البارت 33
ضحيه لمن لايرحم
بقلَ زهراء الحسناوي
،،،،،،،،،
اعتذر ع التاخير بس والله هاي رجعتي من الدكتور جبت بنتي حتى ماعدلت البارت ولاراجعت
من يصير عندي مجال ارتبه
،،،،،،،،،،،،،
جبت كلشي.. وعفت كلشي
ومدري اشلون اجيت امشي
اجيتك ردت اگلك شوف
ردنه نعوف كلشي وماگدرنه نعوف
كون تشوف حالي شگد الك ملهوف؟؟
جبت كلشي اليسولف بيك
خيالي وصحوتي وطيوف
كون تشوف
بشفافي الحزن ماخلئ بسمه تعيش
وكلمن گمت ابوسه بخده اطبع اوف
كون تشوف
خلصت الوجوه وشفت كل الناس
كلها وجوه غربه ولاوجه معروف
وكون تشوف،، شخله بيه الخوف؟؟
مثل حلة مدارس روحي احسها اطفال
حلت وتركتني وباقي بس صفوف
وكون الگاك وابجيلك
واسوي خدودي سبوره ودمعتي حروف
وكون الگاك واحجيلك
بكتاب السنين انحذف كلشي الجان
بس اسمك لگيته الباقي مامحذوف 💔💔
،،،،،،،
غصون،، احس جسمي يرجف من سمعت صوت سيارته
عمتي فتحت الباب تريد تروح تشوفه وساره
دنگت همستلي
ساره،، اليوم اخوي يفصخج تفصيخ
عود هم اشردي
غصون،، باب الغرفه مفتوح الدرج صاير گدامي سمعت صوت حجي عالي وراها عمتي صاحت بصوت رج البيت احس گلبي وگع من الهبطه
شفته صعد الدرج يركض سواه شبختين ساره تصيح شكووو
وهو يصعد الدرج صااح بصوت عالي
ذياب،، يااالواااااء يااخووويه
غصون،، عمتي گعدت بالگاع ادگ على راسها واني وساره واگفين مانفهم شكو
ساره تسال امها بس عمتي ساكته المره تلوب وتضرب على راسها
ام ولواء،، ولج ابن عمج مفجووره علي عبووه
غصون،، عرفته رجل زينب گعدت رجليه ماتشيلني الكل يبجي نزل ذياب يركض
عمتي وكفته كالتله انتضرني اروح وياك
حاجاها وهو يحط الفلوس بالمحفضه
ذياب،، ييمه طاللع بوجهي للمستشفئ اجرري سيااره وروحييي
غصون،،عافنه وطلع يركض ماسمعنه غير شخطت السياره
ام ذياب ماتگدر تكوم وساره اتصلت برجلها
يجي ياخذها هي وعمتي يفزعن العمامها
راحت ساره جابت عبايه وجواريب العمتي خطيه وهي گاعده لبستهن مالها روح تنهض
ربع ساعه واجه رجل ساره اخذهن قفلت الباب وراهن
وكعدت ابجي على زينب الله يساعدها شنو حالها هسه؟؟
وخاصتا سمعت بيها حامل من عمتي وانوب اجتها مصيبه ثانيه
لليل ماكو احد بس اني وخايفه اتلفت منا وارد منا
تالي للساعه 12بليل رجعت ساره من عمامها امها موصيتها تجي تبات يمي ورجلها جابها واجه
دخلت للبيت ياالله راح
اجت ساره عيونها وارمه گالت خابرو الحمدالله طالع من العمليات بس وضعه تعبان هواي متاذي بس شي على شي الحمدالله من طلع عايش
لوتشوفين بنت عمج بجت النسوان كلها عليها
ترفس مثل طير المذبوح گاعده بره بالحديقه تبجي
مبينه تحبه من حرگه گلبها الله يشفي ويرده سالم الها
خمس ايام اني ليل نهار اندعي الله يشفي ويرده الزينب ويبرد گلبها على رجلها
عمتي يوميه تروح يمهم من الصبح ماترجع غير بليل اسمع منها انو لواء زين وعده مرحلة الخطر
