#عنيد_أسر_قلبي#فريده_احمد_فريد

17-(عليا امرأه جالبه المشاكل والدم)

((عشان تعرف انك مفتري وظالم سليم، احنا ورثنا، كان لابويا ورث ف البلد وعمامي وكلينه مننا وقبل ما عمي يموت اعترف واتنازل لنا عن حقنا كله))

((لا يا شيخه طب سألتي عمك بنفسه، يعني رحتوا البلد مع اخوكي وخدتوا حقكوا بنفسكوا))

((امممم.. لاء هوه سليم اللي راح استلم الميراث وهوه اللي خلص الاجراءات القانونيه، ايوا احنا عملنا له توكيل عشان ما نتبهدلش ف الموصلات والمحاكم وكده، طبعاً بما انه هوه الراجل))

((بطلي هري ع الفاضي بقي واعقليها، مين ف الزمن ده بيتنازل لاخوه عن بريزه مش جنيه، هوه عمك ده مالهوش زوجه مالوش ولاد اكيد ليه ولو مالوش اكيد ليه اخوات، تقدري تقوليلي ازاي قدر يقنع عياله واخواته انهم يتنازلوا عن ملايين عشانكم، فكري واعقلي الكلام وخلصيني بقي عندي شغل كتير))

((ويعني انا اللي صايعه، مانا كمان عندي شغل واهل زمانهم قالبين الدنيا عليا))

فكر للحظه وقال بجديه
((ما افتكرش انهم لاحظوا غيابك، يا وعد الناس الفقيره اللي زينا لما ربنا بيديهم بينسوا كل حاجه وكل حد ويعيشوا لنفسهم وبس، عندك عيلتي عمرنا ما افترقنا، واول ما حق جدي وابويا رجع... العيله كلها اتجننت وكل واحد شايف حياته وبس، مابقيناش نتجمع ع سفره واحده زي زمان، انا مابقتش اشوف امي غير كل فين وفين، تعرفي يا وعد وصل بينا الحال اننا نسينا ااقرب الناس لينا اخويا قالي ان امي من كام يوم سألت عن خالتي غفران، هيه متجوزه او كانت متجوزه رجل اعمال كبير اوي اسمه فهد الحوت، عرفوا بالصدفه ان جوزها ده طلقها ورماها ف الشارع امي اتجننت ع اختها و راحت سألت عنها الحكومه وف المستشفيات حتي المشارح مالقتهاش، بس كام يوم وبس ورجعت امي لحياتها ونسيت اختها الوحيده، شفتي الفلوس بتعمل ف الناس ايه))

ردت هيه الاخري بتوهان
((عارفه الكلام ده كويس، انا اعز صحابي راحت مني بسبب الفلوس وده السبب اني كنت ف القريه عندكم مش لمجرد الفسحه زي ما انت فاكر))

نظر لها بتمعن وقال
((قصدك ايه))

((فاكر سمير العناني اللي طلبت منك تعرفني عليه، اهوه الراجل ده اللي ورا اختفاءها، يعني بيقولوا انه بيخطف البنات ويتاجر فيهم))

قال بملل وسخريه
((لا يا شيخه، ليه انتي فاكره ان كل راجل غني، يبقي زي اخوكي حرامي او جاب فلوسه من الشمال، الراجل اللي بتتهميه ده يبقي من اغني عائلات  اسكندرية، وطول عمرهم شغالين ف السوق وعمر ما حد سمع عنهم كلمه شمال هتيجي حته عيله زيك بتاعه امبارح تطلعه تاجر عبيد ولا من بتوع تجاره الاعضاء، بطلي هبل وافترا شويه ولا عايزه تعملي لنفسك سيط ع حس الناس دي))

نظرت له بتعب وقالت
((انا  مش زيك يابن الكيال، برمي التهم ع الناس الشريفه، الراجل ده انا براقبه من ست شهور، وعرفت انه بيروح الاماكن الفخمه يصطاد منهم البنات الطموحه اللي نفسهم يسافروا بره، اللي عرفته انه بيختار ناس معينه و يشحنهم ع بلاد بره ويقبض تمنهم، وبره بقي بيتاجروا فيهم او يأخدوا اعضاءهم او يشغلوهم ف الدعاره غصب عنهم، ايه عمرك ما سمعت عن ناس زي دي))