بيوتات اهلنة

البيت الخامس

وتضحك

والله شبيج ما نزلت ومن دخلنه للمنطقه ستغربت كلت يجوز متوهم لا والله ما متوهم نفس البيت ونفس الباب  هذا من كل عقله ماخذ وحدة داكة الدروب كلهة

والله شكلك حيرة بس سمعت يكلون حلوة تخبل ايه من  الحسن

اي هوة كلي عدهم بنات  بعمرك مشايف منهن

للأمانه ( الحوار اني سامعته منهم من جانو يحجون  بس الوالدة فيما بعد سولفتلنه وتقريباً الحوار منهة اخذته كامل)

وزفوهة للعروسة

اذا اكول جميله اظلمهة

اكول حلوة اظلمهة

اكول تخبل اظلمهة

اكول ايه من الحسن اظلمهة

صورتهة لليوم عالقة بذهني شكد شفت بحياتي جميلات بس مثل حسن خالدة ما شفت لليوم والله وما كاذبه من اكول ماشفت بجمالهة بعد معناها ماشفت فعلاً

خالد اسمر وضعيف وقصير وشكلة عادي يعني مابي جمال وخالدة بيضه بياض كرستالي وشعرهة كأنو اميشته خصل  على صفار او عسلي فاقع وهية حته صبغ مصابغته الطول شطب ريحان والجسم غصن البان شحجي وشوصف منهة والاخلاق والأسلوب شي ثاني حته الصوت كأنو جوهرة مصقوله بس مع الاسف ماضيهة 

ورغم هالشي ابويه حلف امي مجيب طاري الاحد زحمة من خالد  خاف يسمع احنه مطلعين سرة وأمي كلتله اصلاً بله ما توصي شلي دخل هنوب تطلع من وجهي

ودخلوهة للبيت  العروسة العشيرة اجمع بقت صافنه وكلهة تتسائل منين جبتوهة وين لكيتوهة قبل بأيام گبل ما جانت الناس ازف ولدهة بالفنادق ذاك من ذاك الي يروح للفندق معظمهم بالبيت يزفوهم

او ورة ما خلصو عشة المعازيم ابويه رجع للبيت وتلكته امي احنه اصلاً مابقينه عالعشة زحمة نبقه وبيتنه قريب بس همة ما قصرو دزو العشة للبيت وسالته امي

سألته ال خالد   اذا نفسه البيت لو لا

اي سألته ماكدرت اظمهة كتله مو جن العروسه جبناها من نفس البيت ذيج المرة رحت الهم

كال اي والله هية نفسه ما اكذب عليك بس ترة محد يعرف ونتة صاحبي ما ظم عليك حبيتهة للبنيه وكلت اطلعهة من القاع العايشه بي وخليهة عدي  وهم بزرتي يطلعون حلوين اغير بيهة النسل

الله يسعدكم شكو بيهة ونته اعرف بمصلحتك

ومرت الايام والشهور وخالدة عد جوارينه يا محلاها   تعودت عليهم وهية صاحبة شخصيه ولسان وعدهة اسلوب محترم يعني ممبين نهائي نوع البيئة الي جانت عايشه بيه ومرة من المرات حركت بيت اهلي ههههههه   وجوارين طفو وحته خابرو الاطفائية واذكر هية شافتني واكفه يم الحايط مال الحديقه مصفوكة من الخوف والعقاب وكلتلي مگموعه انتي مو قبل شويه جنتي يمنه تلعبين ويه البنات ليش حركتي اهلج اباوع عليهة لابسه بجامه مقلمة بازة والقميص مالته ابو الدكم هوة تقريباً فصاله رجالي  قبل هذا القماش اهاليتنة تخيطه بجايم للولد ومعظم الولد لابسين منه البازة 
ظليت صافنة عليهة وعلى حسنهة