بيوم الخامس بليل تقريبا الساعه ب 11ونص دگ موبايلي رفعته شفت نفس الرقم
گلت يمكن هاي زنوبه تريد تشكيلي الصار وياها
رفعت الخط جاوبت اصيح الوو ماكو جواب
دقيقه كامله بس خط مفتوح ومحد يحجي
تالي سدو بوجهي
رجع دك التلفون رفعته رقم ذياب احس گلبي صار يدگ سريع اول مافتحت خط گال
ذياب،، ويامن جنتي مشغول؟؟
غصون،، من غبائي وبدون تفكير گتله امي جانت تتصل
ذياب،، امج بهذا الوقت؟؟
غصون،، اي سالتني ع على رجل زينب
صدگ هو اشلون صار؟؟
ذياب،، زين الحمدالله وضعه تمام انتي اشلونج؟؟
غصون،، زينه
ذياب،، مشتاقلج
غصون،، احس دگات گلبي صارن الف وماادري ليش يمكن لان موگدام عيني اتشجعت غمضت عيوني وجاوبته اني مشتاقتلك اكثر
ذياب،، اشتعلوو ولج غصون خاف مصخنه وتهذين يمعوده
غصون،، ابتسمت همست لا مابيه شي
جر حسره طويله احسها من روحه
حجه بصوت ناصي
ذياب،، چا ليش شالعه گلبي؟؟
غصون،، كانه نسينه نور ونسينه ارواحنه ونسينه الدنيا ومابيها
ولاول مره نحجي بتفاهم وبكل حب
اندمجت وياه واني اسمع اجمل كلام
تالي زمخ بيه اخر شي
ذياب،، وولج الفاهيه لاتورطيني بهليل ومايمي بس المصاويب والمكاسير وين انطي وجهي بهليل؟؟
تره وعلي هسه انگر سلف واجيج وعود هم فكي حلگج وامنعيني حتى انعل والديج
غصون،، صح صوتي يرجف خايفه بس گتله تعال وتدلل لان حسيت هلمره مااريد اخسره
ومااريد اخسر عمتي لان حلفت تروح لبوي
ذياب،، متاكده انتي غصون؟؟
ولج راح اتخبل والله اول تالي هيج تحجين؟؟
غصون،، ردت اجاوب تالي سمعت صوت رجال يمه گال اجه الطبيب روحي هسه
ولاتنامين بس يطلع الدكتور اخابرج
وفعلا نص ساعه ورجع اتصل گال اني مبطوح بالسياره
تحسه ملهوف كل شويه وگال كون يمي هسه
من ثولي گتله شتسوي؟؟
ذياب،، الفاهيه تگول شتسوي غير انيمج بحضيني للصبح
غصون،، جريت الحجاب غطيت عيوني احس وجهي اشتعل نار
بس احس اريد اسمع بعد گتله وشعندي نايمه يمك؟؟
ذياب،، والله محد يلومني من اسميج دهن الثول
مرتي ونايمه بحضني شتتوقعين اسوي؟؟
غصون،، اول مره اسمع هيج حجي صح جنت كارهته لان ساره شرحتلي شنو يصير بين المتزوجين رغم خوفي ورجفتي عجبني اسمع اكثر
نزل بالحجي وتعمق وكل كلمه يحجيها اصخن ويتخربط وضعي يريدني احجي ساكته مااگدر افتح حلگي اخر شي حجاله حجايه شكبرها من خوفي سديت بوجها الخط وشمرت الموبايل اباوع اديه يرجفن وجسمي يرعش مثل السعفه
بگلبي گلت هذا حجي وهيج اتخربطت جا اذا اجه يمي شراح يصير؟؟
مرتين رجع اتصل ماجاوبت اخر شي دزلي رساله
ذياب،، خل اجي واني اعلمج
غصون،، للصبح مانمت ثاني يوم امشي مدوهنه الزم الگلاص يوگع من ايدي اشيل شغله توگع من ايدي
من اذكر كلامه وحدي اعصابي تصير ترجف ومااسيطر على رجفه ايدي
عمتي كل شويه تسالني ياربي دخيلك شبيج اليوم تفلتين؟؟
