رواية امرأة العُقاب

الفصل التاسع والعشرون

تستطيع رؤية العُقاب في السماء ..
لكن لا يمكنك تعقبه ..
فانقضاضه يكون مفاجيء وغير متوقع ! .

طالت النظرات الثاقبة في عيني عدنان يصوبها كالسهوم الجارحة في عين نشأت .. الذي يجلس بدوره في صلابة وقوة .
لم يسمع قط عن انقضاض الجوارح المفترسة كيف يكون ولكنه سيكون من المميزين الذين سيشاهدون العرض بعيناهم ! .
بدأ عدنان هادئًا بشكل يثير القلق ويمسك بيده قلم يطرق بسنه على سطح المكتب محدثًا صوتًا مزعجًا .. وبالخارج كانت جلنار تقف أمام الباب تستند بأذنها تستمع لحديثهم .. تترقب سماع رده لكن لا يوجد بالغرفة صوت سوى صوت طرق القلم ! ، وإذا بها آخيرًا تسمع صوت عدنان الذي أجاب :
_ اطلقها ليه ؟!
هتف نشأت بغضب :
_ عشان هي مش عايزاك ياعدنان !
يستمر في الطرق فوق سطح المكتب بالقلم ويبتسم في شكل مريب مجيبًا ببرود :
_ بس هي مقالتليش كدا !
نشأت بعصبية حقيقية :
_ اسمع ياعدنان أنا سبق وغلطت لما جوزتك بنتي ودلوقتي جه الوقت اللي اصلح غلطتي
رفع القلم وقلبه بين أنامله ومازال يحتفظ بإطار بروده وهدوئه المزيف حيث رد عليه :
_ هو قرار حلو ويحترم طبعًا .. بس أنا مش هطلقها
هب نشأت ثائرًا وصاحب به :
_ يعني إيه مش هتطلقها .. دي بنتي وأنا بقولك هي مش عايزاك ولازم تطلقها
وقف عدنان هو الآخر بدوره وسار نحوه يهتف بنبرة صوت بدأت تظهر خشونتها :
_ بنتك مراتي وهتفضل مراتي سواء وافقت أو رفضت
_ إنت متستاهلش جلنار وأنا اللي كنت قذر وبعت بنتي عشان شغلي ومصلحتي
فقد أعصابه ولم يعد لديه القدرة على تصنع البرود أكثر من ذلك ، فانفجر بنشأت كالثور يصرخ به بعينان حمراء كالدماء :
_ كنت قذر ومازالت يانشأت متعملش قدامي دور الأب المثالي والمحب .. دلوقتي افتكرت بنتك وجاي تقولي طلقها .. عايز تصلح علاقتك بيها يبقى بعيد عني ومتحاولش تفصلها عني .. لأن ده مش هيحصل ، جلنار وبنتي هيفضلوا معايا وجنبي ومش هطلقها .. تحب أعيد تاني ولا المعلومة دخلت ! 
ابتسم نشأت بسخرية وقال في نظرات شيطانية وساخطة :
_ إنت عارف  إني اقدر اخليك تطلقها إن مكنش برضاك يبقى غصب عنك .. وإذا كنت أنت ابن الشافعي فمتنساش إني نشأت الرازي والاسم ده إنت عارف كويس أوي يقدر يعمل إيه
ضيق عدنان عيناه باستغراب يجيبه بصوت متحشرج :
_ تقصد إيه ؟!
نشأت بشيطانية وغضب عارم :
_ يعني زي ما الصفقات اللي بينا من سنين واللي كنت أنا السبب فيها خلت من اسم عدنان الشافعي يبقى ليه وضعه ومقامه في السوق كله .. بحركة واحدة مني اقدر اهد كل ده زي ما عملته .. بفضيحة ليك مثلًا ! .. عشان كدا تبعد عن بنتي بالذوق وتنهي كل حاجة بهدوء زي ما بدأت

انطلقت شهقة مدهوشة من جلنار بالخارج فور سماعها لكلمات أبيها .. ستندلع الحرب الآن إن لم تسرع وتتدخل لتنهي هذه المهذلة وتوقفهم عند حدودهم  .. أسرعت وفتحت الباب تهرول وتقف بينهم صائحة بعصبية شديدة :
_ إنتوا إيه اللي بتعملوه ده .. لو هنا نزلت وسمعت كلامكم ده هتقولولها إيه .. بباها وجدها بيهددوا بعض !! .. ثم إن محدش فيكم ليه الحق ياخد قرارات تخص حياتي  .. دمرتوها مرة قبل كدا ومش هسمحلكم تدمروها تاني .. أنا بس اللي اقرر عايزة إيه سواء اكمل معاه أو لا
تطلعت لعدنان هاتفة بشجاعة :
_ أنا لو لسا مكملة معاك يبقى اكيد مش عشان إنت رافض تطلقني .. أنا لو عايزاك تطلقني هيحصل وغصب عنك
ثم التفتت لأبيها تقول باستياء :
_ وإنت لو عايز تساعدني بجد يبقى تسيبني إنا اللي اتحكم في حياتي .. إنت لما جيت الصبح قولتلي إنك هتتكلم مع عدنان وهتخليه يطلقني مسألتنيش عن رأى حتى هل لسا عايزة اتطلق ولا غيرت رأى
نشأت بتعجب وصوت حاد :
_ وهو مش إنتي اللي دايمًا بتقوليلي طلقني منه .. ولو عايز تثبت ندمك يبقى صلح غلطتك وخلصني من عدنان .. إيه اللي اتغير !! .. لو مش عايزة تتطلقي امال عايزة إيه بظبط !
صرخت بانفعال شديد ونفاذ صبر :
_ مش عارفة .. مش عارفة أنا عايزة إيه .. كفاية بقى ابوس ايديكم أنا تعبت من أني أكون دايمًا الضحية وسط خنقاتكم ومشاكلكم واتفاقتكم .. أنا اللي في النص بينكم ومبقتش عارفة اعمل إيه زهقت من انانيتكم