I ADORE YOU. (COMPLETED)

Chapter-19

(Unicode)

မွေးနေ့ရက်မတိုင်မှီ တမှူး အတော်လေး အလုပ်ရှုပ်နေရသည်။ အဟာရအလှူအတွက် ဆေးရုံမှ တာဝန်ရှိသူများထံ ကြိုတင်အကြောင်းကြား ခွင့်တောင်းရသည်။ ထို့ကြောင့် ပထမဦးစွာ ဆေးရုံကို တစ်ခါသွားရသေးသည်။ လူအရေအတွက်နှင့် ခန့်မှန်းမှာရမည်ဖြစ်သောကြောင့် ကိုယ်လှူမည့် ဌာနရှိလူစာရင်းကို မှန်းခြေတောင်းရသည်။ ဌာနပေါင်းများစွာ ရှိသည့်အတွက် တစ်ဆေးရုံလုံးလှူဖို့ရာလည်း မတတ်နိုင်သောကြောင့် ဆေးရုံရှိ တာဝန်ရှိသူများက အကြံပေးသော ပို၍ လိုအပ်နိုင်သည့် ဌာနများသို့သာ လှူဒါန်းဖြစ်သည်။ အရင်တစ်ခါ တမှူးတို့သွားခဲ့သော မီးယပ်ဌာနကတော့ မပါမဖြစ်ပင်။

ထို့နောက် အရင်လို ထမင်းဘူးပဲ လှူမည်ဖြစ်ပြီး ကျန်းမာရေးနှင့် ညီညွှတ်သည့် အဟာရဖြစ်ဖို့လည်း စီစဥ်ရသည်။ စီနီယာ့သူငယ်ချင်း အော်ဒါမှာခဲ့သည့်ဆိုင်မှာပဲ စီနီယာ့အကူအညီဖြင့် အော်ဒါအပ်ရသည်။

ဆေးရုံသွားရ...ဆိုင်သွားရနှင့် ကြားထဲရှိ ကျောင်းပိတ်ရက်တို့ကို တမှူးတစ်ယောက်အလုပ်ရှုပ်စွာ ကုန်ဆုံးရသည်။ စီနီယာကတော့ တမှူးနောက် တကောက်ကောက်လိုက်ပေးသည်။ တကောက်ကောက်လိုက်သည်ဆိုတာထက် စီနီယာကသာ ဦးဆောင်၍ စီစဥ်သွားသည်ဆို ပိုမှန်မည်။ နယုန်တို့ကတော့ မွေးနေ့တွင်မှ ဆေးရုံလိုက်ကြပေမည်။

မွေးနေ့ရောက်ဖို့ သုံးရက်ခန့်အလိုတွင်တော့ အားလုံးအသင့်ဖြစ်နေပြီဟုဆိုနိုင်ပေမည်။ မွေးနေ့က တနင်္လါနေ့ကျသဖြင့် ထိုနေ့တော့ သူတို့တစ်အုပ်လုံး ကျောင်းပျက်ရမည်ပင်။ လုပ်အားပေးဖို့ရန်အတွက်လည်း အတန်းထဲမှ သူငယ်ချင်းအချို့နှင့် စီနီယာ့သူငယ်ချင်းအချို့က လိုက်ပေးမည်ဟုဆိုသည်။

ယခုမွေးနေ့အတွက် တမှူး အတော်လေး စိတ်လှုပ်ရှားမိသည်။ အမြဲတမ်း သူငယ်ချင်းများ၊ မိသားစုများနှင့်လောက်သာ မသိမသာကုန်ဆုံးခဲ့ရပြီး ဒီနှစ်တွင်တော့ အရမ်းမွန်မြတ်သည့်အလှူတစ်ခုပြုလုပ်ရတော့မည်ဟူ၍ ညတိုင်းကြိုတွေးပြီး ကြည်နူးရသည်။ ပို၍ ကြည်နူးရသည်က စီနီယာနှင့် Jayy တမှူးဘဝထဲ ဝင်ရောက်လာခြင်းလည်း ပါမည်ထင်သည်။