اجاوبها مابيه شي
للضهر رجع الرقم يتصل اجاوب ماكو احد يحجي
حسيت هاي موزينب لان لو زينب جان حجت ليش بس تتصل وماتجاوب
تالي انطيت رفض مره مرتين حذفت الرقم
وخليت الموبايل صامت
يوميه الگه مكالمات فائته لان مخليته صامت والمكالمات من نفس الرقم حتى مرات الگه مكالمه لذياب من ارجع اتصل بي يسالني ليش ماجاوبتي اكله الموبايل بالغرفه واني بالمطبخ وماسمعته
تسع ايام اني ماشايفه ذياب والرقم خبلني
كلساع يتصل ومااجاوب
من طلعو لواء من المستشفى ذياب رجع للبيت بس سلم بدل سبح ورجع يم لواء مبين حتى وجها تعبان من السهر يومين هو بايت يمه مارجع
عمتي بذني اليومين شجعتني گالت باجر عگبه من يجي ذياب احجي وياه وانتي هم لاتصدي من يتقربلج وبلكت الله تفض سالفتكم
بيوم الثالث من الصبح راح للدوام لان طالب اجازه طول هاي الفتره مارجع غير للضهر اول مارجع نام بدون غده العصر گعد بسرعه سبح بدل وطلع گال راح اخذ لواء للطبيب
قبل مايوصل الباب التفت گال اني اجيب عشه لاتسون شي
من راح دخلت للحمام سبحت وجهزت نفسي وهاي ثالث مره بس كل مره تصير عرضه بالسالفه مره اني اصد ومره تطلعنه سالفه صفح
تالي گلت مبينه اليوم مابيها مجال
طلعت من الغرفه مبدله وكاشخه ومكياج وترتيبات
تالي تفاجئت بوجود عذراء ونور
ماسلمت عليهن رحت يم عمتي
گاعده بغرفتها اجن ثنينهن گعدن بس مامرتاحه الوجودهن يباوعلي من جوه لجوه اني من اشوف نور احقد على ذياب
شويه واجه ذياب جايب عشه لااراديا گلبت خلقتي لان اشوفها تتشاقه وياه احس بروحي اغار علي
حاول يحجي وياي ماانطيته مجال مغندبه بوجها
عذراء ونور يتخنسن مدري شبيهن
نور اخذت موبايلها وطلعت گالت امي تتصل بيه
ذياب صعد الغرفته انتبهت عمتي لحگته وهي نادرا تصعد للطابق الثاني لان ماتگدر
انمغصت بطني وخفت اكيد راح تحجيله
تيهت دربي ولزمتني الخوفه والهبطه
عمتي نزلت اجت باوعتلي وضحكت مبينه تصخمت اليوم اني
بعدها نزل اجه للمطبخ شافني ابتسم وغمز
وكف يمي يغسل همس
ذياب،، وعلي احبج
غصون،، غير اريد اسيطر على اعصابي؟؟
مااگدر كلها ترجف
صبينه عشه وگعدنه كلنه نتعشه
گامت عذراء گالت اريد اروح للحمام
شويه وسمعت صوت موبايلي تفاجئت لان اني مخليته صامت وضامته بغرفتي
دخلت عذراء لازمه الجهاز بيدها
ذياب رفع راسه مضيگ عيونه
عذراء،، غصون موبايلج صارله ساعه اسمعه يرن
هذا رقم غريب يتصل
ذياب،، شو انطينيا
غصون،، راحت عذراء انطته لذياب
فتح خط وجاوب بكل هدوء عگد حواجبه يباوعلي
كانه جاي يسمع الطرف الثاني
ذياب،، المن طالب؟؟
غصون،، سكت ماحجه
ذياب،، لاغلطان
غصون،، سد الجهاز وحطه بصفه
اني اريد اندل حلگي تيهته من الخوف
اباوع نور وعذراء يتنادسن بيناتهن
ويباوعن لذياب وهو مدنگ ياكل بكل هدوء
سمعت صوت رساله اجت على موبايلي
عذراء،، منو هذا يدز رسائل؟؟
