siya ay na-appreciate ko ang pagsama niya kina Isaiah noong tinambangan ako ng tropa ni Wayne.

'Balita ko ay nanghiram pa siya ng motor sa isa mga tiyuhin niya para lang makasama siya. Kahit pa umuwi rin siya agad noon, bumawas naman siya sa tropa ni Wayne ng dalawa.