عشقت انفاسك

الحلقة السابعة والعشرون

《☆☆☆》

ساره / ليا كم يوم في الشقه عشان مريم نقدرش نطلع بيها مزالت صغيره حتى لوطه مننزلش يركبن البنات عندي مرات يكسدن
طارق معاش شفته بس الموضوع هذا شاغل بالي مفكره نحكي ليوسف بس اكيد هيكرهه وهو ولد خالته وصاحبه شكله واجد
يوسف ** اعيوني انا نازل تبي شئ
ساره ** لا حبيبي منبيش شئ بس وين ماشي
يوسف ** بنمر علي امي بعدين ماشي لهيثم
ساره ** سلملي عليها اعميمه وقول للبنات يركبن يكسدن عندي
نزل يوسف قعدت مكسده خلاص البنات مركبنش ومريم رقدت قررت ننزل انا خليتها راقده ونزلت
سمعتهم يعدرزو في الجنان آيه وسندس ويوسف وعمتي ويضحكو وجوهم سمح بحتت فيه القيته يضحك بدموعه وجعتني روحي انا طول النهار في الشقه وجو شين وهو مسيبني وقاعد هنا ينكت ويضحك
ساره ** السلام عليكم خير
كلهم ** وعليكم السلام
سندس ** كيف حالك سرو اليوم
ساره / بحتت فيها وكشخت ** الحمد لله
يوسف/ عارفها حاسه بالغيره نضت تبعدت من جنب البنات ومشيت قعمزت جنبها وقربت لودنها
يوسف ** شن السماحه هذي
ساره ** مشيت لهيثم
يوسف ** ايه تو كيف روحت
سندس ** ساره تفضلي هاك هذي بسبوسه دايرتها انا هاك ذوقي وعطيني رايك
يوسف ** ايه سرو ذوقيها اتهبل
ساره / فنصت فيه وكليت منها ** ايه حلوه عطيك الصحه
يوسف ** اهو العصر يأذن انا ماشي لجامع
سندس ** يتقبل الله مقدم انوض انصلي حتى انا
يوسف ** منا ومنكم
ساره ** آيه ارزقي شوفي مريم ناضت ولا لا
حنان ** جيبيها عندنا
ساره ** اعميمه يوسف ميبيش يقولي صقع ومزالت صغيره
حنان ** خليك منه هالمهبول
ساره ** هههههه جيبيها ياآيه وين هند مزالت في الكليه
حنان ** ايه عندها اختبار اليوم
ساره ** ان شاء الله ربي يوفقها
آيه ** هاك امسكي ابنيتك  نجيها ياربي
حنان ** هاتيها ليا انا
سندس ** شبه يوسف
ساره ** ايه حتى هو يقول فيها
سندس ** نجي العيون ياربي عيون باتها
ساره ** ايه اكبار زي باتها
ساره / حرقتلي دمي باتها وباتها
ساره ** انخشو داخل هنا صقع علي ميري
سندس ** دلعي فيها ميري
ساره ** اها انا اندلع فيها ميري
سندس ** اكيد يوسف لا اصله ميحبش الكلام هذا
ساره / بحتت فيها زين وخشيت
حنان ** آيه غسلتي دبش يوسف
ساره ** اي دبش  شن جابه هنا
آيه ** شيخنا نزله الصبح دبش امسخ قال ساره تقدرش واعر عليها تغسله مزالت مريضه فجت علي راسنا انا وسندس غسلناه
سندس ** ماشيه نطبقه ولما يجي انمدهله
ساره** لا لا خليك تو نطبقه انا انت خلاص بارك الله فيك تعبتك / ومشيت سيبتهم
أيه ** كنها هذي
حنان ** خلنها حرام تعبانه وضايق خاطرها امشن غيرلها جوها
ساره / قلبت وجي انكشخ عليهم جت آيه وسندس
سندس ** كنك ساره شن صار
ساره / مرديتش
آيه ** سرو كنك عاد قلبتي فجاه
ساره ** انا مقتلاش مش غاسله هو يشتغل من عقله
آيه ** تي عادي يابارده خويا هذا يعني قبل اتجي انت انا كنت نغسل ونحدد ونوكل ونشمل ههههه
سندس ** هههههه
ساره ** ايه هذا خوك وعادي اديريله الشئ هذا يفرح بيك بس تعبنه سندس / وبحتت فيها وكشخت
سندس / فهمت قصدها متبينيش ندخل في راجلها
آيه ** تعالن بنحكيلكن حاجه
ساره ** شن في مدخلتينا لدار ان شاء الله خير
آيه ** خير خير عيد ميلاد هند قريب ومخططه نديرلها حفله هك عائليه علي قدنا
سندس ** هههه حي يسمعك اوفي يقتلك يقولك حراااااام
آيه ** هههههه ايه يحكي فيها هك صوته يزلزل حرااااااام ههههه
ساره / انبحت فيها كيف تحكي علي يوسف وكيف يتغير وجها لما اتقول اسمه تي اعيونها يريحن اقلوب اقلوب
ركبت شقتي حطيت مريم في سريرها جا يوسف
يوسف / خشيت القيتها مقعمزه والشقه مظلمه
شعلت الضئ
يوسف ** خير اعيوني / جيت قعمزت جنبها
ساره ** خير .كنك ماقلتلي اغسليلي دبشي انا عمري قلت واعر منقدرش يعني تتصرف من راسك وتحرجني قدام امك وخواتك وفلونه شن يقولوا عليا تو بايره مش قادره تمسك حوشها وتهتم بيه راجلها يدور في من يغسله دبشه
يوسف ** سرو انا نبيش انتعبك نبي انريحك انت مزلتي مريضه
ساره ** انا قتلك مريضه انا طلبت منك تريحني انا غاويه تعب يااخي تعبني بس تنزل تقول للفرخه هذك تغسلك دبشك هذي منرضاهاش
يوسف ** ساره اوزني كلامه شن فرخه هذي بعدين هذا مش اسلوب الي تحكي بيه تحركي في ايديك قريب تضربيني
ساره ** حرقتلي دمي انت وياها طول النهار اوفي واوفي تي عارفه تفاصيلك اكتر مني
وانت طول النهار فلونه وفلونه كان الحكايه هك طلقني وتزوجها
يوسف ** تي لا انت زودتها انا مش هنرد عليك عارف نفسيتك تاعبه بس كلامك هذا مش ناسيه تعلمي اسلوب الحديث
ساره ** ايه انا مريضه نفسا صح كلامك يايوسف وبعدين اسلوب الحديث خليته لك ياشيخ
مش عارفه علي من تكذب تي كيف شيخ وانت طول النهار تضاحك معاها مش حرام هكي حرام تقابلها لابال تهدرز وتبصر
يوسف ** سااااااااره
ساره ** اضربني فش تراجي
يوسف / مسحت لحيتي بيديا ** استغفر الله لاحول ولا قوة الا بالله مش هنرد عليك انت نفسيتك تاعبه بعد اجيابك وانا عاذرك /  خشيت لدار غيرت 