غصون،، جاوبها وهو مدنگ
ذياب،، من الشركه
غصون،، سكتت ماحجت تالي اخذ الموبايل وصعد الغرفته
اباوعلهن يحوصن اثنينهن شويه ونزل بيده السويج عيونه حمر دم
ذياب،، اذا تردن ترحن اني طالع اخذجن وياي
ام ذياب،، ماتاخذني بدربك تزتني يم خالتك مريضه
ذياب،، ماشي
غصون،، هنه لبسن عبيهن وطلعن كل مره يتعطلن يمنه لنص الليل ام ذياب يمكن متعمده تروح لختها حتى يفرغلنه البيت
هنه طلعن وراه وعمتي جرتني باستني وتوصيني صيري سباعيه وخل السالفه تخلص ولاتعترضين
دگ هورن يستعجلها عافتني وراحت
ركضت صعدت الغرفته فتحت الباب ادور ع الجهاز اريد اشوف شنو ذني الرسائل
شكد دورت مالگيت الموبايل
بداخلي گلت عليمن خايفه اذا مامسويه شي غلط
شو هو رقم غريب وحتى ماحجه وياي ولااني حجيت كل ضني جانت زينب
خل يجي وافهمه ماتستوجب اخاف
بس اكو احساس بداخلي ينبئني بالخطر
احساس يگلي راح يصير شي موزين
ثلث ارباع الساعه سمعت صوت سيارته من وحدي انهبطت ركضت دخلت غرفتي وسديت الباب
الساعه تقريبا 9ونص بليل من الخوف فرشت فراشي قبل مايجي بدقايق
بس من سمعت صوت سيارته بسرعه تمددت واتغطيت
دثرت حتى راسي معدتي خبطت ومغصتني
احس سالفه تقربه مني من صارت صدگ هم رجعت خفت
اسمع صوت خطواته قريبه ع الباب تملكني الشعور بالخوف اكثر واكثر
انفتح باب غرفتي وانسد
غمضت عيوني بقوه لان جاي احس بوجوده يمي گاعد
حجه بهدوء
ذياب،، ادري بيج گاعده اگعدي احجي وياج
غصون،، مابيها مجال للجذب مبين مكتشفني من رعشه جسمي من وره الغطه
رفعت الغطه وگعدت شفته گاعد يمي مايفصلنه شي
مگمبص على اطراف اصابع رجلي
بمجرد مارفعت عيني بعيني
احس خدي افتر من قوة ضربته
،،،،،،،،،،،،،،،،،،،،،،،،،،،
زينب،، شمرت الوجوه مال المخاد من ايدي ولحگته بسرعه
لگيته واگف بنص الغرفه وبيده الصونده
باوعت على نذيره خاتله وره امها صاحت بي ام لواء
ام لواء،، اكعد يمه عوف اختك
حسن،، خوه الخواها وخوه ضلوعها
اريد اشوفها الخبل شيسسووي
زينب،، اتقرب منها امه رفعت ايدها تحمي نذيره ومن فوگ راس ام لواء ضرب نذيره صونده على ضهرها لمن صاحت بعلو حسها
نذيره،، خبببل والله خبببل
اخذووو للمصح هذااا مسودن
حسن،، اسودنج ياالله ادخل للمصح بنت الكلللب
ام لواء،، يبوووو شيبتوني ولك اكعد ييمه
زينب،، خامل امه وجر نذيره لنص الغرفه
عمتي ماتگدر تتحرك وحدها ضلت تهمش وحسن عيد وجابه العباس النه لازمها من صدر ثوبها وبطرف الصونده يمسمس بيها على رجليها
من قوه الضربه وشوغه روحها تمد ايدها تريد تاخذ الصونده منه ماتكدر
وكل ماتمد ايدها تجيها ضربه على اصابعها
على صوت صريخ نذيره اجت غفران دفعتني وركضت تحمي امها
حسن طبگها فوگ نذيره خلاهن يتصارخن نفش شعرهن نفش والله اني محد يمي خفت
صاح،، محد يگدرررلجن؟؟ براابيييج
زينب،، نذيره،، تبجي التفتت ل امهااا الماتعرف شتسوي بس تصيح على حسن يعوفها هي وبتها
گالتلها يييمه وخررري هذا المخببل
حسن،، والله لنعل ابووج لابو امج ويااج
وعلي اسودنج اخللليج تحجين ويه روحج
مرره جبيرره راسج ابيض تنطگينن جااان استحيتتي
النهار كله متگابله ويااها عليمننن بوويه؟؟
كااتله رجلج؟؟؟
ام لواء،، يااااا ولك يمه جدك شله غرض تشتمه رجال بخيت ومييت؟؟
حسن،، كلش بخييت من ط... من البخت العنده خلفج وانتي خلفتي هااي الحيه امهااات السحووووره
رجال يكولون جااان سبع
خليتنه مطططي بسحورتجن
ام لواء،، دددخل يجي ابببوك وشووف شيسويلك
حسن،، كلش بي حضض راح يطهرنييي
خل يگدرلج اول شي وبعدين يحجي ويااي
زينب،، امه سكتت لان ينطيها الحجايه بعشره اباوع نذيره كفشتها صايره شكبرها وحسن يفتر بالغرفه مثل الاسد الحاصر فريسته
صاح
حسن،، ياابويه يااايابه هو كله من وره منهللل الدثووو جابج غضب على گلوبنه حطج اهنااا
حتى رجلج الله اخذه حتى يخلص منج
زينب،، سبحانك يارب الله سلط عليهن شخص منهن وبيهن حتى يعذبهن
مثل ماعذبني
حسن لعب بيهن طوبه گالهن وعلي افرغ الرشاشه براسها الاسمع صوتها
طلع وگف بالباب صاح
حسن،، خللل اسمع صوت وحده منجن برابببيج
باوعلي زمخ بيه
حسن،، وانتي الثانييه خل اشوفج غاسله شي بهااي الصونده انعنعج
زينب،، سوه حركه تضحك بوجها عود عصبي عافني وطلع صاحت ام لواء
ام لواء،، يغغضب الله يالفصلليه الگشررره
نذيره،، كله من ورااج انتي حشدتي عللينه
اني اعلمج والله ضامتلج ضمممه بنت الفگرررر
ام لواء،، علليمن هااي الطلابه؟؟
نذيره،، كتلها نضفي المظيف واغسلي المخاد
گامت تتعااير
زينب،، التفتتلي ام لواء
ام لواء،، من طبيتي بيتي لسه ماشفنه من ورااج غير الطلايب بومه فگر بنت الفگر
زينب،، خنگتني العبره تركتهن وطلعت رحت الغرفة لواء
سديت الباب وگعت دمعتي امسح وحده تنزل الثانيه
من شوكت الفقير يتعير؟؟
الفقر مو عيب بس العيب من تتكبر ع الفقير وانت حالك حالهم مخلوق من طين
العيب من تتباها بمالك وثروتك ع الفقير متناسي انو الله القادر على رزقك بهاي الثروه يگدر ياخذها منك برمشه عين ويمكن تكون حالتك اتعس من حالة الشخص العيرته بفقره
گعدت بمكاني واسمع جوشه ام لواء ماتركت كلمه ماحجتها
حطيت راسي على فراش لواء واني گاعده بالگاع
سرحت بتفكيري اگلب بصفحات الماضي بذاكرتي
اتذكر
كلام ابوي من جان احمد يتذمر من عيشتنه
يگله صح احنه فقراء بس نملك عزة نفس
وعزة النفس ماتنشرئ بالمال
اتذكر ايامي قبل ويه اهلي الله ياذيج الايام
مابيها لاغم ولاهم من دخلت هذا البيت احس روحي كبرت عشرين سنه لگدام
من تصبح لمن تمسي انت تسمع كلام يجرح ومجبور تسكت وتتعايش ويه وضعك
فزيت من صفنتي على صوت ام لواء تصيح اطلعي لاتختلين
مسحت دمعتي وطلعت وگفت بالباب گتلها ها عمه؟؟