ورقدت
ساره / خش رقد اشويه ولحقته حطيت مريم في سريرها جنبي ورقدت
في نص الليل ناضت مريم اتعيط قعدت انسكت فيها خلاص تعبتني عيت نعسانه نبي نرقد ويديا طاحن
يوسف / كنت راقد قلبت لجهه الاخره نسمع فيها اتقول
ساره ** ارقدي ياماما ساد عيت ارقدي حرام عليك
يوسف / فتحت اعيوني القيتها تبكي رفعت روحي
يوسف** هاتيها نسكتها انا
ساره / مرديتش كشخت ومسحت دموعي
يوسف ** قتلك هاتيها وانت ارقدي ساد قديش منك حتى انت
ساره / فك مني البنت وقعد يهز بيها انا تسطحت
يوسف / مربم رقدت حطيتها في سريرها بحتت في ساره راقده خشيت جنبها وحركتها بالشويه حطيتها علي صدري وقعدت نمسح علي شعرها
يوسف ** حبيبي انت اغلى انسانه عندي بعد امي انت حياتي مستحيل نبحت في غيرك انت ساره وحده بس في الدنيا مافيش منك اتنين انحبك انحبك انحبك يادنتي كلها
ساره / كنت نسمع فيه بس مغمضه اعيوني دايره روحي راقده
يوسف / حس بيها كأنها تكذب عليا ومش راقده
نبي نتاكد بعدتها عليا وقعمزت قعد نكح
ساره / شرق قعد يكح نطيت للمطبخ جبتله ميه
ساره ** هاك حبيبي اشرب بسم الله عليك تو كنت اكويس شن صار
يوسف / خديت لميه حطيتها علي جنب بحتت فيها عرفت انها كانت تسمع فيا
ساره ** اشرب اميه
يوسف ** لا خلاص عدت الشرقه
ساره **به / وخشيت بنرقد جا حضني
يوسف ** اسف عمري زعلتك اليوم بس حتى انت زودتها معاي
ساره / خشيت فصدره ** حتى انا اسفه بس تعبانه مضايقه من الحوش وضايق خاطري وانت را مزودها مع البنت هذي انا واثقه فيك بس مش واثقه فيها
يوسف ** حرام عليك سرو بعدين انا متزوج شن تبي فيا هي بنيه صغيره وسمحه والف من يتمناها وانا شين ههههنه
ساره / بعدت من عليه ** ها شفت عليش نحكي اصغيره وسمحه قال
يوسف ** ههههههههه نبصر اعيوني تعالي عندي