ام لواء،، عمه اليعميج انشاءالله تكيفين ع الختله
امشي ولي سوي عشه ولاتنسين تغسلين الوجوه السويتيلج طلابه من وراهن
زينب،، عفتها ورحت للمطبخ طلعت علاگه لحم سويت تشريب
تركتها تفور ورحت للحمام اخذت الوجوه مال المخاد بيدي
اني جبت بس عشره وتركت الباقيات
حطيت العشره يمي وكعدت بالكاع اغسلهن بالطشت لان بيهن نقشه مال خيوط اذا انغسلن بالغساله يتكربسن وتخرب النقشه
ام لواء گالت اغسليهن بيدج وحده وحده
دنگت اغسل انفتح باب الحمام غفران بيدها الوجوه الباقيات شمرتهن على وجهي ترست بيهن الحمام
عافتني وراحت
كعدت اغسل ماخلصتهن اله حيلي مهدود
حطيت عشره بالطشت ورحت شريتهن
ورجعت سويتهن وجبات اشر بيهن لان ماينشالن وجبه وحده
صارت الساعه ب 6بليل رجع لواء من الدكتور
ذياب دخله للغرفه وگعد يعلمه على اوقات العلاج
حطيت الطشت بالگاع ورحت الواء اشوفه
دخل وراي حسن
حتى لو ضايجه من اشوف لواء گلبي يرتاح وابتسم تلقائيا
توني دخلت اجه وراي عمي سلم على لواء وساله عن الدكتور شنو گاله
لواء جاوبه ماگال شي وعمليتي زينه
اجت عمتي غفران تدفع بيها واثنينهن وجوهن مغندبه
ام لواء اذا ضايجه تبين من كلامها وتصرفاتها
عمي سالها شبيج حجيه شو اليوم منفوخه صاير شي؟؟
ام لواء،، اجرلي بيت وحدي اشرد بي من الطلايب تره لعبت روحيي
الشيخ منهل،، ياساتر يارب الضهر عفناج كلشي مابيج صاير شي؟؟
ام لواء،، اسال ابنك شسوه بااخيته وبنيتهااا؟؟
زينب،، عرفتها راح تحجي العمي عمي بسرعه سالها شبي حسن شمسوي؟؟
ام لواء،، حط اخيته وبتها وبسطهن بالصونده
حسن،، انعال على راس نذيره وراس بتها يستاهلن
شيخ منهل،، انجببب خل افهم
احجي ام لواء عليمن بسطهن؟؟
ام لواء،، نذيره طلبت من الفصليه تغسل المخاد
والفصليه كامت تتعاير لان اهواي
وحسن سمعهن يسولفن كوم على اختك وابسطها
فشله مو زغيرونه وتنطگ
انه مااضل اهنا خل البيت الكم وللفصليه انه اخذ بنتي واهج منكم
حسن،، خفتا وراحه الله ومحمد وعلي وياج
شيخ منهل،، حسسسسسن
حسن،، هو انته گدرتك بس على حسن ويم مرتك ونذيره رجل الدجاجه ماتحلهااا
زينب،، ماحسينه غير عمي طفر من مكانه نزع عگاله وطگ حسن على متنه بقوه
بس العجيب حسن ابد ماكام دنگ ماحجه
شيخ منهل،، ابن الكلللب انطيتك مجال اكوول خطيه مرريض تالي تفرعنتتت على امك واخواتك
لا عنددك جبير ولاعندك زغيير تحترمه بسس صوووجي انه ماشمرتك بمستشفى مال مخاابيل
زينب،، عمي راد يرجع يضرب حسن بس لواء وذياب منعو ذياب اخذ منه العگال
حسن نهض من مكانه راد يطلع لزم ايده ذياب
شيخ منهل،، روحيي صيحي ل امج
زينب،، راحت غفران تصيح ل امها دقايق واجت نذيره من شافت ابوها بجت
شيخ منهل،، خللل يمدد ايده ويطگج والله احط چيله براسه واخلص منه
نذيره،، بعدك عدل بويه وابنك طگني ومايحترمني
حسن،، احتررمي كبرتج وبعدين تعاي اطلبي الاحترام
زينب،، رجع عمي ضرب حسن راجدي جدام الكل
زادت العركه واصواتهم علت ذياب بنصهم حاجوز وعمي يريد يرجع يطگ حسن
حسن،، خااف عباالك خاايف منك
لا انه خاايف من الله يعاقبني الخاطررك
زينب،، من اشوف هيج مواقف لااراديا رجليه ترجف كلها تصيح واحد يذم واحد وذياب ولواء يحاولون يهدون عمي بس لواء لزم ايد احس اشرله بمعنى اسكت لاتحجي
ذياب دفع عمي طلعه بره وكال النذيره اخذي عمتي واطلعي
كلهم طلعو بقيت بس اني وياهم بالغرفه
ذياب،، حسن شنو سالفتك اكوو واحد يغلط على ابو؟؟
حسن،، ليش هم محسوب هذا ع الابهات؟؟
لواء،، كافي ولك لاتضل تجفص انجب واگعد مهما يكون هذا التحجي عنه ابووك
لو صاعد ضغطه وميت بسببك؟؟
حسن،، لتخااف العار مايموت
زينب،، ذياب،، ضحك نهض من مكانه گالهم اني رايح لان جايب عشه وياي بالسياره لهلي
راح يم حسن گاله فشله مهما يكون هذا ابوك وانت مامحترمه تغلط علي جدام الكل
حسن مدنگ ماحجه ذياب طلع وحسن نهض راد يطلع ماقبل لواء گاله اذا تطلع الحگگ واني مريض وتعبان
رغم كلام لواء حسن ماقبل راد يطلع گاله اريد اشرد من بيت الشياطين هذا اختنگت منه
لواء،، احلفك بروح العلويه تگعد
زينب،، احس حسن هدئ ضل صافن بوجه اخو
گعد تحسه حيله مهدود من سمع طاري علويته من لواء
دنگ وشبك ادي اثنينهن انتبهت الحسن دموعه تجري
لواء،، كافي خويه لوماادري بمعزتها عندك ماحلفتك بيها
حسن، والله مانايم براحه
من يوم الماتت لليوم محمل روحي ذنب موتها
تمنيت لاشفتها ولاعشگتها
تمنيت حتى لوحابها بس مامصارحها
جان ماصار الصار وجان هسه هي بين اهلها عايشه
لواء،، استغفر الله بعد اخوك
الموت حق تعددت الاسباب والموت واحد
تره انته جاي تكفر بهذا تفكيرك
نفرض ماانتقلت لدياله وماتت بنفس اليوم يم اهلها وبفراشها
هم راح تعاقب اهلك بسبب موتها؟؟
زينب،، حسن سكت ماحجه
لواء،، اخو زينب چتل اخوي احزام ضهري وعضيدي
اجي اني احمل اخته السبب؟؟
يصيرر؟؟
مايصير يابويه كلمن وحد يومه من الله عز وجل يبست ورقته وطاحت بس اخو زينب جان سبب
شوف شگد ناس جاي تموت؟؟
هذا بكهرباء وذاك غرگان وهذا سياره ضاربته وهذا مات چتل ذني كلهن اسباب بس المسبب الله سبحان وتعالى جعل نهاية هذا الشخص على ايد فلان
كافي بعد اخوك انساها وعيش حياتك صدگني اذا فتحت گلبك من جديد وحبيت راح يندمل جرحك وتنسئ
زينب،، حسن ابتسم بااستهزاء
حسن،، مااحس هذا ينبض الوحده من جديد
لواء،، ينبض ويحب بس انطي مجال النفسك
حسن،، لواء خلني ساكت رحمه لتراب حسين
ولك ذني شيااطين تعرف شنوو شياطين
شسوي بيهن گلبي بعده مامرتاح
حقك انت ماتدري بسوالفهن
لواء،، احجيلي انت
حسن،، تدري امك واختك شسون بعرس حسين؟؟
لواء،، شسون؟؟
نذيره گالت ل امي اكو مره تنطي بطله عن السحر نجيبها بيوم الحنه مال النسوان نرشها ع الگاعدات خاف اكو سحر وحده شايلته
بيومها سمعتهن گتلهن التجيب بطله احرگها والله
امك گالت هي بطله مقري عليها ايات قرائنيه واكو نسوان تكرهنا وماتريد تشوفنه مرتاحين تروح وحده منهن تشمرلنه عمل واطشرنه
تركتهن بعد ماحذرتهن انو مايجيبن شي
ثاني يوم اجت مره اني بالمظيف ومفتوح الشباك شفت المره انطت بطل النذيره بي ماي والماي عادي مثل ماينه ابيض
طفرت من مكاني ركضت النذيره كتلها موگلت ماكو ذني السوالف
اجت امك اخذت البطل رفعته بوجهي كالت شوف شبي؟؟
ماي عادي مقري علي ايات قرانيه وبي ياس
امك اكلتني هي واختك بلسانهن وقنعني هاي ماي مقري علي
تالي وره العرس بيومين فتحت كنتور امك اريد ارجع الشواجير مال الاسلاح
وجان اشوف نفس البطل بي ربع ماي بس ياخويه ماييش؟؟
فتحت القبق مالته ريحته مثل باب الگبر ماتنچهب
جايف ترس الغرفه ريحه تلعب النفس
اخذت البطل ورحت درت الماي بالمنهوله لان غبببي
مااخذته السيد يشوف شبي
والله امك واختك الكتلن حسين بسوالفهن
لان مايخافن الله عبالهن النسوان كلها مثلهن
زينب،، اني بس فاتحه حلگي وصافنه ولواء ابد ماحچه تالي رفع راسه گاله حرام تتهمهن انت تعرف السحر شنوو تره السحر موهين وياهو اليجي يسوي عمل
حسن،، المايخاف من الله كلشي يگدر يسوي
جهنم تريد حطب
وامك ونذيره وامثالهن اليسون اعمال ذني حطب للنار الله يلعنهن
لواء،، كافي بعد اخوك
صح السحر مذكور بالقران بس ماجاي اقتنع لان التحجي عنها امك وامي عقلي ماجاي يتقبل كلامك
اترك هذا الموضوع هسه وحلفتك بالغاليه مالك شغل بيهن
حسن،، الله كريم
زينب،، عافنه وطلع سديت الباب وگعدت يمه
دموعي تجري على حسن
لواء،، وانتي الثانيه شبيج؟؟
زينب،، خنگتني العبره گتله ابجي على حسن
لواء،، اشلون بويه اليوم اخلصها اسكت واحد ينعئ الثاني؟؟
تعاي يمي
زينب،، اتگربت منه جر ايدي حطها بحضنه
لواء،، زينب كل الحجا حسن يبقى بيناتنه
حسن لان ضايج منهم هيج يحجي
لان مستحيل امي تسوي اسحار ومن ذني السوالف
زينب،، هزيت راسي بمعنى اي
وثانيا شغله بيناتهم شعليه بيهم
بس بداخلي عرفت حسن كاره اهله مو بس بسبب موت العلويه وانما بسبب اعمالهن
حسن ابد مايخلي واحد يغسل ملابسه من اهله
ولا ياكل وياهم اكثر اكله يسوي بيده ومن اطبخ اني يصب النفسه قبل الكل ياخذه ويصعد الغرفته
يومين الوضع مخربط ونذيره ماتجي يمنه عود زعلانه بس رفل تجي يم بيبيتها تاخذها للحمام لو تنطيها اكل يعني قايمه بواجب ام لواء
يومين حسن ماله حس ماينزل يمنه ولواء مبين ضايج رغم الدكتور مانعه يشرب جكاير بس من حجاله حسن عن سالفه السحر لواء بس يحش بالجكاير
بيوم الثالث
شفت عمي دخل يم لواء اخذت صينيه بيها كوبين جاي ورحت يمهم
اول ماوصلت سمعت كلام عمي بدون وعي وگعت الصينيه من ايدي،،،،،، يييتبع